โยฮัน ปือมือเลา มือญาเระ ดูลู
ปือมือเลา มือญาเระ ดูลู
บรีตา นู บาฌิ_ ซูรัจ นู โยฮัน ฆาแรฮ อีนี_ ญา มือญาเระ ปาซัน ลาฆู นะ เยซู_ ซือรูปา บือกะ โกะ ซูรัจ นะ มัดทัย_ มาระโก_ ฌางัน ลูกา. ตาปี โยฮัน ญา ฆาแรฮ อาซิก เดะ กูญา ฌูฆา.
ลามูลา ญา บรี กีตา ตาฮู จะ_ เยซู ฌาดี ปือมือเลา นะ ตูฮัด เดะ อาตัซ_ นู อาดา ฌางัน ตูฮัด_ ตะเดะ ดูลู นะ บือฌาดี ดือนียา. ญา เตอ_ ซามา บายา ฌางัน ตูฮัด_ ตาปี ญา มาแรฮ ฌาดี ซือมียา ดัฮ_ บีดา นะ ตูโลก อูมัจ ซือมียา บรี ฮีโดะ ลือปัซ บาฌิ. กะฆีเตอ โยฮัน ญา ฆาแรฮ ซูรัจ อีนี_ บีดา นะ บรี โกะ ซือมียา มาแรฮ ปือจายา กะ เยซู_ นะ บือเลฮ ลาฆู ฮีโดะ นู ซูโงฮ (ลีฮัจ 20.31).
โยฮัน_ ซือมียา ฆาแรฮ ซูรัจ อีนี_ ญา ฌาดี มูเระ นะ เยซู ซืออูรัก_ นู กระ บาฌิ ฌางัน เยซู (ลีฮัจ 13.23; 19.25-27; 21.20-24). ญา เตด บือเลฮ จรือตา ปาซัน โกะ ปือบูวัจ นะ เยซู ซือมูฮา_ ตาปี ญา ปีเลฮ ปือนานา นู ซีดี_ ตูโฌฮ ปือนานา_ จรือตา มือญาเระ_ บรี ลีฮัจ ลาฆู มือฆัฮ นะ เยซู. ลือปัซ โกะ ปือนานา นู ซีดี อีตู ซอกซา ปือนานา_ ญา ฆาแรฮ ปือมือเลา อาฌัยํ นะ เยซู_ นู นะ ตูโลก บรี มาโซะ เดะ ฮาตี ลาฆู นู ซีดี อีตู. เดะ ปือมือเลา อาฌัยํ นะ เยซู อีนี_ อาดา ลาฆู ปือซามา บาญะ มาจับ_ มือเลา ปาซัน โกะ ซือบารัก อารีๆ_ บือกะ อาเย_ บือกะ ตือโปก โรตี_ บือกะ ลาฆู จรัฮ_ บือกะ โกะ กาเมก โปด_ บีดา นะ ตูโลก บรี มาโซะ เดะ ฮาตี_ ลาฆู ดาลับ นะ ตูฮัด.
เดะ ปาซัน 13 รอจ กะ ปาซัน 17 นะ ซูรัจ อีนี_ โยฮัน มือญาเระ ลาฆู นู โกะ มูเระ อาซิกๆ เตด บือเลฮ มือญาเระ_ ฌาดี จะ_ ลาฆู บรามัย บือซามา นะ เยซู ฌางัน โกะ มูเระ 12 อูรัก_ เดะ มาลับ อีตู_ ดูลู เดะ ญา กือนา รีฆะ. อาดา ฌางัน ลาฆู อาฌัยํ_ ฌางัน ลาฆู บือซาโวจ นะ เยซู ฌูฆา.
เดะ ดาลับ ซูรัจ โยฮัน อีนี_ นะ ดาปัจ ลาฆู กะฆีนี
1. ลาฆู ลามูลา (1.1-18)
2. โยฮัน นู บรี ซือลับ เดะ อาเย ฌางัน โกะ มูเระ ลามูลา นะ เยซู (1.19-51)
3. ลาฆู นู เยซู บือกรือฌา_ นู ญา อาฌัยํ_ บรี ราตา ซือมียา ลีฮัจ (2.1—12.50)
4. เยซู อาฌัยํ โกะ มูเระ_ มาลับ ปือญูดัฮ (13.1—17.26)
5. เยซู กือนา กรัจ ฮูโกบ_ กือนา กาจิก เดะ กายู ปลีตัก (18.1—19.42)
6. เยซู ฮีโดะ ปาเระ เดะ มาตี (20.1—21.25)
บาจา เลอ เดะ ซูรัจ ปือมือเลา นะ ตูฮัด
Okuqokiwe okwamanje:
โยฮัน ปือมือเลา มือญาเระ ดูลู: ULBIBLE
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume