Oosana 43
43
Yooseefaana afasausamara Beensaminna uru afiqee kaifaa Isipa maqa maaqai ooqu fu ufafa.
1Kannaana maqa maaqaki aandaroo firaafa narinoo mandaika uqanna inau. 2Isipa maqa maaqai feefaurummamaree murusoo naranna Yakooboona aiku asauku nama taikasoofanoo Yakooboofa narí faiqi namu qimanniminau. Kaifaa ooquree kaqikaa narana feefaurumma murusaifaqa naa.
3Miqi qimasoofanoo Yudafa qinau. Mindaraa uriqararafa maasa oori runusee qimaqimifaqa iriqa. Innee inneeqa nikaqa sia afiqee qumiqa sia qini qifusaa nifaranoo fee qinoo. 4Anee qini qikaqara eedoo qinaqa maasa afiqee ooquree ani narana feefaurianaura. 5Anee sia eedoo qinanoo maasa qikaqa sia ooqu finaqa sia amana fifau ooqu fuanaura. Mi maqannaasa uriqararafa qinoo inni nikaqa sia quminaqa sia qini qifusaa nifaranoo fee qinoo. 6Yakooboofa mi ufana iriseenoo qinau. Innee nanaree moomoo ummaara qini qimidee mi uriqararana qimamiqa maasa qikaqa maridanoo fee qifee.
7Misa iriseeqa kafaa qimamiqa qiqau. Mi uriqararafa maasara faqa maasa faiqi aanaaseera faqa iréenoo. Inni nikoofa kaqi fee maridanoo fee qinoo. Kafaa inni nikaqa moo maridanoo fee qinoo. Miqi qimasee maasa iraifaqa qimamiqa. Maasa naqaa fee masee maasa qikaqa afiqee qumuaqee qianinnanara irianauree. Sia maasa iriqa.
8Miqi qimasee Yudafa narí akoona maaqi qimasee qimaminau. Qipoo anee maasa qikaqa qini qisaukuki quqasainaqa maasa doo findifi ooqu fuanauranoo. Miqinaqa maasa sia daara rainaqa kuqunauranoo. 9Qinee qeeqa marirana mina amaaqa maqaanaura. Anee minara qini kikiaqa usua. Qinee sia afiqee andeeqasee anee iannannai uriqa qinee ani nifairirana maraanaura. 10Maasa sia ani faqa kisaaqasaa ufa qifau, maasa amana qaara kari ooquree ururee unaiqini.
11Miqi qufanoo misa nikoofa qimanniminau. Doo amana inneeqa miqiqa miqiaqa. Innee maa maqa maaqana kinaana amiqira ainaina inneeqa uqaki rumammareeqa kaqi nimi maria ainainnara foora muqu mi maqannaasa uriqararana amiaqa. Saqari anoona qoodaa faqa ookasaasa anoona qoodaa faqa adiafaa imari saqari qaqamana anoona faqa oofauna fooqaa ira ainaina anoona faqa kasa fooqaana anoona faqa maree ooqu fuaqa. 12Innee moomoo munnimma qaara kari afaqamaree ooqu fuaqa. Innee ooqai munnimma inni uqa adianai marufaqa qafaqau. Abee, aaqamasee munnimma inni uqaki kafaa quqaqau. 13Inneeqa nikaqa afiqee ooqurandee kai kaqi uruaqa. 14Aiqama afeeka faqaa Anutufa dadaaqinanoo mi fasiqafa inniara qimudaoo qiani. Qimudaoo qimaseenoo Beensaminna faqa inni nikaqa moo faqa kafaa nimiani. Qinee qini faiqi namu kakasifanoo doo saina kakasiani.
15Miqi qimasoofaqa Yakooboona faiqi namu mi saqari anoonausa faqa munnimma moomoo qaara kari mara maree Isipa maqa maaqai Beensaminna faqa afiqeeqa ooqu fiqau. Miqoo misa Yooseefaafa maruqoo ooqu kikiqa mambufanoo Yooseefaafa misa nindafanau. 16Yooseefaafa Beensaminna qafamaseenoo narí maaqakinaa ainainasaa rakisi maru fasiqana qimaminoo qinau. Anee maa fasiqausa nifiqeenana qini maaqaki munu quqaa. Misa suani qambaana qini faqa narana neefaranoo. Anee aandau aruseenana deedaqia.
17Ainainira faiqi fannoo mifa qimamundee inoo misauqa nifiqee Yooseefaana maaqaki munu quqanau. 18Yooseefaana maaqai nifiqee munu quqarara fimarufaqa misa rufiaidaqa oonumafi irimariqau. Indaaru narana feefauriafanna munnimmana maasa mara mareeqa qimaaqai murusee mi munnimmana maasa uqaki paquriafannana akiiqara maasa mai qifiqee anidanoo. Misa kai kaqi maasa darusee maasa doonkiuqa marasaifaqa maasa misa ainainira faiqikianaura.
19Misa miqi qimiriseeqa mina ainainasaa rakisi maru faiqina maaqa kooqiki oonuree qimamiqau. 20Oo uriqarara amanee maasa ufa irinnaree. Ooqai maasa qeeqa maaqaindari mai qumuree narana feefauru iqiafana. 21Maasa mai feefauru mamaree ooru fiiufaqa aanai ooru faiqarara uiqaana arasee maasa qeeqa sakuma uqa sanda idukusee qafaafananoo maasa aiqamausa aquafanna munnimmafa aiqama maasa uqauqa adianai marinau. 22Maasa mi munnimmana fabaqa maasa qeeqaindi moo faqa fiqaramasee narana feefaurirara maree qumidaqa. Yafee moo fannoo maasa uqakiaqa maasa narana feefauriafanna munnimmana kafaa uqarinau fee.
23Miqi qimasoofanoo Yooseefaana ainainasaa rakisi maru faiqifa iriseenoo qinau. Doo innee nifaaqa quqaaqa. Sia rufia rufia iaqa. Inni Anutufa inni nikoona Anutufa mifa kai inni munnimma inni uqaki rinau. Doo qinee inni munnimma mareeqa. Mifa miqi qimaseenoo Simeeoonna karabusaki maruna iduku eeqeenoo misaki quqanau.
24Quqaseenoo misa nifiqa mareenoo Yooseefaana maaqaki munu quqaseenoo nammari nimufaqa niku nammari uqusee mariqau. Misa doonkiuqa faqa narana nimufaqa naqau. 25Miqimmasee misa nári maree qumu ainainausa Yooseefaafa suani qambaana anirainaqa amiraree qimasee deedaqiqau. Yooseefaafa suani qambaana inni faqa narana naanauranoo fee qimasee qimannimunara irisee deedaqiqau. 26Yooseefaafa maaqai aniroofaqa misa nári maaqaindari maree qumu ainainausa mara maree maaqaki mifa marunnai ooruree mina oorinni noorindari maqasaa aqufiqau. 27Miqimmasoofanoo Yooseefaafa misara amiqi fee masee maridee qimasee iramirinau. Inneeqa nikoona nauraiqiara qima qimufaqa iriafanafa maqee kaqi fee maridanoo fee.
28Qufaqa misa iriseeqa qiqau. Eeoo ani ureeqara ainainira faiqi maasa qikoofa kaqi maridanoo. Miqi qimaseeqa misa kafaa Yooseefaana oorinni noorindari maqasaa aqufiqau.
29Miqimmasoofanoo Yooseefaafa narí akaqa Beensaminna qafamaseenoo qinau. Maana inneeqa nikaqara qima qimufaqa iriafanafee. Qimaseenoo Yooseefaafa qinau. Qini qimaaku Anutufa ani amiqi amiqimma amaqaani. 30Miqi qimaseenoo kai kaqi findifufanoo quqasee finau. Mina amuqusa firaaqoo narí akaqara mandaikufanoo finau. Yooseefaafa misa nifusaa iki raqaaqaa ufanoo quqasee narí faiqee maru rummanai oonuree iki raqanau.
31Iki raqeeseenoo nammarinnnai aukunu nammari uquseenoo narí aukunu afeekaika mandeenoo doo misunnai qumureenoo narí suqee maruna qimaminau. Doo narana rakiqaannee qinau.
32Miqi qufanoo suqee marufa narana naadu naadu rakiqanau. Yooseefaana aaduma teeboorasaa rakiqa amaqanau. Kafaa mina afasausa mara naaduma teeboorasaa rakiqa nimaqanau. Isipa maqannaasa minaki nee marusa naaduma moo teeboorasaa rakiqa nimaqanau. Isipa maqannaasa Qeeburu maqannaasa faqa narana narara nikooqee marusa marunara naadu naadu naqau. 33Yooseefaafa narí narana suqee maru faiqina qumee kai qimamufanoo mi faiqifa misa nifasaana indaaru mara ooqu mara amaqaseenoo mina aanaaqiannaana mina muqufi ooqu mara amaqasee miqimmamaree inaaqiana nikaqa fannoo atinni ooqu marinau. Misa nári ooqufaaqeeuna qafamasee tautumasee narí qafee narí qafee iqau. 34Yooseefaafa narí qufanoo mina difaanikinaa narana mareeqaida misa piritakiaqa quqa mareenoo Beensaminnaindiki fiqaramasee moodaannai qisauku 5 kari narana quqanau. Quqasoofaqa narana faqa uainna nammari faqa neeneesoofanoo doo nifaaqa iduku fufaqa qufaina qiqa asasiqau.
Okuqokiwe okwamanje:
Oosana 43: bjr
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2017 Wycliffe Bible Translators, Inc. All rights reserved.