मत्ती 2
2
रासी देखण्या माणसे ईसुक भेळा हवणे आवे
1जत्यार हेरोदेसेन राजान राज चाल रह्लो, तीनुत दाहड़ा मां यहुदीया जीलान बेतलहम गांव मां ईसु पयदा हयु, ती उगेवणा सी तारा देखीन रासी देखण्या यरुसलेम सहर मां आया। 2ने पुछ्या की, “यहुदी माणसेन पुर्यु राजु पयदा हयु, चु कां छे? काहाकी हामु उपर उगवणु सी तारु उंगलु देख्या तेरेमां हामु पुछ रया ने तीना काजे हामु पांये पड़ीन आंधणे आवला छे।”
3जत्यार हेरोदेस राजु जी वात सामळीन घाबराय गुयु, ने तेरे पुठ्ये यरुसलेम सहर मां रहणे वाळा बी आखा घाबराय गुया। 4तेरेमां हेरोदेस राजु आखा मुख्या पुजारा ने यहुदी नीयम सीकाड़न्या मास्तर्याक भेळा करीन तीनुक पुछ्यु, “की मसी कां पयदा हवसे?”
5चे कह्या की “यहुदीया जीलान बेतलहम सहर मां हवसे, काहाकी भगवानेन अघी सी आवणे वाळी वात बताड़न्या माणसेन साहरे असो लिखलो छे।
6“ए बेतलहम सहर, तु यहुदीया देस वाळा,
काहना बी मटला सहर नानु नी हय,
काहाकी तारे सीत एक असलु राज करन्यु पयदा हवसे,
चु मारा ईस्रायेली जातीन माणसेन गुवाळी करसे।”
7तत्यार हेरोदेस राजु तारा देखीन रासी देखण्याक कळेन बुलायन तीनुक पुछ्यु की तारु तुहुंक काहनी टेमे देखाव पड़लु, 8अळतेन चु असो कय्न तीनुक बेतलहम सहर मां मकल्यु, “जावु, तीना पुर्यान बारामां पतु करु, ने जत्यार जड़ जाय तत्यार मेसे खबर करु काहाकी मे बी आवीन तेरा पाये पड़ीस।”
9ने चे राजान वात काजे मानीन चाल पड़्या, ने तीना तारा काजे चे उंगतेलु देखला चु तारु बी तींद्रे अगळ-अगळ चाल पड़्यु, ने चां पुर्यु हतलु, तीनी जागा पर जाय्न चु तारु उबु रय गुयु। 10ने तीना तारा काजे देखीन चे बेसका खुस हय गुया। 11चे तीना घर मां जाय्न तीना पुर्या काजे हेरी माय मरीयम साते देख्या, ने उबडा पड़ीन पुर्या काजे आंध्या, ने आपणा-आपणा थयलाम सी तीना काजे सनो, लुभान, ने मंहगलो ईत्तर भेट चड़ाया।
12बाकुन भगवान सी सपना मां असी खबर जड़ी की, हेरोदेस धड़े पछा घुण जावु, तत्यार चे दीसरे वाट्ये सी आपसान देस मां पछा जाती रया।
मीसरे देस मां जाणेन
13अळतेन चे तारा देखीन रासी देखण्या चां सी जाती रया ने पछेन मालीक भगवानेन सरग वाळु काहवाळ्यु सपना मां ईसुन बास युसुफ काजे देखायन कह्यु, “उठ, ईना पुर्या काजे ने हेरी माय काजे लीन मीसर देस मां जाती रव; ने जत्यार लग मे तुसे नी कहं, तत्यार लग चांहान रवजी; काहाकी हेरोदेस ईना पुर्या काजे माराड़ने करीन हेरसे।”
14तत्यार युसुफ उठीन पुर्याक ने हेरी माय काजे रातेत लीन मीसर देस मां जाणे करीन चाल पड़्यु। 15ने हेरोदेस मरने लग चांहान रयु। काहाकी ज बुल मालीक भगवानेन अघी सी आवणे वाळी वात बताड़न्या माणसेन साहरे कह्लो छे, चो पुरो हवे की, “मे मारा पुर्या काजे मीसर देस सी बाहर बुलायु।”
नानला पुर्या काजे हेरोदेस राजु माराड़े
16जत्यार हेरोदेस राजा काजे असु पतु चाल्यु की, तारा देखीन रासी देखण्या मारे सी धुकु कर्या, तत्यार चु रीस सी भराय गुयु, ने आपसा माणसे काजे मकल्यु जसा रासी देखाड़न्या जी टेम देखाड़ला तीनी टेमेन अनसारे बेतलहम ने तेरे आड़े-धड़े वाळा आखा जे दुय सालेन ने तींद्रे सी नानला पुर्या हतला तीनु काजे माराड़ देदु।
17तत्यार ज बुल मालीक भगवानेन अघी सी आवणे वाळी वात बताड़न्या माणसेन यीर्मयाहन साहरे कह्लो हतलो, चो पुरो हय गुयो।
18“रामा सहर मां सी एक दया आवे तसी अवाज सामळाय,
ने रड़नेन ने बेसका कलपणेन बी अवाज सामळाय;
राहेल तेरा पुर्या वाटे रड़तेली,
ने हुगी राखे तेबी हुगी नी रवतेली,
काहाकी तेरा आखा पुर्या मर गुयला।”
मीसरे देस मां सी पछु आवणु
19ने जत्यार हेरोदेस राजु मर गुयु, तत्यार मालीकेन सरग वाळु काहवाळ्यु मीसर देस मां युसुफ काजे सपना मां देखायन कह्यु, 20“उठ, पुर्याक ने तेरी माय काजे लीन ईस्रायेल देस मां पछु जाती रव, काहाकी चे ईना पुर्या काजे मारने हींडी रवला, चे मर गुया।” 21तत्यार युसुफ सुयन उठ्यु, ने पुर्याक ने तेरी माय काजे लीन ईस्रायेल देस मां पछु जाणे करीन चाल पड़्यु।
22बाकुन युसुफ असु सामळ्यु की अखीलु तेरा बास हेरोदेस राजान आवजी पर यहुदीया पर राज कर र्यु, तेरेमां चां जाणे सी बीही गुयु। ने तत्यारुत सपना मां भगवानेन हुकुम सामळीन गलील जीला मां जाती र्यु, 23ने नासरत नावेन सहर मां जाय्न वसी ज्य, काहाकी च बुल पुरो हवे, ज भगवानेन बुल मालीक भगवानेन अघी सी आवणे वाळी वात बताड़न्या माणसेन साहरे कह्लो हतलो की: “ईसु नासरी#2:23 नासरी हेरो मतलब जे नासरत सहर मां रहे चे नासरी कहवाये कह्वाय्से।”
Okuqokiwe okwamanje:
मत्ती 2: NTBSP23
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
