التكوين 12
12
بركة أبرام
مولانا يمشي بأبرام شور ارض كنعان
مولانا يسلك أبرام من الجوع ومن المصريين
1وڮال الله تعالى لأبرام: امشي من ارضك وقبيلتك ودار أهلك، وڮيس لارض اللي لاهي انعتلك. 2ولاهي انعدل منك شعب عظيم، ولاهي انباركك، ولاهي انكبر أسمك، واتعود بركة لناس كاملها. 3واللي يباركك يعود امبارك، واللي يلعنك يعود ملعون. ولاهي تتبارك القبايل كاملها اللي فلارض بسببك.
4وڮام أبرام وعدل ذا اللي ڮالّو الله تعالى. وامشات امعاه ساراي أعيالو ولوط ول خوه من حاران. وفذا الوقت كان عندو أبرام 75 سنة. 5وڮبظو امعاهم ادبشهم واعبيدهم اللي كانو فحاران، وامشاو واعدين ارض كنعان. وإلين وصلو ارض كنعان، 6عاد أبرام يمشي من ابليدة شور ابليدة يجول فكنعان يلين اوصل لبليدة اللي فيها صدراية اكبيرة أسمها موري اللي خارج مدينة شكيم اللي ساكنين فيها الكنعانيين فذاك الوقت. 7واظهر الله تعالى لأبرام، وڮالّو: لاهي نعطي هاذي لارض لنسلك. وڮام أبرام وابنا فم مذبح، ويڮدم فيه اذبايح لله تعالى اللي اظهرلو. 8وعاڮب ذاك امشا من هاذي لبليدة واعد كدية فجيهة الشرڮ من لبليدة اللي اظهرلو الله تعالى فيها. وابنا خيمتو امبين بيت إيل اللي فالغرب ومدينة عاي اللي فالشرڮ. وابنا فم مذبح لله تعالى وصلى فيه. 9ومن فم ڮيم ماشي واعد النقب اللي فالجنوب.
10وإلين خلڮت جفاف فارض كنعان، ڮام أبرام وامشا واعد مصر يسكن فيها شي من الوقت بيهلي الجفاف كانت امتينة فلارض. 11وإلين ڮرب من مصر ڮال لساراي أعيالو: آنا نعرف اعلنك امرة زينة، 12وإلين يشوفوك المصريين لاهي يڮولو عنك أعيالي، ويكتلوني، ويمشو بيك امعاهم. 13ڮوليلهم اصا عنك اختي ونسلكو من المشاكل ونجبرو العافية بسببك انتي. 14وإلين ادخل أبرام مصر شافو أهل مصر اعلن أعيالو امرة زينة. 15وشافوها املي عمال فرعون وخبرو فرعون بجمالها ، وامشاو بيها شور قصرو. 16ولا ابخل شي من شي متعدل لأبرام بسبب ساراي، واعطاه لغنم ولبڮر ولحمير ولعبيد ولخدم والبل.
17يغير ما ابطا فرعون يلين ابلاه الله تعالى هو وأهلو بامراض خطيرة بسبب اعلنو اكبظ ساراي زوجة أبرام وحاول يتعرص امعاها. 18وڮام فرعون ومشّا لأبرام يجيه وڮالّو: انتا ذا اللي عدلتلي شنهو؟ اعلاش ما اتڮولي اعلنها أعيالك؟ 19اعلاش اتڮولي اعلنها ختك اياك نڮبظها ونتخيم امعاها؟ ظرك اصا اسمع، اڮبظ أعيالك وامرڮ بيها. 20وڮام فرعون ووصا اعليه ارواڮيج يصيفطوه هو وأعيالو وكل أملاكو.
Okuqokiwe okwamanje:
التكوين 12: الحسانية
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/