Luc 21
21
Môkué ômakuya dode yadibiia
(Bono na Marc 12:41–44)
1Jésus amabono na gésa na gésa ameena ékiti ékuya dode yaô yadibiia gô gégaa géndé gô eba aNzambé. 2Ameena dôta môkué amôgeto, môsuga amakuya tôdode tôbaé takunga tosunu asuda dibaé. 3Jésus amavovo mbe: Nanôbeenda na gô pie mbe mômane osuga, môkuée ôdôô, éne ékuyi angô gô gégaa sadibiia, éôtéa éne ékuyi akedi muetso. 4Muetso akuyi te ôkabô okitie waô ôsaba n’eyanza évôni gôndé ahngô. Ahsikuya wetso. Géé ti môgeto noo, g’ôsugee wedi akuyi ti éetso. Asisanéa ta na sôma.
Jésus ameevéda gépanzédéô seba aNzambé
(Bono na Matt. 24:1–2, Marc 13:1–2)
5Avo oma amasémana ényepa éeba aNzambé. Amavovoko gômeenahngô mataéme mamisôba mamasaaô ebee, na éôma éokiti émadeekedu na gôndé Nzambé. Vane Jésus amavovo mbe: 6Ndéône éwesea gôsangasanéa ta n’etaé évo gô ngongo amôkedi. Metso mangapanzô.
Maguga mapitsi yamôyusumédu
(Bono na Matt. 24:3–14, Marc 13:3–13)
7Oma ameevôa Jésus mbe: ?Môékédi, ébégôe éne éngabuéa ndéô ndé? ?Gémbégéa ndé géngatubéda we mbe ndéône éka gôpégôpé na buéaga?
8Vane Jésus amakeneda ahngô mbe: Nôwema kabaga nôbômédu. Oma ayekani angaviga atsua inami gô diboe yaô mbe: Me te Christ, ône amasevôu na Nzambé. Na angavovo mbe: Ndéône ébuéyi. Tambô. Nômbiaanda ahngô. 9Nôngookô tsangô yamabadi magenyuni. Nôngookô na tsangô yane atômuni akékôéa na apatsa ane atômani. Nômbieena gomo. Mabadime mane mangagenyu. Ivô tsengene ésangakôdéa vane. 10Jésus amoomba ébeenda mbe: Eongo évo éngagenya na évo éongo. Tsenge épo éngagenya na épo tsenge. 11Tsinane éngatatéa pepe gô tungune ésitatéké yangô na mbeego. Gôngaba nzaa na évunga éamabeea mavôni. Gôngeenanô étsutsuku éagomo ésienanô na mbeego. Gôngeenanô dôta émbégéa g’ôba.
12Ivô magébôme mane n’egébuéaka, anye nôngapanga ékuanô. Nôngatsôpu, na nôngakedu na gôndé ane atômani, buéyé mbe gô eba agéwanyéô, buéyé mbe gô eba atsôgôô. Nôngatemedu va mbene oma avôni na ane atômani gôébégô éainami. 13Engaba ndéô éamôsôba gôndé anye gôénigôa mabégô mami na gamavambanye n’ami. 14Nanôévéda te mbe nôkônza mitéma mianyô gôéba gébé na mikebanganô na nôngamenya énigôa. 15Menyani mbe memuene nanganôétsa éodo évôni na mavovia mangudi. Vane buéyé n’adudeoe wanyô asangamenya ékitsanganéa anye na asangoongôa ésiia. 16Nôngakabô te na tétee yanyô, n’eyee yanyô, na anayanyô, na kindanyô, na wee yanyô. Ayekani va gatse anyô nôngayôhu. 17Muetso angadudu anye te gôndé anye omami. 18Ivô ta na ôsôgé ôvo agô miôtsé mianyô ôngadimbana bobo. 19Sipani gô mabégô mami. Nôngadiia monyoe wanyô te gô mangô.
Jésus ameevéda gépanzéô saJérusalem
(Bono na Matt. 24:15–21, Marc 13:14–19)
20Vangeenanye migode miyekani miseta Jérusalem, nôngamenya mbe, ômahpanzô. 21Vane ane ahngaba gô Judée ahbusugé na gô ngongo amikôdimie. Ane angaba gô môsenge aJérusalem atongonéké n’angô. Ane angaba gô madeke, asanika na gô môsenge. 22Menyani mbe pitsiye dine te pitsi yagésisédéô dingeenanô éne émeevéda Matendeo MaNzambé. 23Te ngeba épôni gôndé ageto pitsiye dine, ane ahngadenganô andé na mimé, n’ane ahngadenganô ahnyuéséda ana. Gôébégô tsengene nyetso éngeena ti panda dipôni. Opisa aNzambé ôngeenanô gôndé omee. 24Asi tsengene angayôhu na mabaga. Angatsôpu g’ovéga gôékabô na gô tsenge diyekani. Ane asavamba na Nzambé angaviga gôéyeta makôdô maô gô Jérusalem ngu na vangoota ndéône yaô.
Génikéô saJésus Muana Amôma
(Bono na Matt. 24:29–31, Marc 13:24–27)
25G’ôba gôngatsiga émbégéa gô kômbéne, na gô ngondene, na gô minangamie. Asi tsenge yetso yava tsina angeena gomo na angadigaa na mikebanganô go nzongodi éamubue na éamiyôkiyôkimie miedi. 26Vangatanganéda oma mane mangabuéani, ayekani angawa te gô gomoe. Ane atôma na ngudi va gatse atsinane na diôbaye, angatatéa. 27Vane nôngeena me Muana Amôma natsutsuga va gatse adibôngé yag’ôba. Nangaviga na ngudi yetso n’obébayi ôtubédu ôndômbee okumakee wami. 28Vangabandôa étsiga mabégô mema, vétsani na bôgôani édimôe éanyô gôébégô génôtôgéô sanyô sava tsina géka gôpégôpé.
Meekédu maviga g’ôfiguier
(Bono na Matt. 24:32–35, Marc 13:28–31)
29Jésus amagunya oma tsava nedué mbe: Bononi géététége gééndô mbe ôfiguier. Bononi béyé n’evo éétété. 30Veenanye yabiye dibandôa épunzua nôsabômu mbe mbuuaye dimoba. 31Te mônongovo veenanye mabégô metso éma mabuéa, menyani mbe okumu aNzambé ôka gôpégôpé n’eviga. 32Me nanôbeenda na gô pie mbe muetso ahndé adôngani asangawa mbe mabégô mema masatsigaka. 33Obee na tsinane éngoota na éngadimbana. Ivô mavovia mami te môgunanza.
Bakani misiki gôéenéa Kumu
34Bakani n’ekena. Nômbiasinga mitéma mianyô miyungédu na madangi na miambô. Nômbiasinga mitéma mianyô mikatanganédu na mikebanganô miamane matsengene. Kabaga nyoo ône ôvôni ôdenga anye tsina na tsina anye gébé n’etasa mbe, mavooe te deo noo. 35Nyoo ône ôvôni ôngaba ga pagô évétsani gôékubéda omee muetso ava tsina. 36Nômbiatimba na vio. Vovoni na Nzambé ndéô yetso gédundé. Vane nôngaba na ngudi yebusuga metso mane mangabuéani. Na nôngatubéda anyene va mbene ame, Muana Amôma mbe: We tôanguaa.
37Miôsaa mietso Jésus ameekéda gô eba aNzambé. Ivô na dikoo amakea gôéeboga gô môkôdi ôtetu mbe Olivier. 38Oma muetso amamenegéa na kué na gô eba aNzambé gôémôôkô.
Okuqokiwe okwamanje:
Luc 21: TSV
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Alliance Biblique du Gabon (Bible Society in Gabon) 1983
