KALATE METATAʼA 41
41
Biyeyem bi Faraoñ
(Met 40; Dn 2:1 a 3:31; 4:34; Miny 3:20)
1Mvuse mimbu mimbaé, Faraoñ a nga yeme biyeyem: A mbe a tele e fefele beta ôsôé. 2Abeñe beyale benyaʼa zamgbwal be too mevem be nga vame beta ôsôé a taté na ba di élobé. 3Wôna benyaʼa bevok zamgbwa, abé a minkôt, be nga vame beta ôsôé, e mvuse ba be mbe mevem, a tebe mefefele map abôñ ôsôé. 4Ane beyale benyak be mbe abé a minkôt be nga di ba zamgbwal be mbe abeñ a mevem. E nde Faraoñ a nga vee ôyo. 5A nga beta ke ôyo a yeme biyeyeme bi baa: 6Abeñ a mindu mi fône zamgbwal mi too atine da wôna fône zamgbwa, minkôt a ndiʼan amu évuñulu ja so jôp da tôô, je ke é nga vame mvuse jap. 7Ane fôn é mbe minkôt é nga mine nyô é mbe mindu. A Faraoñ a nga vee. Biyeyeme biame le.
8Mametyé, nsisime Faraoñ ô nga bili éndeñelaʼa, a nga loone bebo majik béé a beyeme mam bese yʼEjipte. Faraoñ a nga kañete be biyeyeme bié. Ve môt éziñ a nji bo ngule ya liti Faraoñ atinane yʼété. 9Eyoñe te évete menyu é nga nyoñe nkobô a jô Faraoñ na: Ma zu tote den ôsimesane ya ékobe jam. 10Faraoñ a nga wôʼô bebo bisaé bé ôlun, a a nga futi ma mimbôk e ndaa évete bebaʼale, bia évete ñyame belet. 11Bia nye bi nga yeme biyeyem alu da, môt ase biyeyem be ne nguleya yem atinan. 12Bia be ésoé mon Hébre bi mbe valé a too ôlo évete bebaʼale. Bi nga kañete nye bie a nye ke a nga liti bia atinane ya biyeyeme biangan; a nga kate môt ase atinane ya biyeyeme bié. 13Mam me nga kui foʼo vʼane a nga kate bia: Faraoñ a nga bulane ma éto jam, a a nga tyelé môte mboʼo élé.
14Faraoñ a nga bo na be loone Yôsep. Ane be nga bo na a kui mimbôk avôl avôl. A nga tyembane nlô, a tyendé mengômesan a ke e be Faraoñ. 15Faraoñ a nga jô Yôsep na: Me nga yeme biyeyem. Teke môt a ne nguleya ve atinane yʼété, ve me nga wôʼô na ô ne nguleya kat atinane ya biyeyem ba kate wo. 16Yôsep a nga jô Faraoñ na: Saa ke ma! Zambe nye a ye ve Faraoñ éyalane atinan da yian.
17Faraoñ nye Yôsep na: E biyeyeme biam été me nga tele kindiʼi beta ôsôé. 18Beyale benyaʼa zamgbwal be too mevem a abeñe ya yen, be nga vame beta ôsôé a taté na ba di bilok élobé. 19Wôna beyale benyaʼa bevok zamgbwal be nga vame mvuse jap be too awulewula, be yenéʼé abé a minkôt; me ngenane te yene befe be too abé avale te Ejipte ése été. 20Beyale benyaʼa be mbe awulewula a abé be nga di beyale benyaʼa zamgbwal be mbe avem. 21Be nga nyiin e mimfeʼe mebume miap, be too teke ayemé na be nga nyiin été; be yenéʼé abé vʼane ôsusua. Ane me nga vee ôyo. 22Me nga beta fe yene biyeyeme na: Fône zamgbwal é too mindu a abeñ é too atine fône da. 23Wôna fône zamgbwa é too kpwandé, mboʼon a ndiʼan amu évuñulu ya jôp da tôô é nga vame mvuse jap. 24Mimboʼone mi fôn mi nga mine nyô é mbe abeñ. Me nga kate de bebo majik bam, ve teke môt a nga kate ma atinane yʼété.
25Yôsep a nga jô Faraoñ na: Biyeyeme bi Faraoñ bi ne jôme jia a avale da; Zambe a liti Faraoñ jam a ye bo. 26Beyale benyaʼa zamgbwa be ne abeñ be ne mimbu zamgbwa; fône zamgbwal é ne abeñ é ne fe mimbu zamgbwal; avale biyeyeme da. 27Beyale benyaʼa zamgbwal be ne awulewula a abé be nga vame mvuse ba ya ôsu, be ne mimbu zamgbwa; a fône zamgbwa é ne bindañ ndiʼan amu évuñulu ya jôb da tôô, ja ye bo mfumbale zaé mimbu zamgbwal. 28Ajô te, avale me ndôme mane jô, Zambe a litiya Faraoñ, jam a ye bo. 29Tame yene na beta afok a ye bo e si yʼEjipte ése tañe mimbu zamgbwa. 30Mfumbale zaé a ye tôñe mie tañe mimbu zamgbwal. E si ése yʼEjipte, ba ye vuan afoʼo te ése; mfumbale zaé a ye bo si yʼEjipte zezé jôm. 31Mvus éte ba ye bo te fe nguleya yemelane jôm éziñ yʼafok e si yʼEjipte amu mfumbale zaé a ye bo teke ajibi. 32Nge biyeyem bi nga baʼalane biyoñe bibaé be Faraoñ, ndeme na Zambe a tyiʼiya jame te na é boban a na Zambe a ye bo avôle ya bo de. 33Eyoñe ji Faraoñ a ntoo ve yene môt a ne atyeñ a Fek a telé nye si yʼEjipte. 34Faraoñ a fôʼôsaʼan a telé bebo bisaé e si asu ya nyoñe ngabe tane nkôane bidi yʼEjipte, tañe mimbu mi afok zamgbwal. 35A kôʼane bidi bise ya mbamba mimbu zamgbwale mia zu; a boʼok mevôm ba naane fôn a bidi e bitison, bi too éjôé Faraoñ si, a émien nye a baʼaleʼe bie. 36Bidi bite bia ye bo mbaʼalan asu si, mfaʼa mimbu mi mfumbale zaé zamgbwal mia ye bo e si yʼEjipte, nalé ate si ja ye bo te diʼiban a mfumbale zaé.
Yôsep a tobane minisi
(Sam 105:17-22; Mm 7:9-10; Met 45:4-8; Fil 2:9-11)
37Faraoñ a nga wôʼô nkobô te mvaé; 38a Faraoñ a nga jô be na: Ye mi ne nguleya yene môt a ne aval ane môte nyô, nyô Nsisime Zambe ô too be nye? 39Faraoñ a nga jô Yôsep na: Ataté éyoñe Zambe a te liti wo mam mese ma, môt a ne atyeñ a ñyeman ane wo a nji bo. 40Wo wo ye bo nlô ya nda jam, a bôte bame bese ba ye ke mebendé môé si. Eto njô bôt étam e nje ja ye bete ma yôp be wo. 41Faraoñ a nga jô Yôsep na: Yenek, ma ve wo éjôé Ejipte ése. 42Faraoñ a nga vaa élondo jé wo wé a jalé je e wo Yôsep; a nga jalé nye mengômesan me ndombo ja dañ abeñ a jalé nye nsanga or e tyiñ . 43A nga bo nye na a bet e nyanga metôa é mbe é tôñe énjé mvus be yôtaʼan ôsu vié na: Kutane meboñe si! Avale te e nde Faraoñ a nga ve nye éjôé Ejipte ése. 44Faraoñ a nga jô Yôsep na: Me ne a me ngenane Faraoñ! Ve da Ejipte ése, teke môt a ye fôʼé mon ônyu teke nkañesane wôé. 45Faraoñ a nga yôlé Yôsep jôé na: Tyafnat-Paénéa. A nga luʼu nye minga jôé na: Asnat, ngone Pôtiféra, ntuni ya On. Yôsep a kui atan asu ya nyoñe ntum éjôé Ejipte. 46Yôsep a mbe mimbu mewôm mela éyoñ a nga zu tebe asu Faraoñ, njô bôte yʼEjipte; a nga kôlô be Faraoñ, a bômane si ése yʼEjipte.
47E nté mimbu mefoʼo zamgbwal, si é nga saé abui. 48Yôsep a nga kôane bidi bise ya mimbu zamgbwale mite e si yʼEjipte; a nga futi bidi e bitison, a futiʼi e tison ése, bidi ya mefup ma bôman afôla te. 49Yôsep a nga kôane fôn ane nseleʼe ya mañ; é mbe étua abui teke fe alañé, amu be nji fe bo nguleya lañe je.
Esaé Yôsep Ejipte
(Met 48; 13–26)
50Te na mbu mfumbale zaé ôsu ô kui, bobefame bebaé be nga bialé Yôsep e be Asnat, ngone Pôtiféra, ntuni ya On. 51Yôsep a nga yôlé ntôle na: Manasé amu a nga jô na: Zambe a boya na me vuane minjuʼu miam mise a ndaa ésaa wom. 52A nga yôlé ébatane jôé na: Efrayim, amu a nga jô na: Zambe a boya ma na me fôé e si ya ôsame wom.
53Mimbu mefoʼo zamgbwale ya Ejipte mi nga man, 54a mimbu zamgbwale mi mfumbale zaé mi nga taté na mia zu, avale Yôsep a nga kate de foé. Mfumbale zaé a mbe mesi mese; ve bidi bi mbe e si ése yʼEjipte. 55Eyoñe si yʼEjipte ése fe é nga kui zaé, bôt be nga yône be Faraoñ asu ya bi bidi. Faraoñ a nga jô bôte bese yʼEjipte na: Kela koon Yôsep a boʼone jam a ye jô mia. 56Mfumbale zaé a mbe si ése. Yôsep a nga yooé mevôm mese be nga baʼale bidi a kuane bôte yʼEjipte fôn. Mfumbale zaé a nga dañe dañe bo ngu e si yʼEjipte. 57Bôt be nga so mesi mese a zu Ejipte asu ya kuse fôn e be Yôsep; amu mfumbale zaé a nga suʼulane bo ngu e mesi mese.
Okuqokiwe okwamanje:
KALATE METATAʼA 41: BULU09
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© LʼAlliance Biblique du Cameroun, 2009