Matteyo 16
16
Awahan Farisei Etamijani
Mk 8:11-13; Lk 12:54-56
1Ofwonni Farisei iko Saducehyen ikemyere Yesu ette ifiyo inyi itahutaniere etamijani on ottu’to t’edou. 2Itarraŋ inyi jihosi ojo, Al iddorro oloŋ ette itado edou ijatta tai jo afaŋ adi motye. 3Bwo fe ta amotye hanyik al ado edou bwo edisi owoni ijatta tai jo ottu adi ahide ahana. Imijana tai ahode awoyo hiram ono etamijanita huno edou ati ibyaŋata tai imijana etamijanita huno oŋitek huna. 4Awahi nelahaji on orroho’to etamijani, ati obeŋi adi itahutani obo jihosi arari etamijani ono Yona. Obusak inyi isi ette leten addi.
5Ninya lafanyi leyiyanak honyi aŋati hari tole, ogiluni isi jo eguuno isi emunio. 6Ojo Yesu jihosi, Ihumata mijo. Heruhoto abula huno Farisei iko huno Saducehyen. 7Attati isi ikikyana ta ahwattek hosi ojori, Ikyana inyi ihwania nyo obeŋ emune jihohoi. 8Omijak Yesu ana ette ifiyo isi, ?Nyo ikikyanati tai ta abyaŋan imune? Omuta neruk hatai. 9?Ibyaŋata tai itaniŋuna? ?Ibyaŋata tai igotyete emunio miet hun aharak ni jyo laati esiha atomwana miet? ?Omukaja afejin huno ebenyiti munio hun iduhuna tai? 10Bwo fe emunio hattarik jyo laati esiha atomwana aŋwan, ?Omukaja afejin huno ebenyiti munio hun iduhuna tai? 11?Aŋai ibyaŋata tai itaniŋuna jo abeŋ ni ekyana te eram ono emune? Ihumata mijo abula huno Farisei iko Saducehyen. 12Tania itaniŋuni isi jo obeŋ inyi ittittoyo isi ta abula huno emune, ati ikyana inyi te ettiyenio ono Farisei iko Saducehyen.
Elyet Petro Neruk Honyi
Mk 8:27-30; Lk 9:18-21
13Ninya afany Yesu lifau Cesarea Filipi ette inyi ifiyo leyiyanak honyi ojo, ?Ojori laati ŋai Lonyi tulo? 14Ette isi itarraŋ, Ojori omuk ara inyi Yoane Batista; bwo omuk ojori, Elija; ojori omuk, Yeremia kuyya bu obo eyani sayyo. 15Attati inyi ifiyo isi ojo, ?Ati ijatta tai ta ahwattek hatai ani ŋai? 16Attati Simone Petro itarraŋ jihonyi ojo, Ira iye Kristo, Lonyi Hollum leswoni. 17Ojo Yesu jihonyi, Simone lonyi Yona ofwonni adi emuniti arryai jihoi nyo obeŋ tulo itahutak ania jihoi, ati Monyoŋ ette dou itahutak iye. 18Bwo fe ajo ni jihoi, iye Petro bwo ihide amorwo ana aduhok adi ni eklesya#16:18 eklesyaEluluŋ heruhok jyo Hollum. hoŋ bwo fe obeŋ adwaran ono naye agalik inyi. 19Esyo adi ni jihoi amuhottahyen huno olobye ono Hollum bwo fe erre daŋ hun ifit iye ta afau, ifitanie adi bwo fe isi lidou; erre daŋ hun ihohi iye ta afau, ohohinie adi bwo fe idou. 20Tania iramak inyi leyiyanak honyi hotobyaŋahi iramani omuk laati jo ara inyi Kristo.#16:20 KristoAn ojo onyimoto olo Hollum.
Ekiluna Yesu Naye Honyi
Mk 8:31—9:1; Lk 9:22-27
21Ta asaa ania itteryo Yesu itahutana leyiyanak honyi jo oŋida inyi alo Yerusalem bwo fe ittigemye adi amarwak iko ehumak eleittaha bwo egyorok inyi. Ojo inyi bwo fe jo, ottohori adi inyi ati ihalu oŋitek hunihoi ibuhu adi inyi. 22Iyaro Petro inyi addi kai ette ikyana ojo, Hobu, ijara Hollum olwak iye. Helaha erre huna ofwonni jihoi. 23Oyito Yesu ette ikyana jyo Petro ojo, Ihuto tehalu hoŋ addi Sitan. Ira iye ahetipalani hoŋ nyo ibeŋ iye igigilo egigilita huno Hollum ati igigilo iye egigilita huno laati.
24Ojo Yesu jyo leyiyanak honyi ojo, Al awak obo atulo ijifatyo ani ijara inyi hetehai ahwan honyi, hotolororo akruce honyi, hetejifatye ani. 25Al awak obo atulo italahuna nesu honyi italitohi adi inyi, ati lya al isyo’to nesu honyi te eram hoŋ orumak adi inyi. 26?Anyo adi ayiji honyi al opocou atulo erre daŋ hutta fau bwo nesu on osyo fur olitohi? ?Ta anyo itinyyaŋak obo atulo nesu honyi? 27Nyo ottu adi Lonyi tulo iko anjelohyen honyi ta akwatan ono Monyonyi. Ta asaa ania oduma adi inyi laati daŋ te ehanita hosi. 28Ahode eramak ni itai jo, itoŋoi omuk dini hul obeŋi adi igonyuni naye many igonyunierek isi Lonyi tulo ol ottu a Hobu hosi.
Okuqokiwe okwamanje:
Matteyo 16: LOT1969
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
This text was originally published by the British and Foreign Bible Society in 1969.
