Oosana 32
32
Yakooboofa Eesauna oori qafarara deedaqu ufafa.
1Yakooboofa miqooqari findi fufanoo narí anaukoo unnai aanai fimaru fanoo Anutuna angiroouqa aanai ani paquriqau. 2Yakooboofa nindafamaseenoo qinau. Maa maqa maaqafa Anutuna uiqaana maqusa maridanoo. Miqi qimasee mi maqusana auqureenoo Maqannaimmee qinau.
3Yakooboofa narí faiqi namu qaarammoo ufa maree narí nifasaafa Eesau funnai fuaqeera niiqoofaqa Eedoomma maqa maaqai fiqau. 4Miqoo qini qifasaana paqurimmasee qini maa ufana qimamiaqa. Qinee Yakooboosa ani ainainira faiqi maaqi qimasee ani Eesauna qini uriqararana qimamidaqa. Qinee Rabannana faqa maridaqa anirara masaidaqa mariifaqa maqee anidaqa. 5Qinee burimmakau faqa doonkiuqa faqa sipsipa faqa mimmiuqa faqa ainainira faiqiuqa faqa faqaasa maridaqa. Qinee aniara ufa quqaidaqa qini uriqararafa qini maa ufafa ani asooamamaqaanifeera qidaqa.
6Ufa mareefu fasiqausa oonu randee aniree Yakooboona maaqi qimasee qimamiqa qiqau. Doo maasa ani afasaana qimamisaunanoo mifa narí ainainira fasiqauqa 400 namufaqa maasa inaaqianna anidanoo.
7Yakooboofa mi ufana irufanoo aaququqoofanoo moomoo irirana maranau. Miqufanoo narí sipsipauqa faqa mimmiuqa faqa burimakauqa faqa kammeerauqa faqa qaaraki raina quqanau. 8Maaqi qimasee qimirinau. Eesaufa anireenoo moo usiranaki narinaqa moo usiranakiqari amana sandeefaranoo. 9Miqimmasee Yakooboofa maaqi qimasee innaaru qinau. Oo Anutu, qini qinaakuna Abaraqaammana Anutufa qini qikoona Isakeena Anutufa qini innaaru iria. Karaambaiqa anee qini qima qimiananoo aneenna maqa maaqai aneenna ainainiannai finaqa qinee aiqama ainaina andeeqa aisaanauranoo fee qinau. 10Oo Anutu anee qini amiqi amiqimma qisarana faqa ani mapukira dadaaqiranara faqa irunanoo uriqaraifaqa qinee oorudupiqa maridaqa. Qinee ooqai Yooradanna nammari qeeqa saunu kai uqirausa taqaqiafana doo maqee qinee qaaraki rainarausa faqa anidaqa. 11Qinee qeeqa qifasaana Eesauna asaukukinaana asumu mara quqaqisaanneera innaaru qidaqa. Qinee minara rufiaidaqa. Mifa anireenoo maasa faiqi anaasee faqa aiqama daru taikaandoora rufiaidaqa. 12Anee maaqi qimasee qiniara qima afeekaikinau. Ani aiqama ainaina andeeqamma aisaanauranoo fee qinau. Ani moomoo faiqi asumu amianaqa sia amana moo fannoo asaana ruannoo, nukudara foora sia kasoo uqanna marifaranoo fee qinau.
13Yakooboofa miqi qimaseenoo innaaru qimaseenoo mi eendanaki miqoo faiqeenoo iaqoofanoo narí aandau Eesauna amiraree qimasee raina quqanau. 14Mifa mimmi anaasee 200 faqa mimmi akoona 20 faqa sipsipa anaasee 200 faqa sipsipa akoona 20 faqa raina aaduma quqanau. 15Miqimmaseenoo kaifaa kammeera anaasee 30 faqa nári aanaaqi naamma neemarusa faqa burimakau anaasee 40 faqa akoona 10 faqa doonki anaasee 20 faqa akoona 10 faqa raina quqanau. 16Yakooboofa raineeqeenoo aandau oosana oosana naadu naadu kai quqaseenoo narí ainaini maru faiqisa moodaa moodaa mareeqeenoo minauqasaa rakisiaqeera quqanau. Quqaseenoo maaqi qimasee qimanniminoo qinau. Innee qini qifunni fidaqa adaaraika masaidaqa niana niana maridaqa fuaqa.
17-18Miqi qimaseenoo Yakooboofa indaarufu faiqina qimaminoo qinau. Qini qifasaafa Eesaufa paquri maseenoo irainana yafee ani uriqararafa maridanoo fee yaifee anee fidanee yana aandauqee anee maree fidanee, qinana anee maaqi qimasee narí qimamia. Maa ainausa ani ainainira faiqi Yakooboooonaindi maridanoo. Mifa narí uriqararana Eesauna amiannee qimasee quqasaifaqa maree anidaqa. Yakooboofa narí inaaqianna anidanoo mifoo qia.
19Yakooboofa indaaru fu faiqina qimamundee kai minoo mina aanaaqiana fusa faqa miqi kaimmasee qimanniminau. Innee Eesauna paqurimmasee miqi kaimmasee qimamiaqa. 20Innee maaqi qiaqa. Eeoo ani ainainira faiqi Yakooboofa inaaqianna anidanoo mifoo qiaqa. Yakooboofa narí kai oonu mafi irinoo qinau. Qinee maa ainainausa amiannanannoo mina irirana quandasaananoo qiniara amiqi amiqiani. Qinee mina paqurimasaananoo aqbee mifa qini numooo minniqisaannoo. 21Eesauna amaqoo ainainausa indaaru fifufanoo doo narí miqoo mi uiqaana maqusanaki faiqanau.
Yakooboofa Peenieera maqa maaqai angiroo faqa narí qumaree narí qumaree qu ufafa.
22Mi eenda amuqusanai Yakooboofa findi fufanoo narí anaaqa qara faqa narí ainainira anaasee qanda faqa narí faiqi namu qisaukuqara taikasee qikunni ooqu moodaa marasee 11 nifiqamareenoo Yabooka nammari fitaqamareenoo muqu afainai munu nisanau. 23Munusee niiqamasoofaqa fufanoo narí aiqama aandauqa faqa mara quqasoofaqa misa faqa taqaqau. 24Taqa nimaqaseenoo naríara dinni afainni kaqi marinau. Marufanoo faiqí moo fannoo anireenoo aitata fufanoo Yakooboona qumaranau. Uaqeeidanoo narí rudammiqi narí rudammiqi idamarufanoo iaqarafa adeedi ranau. 25Sia mi fasiqafa Yakoboona uraaqaranau. Miqi usianoo asauku samu Yakooboona upisuna aranaiqi arinau. Miqubaqa Yakooboona upisuna arufanoo amudaani ootuparafa aikatamafufanoo raaqee raaqee inoo ninau. 26Iaqoofanoo mi fasiqafa Yakooboona qimaminau. Doo qini quqasainaqa fua, doo iaqarafa adeedi reenoo. Yakooboofa iriseenoo qinau. Sia ani quqaanaura. Anee qini qifaaqooqa qima qimaqasainaqa quqaanaura.
27Mi fasiqafa Yakooboona qimaminoo qinau. Ani auqu yafee. Aneenna auqu rainaqa iria. Yakooboofa qinau. Qini duqu Yakooboosa maridaqa.
28Miqi qufanoo mi fasiqafa qinau. Maqee maaqooqari Yakooboofa taikaannoo ani auqu Isaraeerafa marinnaranoo. Anee Anutuna faqa faiqí faqa aitatafi qumaraanannannoo uriqararafa marianaqa minara ani auqu Isaraeera fee qidaqa.
29Miqi qimasoofanoo Yakooboofa mi fasiqana qimaminoo qinau. Aneenna auqu qimaqimia. Miqu qufanoo mi fasiqafa qinau. Nanaree anee qini duqu irirara iraidanee. Miqi qimaseenoo Yakooboona afaqooqa qimama qaseenoo doo quqaseenoo finau. 30Mi fasiqafa fifufanoo Yakooboofa qinau. Qinee Anutuna oori qafamaseeqa sia kuqiqa kaqi maridee qimaseenoo miqoo auqureenoo Peenieera fee qinau. 31Suani afu ururoofanoo Yakooboofa Peenieera maqa quqaseenoo upisuna aidafi marufanoo reetaa reetaa qinoo finau. 32Miqooqari oosana arasee Isaraee maqannaasa sia aandau upisunakinaa amaqi neemariqau. Maqee faqa sia naidaqa. Anutuna angiroo fannoo Yakooboona upisunaki arunara iridaqa sia naidaqa.
Okuqokiwe okwamanje:
Oosana 32: bjr
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2017 Wycliffe Bible Translators, Inc. All rights reserved.