IsAmbulo 21:9-27

Kwase kufika kimi enye yezingelosi eziyisikhombisa ezazinezitsha eziyisikhombisa ezigcwele izinhlupho eziyisikhombisa zokugcina, yakhuluma nami, yathi: “Woza lapha, ngizokubonisa umlobokazi, umkaWundlu. Yangithwala ngikuMoya yaya entabeni enkulu nephakemeyo, yangikhombisa umuzi omkhulu, iJerusalema elingcwele, wehla uvela ezulwini kuNkulunkulu, Ulenkazimulo kaNkulunkulu; ukukhanya kwawo kunjengetshe eliligugu elikhulu, linjengetshe lejaspi elicwebezela njengekristalu; inogange olukhulu noluphakemeyo, inamasango ayishumi nambili, nasemasangweni izingelosi eziyishumi nambili, kulotshwe kuwo amagama angawezizwe eziyishumi nambili zabantwana bakwa-Israyeli. Ngasempumalanga amasango amathathu; ngasenyakatho amasango amathathu; eningizimu amasango amathathu; nangasentshonalanga amasango amathathu. Ugange lomuzi lwalunezisekelo eziyishumi nambili, nakuzo amagama abaphostoli abayishumi nambili beWundlu. Owayekhuluma nami wayenohlanga lwegolide ukuba alinganise umuzi, namasango awo, nogange lwawo. Umuzi wawunezinhlangothi ezine ezilinganayo, ubude bawo bungangobubanzi bawo; walinganisa umuzi ngohlanga, amastadiyu ayizinkulungwane eziyishumi nambili. Ubude nobubanzi nokuphakama kwawo kuyalingana. Yalinganisa ugange lwawo, izingalo eziyikhulu namashumi amane nane, ngesilinganiso somuntu, okungukuthi, sengelosi. Isakhiwo sogange lwawo kwakuyijaspi, nomuzi wawuyigolide elicwengekileyo, linjengengilazi ecwebezelayo. Izisekelo zogange lomuzi zazihlotshiswe ngawo wonke amatshe anenani. Isisekelo sokuqala sasiyijaspi; eyesibili isafire; eyesithathu ikalkedoni; eyesine iyisimaragidu; Eyesihlanu isardoniksi; eyesithupha yisardiyu; eyesikhombisa ikrizolithe; eyesishiyagalombili ikrisolite; eyesishiyagalolunye yitopazi; eyeshumi yikrisoprasu; eyeshumi nanye yihiyakinte; eyeshumi nambili, i-amethiste. Amasango ayishumi nambili ayengamaparele ayishumi nambili; isango ngalinye lalingeleparele linye, nesitaladi somuzi sasiyigolide elicwengekileyo njengengilazi ekhanyayo. Angibonanga ithempeli kuwo, ngokuba iNkosi uNkulunkulu uMninimandla onke neWundlu bayithempeli lawo. Umuzi awudingi ilanga nenyanga ukuba kukhanye kuwo, ngokuba inkazimulo kaNkulunkulu iyawukhanyisa, nokukhanya kwawo iWundlu. Izizwe zabasindiswayo ziyakuhamba ekukhanyeni kwawo, namakhosi omhlaba aletha kuwo inkazimulo nodumo lwawo. Amasango awo akayikuvalwa nhlobo emini, ngokuba ubusuku abuyikuba khona lapho. Bayakungenisa kuwo inkazimulo nodumo lwezizwe. Akuyikungena kuwo lutho olungcolileyo, nawo wonke amanyala namanga, kuphela abalotshiweyo encwadini yokuphila yeWundlu.