MATA 18

1Yɔ anbɔ a ya̧a̧gbun bɔ gedu walɛsɛrɛ wɔ hi zaa Yeesu ge hi warige

a bɔ gi gbɔɔl gi daarlɛl a Bɛt wáát du nɔ?

2Yeesu el waa za fɛŋ looge esig hi muutdu, 3dɔgɔ

a be raasin rɔbo gid nɛ zɛmr kpoos nɛ nɛ wɛɛn zul nɛ fɛŋ an waat gɛ, nɛ taa gulk a Bɛt wáát du. 4Za̧a̧ni wɛɛn zulɔ wɛɛdis an waa yɛrɛ, gi gbɔɔl gi daarlɛl a Bɛt wáát du. 5Wɛɛ za̧a̧nyɔ dag waa za an waa yɛrɛ lɛ a be dɔŋgo, dag beya hi zul be.

6Yɛrɛ za̧a̧nyɔ mat waat wɛrɛ zaaya̧ gbun yɔ gib ɗɔbsugo a hinha̧a̧l du, à hi loo nɛ naalnɔɔ hi wɔbsig a durk du hi bisig a mɛmbal du gi wɔrɔ yɔ bɛsig gi daarɔ. 7Ya̧a̧rhant gis waalɛ anyɔ gin hinwɔ gɔ hi matig dood a hinha̧a̧l du. Gi an hin dɔɔsiŋkya gi giro. Yɛrɛ ya̧a̧rhant gi a za̧a̧n yɔ woohin an dood zaadɛ hi simdɔɔ muulɔge.

8Naan mɔ gi matum hinha̧a̧l du, zaabe dɔɔ mɔ gi matum a hinha̧a̧l du, dɛ̧ɛ̧m mɔ bisige, an mɔ gun naan gbunu zaabe dɔɔ gbunu a za̧a̧tig rɔb du daarɔ, hi anyɔ gɔ mɔ kɔm naan eerɛ zaalab gɛ hi dɔɔ eerɛ mɔ yaay a laazɛŋk yɔ gi waak faa gedu. 9Gid lɔl mɔ gim matig a hinha̧a̧l du, wigumɔge mɔ bisige, an mɔ gul fɛŋki a za̧a̧tig rɔb bɔ gedu daarɔ, hi anyɔ gɔ mɔ kɔm hi lɔl eerɛ hi bisum a laazɛŋk du.

10Yeesu raahi

a oon zul nɛ an bɔnɛ see waat wɛrɛ zaaya̧ gbun an hintɔs. Ɔbe raasinɛ, waat wɔ Bɛt walɛsɛrɛ ya̧ hi waak erki a Baa be yɔ gi bɛtha gi muutdu hi gig seeko. [ 11Yɔ anbɔ, Za̧a̧n Waa bɔ zaa an gi ɓɛɛ dood wɔ hi wagɔ gi za̧a̧sihi. ] 12Nɛ mɔk ri? À za̧a̧n za gin tam yɔ̧ɔ̧lɔ nɔɔnɛ, zaa gbun gi wagɔ, taa an gi ɔɔ tam dumbili ɔnaangbun daatɔ ɔnaangbun wɔ a ga̧a̧t ha an gi re gi tɛbz gbun bɔ wag ya?

13Be raasin rɔbo, à za̧a̧n bɔ wɛɛ gi zol tam gbun bɔ wagɔ, yɔ dag hat dɔŋgɔ ge yɔ daar hatɔ bɔ dag a tam dumbili naanza daatɔ naanza wɔ hi wagdir nɛ gɛ hi dɔŋg gɛ. 14Gbunɔ be, Baa nɛ yɔ gi bɛtha hā̧ā̧ge an waat wɛrɛ zaaya̧ gbun gi wag gɛ. 15Yɛ̧ɛ̧ mɔ gi woo hinha̧a̧lɛ, rekum mɔ zɛŋge mɔ dɔksig a̧a̧bɔ yɔ woo nɛ watin hinɔ nɛ eerɛ; gi kɛmsumɔ, mɔ ɗaasig da̧a̧da̧.

16Gi kɛ̄msum dɔgl mɔ bɔ gɛ, loom doo za gbunu, zaabe eerɛ hi ɔks hi mɔya, an dood segyaadɛ wɔ eerɛ, hi mɔɔ du taarɛ nɛ ɔks ya̧a̧ nɛ gbunu an segyaadɛ a dɔgl yɔ gɔ gi booy hage sɛw. 17Gi kɛmsihi gɛ, rekum mɔ raas dood Bɛtfɔkya wɔ dɔglɔ; gi wɛɛ gi kɛms dood Bɛtfɔkya wɔ ya̧a̧ya̧ gɛ, gi ma an dooyɔ mɛ̄ɛ̄ Bɛt gɛ mɔ muutdu, zaabe an tooszekya mɔ muutdu.

18Be raasin rɔbo: hinyɔ gɔ nɛ wɔb hɛbtdi sɛw gi wɔy a bɛtha be. Hinyɔ gɔ nɛ pid a hɛbtdi sɛw gi pid a bɛtha be. 19Gbunɔ, be gisin raako, gid dood eerɛ a hɛbtdi a nɛ teesdu hi wɔ ya̧a̧ya̧ gbunu an hi zɔ̧ hinza a Bɛt ge, Baa be yɔ gi a bɛtha gi woosihi hinɔ. 20Yɔ anbɔ, lɛlyɔ dood eerɛ, zaa taarɛ hi mɔks ge a be nuŋg du, be gi hi teesdu.

21Yɔ anbɔ Piyɛr zaa a Yeesu ge warige

a Waar i, naabeza gi gɔsib hinha̧a̧lɛ, be bitsig dɔɔ baari? Gi tuur dɔɔ nɔɔn-er ya?

22Yeesu ta̧a̧ge

a ɛ̧-ɛ̧! Taa anbɔ, bé rāam a gi tuur dɔɔ nɔɔn-er kpɔd gɛ, mɔ́ bitsig gi tuur dɔɔ dumbili nɔɔn-erɛ dɔɔ nɔɔn-er be. 23Ya̧a̧nɛ hin yɔ riitin hi wáát yɔ bɛtha gɛrɛ: hinɔ riitin hi doo za waar yɔ 24gi baksig rɔɔsɔ hi gbaarɛ ɔ̧ɔ̧ wɔ gid hi kamsig gbaarɔ za yɔ gii gig fɔk tus duk uznɛɛrɛ kooblɛ. 25Wal bɔ taan tus an gi toos ɗɛntɔ bɔ tusɔ be; ɗɛntɔ bɔ raa a hi looge hi zebrig a doo za, hi wɛɛ hi zebr nistɔ hi waatɔ hi hinyɔ gin sɛw an tusɔ belk bɔ gi wɛɛzɔ.

26Gbaar bɔ zaa zagl a ɗɛntɔ bɔ gi muutdu zɔ̧g raage a baa, mɔmsibe, be ɗɛl be gaamɔ sɛw! 27Ɗɛntɔ bɔ seesig ya̧a̧rɔ ɔsig belkɔ bɔ wɛɛ ɔɔg rekɔ. 28Gbaar bɔ tuu rek dagtin hi naaza za gbaar yɔ gig tusbelk fɔk tus gaat gbunu. Wa̧a̧g durk du firige, raage a toosibe tus be yɔ be gim fɔko!

29Naaza bɔ zagl gi dɔɔ dɔŋdi zɔ̧ge a mɔmsibe, be ɗɛl be toosumɔ! 30Bɔrɔ iinɔ, wɛɛ looge yaage a luknɔ du gi oonik an gi toosig belkɔ bɔ. 31Yɔ naaza gbaarɛ wɔ hi gbɛn anbɔ kpoosya̧ gi ɗɔb ha̧a̧ltɔnɔ hi rek hi raas ɗɛntya̧ bɔ hinyɔ tal sɛw. 32Yɔ anbɔ gbaar bɔ ɗɛntɔ bɔ yaa doo za elz gbaar ha̧a̧l bɔ zaa raage a gbaarwal ha̧a̧l yɛrɛ, mɔ́ bɛr doo gɛ! Yɔ be wa̧a̧mɔ belk be bɔ dɔglɔ, mɔ zɔ̧be a ɔɔbe be tɛb be toosumɔ, be ɔsumɔ, be wɛɛ be raam a bɔmɔ toosibe, anyɔ mɔ zɔ̧be.

33Nɛ yɛrɛ bɛr nɛ an mɔɔ be, mɔ mɛɛs namɔza gbaar bɔ ya̧a̧r anyɔ bee be mɛɛs nɛ mɔɔ ya̧a̧r be mi? 34Yɔ hin nɔɔ ɗɛntɔ bɔ anbɔ looge gaag luknɔ-ookya wɔ naandu a luknɔ du gi tuur an gi toosig belk bɔ sɛw. 35Yeesu wɛɛ dɔg goks ha a nɛɛ hɛw, gid nɛ tā̧ā̧ an nɛ bits nanza hinha̧a̧lɔ hi kpoos nɛ sɛw gɛ, Baa be yɔ gi bɛtha gi woosin anbɔ.

Okuqokiwe okwamanje:

MATA 18: NTD

Qhakambisa

Dlulisela

Kopisha