Matalikilo 17
17
Kupalula ncitondesho ca cipangano
1Abulamu ndyaakaba amyaaka ili 99, Mwaami Lesa wakaboneka kuli nguwe akwaamba ayi, “Ndime Lesa Shinkusu shoonse. Nyumfwile alimwi kocita shiluleme lyoonse. 2Ndaakupanga cipangano cangu andiwe akukupa bamulunyungu lwako baanji.” 3Abulamu wakafukama akushisha ciwa panshi, lyalo Lesa wakaamba ayi, 4“Cipangano cangu nceeci. Ndashomesha kwaamba ayi ulaakuba mushali mukulukulu wa mishobo iinji. 5Liina lyako teshi linoocili ayi Abulamu sombi ayi Abulaamu. Ceebo ntookulengesha ayi ube mushali mukulukulu wa mishobo iinji.#Loma 4:17 6Ndaakukupa bamulunyungu lwako baanji cakwaamba ayi bamwi balaakuba bamaami. Bamulunyungu lwako balaakufula cakuba mishobo iinji.
7“Ndaakucita mbondashomesha kuli ndiwe akubamulunyungu lwako mumyaaka iinji itoosa kweelana ambocili ncipangano camuyayaya. Ndaakuba Lesa wako awa bamulunyungu lwako.#Luka 1:55 8Ndaakukupa cishi ici umo bulya mooli mweensu. Cishi ici ca Kenani coonse cilaakuba ca bamulunyungu lwako kwamuyayaya alimwi ndaakuba Lesa wabo.”#Mili 7:5
9Lesa wakaambila Abulaamu ayi, “Awebo ulyeelete kusumina ayi ulaakulama cipangano cangu, pantu pomwi abamulunyungu lwako abo beshi bakabeeko kunembo. 10Webo abamulunyungu lwako mulyeelete kusumina kupalula basankwa boonse pakati kanu.#Mili 7:8; Loma 4:11 11Kuswa sunu mulyeelete kupalulwa kwaamba ayi cibe citondesho ca cipangano pakati kanu anebo. 12Kulilabo mwaana musankwa na wakwanisha nshiku shosanwe ashotatwe kubikaako abasha bashalilwa mumaanda anu alimwi abaabo boolwa kubaswamashi balyeelete kupalulwa mbomunya ubo. 13Womwi awomwi ulyeelete kupalulwa, alimwi ici cilaakuba citondesho ciboneka pamibili yanu kwaamba ayi cipangano cangu ncamuyayaya. 14Musankwa uli woonse utana kupalulwa teshi anoociyeeyelwa kuba mulikoto lya bantu bangu, ceebo taakwe kulama cipangano cangu.”
15Lesa wakaambila Abulaamu ayi, “Ucileeke ono kwiita mukaako ayi Salai, kuswa sunu liina lyakwe nguSaala. 16Ndaakumupa coolwe alimwi ndaakukupa mwaana kwiinda muli nguwe. Ndaakumupa coolwe, alimwi ulaakuba mushali mwanakashi wa mishobo iinji. Pakati ka bamulunyungu lwakwe palaakuba abamaami.” 17Abulaamu wakafukama akushisha ciwa panshi, sombi wakatalika kuseka ndyaakayeeya ayi, “Sa musankwa ulakonsha kuba amwaana na waba amyaaka ili 100? Sa Saala inga washala mwaana bulya mbwaashisha myaaka ili 90?” 18Mpeeke wakeepusha Lesa ayi, “Ino kulekabo Ishimaeli waba njempyani ya buboni bwangu?”
19Sombi Lesa wakaamba ayi, “Sobwe taakoonshi. Saala mukaako ulaakukushalila mwaana musankwa alimwi ulaakumutumba ayi Isaki. Ndaakulama cipangano cangu anguwe pantu pomwi abamulunyungu lwakwe lyoonse alyoonse. Cipangano ici ncamuyayaya. 20Ndanyuumfwa kusenga kwako pali Ishimaeli, aboobo ntoomupa coolwe cakuba abaana alimwi abamulunyungu lwakwe baanji. Ulaakuba mushali wa baleli bali likumi abobilo alimwi ndaakulengesha ayi bamulunyungu lwakwe babe mushobo unene. 21Sombi cipangano cangu ndaakucilama amwanaako musankwa Isaki, uyo Saala ngweshi akashale paciindi ceenka cino mwakali.” 22Lesa ndyaakamanisha kwaamba aAbulaamu, wakamushiya.
23Pabushiku bweenka ubo Abulaamu wakacita bwakamulwiita Lesa akupalula mwanaakwe Ishimaeli alimwi abasankwa bamwi boonse bamuŋanda yakwe, pantu pomwi abasha boonse bakashalilwa muŋanda yakwe alimwi abaabo mbaakoolabo. 24Abulaamu wakalinga kucite myaaka ili 99 ndyaakapalulwa. 25Ishimaeli mwanaakwe lakwe wakalinga kucite myaaka ili 13. 26Boonse bobilo bakapalulwa bushiku bomwi, 27pantu pomwi abasha bakwe Abulaamu boonse.
Okuqokiwe okwamanje:
Matalikilo 17: BBBLI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Lenje Bible with Deuterocanon © Bible Society of Zambia, 2003.