Lukas 20
20
“Sa inis vaga ogasiga?” yiluk, yugogogwa wene
(Matius 21:23-27; Markus 11:27-33)
1Hivis ndugwis ambi vaga At Yesus Ala awi valekma mbumbumu dugwit, wene mamulirigya, Sek Wene yugirigya, ogagyama, ap imam-imam enasini inim, it Ala wene vagago agarwik menda inim, ap ombok-ombok inim, At adema wagagwa. 2Adema wagu lagagwarik, At yugugu dugwit, “Hat yi ogagek ndi ogagek ogasiga ako, sa inis vaga ogasiga? Saen Hat yukhogogirikmu ogasiga? Yukneran.”
3Yugugu lagagwama, At Yesus en it yugirigya dugwit, “An ogo, wene ambi hemekhinisayogon. 4At Yohanes ima wombabugu lagagi andi, Ala mbogot vaga menda en yugogogirikmu wombabugu lagagi a, ata avakwa en yugogogwarikmu wombabugu lagagi a? Hit ogo yukneres!”
5Yugirigya lagagimu, ir-it wene mbanggu dugwit, “Niren, ‘Ala mbogot vaga menda en yugogogirikmu ima wombabugu lagagi,’ yugugu niniselok, Aren iri dugwit, ‘Eke, andi halok, hit hinilup helan, nggarogo yiluk at avyarat embetetek welagagup?’ yuknerayogon. 6Eke, it avakwa ovok erogo, ‘At Yohanes andi, navi Ala en yugugu hegek yugeraliga menda’ ombasagwi atma, niren ‘Un avakwa en yugogogwa vaga ima wombabugu lagagi,’ yugugu niniselok, ayai! Helep vaga nenarusogom o,” yiluk, ir-it wene mbanggugwa. 7Wene mbanggu lagagwarik, At yugugu dugwit, “At Yohanes ako, saen yugogogi vaga ima wombabugu lagagi ako nit ninunggut,” yugogogwa.
8Yugugu lagagwama, At Yesus en, “Andi halok, An ogasiga yi ogo, saen yuknogogirikmu ogasiga andi yukherayogonbuk,” yiluk, yugeragagi.
It Yakuri menda en Yesus nenanggon umbutu lagagwama, wakhegek ap awi yago malogo welagagwa vaga yugeragagi wene
(Matius 21:33-46; Markus 12:1-12)
9Andi yugirigya lagagirik, wene wakhegek it avakwa wisane yugeragagi ambi yi: “Ap ambien anggur awi yatu lagagirik, enggen mbalogo nin it hidugwi, nin at wogugwis, ogagu dogopwak yiluk, at awen werek ako ap malogo dogomenda mondok okbisiluk, o adumu andoma ndugwis iya erogo dogomindik, wasogon yiluk, lagagi. 10Lagagirik andoma dugwit, anggur enggen yugup ako mbalup amor ari wagya hegek, it at eyavup malogo dogopwak yiluk bisiluk lagagi akoen, enggen yugup nin at angge ako mbalogo woknirupwak en yiluk, ayeloman ambi enadema lakba wagagi. Lakba wagagi ako wagya lagagimu, it at eyavup yagoma malogo agarwik akoen ayeloman wagagi ako yo yawi vaga wakbagu lagagwarik, enggen mbalogo bagagwa ako wogigitek un ovadik eyami vaga lakbagagwa.”
11“Un ovadik eyami vaga lakbagagwa amwa lagya lagagimu, ayeloman adik ambi lakba wagagi. Lakba wagagi wagya lagagimu, at ogo, eyave yo wakbagu lagagwarik, anggadi warogo enggen mbalogo wogigitek un ovadik lakbagagwa. 12Lakbagagwa amwa lagya lagagimu, ayeloman adik ambi lakba wagagi. Lakba wagagi wagya lagagimu, at ako ogo, yo warogo wibagagwa.”
13“Ap lakbisa wagagi ako anderogo adigat okbugu lagagwama, ap awen werek akoen iri dugwit, ‘An nggarogo ogarik? An nabut nendawi hunik yi, lakbayogon. Lakbagya neyalok, at agayuk wutu dugwit wugu sami a, dek a?’ yiluk, lakba wagagi.”
14“Lakba wagagi ako wagya lagagimu, it ap at eyavup yago malogo welagagwa akoen abut wagya inil hugu lagagwarik, ir-it wene mbanggu dugwit, ‘Abut mavorangge hedaup yi atma, mondok wakbaluk, mavorangge nirat hedasogom o,’ yiluk, 15avyak ako wagya lagagimu, eyave yavup yagoma en haryogo weram wibaluk, mondok min-at watugwa,” yiluk, wene andi Yesus en wakhegek yugeragagi.
Wakhegek yugirigya lagagirik, ambi yugirigya dugwit, “Andi ogagagwa ako at enasin awen werek ako en it ap andi, nggarogo okbisami embetep? 16Dek. At wagya dogomindik, it eyavup malogo welagagwa ako enarogo bisiluk, enavoloma it ap hunogo menda malogo dogopwak yiluk, mondok okbisayogon o,” yiluk, yugeragagi.
Yugirigya ako it avakwa hunggu lagagwarik, [wakhegek andi it Iserali menda enavok iri halok, anderogo okbininaup ai, yiluk,] “Anderogo ogarup moga o, Nenasin,” yugogogwa.
17 #
Mazmur 118:22 yokhanes. Yugugu lagagwama, At Yesus en it biginigu lagagirik, wene yugirigya dugwit:
“‘It helep o valisagwi menda akoen,
o vanggu dugwit, helep ambi mbobagagwa ako,
mondok-mondok helep owak ndalaga o,’
yiluk, yagagi Ala wene dirup warek ako andi, nggarogo yiluk dirup warek agarik ombasagwi?”
18“It avakwa helep andi vaga yakhiduguselok, eneyave yungguk-bogok erogo wambusogom, eke helep andien avut endenogo avakwa enovaga sopabugu halok andi, eneyave mondok ilumukmut erogo okbugu dugwit, huvuwelanggen ovagak okbisayogon o,” yiluk, yugeragagi.
19It Ala wene vagago welagagwa menda inim, it ap imam-imam enasini inim, en, “Wene wakhegek yagas andi, nit niniselok yagas ai,” yiluk, yedok hugu lagagwarik, o andi vaga Yesus vagaruguluk, ogagagwa ovara, avakwa enalon en mbup yagagwa.
Ap Kaisar ake baup yugogogwa wene
(Matius 22:15-22; Markus 12:13-17)
20It Ala wene vagago welagagwa menda inim, it ap imam-imam enasini inim, akoen Yesus inil wolok nagu dogopwak yiluk, enaori lakbogogwa. Enaori lakbogogwa akoen, “Nit ap avyarat nenombarupwak,” ombakluk, enane enagavoval yagan nagu lagagwa. Enane enagavoval yagan nagu dugwit, “Yesus ane yupum-ndupum yimi vaga yidibaluk, eyave vagarogo at Gubernur akoen awene mbalup at ovadombok atma, awene mbalupwak yiluk, balasogom,” umbutugwa. 21Yagan Yesus adema lagu lagagwarik, hemetu dugwit, “Ngguru wai! Hat wene yagaliga inim, mamuleraliga inim, andi avyarat adigat iri dugwit, ap ambi iya, eke, ap ambi meyan, andi embetetek Ala wene avyarat des erogo mamulnirigya heyalagwi. 22Anderogo heyalagwi atma, ap inis ombok Pemerintah Oroma enasin Kaisar ake yoparip pajak baup andi, sek a, weyak a?” yiluk, yugogogwa.
23Yugugu lagagwama, At Yesus en it at ambukmu unggwi yedok inigu lagagirik, yugirigya dugwit, 24“Yoparip mbusi ambi inuk neres,” yugirigya lagagimu, wogugu lagagwama, it yugirigya dugwit, “Sa elese ovagak ogarek inis dirup warek helagwi?”
Yugirigya lagagimu, iren, “Dek. Andi Kaisar aro.”
25Yugugu lagagwama, At Yesus en, “Andi halok, Kaisar angge halok andi, Kaisar-at wogugwis, eke, Ala angge halok andi, Ala-at wogugwis, ogagu dogones,” yiluk, yugeragagi.
26At wene yugeragagi ako vaga avakwa inivaga wene ambi yidilogo ovaga baup meyan halok, un, “Wi!” yiluk, mbup yagagwa.
“Hambugu niniselok, hivis niniluk arusogom a, dek a?” yiluk, yugogogwa wene
(Matius 22:23-33; Markus 12:18-27)
27Andien, it ap Saduki menda nin Yesus adema wagagwa. It Saduki menda ako, “Avakwa hambuluk, iniluk akluk mendek yusogombuk,” yugu lagagwa. It ako, Yesus adema wagu lagagwarik, At hemetu dugwit, 28#Bilangan 25:5-10 yokhanes. “Ngguru wai. At Musa en, ‘Ap ambi hwa wolok, abut endagetek dugwit hambigya halok, owa avoloma abut endarupwak yiluk, aot en owa sogwa akoat hedapwak o,’ yiluk, dirup warogo wokneragagirikmu, 29ap ambi aburi eneyave 7 endaginipigi. At manggum akoen hwa wigya lagagirik, abut endagetek dugwit hombagagi. 30Hambigya lagagimu, aot manggum ambetaga menda inim, 31andien, at aot ambukmu menda inim, andien, it eneyave 7 endago ovok erogo anderogo adigat hwa ako wugwi, enaburi dek hegek enadigat hambugwi, ogagagwa. 32Eke, hivis, hwa ako ogo hombagagi. 33It ap eneyave 7 akoen hwa ako wugwi, hambugwi, ogagu lagagwama, hivis avakwa hambuluk iniluk erogo mondok okbisaup hudi vaga hwa andi, ap sa ogwa arisogon ombasiga?” yiluk, yugogogwa.
34Yugugu lagagwama, At Yesus en, “It avakwa yogak wema agarwik yi, ap en hwa hedugwi, akwa en ap hedugwi, ogasagwi. 35Anderogo ogasagwi ovara, At Ala en, ‘It avakwa sek menda enombasiga andi, ninim dogoguluk, hambuluk lendagwima en iniluk erogo mondok okbisayogon,’ ombasiga ako andi, Ala en mondok okbisagwi. Mondok okbugu dogogwimu inim dugwit, ap en akwa woginipwis, akwa en ap woginipwis, ogagu dogogupuk. 36Ala en it avakwa ako iniluk erogo mondok okbisagwi andi vaga, Ala aburi adigat dugwit, malaikat ovagak dogogup atma, hivis ambi hambugupuk. 37It avakwa hombagagwa iniluk erogo mondok okbisagwi ako andi, ambi yisogon. At Musa yo aik werek adema hali abya hagagi wene ako mbilinogo dirup watya dugwit, ‘Nasin Ala andi, ap Averakam inim, Isak inim, Yakup inim, Enasin Inis Ombok Ala aro,’ yiluk, dirup watigi andi vaga it hombagagwa ako Ala en avyarat iniluk erogo mondok okbisaliga helagwi o. 38Andi halok, At Ala en it avakwa hombagagwa ako, ovok erogo iniluk agarwik inisaliga atma, At andi, it avakwa hambuluk dek asagwi menda Enasin Ala dek. Ata, iniluk menda Enasin Ala aro,” yiluk, yugeragagi.
39Anderogo yugirigya lagagimu, it Ala wene vagago welagagwa menda ninen, “E o Ngguru. Hat sek yegen,” yiluk, yugugu lagagwama, 40it ovok en ambi inim At hemethaup enalon en mbup yagagwa.
“Keretus andi, sa ombao?” yugeragagi wene
(Matius 22:41-46; Markus 12:35-37)
41At ambi inim hemethaup enalon umbutu lagagwama, At Yesus en it yugirigya dugwit, “‘At Ala en denogo mondok okbagagi Keretus ako andi, Daut ombao,’ yagalagwi andi, nggarogo yiluk yagalagwi ombasagwi? 42-43#Mazmur 110:1 yokhanes. At Daut adik en mbuku Ndawi Wene vaga dirup watya dugwit:
‘At Nenasin Inis Ombok Ala en an Nasin Inis Ombok yugugu dugwit,
“It hinim ndup ogorek menda ako, An sovalogo havema bigitek neyagek,
ninggis amotkan hora yima,”
yugogogi,’
yiluk, yagagi dirup watigi ako andi, 44at Daut adik en iri dugwit, ‘An Nasin Inis Ombok,’ yagagi ako halok andi, nggarogo yiluk hiren Mesias andi Daut ombao menda yagalagwi? Anderogo yup meyan o,” yiluk, yugeragagi.
Ala wene vagago agarwik menda en henambukmu unggu saoen, henova hwalogo dogop wene
(Matius 23:1-36; Markus 12:38-40)
45Yugirigya lagagirik, avakwa ovok erogo enaruk hunggusigik, Yesus en At ane welagwi menda ako yugirigya dugwit, 46“It Ala wene vagago agarwik menda akoen henambukmu unggu saoen, henova hwalogo dogones. Enasum adup segedok yikbetaluk, avakwa pasar ogasagwima andoma en nit adigat vok yuknerapwak yiluk nagwis, it Yakuri samban ogasagwima akoma ap ombok-ombok hora yagalagwima hora yugwi, isogo isagu dugwit, ap ombok-ombok hora yagalagwima hora yugwi, ogarup adigat enendawi sek ombasagwi.”
47“It ap andi, akwa sogwa enangge dek okbugwis, avakwa iya nenombarupwak yiluk, samban adup erogo ogagwi, ogasagwi andi vaga, it avakwa nin enomaduk onggo horogat enovaga bugu dugwit, it ap andi, enomaduk onggo anggin ombok erogo enovaga bisayogon,” yiluk, yugeragagi.
Okuqokiwe okwamanje:
Lukas 20: nbq2013
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
