མ་ཏི། 11
11
ཡི་ཤུ་དང་ཁྲུས་གསོར་པ་ཡུ་ཧན་ན།
1ཡི་ཤུ་གི་ རོ་ཀ་སློ་མ་སོང་ཉིག་ཙིང་ག་ གསུངས་ཉི་ཆུམ་དེན་གེ་ རོག་ཏེ་བ་ཀ་ཁྲོམ་ཆེན་ཁོན་ ཡེ་ལེ་དེན་གེ་དང་ གསུང་བཤད་པེ་དེན་གེ་ བྱོན་མ༌ལ།
2ཁྲུས་གསོར་པ་ཡུ་ཧན་ན་ བཙོན་ག་ཆོ་ལེ་གང་ཀ་ ཁིརིས་གི་མཛད་ཁཱན་ ཕྱག་ལཱ་ཐམས་ཅན་ག་ཀོར་གེ་ ན་ཐ་ཝ༌ལ། ཨོ་ཉི་ཨ་དེན་གེ་ རོ་ཀི་ རོ་ཀ་སློ་མ་བ་ ཡི་ཤུ་བཞུགས་ས་ག་ཏཱན་ ཨོ་ཐེན་གསུངས་ཉི་ ཀུན་ཏི་ཝ༌ལ། 3བྱོན་མེ་དག་ཁཱན་ ནཱན་རང་གི་ལ་སྨོ་ ཨུ་ཉུ་མ་ནེ་ལ་ ཨའི་བཱརའ་སོ་ངོ་ཐུར་ག་དེན་གེ་ ནོང་མེ་ཡ་དག༌ཉི།
4ཡི་ཤུ་གི་ལན་གནང་ཉི་ ལོག་ཉི་དིན་ཐཱན་ ན་ཤི་ཐོང་ཁཱན་དང་ ན་ཐ་ཁཱན་ག་ཀོར་གེ་ ཡུ་ཧན་ན་ག་ཡེག་ཅོ། 5མིང་ཀ་ན་བ་ཀི་ཐོང༌ལ། དང་མེ་མར་ཁཱན་བ་དང༌ལ། ཀླུ་ན་ཚ་ཁེ་ཁཱན་བ་དྲག༌ལ། ན་ཏོ་ར་བ་ཀི་ན་ཐ་ན། ཤི་ཁཱན་བ་ཝུ་ན་ ཉི་དུག་པུ་བ་ཀ་ འཐེན་ལེག་པུ་བཤད༌ལ། 6ཉི་ཇ་ག་ཏཱན་ དོགས་པ་མ་སག་ཁཱན་བ་ བྱིན་རླབས་ཅན་གི་ལ་དག་ཉི་ གསུངས་མ༌ལ།
7ཡུ་ཧན་ན་ག་སློ་མ་བ་ རོ་ཀ་སྐུན་མདུན་གེ་ དིན་ཅ་ཨ་ཉི་ རོ་ཀི་སོ་ངོ་མང་པུ་ ཛོམ་ཁཱན་བ་ཀ་ ཡུ་ཧན་ན་ག་ཀོར་གེ་ གསུངས་མེ་གོ་ཙུག་པ༌ལ། ན་ཧ་བ་ ས་ཏོང་པ་ནང་ཀ་ ཧང་གོད་པེ་ག་དི་ཝ་ཡ། ཧང་རི་དི་གི་ཝག་ཁཱན་ བང་གོད་པེ་ག་དི་ཝ་སྨོ། 8ཨུ་ཉུ་མ་ནེ་ལ་ ན་ཧ་བ་ ཧང་ཨ་ཉི་ ཕིས་ཀ་དི་ཝ་ཡ། ཧང་ཁ་མུང་ལེག་པུ་ཡེ་ཁཱན་ གོད་པེ་ག་དི་ཝ་སྨོ། མང་གི་ ཁ་མུང་ལེག་པུ་ཡེ་ཁཱན་བ་ཤོ་ དཔོན་ག་ཕོ་བྲང་ག་ཤ་ཨུན༌ཅ། 9ཨུ་ཉུ་མ་ནེ་ལ་ ན་ཧ་བ་ ཧང་གོད་པེ་དི་ཝ་ཡ། ལུང་བསྟན་པ་སྨོ། གི་ལ་ དེན༌མེ། ཇི་གི་ ན་ཧ་ཡེག་པེ་ རོག་ཤོ་ ལུང་བསྟན་པ་གེ་བུ་ ཆི་ལུ་ཆོ་ཝ། 10རོག་ཤོ་ གསུང་རབ་ནང་ཀེ་
ཇི་གི་ ཇ་ག་འཐེན་པ་ ནཱན་གེ་གུམ་གུམ་ཀུན་ཏི༌ལེ། ཉི་རོ་ཀི་ ནཱན་གེ་གོ་མ་དི་ཉི་ ན་ག་ལམ་ཟང་མེ་#11:10 མ་ལ་ཀི་ག་དཔེ་ཆ་ 3:1 དག་ཉི་
ཤོ་ཁཱན་ཁེ་པ་གི༌ལ།
11ཇི་གི་ ན་ཧ་ཐྲང་ཉི་ཡེག་ཅ་ མེ་ཝག་ཙ་གེ་ཨ་ཉི་ཀེ་ཁཱན་ ཐམས་ཅན་གེ་ཆི་ལུ་ ཁྲུས་གསོར་པ་ ཡུ་ཧན་ན་གི༌ལ། དག་པ་ཀབ་ཉི་ ཞིང་ཁམས་ག་ རྒྱལ་སྲིད་ག་ཆོ་ཁཱན་ ཟེ་མུ་ཐུར་བུ་ རོ་ཀེ་ཆི་ལུ་གི༌ལ། 12ཁྲུས་གསོར་པ་ཡུ་ཧན་ན་ག་ གང་ཀེ་གོ་ཙུག་ཉི་ ཨོ་མ་སག་པུ་ག་བར་ཀ་ ཞིང་ཁམས་ག་རྒྱལ་སྲིད་ བང་ཙོང་ཉི་རང་ ཡར་རྒྱས་དི་ཝ༌ཅ། ཉི་བང་ཙོང་ཁཱན་ སོ་ངོ་བ་ཀི་ ཁག་པེ་གོད༌ལ། 13ཧང་ཡ་དག་ནེ་ལ་ ལུང་བསྟན་པ་བ་དང་བཀའ་ཁྲིམས་ ཐམས་ཅན་རང་ ཡུ་ཧན་ན་སག་པུ་ཤ་གི༌ལ། 14ཇི་གི་ཡེག་ཁཱན་ག་ ཆ་ཐ་ལེ་ག་སེམས་ཆོ་ནེ་ལ་ རོག་ཤོ་ ལུང་བསྟན་པ་བ་ཀི་ ཨོ་ཕེ་དག་ཉི་ ལུང་བསྟན་ཁཱན་ ཨེ་ལི་ཡ་གི༌ལ། 15ཨི་བི་ག་ན་ཅ་གི་ལ་སྨོ་ ཨོ་ཉ་སོ་ངོ་གི་ཉཱན་ཅེན།
16ཨོ་ཉ་མི་རབས་ ཇི་གི་ཧང་ཀབ་རེ་ཉི་གོད་པེ་ཡ། རོག་ཏེ་བ་ཤོ་ ཚོང་ཕི་ས་ཁོན་ལང་ཐཱན་ བཱརའ་སོ་ངོ་བ་ར་ཁཱན་ ཝག་ཙ་བ་ད་བུ་ཐུར༌ལ།
17ཨ་ཤི་ ན་ཧ་དེན་གེ་ ནམ་བུརུང་ཐེད་པ་ དག་པ་ཀབ་ཉི་ ན་ཤི་བོརོ་མ་ཇོང་ཤི། ཉི་ཨ་ཤི་ སྐྱིད་སྡུག་ལང་པ་ག་ ངང་ཇང་པ་ཀབ་ཉི་ ན་ཤི་མ་གེབ་ཅི།
18ཡུ་ཧན་ན་ མ་ཟ་ལཱན་མ་ཇ་མཱན་ཨོ་ཕ། དག་པ་ཀབ་ཉི་ རོག་ཏེ་བ་ཀི་ཡེག་ལ་ རོ་ཀ་ནང་ཀ་དོན་ནུ་ཕ་ཆོ་ཝ་དག༌ཉི། 19སོ་ངོ་ག་ཟ་ཤོ་ ཟ་ཉི་ཇམ་ཉི་ཨོ་ཕ། ཉི་རོག་ཏེ་བ་ཀི་ཡེག་ལ་ རོག་ཤོ་ ཏོ་ལི་དང་ཞུ་སུང་ཁུ་ཁཱན་ ཉི་ཁྲལ་དུས་ཁཱན་བ་དང་ སྡིག་ཅན་བ་ཀ་ ཇ་རོ་གི་ལ་དག༌ཉི། ཨོ་ཉེ་རང་གི་ནེ་བུ་ རིག་པ་ཤོ་ དེན་པ་གི་ལ་ཨ་ཉི་ ལའི་གི་ཁུངས་ཀེ༌ཅ༎
དད་པ་མ་ཨ་ཁཱན་ཁྲོམ་ཆེན་བ།
20ཉི་ཡི་ཤུ་གི་ རྫུ་འཕྲུལ་མང་པུ་ཐུར་ གེན་ཉི་གནང་ཁཱན་ཁྲོམ་ཆེན་བ་ཀ་ ཇུར་ཇང་གནང་མེ་གོ་ཙུག་པ༌ལ། ཧང་ཡ་དག་ནེ་ལ་ རོག་ཏེ་བ་ཀི་ སྡིག་པ་གེ་མ་ལོག་པ༌ལ། 21ཨའི་ ཁོ་ར་ཇིན་ ནཱན་ཧབ་ཏུར་ཀ་ལུ་ཨོ་ཕེ་ཡ། ཨའི་ བེད་སེ་ད་ ནཱན་ཧབ་ཏུར་ཀ་ལུ་ཨོ་ཕེ་ཡ། ན་ཧ་པོང་ཀ་གེན་ཁཱན་ རྫུ་འཕྲུལ་བ་ ཏྲུ་རོས་དང་ སི་དོན་#11:21 གསུང་རབ་མཱན་མ་ག་གང་ཀ་ ཏྲུ་རོས་དང་སི་དོན་དག་ཁཱན་ཁྲོམ་ཤོ་ ལའི་ངན་པ་ཨ་ཁཱན་སོ་ངོ་བ་ཀི་ཕུང་མ་ཨ་དེན་གེ་ ཨིས་རེལ་ག་ལུང་བསྟན་པ་བ་ཀི་ ཨོ་ཐ་ཁྲོམ་ཉིག་ཙིང་ག་དགྲ་ཨ་ཉི་ ལུང་བསྟན་མ་ཆོ་ཝ༌ལ།ག་གེན་མ་ཆོ་ནེ་ལ་ རོག་ཏེ་བ་ཀི་ གི་ཚེ་གེ་ཤ་ བོ་ར་ཕ་ཙ་ཡེན་ཐཱན་ ཐུ་ལུ་ནང་ཀ་ལང་མ་ཨོ་ཕེ། ཉི་སྡིག་པ་གེ་ལོག་པ་ཨོ་ཕེ། 22ཨོ་ཉི་ཨ་དེན་གེ་ ཇི་གི་ ན་ཧ་ཡེག་ཅ་ ཁྲིམས་ཅཱད་པེ་ནོང་ཀ་ ཏྲུ་རོས་དང་སི་དོན་གི་ ཁྲིམས་ན་ཧེ་ཡང་པུ་ཉོང༌པེ།
23ཀ་ཕར་ན་ཧུམ་ ནཱན་ཤོ་ ཐོ་ལ་ཞིང་ཁམས་ག་ ཤེག་པེ་ཨ་ཉི་སྨོ། མང་གི་ ནཱན་ཤོ་ དོང་དམྱལ་བ་ག་ཏཱན་ ཕ་པེ་གི༌ལ། ན་ག་གེན་ཁཱན་རྫུ་འཕྲུལ་བ་ ཁྲོམ་ས་དོམ་ག་གེན་མ་ཆོ་ནེ་ལ་ ས་དོམ་ཨོ་མ་བུ་ཆོ་ཝ་ཨོ་ཕེ། 24ཨོ་ཉི་ཨ་དེན་གེ་ ཇི་གི་ ན་ཧ་ཡེག་ཅ་ ཁྲིམས་ཅཱད་པེ་ནོང་ཀ་ ཁྲོམ་ས་དོམ་གི་ཁྲིམས་ ནཱན་གེ་ཡང་པུ་ཉོང་པེ་དག༌ཉི༎
ཝུ་དུག་ཁཱན་བ་ཤོང་ལའི།
25ཨུ་ཉུ་གང་ཀ་ ཡི་ཤུ་གི་ ཨོ་ཐེན་སྨོན་ལམ་ཏ་པ༌ལ། ཇ་ག་ཡབ་ ནཱན་ཤོ་ ཞིང་ཁམས་དང་འཛམ་གླིང་ག་ གཙོ་བོ་གི༌ལ། ཉི་ནཱན་གི་ ཨོ་ཐ་བ་ མཁས་ཏྲ་བ་དང་ དཔེ་ཆ་ལམ་ཁཱན་བ་ཀེ་གུམ་ཐཱན་ ཝག་ཙ་བ་ཀ་ གེན་ཉི་གནང་མ་ཨ་དེན་གེ་ ཇི་གི་ ན་ག་བཀའ་དྲིན་བསམ༌ཅ། 26གི་ལ་ཡབ་ ཨུ་ཐུ་ཤོ་ ན་ག་ཐུགས་བཞེད་གི༌ལ། ཉི་ཨུ་ཐུ་ད་བུ་ག་ ནཱན་ཐུགས་བཞེན༌ཅ།
27ཇ་ག་ཡབ་གི་ ཐམས་ཅན་རང་ ཇ་ག་ག་དང་ག་གནང་མ༌ཅ། ཡབ་ཐུར་གི་མ་ཏོག་པ་ བཱརའ་ཨི་བི་གི་རང་ སྲས་གུམ་མ་ཡེ༌ལ། ཉི་ཡབ་ཨི་བི་གི་ལ་སྨོ་ སྲས་ཐུར་དང་སྲས་གི་ གེན་མེ་དེན་གེ་ སི་ཁཱན་བ་ཀི་མ་ཏོག་པ་ བཱརའ་ཨི་བི་གི་རང་མ་སེ༌ལ།
28ནའི་ཝུ་དུག་ཁཱན་དང་ རོང་ཅིད་པུ་བང་ཁཱན་བ་ ཇང་ཆོ་ས་ག་ཨོ་དོ། ཉི་ཇི་གི་ ན་ཧ་བ་ ཤོང་ལ་ལེ་བི༌ལེ། 29ཇ་ག་ངེ་ཤིང་ ན་ཧ་ཐུང་ཀ་ཀེ་ཉི་ ཉི་ཇང་གེ་ལམ་ཅོ། ཧང་ཡ་དག་ནེ་ལ་ ཇང་ཤོ་ ཇམ་པུ་དང་སེམས་ཀ་ཉམ་ཆུང༌ཅ། ཉི་ན་ཤི་ ན་ཧ་སྲོག་ག་ ཤོང་ལ་ལེ་ཉོང༌པེ། 30ཧང་ཡ་དག་ནེ་ལ་ ཇ་ག་ངེ་ཤིང་ཤོ་ ཡ་ལུ༌ཅ། ཉི་ཇ་ག་རོང་ཡང་པུ་ཅ་དག༌ཉི༎
Okuqokiwe okwamanje:
མ་ཏི། 11: TNTB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Tshangla New Testament
© 2023, The Bible Society of India
all rights reserved
