Matiyu 2
2
Sɔriniŋ tɔtɔnŋ kiri wɔ Yesu pyaanŋ ki ja bi ki
1Yesu ji-i niŋ ɲaan ki tɛ Bɛtilɛhɛmu, Yude sɔɔta ki ru, masa Ɛrɔdi wɔ sunŋ ki ra. Ntiŋ jimaan ki ra, bitɔtɔnŋ bɛɛ ri i po sunfalimwuŋ, kí i na so Yerusalɛmu. Nini wuru sɔriniŋ tɔtiiri i. 2Kí so-i niŋ mani nu waarinŋ wɔ̀ ru, kí i konaŋ kiri ranɔri tu : « Yawutu kiri wɔ masa wɔ̀ ji-i dɔɔ, niŋ da? Yibɛɛ ǹʼwɔ sɔriniŋ ki ja-i, ŋì i yiri-ri sunfalimwuŋ, yibɛɛ na-i ǹʼgbɛ. »
3Masa Ɛrɔdi niŋ wulu ki rama-i waarinŋ wɔ̀ ru, niŋ i ntiŋ fa Yerusalɛmutɔnŋ kiri bataa ciirufɔni. 4Ntiŋ i Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ kiri bataa rakɔli, ntiŋ i na kí ranɔri tu, ŋì i kɛɲɛ Kirinŋ wɔ cintɔnŋ kiri wɔ wulu kiri wu, tu Kirinŋ Ɲaannakonshimaan ki kakan ŋì i ji da? 5Nini tu ntiŋ tɛ tu, Kirinŋ Ɲaannakonshimaan ki kakan ntiŋ i ji Bɛtilɛhɛmu, Yude sɔɔta ki ru, sabu Kirinŋ wɔ cintɔnŋ ki nwɔ̀ sɛbɛ-i, niŋ i kaa :
6« Miŋ Bɛtilɛhɛmu, minwɔ̀ i Yude sɔɔta ki ru,
miŋ Yude sɔɔta ki ru kili kiri bataa ru pyaanŋ ki i kì dɛ!
Sabu ŋununtiŋ ki bɛɛ a na po miŋ nu,
nwɔ̀ a na mɔ́ɔ́n konanbi ki, Isirayɛli jɛnpa. »#Mise 5.1.
7Masa Ɛrɔdi niŋ nama-i waarinŋ wɔ̀ ru, ntiŋ i sɔriniŋ tɔtɔnŋ kiri dɔri du ru, ntiŋ i na kí ranɔrika shɔ sɔriniŋ ki ja waaci ki bi sun arì gbɛ. 8Niŋ kɔɔtɛ, ntiŋ i kí bo tiri Bɛtilɛhɛmu tu : « Á ta daŋ ki bi ki ɲaan ceelika shɔ, á ta ǹʼja, á i na ǹʼbi ńʼtɛ, nwɔma míŋ yɛrima ki i ta ǹʼgbɛ. »
9Masa Ɛrɔdi niŋ wulu kiri bi kɔ-i sɔriniŋ tɔtɔnŋ kiri tɛ waarinŋ wɔ̀ ru, nini i tiri. Kí tirira ki i sɔriniŋ ki ja tiri-ra arì jɛŋ, kí mìnwɔ̀ ki ja wuru kabi sunfalimaŋ ki ru. Sɔriniŋ ki ta-i so daŋ ki maŋ ki ŋununu waarinŋ wɔ̀ ru, ŋì i tu fu bɛɛ ŋununu. 10Sɔriniŋ tɔtɔnŋ kiri sɔriniŋ ki tumaan ki ja-i niŋ ɲaan ki tɛ, niŋ i ji ciirudibi sinaŋ i kí gbɛ. 11Kí i de niŋ fu ki ru. Kí i ta daŋ ki fa a ɲiŋ Mariyamu ja. Kí i arì kwushiri, kí i daŋ ki gbɛ. Kí i arɔɔ shii kiri pili, kí i daŋ ki ka finŋ ni na. Sɛniŋ fa kinidifinŋ fa ŋuŋ kini jii bɛɛ i dɔri-ra tu miri, nini wuru niŋ kafinŋ kiri ru.
12Niŋ kɔɔtɛ, Kirinŋ i sɔriniŋ tɔtɔnŋ kiri racin jii ru, tu kí fa de masa Ɛrɔdi tɛ kì. Niŋ na, nini i saa tɔri shi, kí i arì pwulu tiri arɔɔ kɛniŋ nu.
Yusufu fa Mariyamu bili ta bi ki Yesu pyaanŋ ki wu Misira kɛniŋ ki ru
13Sɔriniŋ tɔtɔnŋ kiri tirimaan ki kɔɔtɛ, Ŋuntiŋ ki wɔ mɛlɛkɛn bɛɛ i a yɛri ji Yusufu wu jii ru, ŋì i ǹʼbi ntiŋ tɛ tu : « Jɔrɔkɔ, ŋi i bili tiri daŋ ki fa a ɲiŋ ki wu Misira kɛniŋ ki ru. Ŋi i ta tu nmaŋ fɔ waaci wɔ̀ ru, míŋ na ǹʼbi tu a na. Sɛli ki ra, Ɛrɔdi a ǹʼbi tu a ra daŋ ki ceeli, a i ǹʼkilɛn. »
14Yusufu i jɔrɔkɔ mìŋ cii tenŋ ki ru, ntiŋ i bili daŋ ki fa a ɲiŋ ki wu, kí i ta arì radu Misira kɛniŋ ki ru. 15Ntiŋ i ta tu niŋ mani nu nmaŋ, fɔ Ɛrɔdi i na beeni. Niŋ i ma ninkunŋ, ŋì i kɛɲɛ Ŋuntiŋ ki wɔ wulu ki wu Kirinŋ wɔ cintɔnŋ ki tɔnŋ na tu : « Míŋ ńʼdanshuru ki dɔri po-i Misira kɛniŋ ki ru. »#Ose 11.1.
Masa Ɛrɔdi wɔ daŋ kiri kilɛn bi ki
16Masa Ɛrɔdi na-i ǹʼtɔ tu sɔriniŋ tɔtɔnŋ kiri afinŋ sunnɛɛn waarinŋ wɔ̀ ru, ntiŋ tɔnŋ i kwulu kusɛbɛ. Ntiŋ i ǹʼbi tu danshuru finŋ woo finŋ ji-i niŋ waaci ki ru, nwɔ̀ri shi ki fwuude-ri jiri fuuli sun sun kì, Bɛtilɛhɛmu fa a tonfan kili kiri bataa ru, tu nini bataa kilɛn. Ntiŋ niŋ ǹʼbi wuru, sabu ntiŋ ǹʼja wuru-i tu, niŋ waaci ki wuru kɛɲɛ-a sɔriniŋ tɔtɔnŋ kiri wɔ bimaan ki wu.
17Kirinŋ wɔ cintɔnŋ Yeremi wɔ wulu bimaan ki i nafaa niŋ ɲaan ki tɛ. Ntiŋ ǹʼbi wuru-i tu :
18« Wulu mwɔɔnna bɛɛ i po-a Arama kili ki ru,
míŋ i ŋuntan wulu fa yaalinpo wulu mwɔɔnna nama-a.
Arashɛɛli i ŋuntan-a a daŋ kiri bira.
Nmari a tu gbansan na koŋ tɔri tenŋ gbɛ kì,
nmari daŋ kiri kilɛn-i. »#Yeremi 31.15.
Yusufu pwulu ki Isirayɛli kɛniŋ ki ru
19Ɛrɔdi beenimaan ki kɔɔtɛ, ŋì i Yusufu tu Misira kɛniŋ ki ru, Ŋuntiŋ ki wɔ mɛlɛkɛn bɛɛ i a yɛri ji ntiŋ wu jii ru. 20Ǹʼtu ntiŋ tɛ : « Jɔrɔkɔ, ŋi i daŋ ki fa a ɲiŋ ki shi, á i á pwulu Isirayɛli kɛniŋ ki ru, sabu koŋ wɔ̀ri wuru daŋ ki kilɛnnama ki cɛfan, nini bataa beeni-i. »
21Niŋ na, Yusufu i daŋ ki fa a ɲiŋ ki shi, ntiŋ i a pwulu kí wu Isirayɛli kɛniŋ ki ru. 22Yusufu na-i ǹʼnama waarinŋ wɔ̀ ru tu Arikilayɔsi sɔɔ faan ki sun Yude sɔɔta ki ŋununu a tiŋ Ɛrɔdi ta ru, ntiŋ i kɛni Yude sɔɔta ki ru tarama ki wu. Ŋuntiŋ ki wɔ mɛlɛkɛn ki i wulubi ntiŋ tɛ jii tɔri ru sɛbɛ, niŋ na, ntiŋ i tiri Galile sɔɔta ki ru. 23Ntiŋ i ta sɔɔ kili bɛɛ ra, nwɔ̀ tɔ wuru tu Nansarɛti i. Niŋ i ma ninkunŋ, ŋì i Kirinŋ wɔ cintɔnŋ kiri wɔ wulu kiri rafaa Kirinŋ Ɲaannakonshimaan ki bi ki sun tu : « Ŋì a na dɔri tu Nansarɛtitɔnŋ i. »
Okuqokiwe okwamanje:
Matiyu 2: JOB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc.
