Oosana 31
31
Yakooboofa Rabanna sia qimamirai sandoo ufafa.
1Yakooboofa irufaqa Rabanna faiqi namu misa Yakooboona ainaina moomoo qafamaseeqa aqidaqa qiqau. Yakooboofa maasa qikoonaindi aiqama mareeqee narinni quqeenoo. Yaindaraanee maa firaa qumiasanna mareenoo fee. Maasa qikoonaindi kai mareenoo. 2Yakooboofa mi ufana iriseenoo quanda fufanoo Rabanna oori qafoofanoo sia ooqai undee oori runinoo marufanoo qafanau.
3Mi kamuqoo Karaambaiqa Yakooboona qimaminoo qinau. Doo findi finana aneenna akoona faqa aneenna ainaina maqai fua. Anee finaqa qinee ani faqa marianaura.
4Yakooboofa mi ufana iriseenoo sipsipa rakisi marunnaindari Raseera nammarina faqa Reeaa nammarina faqa naaroofaqa oonu roofanoo qima niminau. 5Ooqai inni nikoona oori sia runinoo mariufa maqee oori runifaqa qafaidaqa. Sia qiniara amiqi amiqidanoo. Miqimmi marifaqa qini qikoona Anutufa qini faqa mariufa maridanoo. 6Inneeqara irimariafanoo, qinee qeeqa afeekannai inni nikoona ainaini mariqiafana. 7Miqi mariafanano mifa qini qikaru qimaseenoo qisauku qara 10 kari qini feefauru quandaqaandinoo. Miqi marifanoo Anutufa qifanoo sia qini mandaikamma qimaqeenoo. 8Inni nikoona ainaina iafannana feefauru mina sipsipa nifaaqa takoosa takoosa irana kai mi aukuanna maqee marufaqa qinee mareeqee qeeqaindiki quqee mariqiafana. Inni nikoofa qini feefauruara nifaaqa akara kau rirausa kai maraannee qufaqa mina sipsipauqa mi aukuannai miqi ranauqa kai maqee marufaqa mareeqee qeeqara qeeqaindiki quqee mariqiafana. 9Miqimma saafananoo Anutufa inni nikoona aandau aina mareeqeenoo qinindiki kai quqaqiseenoo.
10Mimmi sipsipa nariqa araraiki maru qanaana qinee qaina qafaafananoo mimmi akoonauqa aanaaseeuqa naafeeqee marufaqa qafaqiafana. Mi akoonausa aiqama akarakau rirausa faqa nifaaqa takoosa takoosa irausa faqa anaasee naafeeqee mariqau. 11Qinee qainasaa qafaafananoo Anutuna angiroo moo fannoo qini daaroofaqa qinee maqi qiqiafana. 12Foo qiafananoo qinau. Qafaa maa nifaaqa takoosa takoosira akoonauqa naafeeqaidaqa. Qinee Rabanafa ani mandaikamma amaqee marina qafamasee qunanoo maa ainainafa kambiqaidanoo. 13Qinee ooqai Beeteera maqa maaqai ani afusaa koorooiafanna Anutusa maridaqa. Miqoo anee aaqoo auqara ooni rakiqasee oorifa fadameena minasaa adiasee qiniara qima afeekaikinau. Doo maqee indaammamaree aneenna maqusai anirandee anee kambiqoonna maqanasaa fua. 14Raseera nammarisa Reeaa nammarisa qimannimi soofaqa Yakooboona ufa iriseeqa qimamiqau. Sia maasa qikoona qumiasana aina kaqi marinaqa maasa maraanaura. 15Mifa maaqandara aanaamuruara foora midanoo. Doo mifa maaqandasaa feefauru mara mareenoo doo nariki kai taikeenoo. 16Anutufa maaqanda qikoona kinaana mareeqee maaqanda faqa maaqanda faiqi namu faqa nimifanoo maasaindi kamminoo maridanoo. Anutufa ani qimamindee ia.
17Yakooboofa misa ufa iriseenoo narí akoona maqai Kannaana maqasaa firara deedaqinau. Mifa narí aanaaqmaaka faqa narí faiqi namu faqa kammeerauqa saa quqasee ooqu mari fufanoo finau. 18Yakooboofa narí mimmi sipsipa doonki kammeera aiqama Meesoopootamia maqusai marida maroo ainainausa aiqama mareeqee oorinni quqaseenoo doo narí inaaqianna Kannaana maqa maaqai finau.
19Rabannafa narí sipsipa asausi moosaa oonu aukirara fifufanoo Raseera nammarifa narí akoona maaqaki keeqa fufanoo narí akoona afunee ainaina maaqaki quqaqoona qumee kai mara mareenoo kukeeqa mareenoo Yakooboona faqa sia qimamirai doo mara mareenoo narí afaaqi faqa finau. 20Yakooboofa Rabannana akaru qimasee sia qimamirai quqasee finau. 21Yakooboofa narí ainaina namu faqa mareenoo kai kaqi ufanoo finau. Fifii ufanoo Eeufarateesa nammari taqa mareenoo dinni afainni oonu ranau. Doo miqooqari Kiriata aaqana qaannai oori ubeekamafi finau.
Rabannafa Yakooboona afaqeefu ufafa.
22Qaarammoo faasaana aiqaroofanoo Yakooboofa sandoonara Rabanna qimamiqau. 23Rabannafa minara iriseenoo narí aiku asauku aiqama nifiqee Yakooboona aanaaqiana afaqee finau. Dinni taikasee dinni oonu qaara marasee 7 afuru aanai fi faiqeenoo afaqee finoo oonu Yakooboona paqurinau. Kiriata aaqana moo amuaqu namusaa paqurinau. 24Rabannafa aanai faiqaqee ufanoo mi eendanaki Anutufa qaina afunnareenoo qimaminau. Anee sia Yakooboona manda ufa amia.
25Yakooboofa aaqanasaa narí uiqaana maqa usakaseenoo marufanoo Rabannafa narí ainaina faqa oonu reenoo mifa faqa narí uiqaana maqa Kiriata amuaqu namusaa usakanau. 26Usakaseenoo Rabannafa oonu reenoo Yakooboona qimaminoo qinau. Naqi fee ifanee qini qikaru qimaseenee qini qiraamuqmaaka rakiranakiara foora rarisamammaree sandeenee. 27Naqi fee ifanee sia qima qimirai qikaru qimasee qumee quqasee sandeenee. Anee qini qima qiminaqau qinee idi namu faqa asasirana namu faqa piripunna faqa dukaanaa faqa aridaqau aiqani. 28Anee sia qini qima qimianaqa qeeqa qinaiqi mara faqa qeeqa qiraamuna qara faqa nimooqa saanana nifiqee aniaqaana. Anee furufarira ainaina auqaananoo. 29Qinee ani mandaikamma amaqara afeeka marifaqa marunanoo eenda eendaki ani akoona Anutufa qini rafaaqafu seenoo qinoo. Anee sia uqanna Yakooboona mandaika mamaqaa qifaqa sia mandaikamma amaqaanauara. 30Qinee iridaqa anee aneenna akoona maqa maaqara oonu mafi iriananoo aundura dapikifana qini qisee sandaananoo. Naqaa fee ifanee qini maaqaki rakisi maria anutusa ummuara mamaree aninanee.
31Yakooboofa iriseenoo qimaminoo qinau. Qinee aniara narí araamuna qara rafiqaandoo qimasee rufiasee sandeeqa. 32Ani maaqaki rakisi maria anutusa marainnana paqurimmaseenana kuqa arua. Doo qini qiku qisauku nifusaa qini ainaina moodaa moodaa mara quqaseenana aneenna ainaina paqurimmasee maraa. Yakooboofa Raseera nammarifa narí akoona Rabannana unnaqira anutusa ummuarunara sia irirai miqi qinau.
33Rabannafa Yakooboona uiqaana maqaki keeqa fufanoo randoosia sia paqurinau. Miqooqari Rabannafa Reeaa nammarina uiqaana maqaki keeqafi randoosia. Kafaa miqooqari ainainira maanaaqaqara uiqaana maaqaki faqa keeqafi randasee sia paqurinau. Miqooqari Rabannafa Raseera nammarina uiqaana maaqaki keeqafinoo randanau. 34Raseera nammarifa Rabannana maaqasaa rakisi maru anutusa mareeqeenoo kammeera saririqa maaqaki quqaqoona uqeeraseenoo minaki kukeeqaseenoo minasaa ooqu faaqee marinau. Rabannafa Raseera nammarina uiqaana maqaki aiqama ainainaki randasee qafoofanoo sia marinau.
35Rabannafa randeemarufanoo Raseera nammarifa narí akoona qimaminoo qinau. Oo qipoo sia qinee findi fuanana sia qini diqia. Qinee qimaaqai qafaidaqa sia findi fidaqa. Miqi qufanoo Rabannafa aiqama ainainaki randoosia sia paqurinau.
36Sia paqurufanoo Yakoobofa amambaina qimasee aanoo qidanoo qinau. Qinee nana aaqaranee maree fee. Nana sandufee rukiasaunana aranaqaifanee qiniara randamaree qumidanee. 37Anee qini ainainaki randeesee doo fee aneenna ainaina paqurinanee. Doo mina mareeqeenana aneenna faiqi namu nifusaa faqa qini faiqi namu nifusaa faqa quqasee ufa qida qafaa, yafee andeeqeenoo fee.
38Qinee moodaa fasiqa aiku asauku taikasee 20 aukuana ani ainaina imariqiafana. Mi kamuqoo ani sipsipa ani mimmi sia moo fannoo dapi maqee mariqau, amiqi kai mimariqau. Sia ani sipsipa akoona moo arusee naqiafana. 39Kaasau faini ani sipsipa arusoofaqa qinee mina amudaani apata siamma ani uqafiqee mariqiafana qeeqaindi kai moo mareeqee mina amaaqa maqeeqa anindiki quqee mariqiafana. Ummuara fasiqa eendaki fee faasaana fee ummuara masoofana anee qiniara qunaqa qinee qeeqaindi mareeqee anindiki quqee mari qiafana. 40Qinee moomoo kari ani ainaina imariafananoo suani darinoo eendaki suara darinoo miqi marufaqa sia faiqee mariqiafana. Miqidaqa ani ainainasaa rakisi mariqiafana. 41Yakooboofa qimamidanoo qinau. Qinee moodaa fasiqa aiku asauku taikasee 20 aukuana ani ainaini mariafanausa marida. Qisauku qara taikasee qikunooqu qaara faqa qaara faqa marasee 14 aukuana ani araamuna qara mararara ani ainainiaafanausa maridaqa. Dinni taikasee dinni oonu moodaa marasee 6 aukuana ani sipsipa mimmi mararara kaifaa ainaini qiafana. Miqi mariafanana anee qisauku qara taikasee 10 kari anee qini feefauruara qikaru maakaru qimarinau. 42Abaraqaammana Anutufa qini qikoona Isakeena Anutufa sia qini dadaaqinanau anee qiniara kaqi samu fua qinaqau qinee kaqi samu fini. Anutufa qini ummaara faqa qini kadaapirirana faqa qiqafamaseenoo eenda eendaki narí ufa irirana ani aminoo.
Yakooboosa Rabannasa moodaanakiku ufafa.
43Rabannafa Yakooboona mi ufana iriseenoo qinau. Maa ani anaaqa qara qini qiraamuna qara maridaqa maa ani faiqi namu qini qinaiqi mara maridaqa maa ani sipsipa qinindi uqanna maridanoo, maa aiqama ainaina anee marana nuanafa aiqama ainaina maaqoo marifa qinindi kai maridanoo. Qinee sia amana qeeqa qiraamuna qara faqa qinaiqi mara faqa rafaaqa fuanaura. 44Doo maqee ani faqa moodaanaki ufa qirara deedaqidaqa. Anindiri ooni aaku aakummasaananoo mifa maasa moodaanaki kira ufara daaqoo auqaannoo.
45Yakooboofa minara iriseenoo eedoo qimaseenoo ooni firaatia qumaree kuradama seenoo daaqoo auqara ooni fee qinau. 46Miqimmaseenoo Yakooboofa narí ainainira faiqiuqara qufaqa ooni moomoo suqusee aaku aaku iqau. Miqimmasee mi ooni aaku aaku irana aakaarinni ooqumarifi narana naqau. 47Namaseeqa Rabannafa mi oonisa auqureenoo Yageer Sahadutaa fee qimasee narí ufakiqari auqu ramasoofanoo Yakooboofa narí ufakiqari Gareeda fee qinau. (Mi nuquna oosana daaqoo auqara ooni fee qimasee nári ufakiqari auquraqau.) 48Rabannafa Yakooboona qimaminoo qinau. Maa ooni aaku aaku irafa anindiri daaqoo auqarafa mariannoo. Minara mi maqusana auqu Gareeda fee qianaura. 49Rabannafa kafaa maaqi qinau. Karaambaiqa fannoo maaqanda daraaniananoo mina afu fannoo maasasaa mariani. Miqi qimaseenoo mi maqusana auqureenoo Misipaa fee qinau. 50Rabannafa maaqi qinau. Anee qini qiraamuna qara mandaikamma nimaqeennaree moo anaasee fee mareennaree, qinee sia minara iriananoo Anutufa anindirisaa rakisidanoo. 51Maaqoo qinee ooni aaku aaku maqaunanoo anindiri qara qambaana maridanoo. Maaqoo daaqoo auqara ooni rakiqarafa faqa maridanoo. 52Maa ooni aaku aaku irafa faqa rakiqarafa faqa anindiri daaqoo auqarafa maridanoo. Qinee sia mina fiaaqaree ani aruanaura. Anee faqa sia mina aiaaqaree qini darua. 53Abaraqaammana Anutufa faqa Naqoorana Anutufa faqa maasa qambaana andeeqa qisaannoo. Rabannafa miqi qufanoo Yakooboofa qinau. Qini qikoofa Isakeefa innaaru qimamaqee mari Anutuna auqusaa qimasee afaqaanauree qimasee qima afeekaikinau. 54Miqi qimaseenoo Yakooboofa aandau aruseenoo mi aaqannasaa Anutuna aandau tatufusee suqaminau. Suqa amiseenoo Yakooboofa narí aiku asauku naaramasoofaqa moodaaqoo ooqu mari fufaqa mi aandauna ataraasa naqau. Namasee mi aaqannasaa faiqaqau. 55Kananaana findifufanoo Rabannafa narí anaiqimara faqa araamuna qara faqa nimooqa namasee nimandamasee amaaqa finau.
Okuqokiwe okwamanje:
Oosana 31: bjr
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2017 Wycliffe Bible Translators, Inc. All rights reserved.