Markus 2
2
Yesusti lebe arop kom nimi wali nembaogha
(Matius 9:1-8; Lukas 5:17-26)
1Ae ik etpare Yesus undo wamogha nen samoro as Kapernaum yaogpa, “Yesus wene samoro aeag yal,” aro yubu sabo taogpa, nimi maikno ka'ebaek. 2Ka'ebaekti yalamekti, aeag babe nimi aghabog teknebaek. Teknebaekti ina siramag babe asag sip nimi to'opto longolaekpa, kolo orog taog. Undo wamekpa, Yesusti sinag Allah yubu ambarelamsiog. 3Ambarelamsiogpa wamekag aneko nengabo tombareri lebe arop kom nimi nhon morea kalag keyapto, “Yesusag payaukap,” aro ulamek. 4Payalamekti kemelamekpa, nimi maiknori sendebel alamekne sembe Yesus peramag wa'inep kom. Wa'inep kom ane sembe, imag alibag waelbaekti, Yesus wamogha alibag imag kwerekaekti, lebe arop kom nimi morea kalag keyapto payaekne aneko haingdi kerekto ae lomag pelengkaek. 5Pelengkaekpa Yesusti kemelamsiogpa, sin payaek nimi tanekori Yesusag sikne aro wana palilameka ipsiog. Kembahiogti lebe arop kom nimi enekoag yubu lelamogti, “Name, andi mali-malia ulamomne tam wailag tal,” seog.
6-7Wene seogpa, nubunang Musari yubu amohirop nang etpare pukamek nimi tanekori Yesusti yubu ka'ebaekti, sindi wanaag mali senelamek. Senelamekti, “Sa'a sembe nimi aneri undop yubu lepla? Nimiri mali-malia uropne sembe nimi nhondi babe tam wailag nembanep kom. Ot Allah eldamneri, ‘Andi mali-malia uropne tam wailag nemban,’ aro lemnep. Nimi eneri Allah san tiliplamla,” aro wanaag seneraglamek.
8Wene aro seneraglamekne Yesus peket eldi wanaag el taog. El taogti ambarelamsiogti, “A'undi wanaag na sembe, ‘Eldi undo lemnep kom,’ senelamlomne nene sa'a sembe seneraglamlom? 9Mog so'oag nimiri nimiag, ‘Andi malia ulamomne tam wailag tal,’ seheng tanena, malia uropne neneko sik uro tam wailag tanep te? Mog so'oag nimiri lebe arop kom nimi enekoag, ‘Sekmendi, andi morea kalap saelbamendi, yan ingiro pululam,’ aro yubu ambatseng tanena, sik uro yabinep te? Ni yubu phende abeneko mog so'oag nimiri mo yubu lemnep tanena, nhon babe uro yabinep te? 10Aghana a'undi na sembe el tahom senelamnari, lag nembatsinun. Na mog so'oag nimi tahinge saeag Allahri mikipne pibog andarina, nimiri malia uropne sembe nari tam wailag nembanep. Kembamundi el talulom,” seogti lebe arop kom nimi enekoag yubu lelamogti, 11“Anag lemnuan. Sekmendi andi morea kal saelbamendi, andi aeag pululam,” seog.
12Wene seogpa, nimi ni taneko tiboglamekpa, lebe arop kom nimi enekori sekom agha morea kal aneko tobogti lambaog. Lambaogpa nimi niri ponekoag tiboghaekti, “Yaghe, ane mane agha ual! Tam undopne nu olog irop komne uro yabil,” aro lo'om seekti, Allah omeklamek.
Yesusti Lewi yobogha
(Matius 9:9-13; Lukas 5:27-32)
13As Kapernaum laplobi agha Yesus samoro mag Galilea longorop mag peramag piog. Piogpa nimi maikno elag yalamekpa, Allah yubu ambarelamsiog. 14Ambatto yabalamsiogti, nimi nhon sina Lewi, Alfeus elme tiboghaog. Lewi poneko Roma nimi sembe kamna poloro toropne wamogti, eldi kamna poloro tolamog aeag pukamog. Pukamogpa tiboghaogti Yesusti, “Nanag neleplamnululam,” seogpa, Lewi sekom agha Yesusag neleplamog. 15Nelebaogpa Yesusap Lewiri aeag piekti, kwaneng telamek. Kwaneng telamek ae enekoag yog nimi Roma nimi sembe kamna poloro torop nimi babe maikno wamek. Ora nimina sin, “Malia urop nimi,” ahirop nimi babe maikno yaek. Yesusag neleptop nimi taneko maikno wamek ane sembe, Lewiri aeag yingkina Yesusap eldi yubu ka'ero neleptop nangap kwaneng nhon telamek. 16Kwaneng telamekpa, Farisi nimi Musari yubu amohirop nimi taneko wamek. Wamekti Yesusap nimi tanekoapti kwaneng nikag telameka tibogahiek. Yesus tiboghaekti, Farisi nimi tanekori Yesusti yubu ka'ero neleptop nangag hailamsiekti, “Sa'a sembe Yesusti Roma nimi sembe kamna poloro torop nimiap, malia urop nimi taneap tolamsildi, kwaneng nikag telamang?” aro haibahiek. 17Haibahiekpa Yesusti ka'ebaogti, samoro ambarelamsiogti, “Nong wali nimiri whesirop nimi sembe, ‘Teko,’ senelamang kom. Ot naiktop nimiri aghabog whesirop nimi sembe, ‘Teko,’ senelamang. Ane saog uro na so'oag, ‘Yepsinun,’ aro yahingena, nimi nhon eldamne sembe, ‘Na malia urop nimi,’ aro el tanep nimi eneko, ‘Yopto yepsinun,’ aro yahi. Ora nimiri eldamne sembe, ‘Na malia uan koma ulamna,’ seneptaho tanena, nimi eneko yopto yepsinun kom,” seog.
Nimiri kwaneng ten koma, “Allahag moloro omeklamnun,” aro uropne sembe Yesusti tibin nembaogha
(Matius 9:14-17; Lukas 5:33-39)
18Yohanesti yubu ka'ero neleptop nangap Farisi nangap sin tanekori, “Allah omeklamukap,” aro kwaneng ten koma omekto ulamek. Undo ulamekpa, nimi etpare Yesusag yaekti hailamekti, “Sa'a sembe Yohanesti yubu ka'ero neleptop nangap Farisi nangap tanekori, ‘Allah omeklamukap,’ aro kwaneng ten koma ulamang aghana, andi yubu ka'ero neleptop nang tanekori kwaneng ten koma ulamang kom?” aro hailamek. 19Yesusti samoro ambarelamsiogti, “Na so'oag wamnaag abenena, nanag neleptop nang kwaneng tero kom-kom wamseng kom. Sunumna ambatsinun. Nimi nhondi kel torop tanena, elkaboap ma'ap tahengdi, sin kwaneng tero koma wamnep te? Kel torop nimi tanekoap, elkaboap kel torop sum eneko elenge nimi pali wamangne sembe kwaneng tero kom-kom wamang kom. Ane saog uro nanap, na neleptop nangap nimi pali wamapti, nu nikag wamap abene kwaneng ten koma wamnep kom. 20Aghana ik nhon sum kel toropne poneko yog nimiri salero pabaik taneogna, elkabo kwaneng ten koma wamukang. Ane saog uro na amik sum wamne kom taneogna, nanag neleptop nang kwaneng ten koma wamukang,” seog.
21Seogti sunumna nhon babe ambarelamsiogti, “Ag samenag wirop ag wamsoba, ag eneko tilipto yabin tanena, ag wiroba wendogne taebom agha nimiri ag samenne wetnelamang kom. Ag wendogne taepto tipto wetnebaheng tanena, wiroba wendogne nene samenneag agha pulukto kolop tanep. Undop pagha ag samenne eneko taepto tinilamnari lom nubu tanep. 22Nen sunumna nhon ambatsinun. Nimi nhondi anggur wana lolterop mag tomnari, mag tero lina pham kambing kon agha wetnerop aghag tero lirop. Anggur wana lolterop mag wendog nena, pham kambing kon agha wetnerop ag samenneag tero libanep kom. Ag samenneag tero libanep kom nena, anggur mag neneag agha iba lanalamnari, kon agha wetnerop ag eneko pikto nubu tanep. Nubu talamnari, kon agha wetnerop ag samenne pikto loba nembanep tanena, kon agha wetnerop ag babe, anggur lolterop mag babe ni loba tanep. Undo unuanep kom aghana, nimiri anggur wana lolterop mag wendogne kon wendog kon agha wetnerop aghag tero lilamang,” seog.#2:22 Yesusti, “Wendogneap samenneap nikag pimnep kom,” seog nena, likiptop yubuag agha lelamogti, “Nari wene ambarelamsinne neneap, a'undi samenag agha seneragto ul palamlomne neneap sunsunum urop kom,” aro likiptop yubu agha ambatsiog.
Sabat sum nimiri uanepne sembe Yesusti o'oro tibin nembaogha
(Matius 12:1-8; Lukas 6:1-5)
23Olog wameka, Yahudi nimiri tektek paptop sum Sabat sum taog. Sabat sum eneko Yesusap eldi yubu ka'ero neleptop nangap palamekti, kwaneng roti sumbaneba gandum awe wero meroba nubungeag ina palamek. Palamek abeneko pere, Yesusti yubu ka'ero neleptop nangdi alniro gandum wana tagto tobek. 24Tagto tolamekpa, Farisi nimiri sin ipsiekti, Yesusag yubu lelamekti, “Kembahimen! Musari samenag, ‘Sabat sum eneko awe tomnep kom,’ aro mome tobog aghana, sa'a sembe anag neleptop nangdi yubu nene philamangdi, gandum wana nene tagto tobang?” aro Yesusag haibaek.
25Haibaekpa Yesusti samoro ambarelamsiogti, “Nunisa nubunge Daud poneko elkaboap kwaneng yo teko ulamsiogpa, uaogne sembe a'undi mome toro pairopneag agha olog kemelamlom kom te? 26Abyatar memnang Allah sembe palirop nang sikini poneko wamog ko'oag Daud elkaboap kwaneng yo ulamsiog. Kwaneng yo sembe Daud poneko Allahri Mem Ae enekoag wa'iogpa, kwaneng roti Allah sembe pibekne taneko nimi nhondi Daud ponekoag tarog. Tarogpa kwaneng roti teogti, Daudti elkaboag tipto tatsiogpa teek.#1 Samuel 21:1-6 Aghana kwaneng roti teekne tanekona, Musari samenag mome toro pibogne sunsunum uro, ‘Ot memnang Allah sembe palirop nangdi aghabog telamukang,’ seog. 27Allahri nimi sam sumbahiog. Amik nena, tektek papto urop sum Sabat sum eneko nimi wali uro wamnepne sembe nembirogti tatsiog. 28Sabat sum babe nimi sembe tatsiog ane sembe, nimiri uanepne neneko na mog so'oag nimi tahingeri saelba ulamnari o'obanepne wamna,” seog.
Okuqokiwe okwamanje:
Markus 2: kklKOS
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved.
