मत्ती 7
7
ज्येनगी गल्ती तेन्दा मेङगो
(लूका ६:३७-३८,४१-४२)
1थेमे ज्येन बात च्यि सासीन परमेश्वरगी खेराङ दोषी ईन सिन मिसिरस्यीत सिन ख्योकोनगी ज्येनला फलाना दोक्ते थे थोक्ते सिन मासेर। 2च्यिला सासीन ख्योकोनगी ज्येनला फलाना दोक्ते थे थोक्ते सिन सासीन परमेश्वरगी ख्योकोनोङ होथोक्तेराङ ईन सिन साला ख्योकोन दोषी ईन सिन सिओ। ज्येनला ख्योकोनगी जस्तो खिदुक परमेश्वरगीङ ख्योकोनला उस्तोराङ खिओ। 3ख्योकोननी मि गोःला स्यिक युक्पा थोङकान्ते थेमे दाक्पोन गोःलाचेन ताक युक्पाङ मोथोङकान्ते मि ईन। 4दोक मेन्दा ईन्सीन ख्योकोनगी दाक्पोनगी खाबाते छ्येज्यीक गल्तीराङ माताबा खाला खेराङ आज्यो न्वाकीते टेक्टेस्यिक गल्ती तेन्च्या मेतान। 5ख्योकोन चुक्तेन्दे ईन्दाका। थोङला दाक्पोन गल्ती छ्या स्येबा खि। थेमेकामा खेराङ आज्यो न्वाकी खाबाते गल्ती बात खि।
6थेमे परमेश्वरते सिराते छ्याःङ किला मातेर। थोक खासीन थेबेकी खेराङलाराङ खाप खाप्ला छिङछिङ खाला खाला मुरग्यो। थोकराङ खाला खेराङ हीरा मोती फाक्पाला पुला मातेर। थोक खासीन थेबेकी ठेक्पेकी ङेन्ला हिलोताङ सराबरी जोइओ।
परमेश्वरगी प्रार्थना ङेन्ला लेमु खिओ
(लूका ११:९-१३)
7थेमे ङा ख्योकोनला च्यि सिते सासीन खेराङला च्यि च्यि गोकीका आबा परमेश्वरला नाङ सि। थेमे थेकी तेरग्यो। ख्योकोनगी चाल्सीन पक्काराङ ङेत्क्यो। गो पेत्ला नाङ सि। थेमे परमेश्वरगी गो पेत्ला ख्योकोनला नाङने स्योक सिओ। 8च्यिला सासीन नाङ खित्कान गाङेला थेकी तेरग्यो। छोल्कान गाङेकी ङेत्क्यो। थोकराङ खाला गो पेत्ला नाङ सिरकान्तेबालाङ परमेश्वरगी नाङने स्योक सिओ। 9मिओनगी चुक खिते सिरच्येते बातराङ विचार खाला तोना। ख्योकोन नाङ सुईचेन फुज्युङतेकी स्योबेन नाङ सिरजीन लो या सो सिन दो तुला तेरगीते? 10थेमे ङ्या नाङ सिरजीन रूल जुम्ला याक सिते? 11ख्योकोन पापी मिकीनी खेराङ फिजाओनला जे तेरा फाप्च्येते ईन थेराङ तेरगीदुक सासीन स्वर्गने देत्कान्ते ख्योकोन आबा परमेश्वरगीनी झन नाङ सिरकान्ते गाङेला च्यि लेमु दुका थेराङ तेरग्यो।
12थेमे ख्योकोन खेराङला ज्येनगी चुक खित्स्यीत सिन सेम खिते, थेबालाङ थोकराङ खि। मोशेकी टिबाते परमेश्वर नियमताङ परमेश्वर बात खित्कान्ते मिओनगी खि साबाते छ्येते बात दिराङ ईन।
स्वर्गने डोच्येतेताङ नरककुण्डमा डोच्येते लामगी बात
(लूका १३:२४)
13थेमे स्वर्गने डोच्येते लामगी गोचेन टेक्टेस्यिक ओत। थे गोने खाला स्यू। सजिलो खाला स्यूक्पा थुप्च्येते जोदाते गोचेन नरककुण्डमा डोच्येते लामगी गो ईन। थे गोदुकी स्यूला सजिलो खाला ख्याम्बा थुप्च्येते लामला डोकान्ते मिचेन काल्बेई ओङगो। 14स्वर्गने डोच्येते लामला ख्याम्बाला दुक्पा ओङगो। ईन्सीनोङ थे टेक्टेते गोनेकी स्यूला दि लाम ख्याम्कान्ते मिओनगीचेन नोमुङ मिसिन्च्येते जुनी ङेत्क्यो। थे टेक्टेते गोनेकी स्यूक्कान्ते मिओनचेन टिक्पीईराङ ओङगो।
सुत्ताङ च्याङबो खाला देता फाप्कीते
(लूका ६:४३-४४)
15थेमे परमेश्वर बात खित्कान्ते मि ईन साला मेन्दे बात लोप्कान्ते मिओनताङ च्याङबो खाला देत। थेबाचेन सुङलाङ छ्याःङ मेलेबा मिक्किकान्ते लुक च्योकराङ थोङगो। ईन्सीनोङ थेबानी फारा च्योकराङ मेलेबा ईन। 16फलफूल दोङबो बातराङ विचार खि। थेरू गोन्दाते फलफूल ताला थे दोङबो रोग लै खाबाते ईन्दाना लेमुते ईन्दे सिन छ्या स्येक्यो। थोकराङ खाला ख्योकोनगीङ होथे मिओनगी खित्च्येते काम ताला थेबा चुक्ते मि ईन्दे सिन दाक डेला थुप्क्यो। च्यि चाङगी बुटाला अंगूर गोन्दाते थेमे सादुम चाङगी झाङला नेभारा गोन्दाते ख्योकोनगी थोङा ओत? 17-18रोग लै माक्याबाते दोङबोला लेमुराङ खाला फलफूल गोन्ग्यो। तर रोग लै खाबाते दोङबोलाचेन लेमु खाला फलफूल मोगोनो। 19लेमु खाला फलफूल मोगोन्च्येते दोङबो टिल्ला स्येइओ। 20थोगी बातचेन दिराङ ईन। च्यि सासीन परमेश्वर बात खित्कान्ते मि ईन साला मेन्दे बात लोप्कान्ते मिओनलाङ थेबे काम तालाराङ थेबा चुक्ते मि ईन्दे सिन ख्योकोनगी दाक छ्या स्येक्यो।
परमेश्वरगी साबाते माङेन्सीन च्यि ओङगीते
(लूका १३:२५-२७)
21थेमे ङाला माने खित्कान ईन सिन प्रभु खो छ्ये ईन सिन सिरकान्ते मि गाङेराङ स्वर्गे राज्यने स्यूक्पा मेङेदो। स्वर्गने देत्कान्ते ङे आबेकी खि साबा साबाच्योक खित्कान्ते मिओनकामा थेने स्यूक्पा ङेत्क्यो। 22था परमेश्वरगी न्याय खिते छोमु चुक ओङगीते सासीन स्वर्गने स्यूक्पा मेङेत्कान्ते मि काल्बेईकी ङाला ‘ए प्रभु, च्यि ङ्योकोनगी खुई मिनगी छ्य्वापेई परमेश्वरगी सिर च्युताते बात खाबा मेतानरो? थेमे च्यि ङ्योकोनगी खुई मिन लाकीन मिओनला खोबाते ल्हन्डीकओन तेन्गीन ताङा मेतान? थोकराङ खाईन च्यि ङ्योकोनगी खुई मिनगी छ्य्वापेई अचम्ब अचम्बतेन्दे काम काल्बेई खाबा मेतानरो?’ सिन सिओ। 23थेबेकी थोक थोक खाबाते ईन्सीनोङ ङाचेन थेबाला ‘ख्योकोननी परमेश्वरगी खि साबाते मेङेन्कान्ते मि ईन। ख्योकोन ङे मि मेन, दुरू मादेत, दुरूकी ग्युक,’ सिओ।
येशू बात थोकान्तेबेकी चुक खिता फाप्कीते
(लूका ६:४७-४९)
24बात दोक दोक ईन्देकी थाल्लासाक ङे साबाते बाततेबा ङेन्ला खि साबा च्योकराङ खित्कान्ते मिचेन लेमु खाला विचार खाला खाम्बा जोकान्ते मि च्योक्ते ईन। थोक्ते मिकीचेन लेमुते ठाउँ छाने खाला जस्तो ओङजीनोङ माराम्च्या खाला जग तिङला खाम्बा जोइओ। 25थोक खाईन जोबाते खाम्बाचेन लेमुते ठाउँदु जग तिङगीन जोबा ओतेकी खित्सादु हुन्डीबिन्डी खाईन छ्यार्बा ग्याप्कीन भल ग्याकीन वासीनोङ रामराङ मारामो। 26तर थाल्लासाक ङे साबाते बाततेबा थोलाङ खि साबा च्योकराङ मिक्किकान्ते मिचेन छ्याःङ विचार मिक्किता खाला खाम्बा जोकान्ते मि च्योक्ते ईन। थोक्ते मिकीचेन लेमुते ठाउँ छाने मिक्किता खाला जग तिङला खाम्बा जोइओ। 27थोक खाईन जोबाते खाम्बाचेन लेमुते ठाउँदु जग तिङगीन जोबाते मेन्देकी खित्सादु हुन्डीबिन्डी खिन छ्यार्बा ग्याप्ला भल ग्याला ओङजीन बराङ बुरूङ राम्ग्यो,” सिन सिदुक।
28येशूकी दि बाततेबा लाप्कीन सिन्नामेकी थेरू ओताते मि गाङे छक्क परे खासुङ। 29च्यिला सासीन थेकी थेबा खोपरोङ धर्मे गुरूओनगी च्योक खाला लोप्कीन मेतान। थेत्ताङ परमेश्वरगी बिन्दाते अधिकार ओतेकी थेकी आउदी लेमु खाला लोप्कीन ओतान।
Okuqokiwe okwamanje:
मत्ती 7: JUL
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1992 Wycliffe Bible Translators Inc. All rights reserved.
