Markus 1
1
Yohanesti Allah yubu ambatto nimi maghag pelengelamsiogha
(Matius 3:1-12; Lukas 3:1-9; Yohanes 1:19-28)
1Yubu walinge Allah Elme Yesus Kristus sembe na Markusti mome palilamnange tamna ane.
2Allahri samenag Elme yanepne sembe lebogpa, Allah yubu silimu tiptopne Yesaya ponekori mome toro pibog. Mome toro pibog nena,
“Nari yubu poa ambatsirop nimi nhon an whingag pogneba,
an amik pinep ina an sembe yarelamlul.#Maleakhi 3:1
3Pognenge poneko pai aldesag pileri,
yubu haum aro nimi yoplamsileri,
‘Nu Saelba Uhiropne yanepne sembe ina yarelamlulom.
El yanep ina porog nenelamlulom,’ aro ambatsilul,”
aro Allahri lebogne sunsunum uro Yesayari mome toro pibog.#Yesaya 40:3
4Yesaya ponekori mome tobogne sunsunum uro Allahri yubu ambatsiropne poghogpa, Yohanes nimi maghag pelengehiropne poneko pai aldesag yaog. Yaogti Allah yubu ambarelamsiogti, “A'undi mali-malia wanaag seneragto ulamlomne lipsimunba, maghag pelengkipsinun. Maghag pelengkipsineba, a'undi mali-malia ulamlomne Allahri tam wailag nembalul,” aro ambarelamsiogti, maghag pelengelamsiog. 5Undo unulamogpa, ni mog so'o Yudea wamek nimiap, as Yerusalem wamek nimi niap, anekoa Yohanesag lamba palamek. Elag palamekti, “Nuri mali-malia undo-undo ulamobo,” aro lag phoro ambarelamekpa, Yohanesti mag Yordan yabirop maghag pelengelamsiog. 6Yohanes poneko pham unta hong agha wirop ag wangkamogti, uwoghag lebe aroba kon agha sunurop haing nobamog. Nobamogti eldi tena whengap pondog maghap tero wamog.#1:6 Allah yubu silimu tiplamek nangdi samenag wangkamekne sunsunum uro wangkamog (2 Raja - Yubu Sia Lennang 1:8). 7Undo tero wamogti, nimiag yubu ambarelamsiogti, “Na sam yano aghana, amik nimi nubunge nhon, nanap sunum komne yalul. Na nimi ologne wamnaba, el mikip phelektopne wamlul ane sembe, el mikip sirikne yaleba, eldi arukna taneri, kinipto pulingkina nari eldi yan wangana haing lopnepne babe nanap sunurop kom. 8Nari mag aneag agha a'un maghag pelengelamsin aghana, el nubunge yalulne ponekori Allah Eldamne Yame Walinge a'unag pelengkatsilul,” seog.#Pogsiog Nang 1:4-5; 11:16
Yohanesti Yesus maghag pelengkaogha
(Matius 3:13-17; Lukas 3:21-22)
9Yohanesti nimi maghag pelengelamsiog abeneko Yesus as Nazaret, mog so'o Galilea wamogha laplobi agha, Yohanes wamoghag piog. Piogpa Yohanesti Yesus mag Yordan yabirop maghag pelengkaog. 10Maghag pelengkaogpa, Yesus maghag agha lambaog abeneko imag tiwalengelamogpa, im sangal naghogpa, Allah Yame Walinge winang yalma saog uro elag kulukul alamogha ibog. 11Elag kulukul alamogpa, imag agha yubu nhon lelamogti, “Anna Name nari o'ona senero angkenne, na wana awi nenelamnelam,” al toghog.#Sumbaogha 22:2; Sepna 2:7; Yesaya 42:1; Matius 3:17; 12:18; Markus 9:7; Lukas 3:22; 9:35
Phia sikini nubungeri Yesus mipto yubu nebogha
(Matius 4:1-11; Lukas 4:1-13)
12Imag agha yubu nhon lebogpa, ta'ap sen koma Allah Yame Walingeri enero pabiogpa, Yesus pai aldesag piog. 13Piogti wamogpa, phia sikini nubungeri, “Allahri iriktop yubu phibalul to, kom to,” aro wana aluktop yubu agha yubu neplamogpa, ik teng nhon epto nualbareap (40) taog. Yubu neplamog paghabog Yesus winangap, manaap, paghaeap ua urobag wamogpa, Allah arukna imagnang malaikat yingkina el yepto paiamek.
Yesusti mog so'o Galilea nimiag alniro Allah yubu ambarelamsiogha
(Matius 4:12-17; Lukas 4:14-15)
14Mog so'o saelba uropne nimi nubunge Herodesti Yohanes salero haing sae kaupto kop aeag tobongkibogpa, Yesus mog so'o Galilea so'oag piog. Piogti Allah yubu walinge ambarelamsiogti, 15“Allahri mog so'oag nimi saelbamsilula peram tal. A'undi mali-malia seneragto ulamlomne lipsimundi, yubu walinge aneko sikne aro seneraglapmundi, ul palamsut,” aro ambarelamsiog.
Yesusti ikan orop nang tombare yopto embahiogha
(Matius 4:18-22; Lukas 5:1-11)
16Yesus mag Galilea longorop mag abol toman palamogti tilamogpa, ikan orop nang phende Simonap, ilipsae Andreasap tibogahiog. Tilamsiogpa ikan orop nang wamdekti, ulamekne sunsunum uro ikan lip tangtop ag mag sinag toboglamdekpa tibogahiog. 17Tibogahiogti Yesusti sinag yubu lelamogti, “Na amik nelabanururom. Wene a'un ikan aghag lilamsirom saog uro amik sum babe yepsineba, a'undi nimi ero nanag poa yalamsururomba yahut,” seog. 18Wene seogpa, ta'ap sen koma sindinge ikan lip tangtop ag laplobi agha Yesusag nelebarek.
19Neleplamdekpa Yesus nen olog we koma piogti tilamogpa, Zebedeus elmabo phende Yakobusap, elkae Yohanesap tibogahiog. Sikin kabong mag alip toman piroba lomag wamdekti, sindi ikan lip tangtop ag o'oro wetnel tolamekpa tibogahiog. 20Tibogahiogti ta'ap sen koma Yesusti, “A'un nanag nelepto nhon pukap,” aro sin yopsiog. Yopsiogpa sindi sikini Zebedeusap, eldi aruknaap kabong lomag wameka aneko lilobi agha Yesusag nelebarek.
Yesusti phia yonge nimi kulomag agha yag lambaogha
(Lukas 4:31-37)
21Yesusap, eldi yopsiog nang tanekoap as Kapernaum piekti wamek. Wamekpa Yahudi nimiri Allah yubu lerop sum Sabat sum taogpa, Allah yubu lero winirop aeag wa'iekti, Yesusti nimi amoro ambarelamsiog. 22Wali uro ambarelamsiogpa, nimi taneko ka'ebaekti, “Yaghe, el mo el uropne wamlari, mikipneag agha amoro ambarelamsil. Musari yubu amohirop nangdi undo mikipneag agha amoro ambarelamsiang kom,” senelamekti lo'om seek. 23Sin nimi tanekori Allah yubu lero winirop aeag aneko phia yonge kulomag wamogne nhon wamog. Wamogpa Yesusti ambarelamsiogha ka'elamekti, lo'om alamek abeneko, phia yonge kulomag wa'iog nimi enekori haum aro yubu lelamogti, 24“Yesus, Nazaretne-o! An nunag hualulam? Nu sembe, ‘Kom nembahinun,’ aro yalam te? Anna etne na el wamna. Anna Allah Eldamneri wepto pogkeogne wamlam!” seog.
25Wene seogpa, Yesusti phia yonge anekoag, “Yubu kom tae! Nimi eneag agha lambae!” aro arukaog. 26“Lambae!” aro arukaogpa, phia yonge nenekori nimi eneko yo uro lologlamogti, yubu ngolol aro nimi kulomag agha lambaog. 27Lambaogpa nimi ni taneko kembaekti, “Yaghe, mane agha ual!” al dalamek. “Huropne mikipne agha undo uro yabil? Nimi enekori yubu wendogne mikipneag agha ambarelamsil. Eldi phia yongeag, ‘Lambae,’ aro aruklamsilba, eldi yubu ka'elamangdi lanalamang,” aro lo'om seek. 28Lo'om seekti sindi, Yesus sembe lelamek yubu eneko sabo tangto yabiogpa, Galilea mog so'o ni tala-tala wamek nimiri ka'ebaek.
Yesusti nimi maikno wali nembahiogha
(Matius 8:14-17; Lukas 4:38-41)
29Sin Allah yubu lero winirop aeag aneko laplobi agha, Simonap, ilipsae Andreasap sindi aeag piekti, Yesusap, Yakobusap, Yohanesap sin lambare nang nhon piek. 30Aeag yaekpa, Simon elyamalkel bobo naikna naiklamogti, ae lomag malamog. Elyamalkel eneko naiklamogha sembe Yesusag peket ambarek. 31Ambarekpa Yesus kel enekoag piogti, sae kiliro yepto pukirog. Pukirog abeneko pere bobo naikna kom taogpa, kel enekori sin tena yepto yobarelamsiog. 32Heng puruklamog abeneko ae imbaogpa, naiktop nimiap, nimi phia yonge kulomag urop nimiap maikno Yesusag payahiek. 33As aneko nimi ni yalonga saog uro ae aneko ina siramag longolaek. 34Longolaekpa Yesusti naikna yogne-yogne seklelamekne wali nenelamsiogti, phia yonge babe nimiag agha yag lambahiog. Phia taneko Yesus sembe, “El etne wamla,” aro el uro wamek ane sembe, Yesusti sinag, “A'un yubu leplulom kom,” aro irikahiog.
Yesusti Allah yubu lerop ae ubu paiamog aeag agha ambatto poa tongolamsiogha
(Lukas 4:42-44)
35Kweleknag aneko ae anam wareban komag Yesus pukogti, ae aneko laplobi agha nimi oroghag piog. Piogti anekoa Allahag moloro yubu lelamog. 36Allahag moloro yubu lelamog aghana, Simonap elkaboap, “Yesus tala wamla?” aro el piek. 37Elamekti ibekti, elag yubu lelamekti, “Nimi maiknori an elangkeangpa, nu nen samoro aeag pukap,” seek.
38Aghana Yesusti samoro ambarelamsiogti, “Nana, ‘Nimi niag Allah yubu sikne ambatsinun,’ aro yahi. Ane sembe, nu saomban koma yog as peramag wamang nimiag pukapti yahut,” seog. 39Anea Yesus mog so'o Galilea so'oag wamek as kanero palamogti, Yahudi nimiri Allah yubu lero winirop aeag nimi ambatto tongolamsiog. Allah yubu ambarelamsiogti, phia yonge babe yag lanalamsiog.
Yesusti nimi kon tena pololamogne wali nembaogha
(Matius 8:1-4; Lukas 5:12-16)
40Yesus mog so'o Galilea kanero wamek nimiag ambatto tongolamsiog abeneko, nimi nhon konag naikna poloro telamogne nhon elag yaog. Yaogti Yesus whingag yabu sanukto pulingkiogti, wanaag agha mololamogti, “Andi na, ‘Wali nembanun,’ sembamen tanena, an mikipneri na wali nembanululam,” aro molbaog.
41Wene aro molbaogpa, nimi eneko yareag sembaog. Yareag senelamogti, Yesusti sae nginikto nimi enekoag palilamogti, “Wali semban. An wali nembaghenun. Kut taghele!” seog.
42Wene alamog abeneko pere naikna aneko kut taogpa, nimi eneko wali taog. 43Wali taogpa, Yesusti elag irikto poglamogti, “Wali uro ka'ebalulam! 44Nari an wali nembaghenne sembe ora nimiag ambatsiseng kom! Aghana memne Allah sembe paliropne ponekoag peket pimendi, waliaba Allah sembe pimnepne elag pabululam. Waliaba pabululam nena, Musari samenag, ‘Kon naikna urop nimi wali tale tanena, Allah sembe pimnepne payalul,’ aro mome toro pibog yubu sunsunum uro pabululam. Pabimendi andamne elag lag nenep talulam. Eldi an kembaghelenge pere agha, ‘Sik uro yabil,’ senenne kekneba nenekori sin nimi taneko el nembahilul,” seog.#Imamat - Memnang 14:1-32
45Wene aro irikaog aghana, nimi eneko anekoa laplobi agha Yesusti el wali nembaogne sembe nimiag salik-malik uro ambarelamsiog. Undop agha, Yesus as nhon tibin uro wa'inep komdi, el sop-sop nimi oroghag ua ulamog aghana, sop-sop tala-tala nimi elag yalamek.
Okuqokiwe okwamanje:
Markus 1: kklKOS
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved.
