Matius 6
6
Avakwa enabwa umbutu dugwit, wogorugu dogop wene
1Yugirigya lagagirik, Yesus en wene ambi inim yugirigya dugwit, “Avakwa inil hinisapwak yiluk, inivaga avakwa sek okbisilin nagu hinisaoen, dibagu dogones. It avakwa anderogo inivaga ogarumwi halok, Henasin mbogot vaga menda en onggo wokherayogonbuk.”
2“It ap enendawi enagavoval ovagak dugwit yagalagwi ako, ‘Avakwa en an iya nombarupwak yiluk,’ samban ogasagwima inim, suvaga inim, ‘Anderogo ogagyo,’ yiluk, yugeregek nelagwi atma, henangge avakwa ininggidek menda wogurugu dugwit, it ogasagwi hak hit anderogo ogarubuk. It ap anderogo ogasagwi vaga avakwa en vok yugerelagwi ako, onggo anderogoat hedelagwi, yiluk, avyarat yukheraliga. 3Hit andi, henangge avakwa ininggidek menda wogorugu dugwit, ‘An nangge avakwa anderogo wogirigi o,’ yiluk, it hinim agarwik ako anderogo mondok yugerabuk. 4Ata, mbauk erogo avakwa inivaga dekma hwilagago wogurugu dogones. Eke, mbauk hwilagago wogurugu hiniselok, hwilagago ogasagwi Henasin il haliga akoen onggo wokherayogon, yiluk, yukheraliga o,” yugeragagi.
Samban ogagu dogop wene
(Lukas 11:2-4)
5Wene ambi inim yugirigya dugwit, “It ap enendawi enagavoval ovagak dugwit yagalagwi akoen, avakwa inil inisapwak en yiluk, samban ogasagwima inim, sup venakodek-venakodekma inim, andenam mendek dugwit, samban ogarup enendawi hunik ombasagwi hak, hit samban anderogo ogagu dogobuk. It ap anderogo ogasagwi vaga avakwa en vok yagalagwi ako, onggo andiat hedelagwi o, yiluk, avyarat yukheraliga. 6Hiren samban ogarup ombasagwi halok henamwa nunggugu dogomundik, sup lakbetaluk, Henasin hinil helagwidek ako nggino yugugu dogones. Eke, nggino yugugu hiniselok, Henasin mbauk hwilagago ogasagwi il hinisaliga akoen onggo wokherayogon.”
7“It ap weram Yakuri dek menda en, ‘Nenane adup yugisagwi vaga aruk hulisogon,’ umbutu dugwit, samban endak ogagao ako inim abelen ovaga hondalogo yagalagwi hak, hit samban ogagu dugwit anderogo ogagu dogobuk. 8Hit henangge dek halok hogop ombasagwi ako andi, ao nggino yugigitek dugwit, Henasin ovok ilup atma, it ap andi menda en yagalagwi hak hit anderogo yugu dogobuk. 9Ata, hit samban yerogoat ogagu dogones:
‘Nenasin mbogot vaga menda wa.
Hat hinis mondok adik enek agindik atma, siyabagalagwi o.
10Nit Hat havema dogoguluk, okbininima.
Mbogot vaga Hat hendawi ombasiga menda ogasagwi hak,
nit wen vaga yoma anderogoat ogagu dogoguluk, okbininin o.
11Yogak yi vaga nenagarom naup wane-wane wokneran o.
12Eke, it ap nit weyak erogo bininelagwi ako, niren enomaduk ninunggut erogo biselagwi hak,
Haren nit nenomaduk hinggut erogo bininggu dogwen o.
13Eke, weyak ogarupwak en yiluk, nenavut mbanggya haoen, hekbininabuk, ninim dogwen o,
eke, at mondok weyak menda akoen weyak okninipu haoen nenagap wendaru o,’
yiluk, yugugu dogones.”
14“Hiren avakwa enomaduk hinunggut erogo bugu hiniselok, Henasin mbogot vaga menda ogo hit henomaduk mondok inggut erogo bigigayogon. 15Eke, hiren avakwa enomaduk hinunggut erogo bigitek hiniselok andi, Henasin en hit henomaduk mondok inggut erogo bigigayogonbuk o,” yiluk, yugeragagi.
Ala ake yiluk, erom hunis dugwit samban ogagu dogop wene
16Yesus en wene ambi inim yugirigya dugwit, “Hiren Ala ake yiluk, erom hunis dugwit, samban ogagu hiniselok andi, it ap enendawi enagavoval ovagak dugwit ogasagwi akoen, ‘Nit Ala ake yiluk, erom hunis dugwit, samban ogagya neyapwak en,’ yiluk, enelose abwa edok erek dugwit okhedelagwi hak, hit anderogo dugwit, samban ogagu dogobuk. It ap anderogo ogasagwi vaga avakwa vok yagalagwi ako, it onggo anderogoat hedelagwi atma yiluk, avyarat yukheraliga o. 17-18Hit andi, Ala ake yiluk, erom hunis dugwit, samban ogarup ombasagwi halok, avakwa inil hinigitek Henasin helagwidek akoen il hinisapwak yiluk, nggamo wakhidugwi, hiniris sisik mbilin hidugwi, okbaluk samban ogagu dogones. Anderogo ogagu hiniselok, hit mbauk hwilagago ogasagwi At Henasin il hinisaliga akoen onggo wokherayogon,” yiluk, yugeragagi.
Henangge-henangge wonggalogo mbogot vaga betaup wene
(Lukas 12:33-34)
19Wene ambi inim yugirigya dugwit, “Wen vaga yoma henangge hudu-hudup libilit nunggwigya, isip bagya, it ap enonggop welagwi menda en sup masalogo baluk, henangge wa nunggugwi, ogasagwima yoma henangge wonggalogo batugu dogobuk. 20Ata, hudu-hudup libilit nunggwigya, isip bagya, it ap enonggop welagwi menda en sup masalogo baluk henangge wa nunggugwi, ogasagwidekma mbogot vaga andoma henangge wonggalogo betelagu dogones. 21Henangge-henangge wonggalek werekma, henendawi ogo, andoma-at dogosogon o,” yiluk, yugeragagi.
Heneyave vaga awiya okhidugu dogop wene
(Lukas 11:34-36)
22Yugirigya lagagirik, ambi inim yugirigya dugwit, “Hit heneyave indwa yevedek ovagak awiya ako andi, hinil aro. Hit hinil sek agipik halok, heneyave ovok erogo awiya dogogup ovara, 23hinil weyak werek halok andi, heneyave ovok erogo o hwiserek ovagak dogogup o. Andi halok, o awiya henendawima agarik ako dek agya dugwit, o hwis iri halok andi, heneyave mondok hwiserekma dogop atma, dibas,” yiluk, yugeragagi.
Enasin mberen dogop andi meyan wene
(Lukas 12:22-31; 16:13)
24Yugirigya lagagirik, ambi inim yugirigya dugwit, “Ap ambien asini mberen inim hondalek dugwit eneyavup ogagya dogop andi meyan. Iperen eneyavup ogarit lagya halok, ambi anggon imbita dugwit, ambi endawi hunik imbita dogosogon, eke ambien ogarup yugugu ako, seve erogo ogagya dugwit, ambien ogarup yugugu ako anggon imbita dogosogon. Hiren At Ala inim, henangge-henayoparip wen vaga menda ako inim, iperen henendawi dambulik vaga musek laup andi, meyan.”
25“Andi halok, hiren, ‘Niniluk dogoguluk, nenagas-nenagarom nano namwi? Eke, neneyave sek dogoguluk, nenasum nano yikhedamwi?’ yiluk, henape wenggenggu dugwit henendawi anggin dogobuk, yiluk yukheraliga. Nelagwi menda andi iya, eke, hiniluk dogop andi horogat ombasagwi? Yikhedelagwi menda andi iya, eke, heneyave sek dogop andi, horogat, umbutu dugwit, henendawi anggin agipik? Dek. 26Swa mbogot vaga nelagwi andi dibas. Iren awi yakhidugwi, eke enggen heralogo ndanggi vaga beta nunggugwi, anderogo ogasagwidek ovara, hit Henasin mbogot vaga menda enat enagarom wogeraliga. Swa andi, At endawi hunik horogat hegek, Ala en enagarom wogeraliga ovara, hit andi, At endawi mondok hunik wisane atma, wokherayogonbuk yiluk yagalagwi? 27Hit ambi vage hambup amor ari wagya hegek, ‘Niluk ambi inim dukluk, hambup sek ai,’ yiluk, henendawi anggin wenggelisagwi vaga, ndatak okbigigayogon ombasagwi? Dek o.”
28-29“Anderogo dek hegek, nggarogo yiluk henagap vaga yikhedaup menda adigat henendawi anggin agipik? Yo hundumbuk mot inggya lagarik agare enggen yiliga ako dibas. At Salomo ap mondok ombok yum pakian sek adigat yirik halok, avakwa en, ‘Wi,’ yiluk, vok yugu lagagwa ako ovara, at andi horogat. Yo hundumbuk agare enggen halok andi, yavup ogagya, digi danggya, ogasigadek ovara, Ala en okbagya hegek, agare enggen mondok sek adigat yiliga atma yiluk, yukheraliga o. 30Yoangga-hedangga weram menda yogak mudi-mudis inggya, eke, heveret sakni baguselok, hali ninggya, ogasiga ovara, At Ala en elese sek erogo baliga atma, Aren yoangga ako madugat okbagya, eke, hit avakwa henendawi Ala des erogo avyarat ombasagwidek menda yi, hit mondok iya-at okbigigya, ogarisogonbuk ombasagwi? 31Ogarisogon atma, henendawi anggin dugwit, ‘Nenagas-nenagarom nano namwi?’ Eke, ‘Nenasum nano yikhedamwi?’ yiluk, andi adigat henendawi wenggelit nelagwi andi moga. 32It avakwa Ala inunggut menda akoen, andi menda ovok erogo havidit nelagwi ovara, hiren ‘Nit andi menda dek o,’ yiluk, hogop ombasagwi ako hit Henasin mbogot vaga menda ilup agarik. 33Hit endak Henasin avema bigigaup ‘Ai,’ umbutwi, eke, At sek adigat ogarup ombasiga ako, hit wane-wane ogagu dogop mitwis, ogagu dogones. Anderogo ogagu hiniselok, hiren ‘Andi menda dek atma,’ hogop ombasagwi ako inim ovok erogo ovaga hondalogo wokhirigya hagup. 34Heveret ogarup hegek, yogak henendawi anggin dogobuk. Heveret ogarup menda ako andi, heveret-at henendawi wenggelup. Yogak ogarup henendawi wenggelup ako andi, anggin mondok iya atma, hutun ogarup inim henendawi wenggenggu dogop andi moga o,” yiluk, yugeragagi.
Okuqokiwe okwamanje:
Matius 6: nbq2013
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
