Matteyo 12
12
Agila Heyiyanak Ema to Sabato
Mk 2:23-28; Lk 6:1-5
1To oloŋ sabato#12:1 sabatoAra inyi neyom ono laati Yudea, oloŋ ono ayiri. ania adaha Yesu ta atwa matta hima. Oniamai leyiyanak honyi ette isi giluna omuk ema ette ryaja. 2Igonyuni Farisei isi ette jaran jyo Yesu, Imijye, ihanie leyiyanak hoi ariŋ on odwa’to lihaniere to oloŋ sabato. 3Bwo Yesu ette itarraŋ jihosi ojo, ?Ibyaŋata tai ihenuna erre hunya ihanio Davide iko laati honyi laniamai isi? 4Ojiŋak nya inyi ihaji ono Hollum ette ŋiyo bwo fe isyo inyi omuk jyo hul owoni’to ikonyi. Isi emunio hun odwari’to hun obeŋ tulo oŋiyo arari lehumak hama. 5Ihwa igyoroni ifahita jo to oloŋ sabato itapwahi ehumak efahita huno sabato al igyamai isi ihaji imojit eneittok ati obeŋi isi ipali. 6Eramak ni itai jo, owon obo dini al agalik aji imojit eneittok. 7Itimoti tai awoyo hiram ono nekyana on ojo’to, “Attifya ni laati hul omehinie tajya obyaŋara hul isyori ehumita.” Kuyya imijana tai eram ana ibyaŋata tai iŋototo hul obeŋi ihanie on orroho. 8Nyo ara Lonyi tulo Hobu olo sabato.
Atulo ol Oye Hani
Mk 3:1-6; Lk 6:6-11
9Idyaharo inyi amaji nya ette jiŋana ihaji imojit hosi. 10Owon dia obo atulo ol oye hani honyi. Awahi laati teyya rasana Yesu ette isi ifiyo inyi ojori, ?Oyyu al itaŋidari atulo to oloŋ sabato? 11Attati inyi ifiyo isi, ?Owon adi obo atulo t’ehiji hatai ol obeŋ adi akafu aker honyi t’ewure addi kuyya okwaharo inyi dia to oloŋ sabato? 12Oyyu atulo bebe agalik aker. Oyyu ehanio jyo laati on oyyu to oloŋ sabato. 13Ette inyi jaran jyo atulo alya, Onitok aani hoi. Ette inyi nitonia ette aani honyi ŋidari ihwa aani ebotye. 14Teyya ofwoi Farisei alet iwwahari jo aŋai adi ettoho Yesu.
Apit ol Onyimuni
15Omijak Yesu erre huna ette inyi busaro amaji nya. Ati ijifarai laati arryai inyi ette inyi itaŋida isi daŋ. 16Ifak inyi isi jo, oŋida isi obeŋi iramani eram honyi jyo laati. 17Oŋida itasiruni ekyanita Hollum hunya ikyana eyani sayyo Isaya ojo,
18“Imijyete apit hoŋ al anyimu ni,
Inyi alya ol omuno ataji hoŋ bebe.
Esyarak adi ni Oloyiri hoŋ jihonyi
Bwo fe ittittoyo adi inyi nekyana ono aŋoco jyo paganohyen.
19Obeŋ adi inyi aŋalafatye iko aati bwo fe obeŋ ohosohita.
Obeŋ adi obo itaniŋu etuk honyi te ekoi.
20Obeŋ adi inyi owur osiholoti on oboina’to,
Bwo fe obeŋ adi inyi itaduny allomo on ofurui’to
Many agalihiniere inyi ta aŋoco on obis’to.
21Bwo attadi paganohyen iyihina ta afure honyi.”
Yesu iko Belsebuli
Mk 3:19-30; Lk 11:14-23; 12:10
22Iyaŋunie isi jihonyi atulo ol owon iko ajok an itaŋodo inyi bwo obeŋ inyi oremik ikyana. Attati Yesu itaŋida atulo alya ette inyi ikyana bwo fe omijo. 23Illillihai eluluŋ wati daŋ ette jaran, Atulo alya, ?inyi ahode lonyi Davide? 24Itaniŋuni Farisei ette jaran, Ifuha atulo olo ajohin ta afure Belsebuli hobu olo ajohin. 25Omijak inyi egigilita hosi, ette jaran jihosi, Al orryomonie laati hutto lobye ta ahwattek hosi itatturi adi olobye ania, bwo fe al aŋalafai aati hutta haŋ kuyya bu hutto miji ta ahwattek hosi, obeŋi adi isi itoŋoi arabotye. 26Al ifuha Sitan egyamak honyi orryomoro inyi hama, tania, ?aŋai adi oremik olobye honyi itoŋo? 27Kuyya efuha ni ajohin addi ta afure Belsebuli, ?ta anani fure ifuhattai lejifak hatai isi? Tania arai isi ahaŋotok hatai. 28Ati kuyya efuha ni ajohin addi to Oloyiri olo Hollum ottu olobye Hollum jihatai ahode. 29Obeŋ adi obo atulo oremik jiŋana ihaji lottir liyari asaŋ honyi hobeŋ inyi ifitak olottir alya ahosyere. Nyati inyi ihalu otuhoro erre ta haji honyi. 30Lya el ebeŋ’to egyama ikoŋ ara inyi amyotononi hoŋ, bwo itasarrayo lya al ebeŋ’to esuduha ikoŋ. 31Tania ajo ni jihatai jo, obusak adi Hollum eyyata daŋ huno laati iko nemoriti hosi, ati lya ol omoryo’to Oloyiri ol Olibo obeŋ adi Hollum obusak inyi. 32Lya al ikyana’to on orroho jyo Lonyi tulo obusak adi Hollum inyi, ati lya al ikyana’to on orroho jyo Oloyiri ol Olibo obeŋ adi onyurak abusana, ara dwo bu ta afau ana kuyya bu ta afau on ottu’to.
Ayyani iko Aŋer Honyi
Lk 6:43-45
33Oŋerik ayyani on oyyu’to aŋer hun oyiji, bwo fe ayyani on orroho’to oŋerik aŋer hun orrohoji. Tania omijani laati ayyani ta aŋer honyi. 34Irata tai ihwa amunok, ittallihoto tai ikyana on oyyu nyo orrohoji atajya hatai. Nyo ikyana etuk erre hun ofwonni’to to taji. 35Ojiŋuni erre hun oyiji’to to taji tulo ol oyyu’to, bwo fe ojiŋuni erre hun orrohoji’to to taji tulo ol orroho’to. 36Eramak ni itai jo iholoŋ ono aŋoco, oŋot adi Hollum laati te ekyanita daŋ hunya ikyanarai isi asai. 37Nyo te ekyanita hun ikyanati tai inyurana adi itai abusana, bwo fe ta omuk ekyanita asai hun ikyanati tai inyurana adi itai aŋoco.
Attifya Nelahaji on Orroho’to Etamijani
Mk 8:12; Lk 11:29-32
38Ojori omuk Farisei iko egyorok jihonyi ojo, Hettiyanani ewak hohoi igonyuna obo etamijani jihoi. 39Itarraŋ inyi jihosi ojo, Orroho nelahaji ana bwo omesye isi Hollum. Ottifyai isi etamijani, ati obeŋi adi itahutani jihosi obo etamijani arari ono leyani sayyo Yona. 40Nyo ihwa ninya awanari Yona oŋitek hunihoi iko arwejin hunihoi ihohe hami, owon adi bwo fe Lonyi tulo oŋitek hunihoi iko arwejin hunihoi itwa ilume. 41Odyotoi adi laati hutto miji Ninifa iŋocere nelahaji ana nyo iloiti aati Ninifa atajya hosi ninya ittittoyere Yona jihosi. Ati imijyete owon dini obo al agalik’to Yona. 42Odyoto adi nobu otto ŋati ihorroŋ iŋocere nelahaji ana nyo ottu nya inyi to fau an alama’to itayiruniere olofyoro huno Solomone. Ati imijyete, owon dini obo al agalik’to Solomone.
Acohuno ono Ajok on Orroho’to
Lk 11:24-26
43Al obusak ajok on orroho’to atulo adaha inyi ihotohoto ittifyari amaji yiri, ati obeŋ inyi onyurak obo. 44Tania ojo inyi jo, Acaharo adi ni jyo atulo odwo edyehuno ni. Al afany inyi dia onyurak inyi ataji tulo ahania, an alibo bebe bwo ilaman. 45Tania olo inyi rumana omuk ajohin hattarik hun orrohoji’to agalihini inyi, ette isi jiŋana itwa tulo lya ette manya dia. Tania orroho ihwania jyo atulo alya agalik ninya hosyere. Ihwa ania ottu adi arrohoji jyo laati hul orrohoji’to hulo nelahaji ana.
Illarak Yesu iko Honyonyi
Mk 3:31-35; Lk 8:19-21
46Al ikyana inyi jyo eluluŋ wati, owotya honyonyi iko illarak honyi ilet nyo awahi isi ikyana ikonyi. 47Iramak obo atulo inyi ojo, Imijye honyohoi iko illarak hoi owotyai ilet, awahi isi ikyana jihoi. 48Ati ojo inyi jyo alya al iramak’to inyi jo, ?Ŋai iyaŋ? ?Haŋai illarak hoŋ? 49Ette inyi ihalamana aani honyi jyo leyiyanak honyi ette jaran, iyaŋ iko illarak hoŋ hulo. 50Lya al ihanio’to awahan Monyoŋ ette dou inyi illaŋ iko hanioŋ ojo iyaŋ.
Okuqokiwe okwamanje:
Matteyo 12: LOT1969
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
This text was originally published by the British and Foreign Bible Society in 1969.
