Gén 1
1
Täjp'ante nech'enyaya
1Tä nech'enyaya Dios yenlhi pule lhäy'e honhat. 2Wet honhat kamaj tek kalelhäj m'ak tä häpe, imälhewek tä inät t'at, wet newache isi. Wet Dios laka Espíritu wey'ä'pe inättso.
3Wet Dios yok:
–Is chik iche isi.
Wet iche t'at isi. 4Tä Dios hiw'en tä wuj tä is, hiw'enhat lhip tä isi newahi 5wet iwo lheya Honatsi, wet lhip tä isi yen lheya Ifwala. Wet mälhyej p'antetso, iche honaj wet äp nech'e fwala, wet häp täjtso fwala tä ichun p'ante.
6Wet Dios yok:
–Is chik iche lakawayhi tä hiw'enhathen inät lhayis.
Wet mälhyej p'antetso, iche t'at. 7Dios yenlhi lakawayhi tä hätet iwoyek itsok inät tä ichufwi lhäy'e tä tumphä, 8wet lakawayhitso iwo lheya Pule. Wet mälhyej p'antetso, iche honaj wet äp nech'e fwala, wet häp täjtso fwala dos.
9Wet Dios yok:
–Is chik weihalha t'at lew'et tä ihi häp inät tä ichufwi pule, häpkhilek n'älpe tä tamchäy.
Wet mälhyej p'antetso, iche t'at. 10Wet Dios yen lheya häp lhip tä tamchäy Honhat, wet inät tä lhaihutwek yen lheya Lewomekitaj.
Tä Dios hiw'en tä wuj tä is, 11-12yok:
–Is chik tälho honhat nilhokej hal'äy tä w'enhahiche, hon'al tä lhoy ihi lhäy'e hal'äy tä iwo lhaya.
Wet mälhyej p'antetso, iche t'at nilhokej hal'äy tä w'enhahiche tä tälho honhat, hon'al tä lhoy ihi lhäy'e hal'äy tä iwo lhaya. Wet Dios hiw'en tä wuj tä is. 13Wet mälhyej p'antetso, iche honaj wet äp nech'e fwala, wet häp täjtso fwala tres.
14-16Wet Dios yok:
–Is chik iche isi lhayis tä iche pule yämthilek ihutunpe honhat, häpkhilek w'enha lhamej tä ifwala wet w'enha lhamej tä honatsi, wet äpte häpkhilek õyen n'otetnekayej lewhäy lhayis, lhäy'e ifwalas, lhäy'e nekchämis.
Wet mälhyej p'antetso tä Dios yenlhi isi lhayis, elh tä wuj häp tä Ifwala, wet elh tä niwuja häpe Iwel'a. Häte Dios yenlhi katetsel. 17-18Wet itihi pule nilhokej isi lhayistso yämthilek ihutunpe honhat tä ifwala lhäy'e tä honatsi, wet nech'e w'enha lhamej isi wet w'enha lhamej honatsi. Wet Dios hiw'en tä wuj tä is. 19Wet mälhyej p'antetso, iche honaj wet äp nech'e fwala, wet häp täjtso fwala cuatro.
20Wet Dios yok:
–Is chik iche m'ayhay tä w'enhahiche tä ihi inät, wet is chik iche afwenchey tä wey'ähen.
Wet mälhyej p'antetso, iche t'at. 21Dios yenlhi m'akitas tä ihi lewomekitaj, lhäy'e nilhokej inät lheley, lhäy'e nilhokej afwenchey. Tä Dios hiw'en tä wuj tä is lhenhayna, 22wet takäpfwayeje lhämtesna wet yok:
–Is chik wujpey ales tä lewoye, häpkhilek tapoyej lewomekitas, wet äpte is chik wujpey afwenchey tä ihi honhat.
23Wet mälhyej p'antetso, iche honaj wet äp nech'e fwala, wet häp täjtso fwala cinco.
24-25Wet Dios yok:
–Is chik iche itshätäy tä w'enhahiche tä ihi honhat, itshätäy tä n'oläy, lhäy'e iyhäj tä iche tayhi, lhäy'e m'ayhay tä lhaitonchehen honhat.
Wet mälhyej p'antetso tä Dios yenlhi itshätäy, wet hiw'en tä wuj tä is.
26Wet Dios yok:
–N'enlhi hin'o. N'atech'ayen n'amejen, hätehlat iwoye n'amel. Wet lhayenla lewuka w'ahat lhayis, lhäy'e afwenchey, lhäy'e itshätäy tä n'oläy lhäy'e iyhäj tä iche tayhi, lhäy'e m'ayhay tä lhaitonchehen honhat.
27Tä mälhyejtso, Dios yenlhi hin'o, wet itech'ayen lhamej tä häpe Dios. Yenlhi hin'o wet yenlhi atsinha, 28wet hiw'enho lakäpfwayaj tä is häp lhamel, wet yok:
–Woyay alesa, a'ämay wujpey häpkhilek tapoyej honhat. A'en niyatayej honhat, wet a'en lewuka w'ahat lhayis, lhäy'e afwenchey, lhäy'e nilhokej itshätäy tä i'pe honhat.
29Tä tajyäme täjtso, wet Dios yok:
–Tetshan olhämet amel. Ow'en amhohen nilhokej hal'äy tä iwo lhaya häpkhilek letufw. 30Mat häp itshätäy tä iche tayhi, lhäy'e afwenchey, lhäy'e m'ayhay tä lhaitonchehen honhat, ow'enho hon'al yämthilek lhamel tufw.
Wet mälhyej p'antetso. 31Wet Dios hiw'en tä wuj tä is nilhokej m'ak tä yenlhi. Wet iche honaj wet äp nech'e fwala, wet häp täjtso fwala seis.
Okuqokiwe okwamanje:
Gén 1: WCHB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia Wichí, Dios Lhämtes tä Matchehen © Sociedad Bíblica Argentina, 2002.