KEJADIAN 8
8
Daknij Beag Entoi
1Tapi Jenang pek Kisip ha Nuh ru dikdij binatag de mong besama-sama ru kek ku kateh bahtere. Jenang Kibeh pinoi kipoi ku seluroh bumi lei teu mula kisod. 2Dikdij kacoh teu ku kerop tik ru pintu teu ku langit bitutop, ru manik pen kihoj. 3Teu mula ya gusod. Telas 150 arik, teu ya ences. 4Ku arik ke-17 kateh gecek ketujoh, bahtere ajeh kibehenti ku nanek lod ku kawasan berlod-lod ku Ararat. 5Ku arik petame kateh gecek ke-10, teu ya gusod ru tumpog-tumpog lod pen mula bibakek.
6Telas 40 arik, Nuh kibuka tingkap de ya kibeh ku bahtere ajeh 7lalu kiterlas nuikor cep engag. Cep ajeh kihengheg diteh madeh ju bahtere ajeh lei teu ku kemil tik jadi sod. 8Sementare ajeh, Nuh kiterlas nuikor cep merpati kaha-panei teu ajeh ya sodka tok. 9Tapi cep merpati ajeh pek kikep tempat kaha-dep kerana teu lekat kitutop dikdij bumi. Jadi, cep merpati ajeh kijog nij nu bahtere. Nuh kiulur iteg ju tingkap lalu kien cep ajeh nu kateh bahtere. 10Nuh kipoj selame tujoh arik nij lalu kek kiterlas cep merpati ajeh nij. 11Ku idui ajeh, cep ajeh kijog sambel kien nuhenglei selak zaiton de lekat pai ku iseknot. Ju kenjehloh Nuh kipanei teu ya gusod. 12Kek kipoj selame tujoh arik nij lalu kiterlas cep ajeh nukali nij. Kali adeh cep ajeh pek kijog nu Nuh.
13Mase umur Nuh 601 tahut, ku arik petame kateh gecek petame, teu ku kemil tik ya gusod. Nuh kibuka ipelog bahtere ru kineng tik ajeh ya gusod. 14Ku arik ke-27 kateh gecek kedue, tik ya betol-betol sod.
15Telas ajeh Jenang Kiurok nu Nuh, 16“Holloh ju bahtere besama ru kenah hek, kekenon hek ru kekenah liknai. 17Enloh hol dikdij binatag de mong besama ru hek begei ha cep, binatag ces, binatag daknek, ru maklok de cekcip ku kemil tik supaye enai buleh naisui ru naibiak ku seluroh bumi.” 18Lalu Nuh kihol ju bahtere besama ru ikenah, ikekenon ru kekenah liknai. 19Dikdij binatag ces, binatag daknek, maklok de cekcip ku kemil tik, ru cep naihol ju bahtere ajeh peraknek-peraknek.
Nuh Kipesembah Korban
20Telas ajeh Nuh kibeh nanek tempat ennog pesembahan ha Yahweh. Kek kikot memerip ikor ju jap-jap jenis cep ru binatag halal, ru kitod dikdij ajeh sebegei pesembahan teknod nu Yahweh. 21Ngoi korban ajeh kipesenang sengik Yahweh, lalu Kek Kiserngik, “Eng doh pek Ngpecelaka bumi adeh nij kerana kelaku jehat manusia. Hamapen peniker enai jehat sejak naisanget, Eng doh pek Ngbinasa nij dikdij sinui, begei de ya Ngbeh kali adeh. 22Selagi bumi adeh lekat mong, doh pek dij musem ceknet ru kiknej, musem sengij ru beked, musem hoj ru manik, ru yah ru kelem.”
Okuqokiwe okwamanje:
KEJADIAN 8: AEH
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.