Lug 24

Jesu boy lɨbɨ

(Matɨyo 28:1-9; Marg 16:1-8)

1Dan̰ wɔlɛ gɨ ni dɨmasɨ, dan̰ jogɨɗu cururu na, kandɨ le sayge gɨrege orge cay kamɨn̰aŋ gaŋ, dan̰ sɔŋ gɨ ɗo̰ tɨna gɨ kan ƴomge cay tɨbayi le. 2Kan wayge garma gɨ gumu gɨ lɨgɨ kɨbɨ kamɨn̰aŋ le, nungɨloŋ walaŋ a kɨbɨ nee. 3Kan andaŋge duroy kamɨn̰aŋ gaŋ, ama kan waage gundi Ba-gulɔŋ Jesu le naŋ. 4Kɨɗɨn̰ ga kan ba ɨrɨmge bɨrɨŋ wayan̰ge cay tɨbayge naŋ bɨ ga ma, kan solge kalaŋ won̰ge sɔɔ dan̰ badɨge ga jɨran̰de andaŋge cayge dus. 5Hundɔrɔ lee kandɨ le bɨrɨŋ gɨ kan dobɨ cayge dugo. Ama kalaŋ le yege hɨn̰: «Na kɨya wa ma magɨŋ mal ungo gɨ som-bɨra dan̰ cɨndi duroy kalaŋ ga madɨrdaŋ gaŋ ga? 6Ban unɔ a kɨɗɨn̰ ga kɛ gaŋ, ama ban boy lɨbɨ a duroy kalaŋ ga madɨrdaŋ gaŋ. Hɨngɨŋ cay kɔl gɨ ban yəgɨŋ kɨɗɨn̰ ga ban ban̰ a Galile ƴee le. 7Ban ye hɨn̰: “Naa wa wa kalɨn̰ ma kan kɨya dɔbɛ Kurɨn̰-ungo kobɨ ka-lɔɔ ɨsɨna, ɗe kan na gagɨlige a cay sɨya-gɨ-dagɨli gɨŋ bɨ, ɗe ban na boy lɨbɨ wɔlɛ sɨbɨdi gɨŋ bɨ.”»

8Kɨɗɨn̰di ga nee gaŋ le, kuduroyge hɨn a cay kɔl gɨ tumɔ Jesu ba yege le. 9Kɨɗɨn̰ ga kan say cay kamɨn̰aŋ gaŋ jɨgage ɨni na, kan dorge kol hɨnga ga nee le nɔm bɨn̰ge kan ga mɔjɨ-cayge-pɨna bɨ, yen̰ge ka-aye-cay-tɨbayi ga ɗaŋ nɔm bɨ. 10Kandɨ ga nee le na: Mari di cay ƴaa do na a Magɨdala bɨ, Jani bɨ, Mari di ni Jag ƴoyi bɨ, kandɨ ga ɗaŋ bɨ orge danage dorɨn̰ge ka-gɨre-gɨye ga da Jesu kol hɨnga ga kan solge. 11Ama ka-gɨre-gɨye ga da Jesu jege kɔl gɨ kan ba dorge le, hɨn̰ kɔl gɨ ni sɔndɛ wo̰. Kan bɨgage kuduroyge cay nee naŋ. 12Gaa ma Pɨyɛr jɨbɨ say bɨ gɨre or a cay kamɨn̰aŋ gaŋ. Ban nɨnge dɨbɨ cɨndi solɨn̰ duroy umboŋ kamɨn̰aŋ, ama ban sol na bagɨda ba wɔyɛ kɨɗɨn̰ pɨna ƴɔbɨ. Ban say jɨga ɨndi bɨ, kɔl kayi yɔd kɨya hɨnga ga ba lee gusɨge le.

Te gɨyəŋ gɨ Emayus gɨŋ

13Sɨla! A wɔlɛdi gɨ nee gɨŋ gaŋ le, ka-aye-cay-tɨbay Jesu won̰ge sɔɔ duroy kamdɨge saygage Jerusalɛm orge jɨn̰ cay karɨn̰ ƴaa ga woy ɓal hɨn̰ kɨlomɛdɨr mɔjɨ-cay-sɔɔ wo̰, dan̰ cay ƴaa-di-gumu di Jerusalɛm. Cay ƴaadi nee le tooge naa Emayus. 14Kan ar kol hɨnga nɔm ga ba pɨde le duroyge orɨn̰ge daa daa. 15Kɨɗɨn̰ ga kan ar kɔl bɨ, man̰ge gusɨge orɨn̰ge daa daa na, Jesu kalɨn̰ ma ɨrga mɨnde gusɨge wayge bɨ, ba or danage. 16Kan solige dan̰ cɨndɨge ama hɨnga narge gɨ kan na gɨ solii naŋ. 17Jesu yege hɨn̰: «Na koldi wa ma magɨŋ ar dan̰ gusɨgɨŋ orɨn̰ daa daa wo̰ ga?» Ɨni na, kan jɨbɨge ɨrege dugo dan̰ cɨn̰-n̰age. 18Ban gɨ pɨna gɨ teeyige Kɨlopas dɨbii cay nee hɨn̰: «Kɛ, na ji ban pɨna han̰ ma na kɨrga gɨ cay ƴaa-di-gumu di Jerusalɛm gɨ ja kol hɨnga ga ba andaŋ a boy wɔlɛ gɨ kɛ gɨŋ le naŋ ga?» 19Jesu dɨbɨge cay nee yege hɨn̰: «Na wa ba lɔɔ hɨnga ga?» Kan jɨga dɨbiige cay nee yeyge hɨn̰: «Na hɨnga ga andaŋ a cay Jesu gɨ Najarɛt! Ban na ba-yɔɔ-kɔl-gɨ-Kumu-ba-yɔɔ. Kumu dan̰ kalaŋ nɔm solge hɨn̰ gɨ ban na lee gɨye bɨ, ye kɔl bɨ, dan̰ dɔnɔ. 20Ka-cay ka-bɔgɛ kɨbar kani nɔm, dan̰ ka-cay ka-dɔrɛ tumoyni ƴomiige dobiige kobɨ kalaŋ ga Rɔm, boyge kɔl tɨma si cay bɨ, asɨgarn̰əŋ gagɨli cay sɨya-gɨ-dagɨli gɨŋ bɨ. 21Ni-gandi tumɔ ni ɨrɨm hɨn̰ gɨ ban naa ungo gɨ ba-dɔrɛ te wɨn̰je gɨ da Ɨsɨrayɛl dɨboo daa wo̰. Ama wɨya hɨn̰ wo̰ naŋ. Bɨ haw kɛ, ɓal wɔlɛ sɨbɨ gɨ hɨnga ga nee le lee gusɨge.#24:21 Kondɨwa gɨ da Jubɨn̰əŋ na ɨrɨmge hɨn̰ gɨ turnon̰ ungo gɨ ma le na som gusɨn̰ gun wɔlɛ sɨbɨ. Kardi nee na turnoyi kɨya sɔ ɗɔɔ dan̰ gun le dugo coŋ ɔrɛ. Ɨni na gun le kɨya ɓale bɔyɛ lɨbe naŋ ɨni. A kɛ na ka-aye-cay-tɨbayi ga sɔɔ le ɨrɨmge hɨn̰ gɨ ungo na kɨya ɓale lɔɔ hɨnga ga ɗaŋ kol cay naŋ ɨni. 22Kardi nee coŋ kandɨ ga pɨna duroyni andaŋge dan̰ jogɨɗu cururu orge a cay kamɨn̰aŋ gaŋ. Bɨ kan jɨgage toy nee dornige kol hɨnga le, lee gɨ kɔl kayni yɔd. 23Ama kɨɗɨn̰ ga kan waage gundi naŋ ɨni na, kan bɨlgɨ cayge jɨgage yenige hɨn̰: “Ka-ƴɔbɛ ga daa nii ba andaŋge cayni yonige gɨ Jesu som-bɨra dan̰ cɨndi.” 24Kalaŋ ga pɨna duroyni orge cay kamɨn̰aŋ gaŋ bɨ, wayge hɨnga ga nee le, hɨn̰ gɨ kandɨ ba yege wo̰. Ama Jesu na kan wayayge naŋ.»

25Ɨni na, Jesu yege hɨn̰: «Ay! Ka-dɨngale ga ɨrɨmedɨgɨŋ nɨn̰e tɔgɨ. Kɨŋ baa bɔgɛ kuduroygɨŋ a cay kɔl nɔm gɨ ka-yɔɔ-kɔl-gɨ-Kumu-ba-yɔɔ ba yege le ga? 26Kɨŋ sɨla hɨn̰ gɨ naa wa wa kalɨn̰ ma, Kɨris ban gɨ Kumu dorii le kɨya gɨle-cɨn̰ pa dɨm ma ban kɨya andɨn̰ a duroy gusoŋ-tɔgɛ gɨŋ naŋ ga?» 27Ɨni na, Jesu dor te kɔl gɨ ojɨ cayi, gɨ kan walge duroy Magtubu di da Kumu dɨŋ. Ban ay toy a cay magtubu da Moyis dɨŋ bɨrɨŋ, andɨn̰ duroy Magtubu di da ka-yɔɔ-kɔl-gɨ-Kumu-ba-yɔɔ nɔm. 28Kɨɗɨn̰ ga ban ba mɨnde dan̰ cay karɨn̰ ƴaa ga kan gey ɔrɛ nee na, Jesu lee hɨn̰ gɨ ɗi na kɨya pɨde na daa ɔrɛ wo̰. 29Ama kalaŋ ga sɔɔ le ɗayge naŋ yeyge hɨn̰: «Sɨma danani, tɨwa or kɨya ɗɔbɛ ɨni, son̰do ba mɨnde.» Bɨ ban andaŋ som danage duroy ƴaa dɨŋ. 30Kɨɗɨn̰ ga ban som dugo danage kɨbɨ dɔɔ gɨŋ na, ban ay dan̰ mapa tor-kɨbi cay nee pa dɨm ma, ƴom boy duroy nee bɨge ƴee. 31Ɨni na, tɨdɨge say sagaŋ kə̰w cayi bɨ, kan soliige. Ama kɨɗɨn̰di ga nee gaŋ le bɨ, kaɗɨn̰ tumoyge. 32Bɨ kan sayge ye kɔl duroyge yege hɨn̰: «Jə! Kɨɗɨn̰ ga ban ba ɨre ye kɔl danana a te gɨyəŋ gɨŋ bɨ, dorna te kɔl gɨ duroy Magtubu dɨŋ bɨ le kɛ, ban dɨba bandɨ kuduroyna, bɨrɨŋ gɨ kuduroyna laa gusi-mɔwa naŋ ga?»

33Kɨɗɨn̰di ga nee gaŋ le bɨ, kan sayge hɨrɛd jogɨge a Jerusalɛm. Orge won̰ ka-aye-cay-tɨbayi ga mɔjɨ-cayge-pɨna dan̰ kalaŋ ga ɗaŋ dan̰ kondige ga dayge danage kɨɗɨn̰ pɨna. 34Ka-aye-cay-tɨbay Jesu ga dayaŋge kɨɗɨn̰ pɨna le, yen̰ge kan ga sɔɔ le hɨn̰: «Na cɨndi, Ba-gulɔŋ boy lɨbɨ a duroy kalaŋ ga madɨrdaŋ gaŋ. Ban andaŋ a cay Simo.»

35Ka-aye-cay-tɨbay Jesu ga sɔɔ le, say dorge kol hɨnga ga ba andaŋ cayge a te gɨyəŋ gɨŋ bɨ, tɨdɨge di buyoŋ a cay Jesu kɨɗɨn̰ ga ban ƴom mapa boy duroy nee bɨ.

Jesu andaŋ a cay ka-aye-cay-tɨbayi

36Kɨɗɨn̰ ga ka-aye-cay-tɨbay Jesu ɨre yege kɔl ban̰ nee ƴee bɨ gaa ma, Jesu andaŋ cayge dus yege hɨn̰: «Gusi-dɔbɛ baa danagɨŋ.»

37Hundɔrɔ leege bɨrɨŋ gɨ joɗɨge bɛrɛ, kɨya wa kan ɨrɨmge hɨn̰ gɨ ke na sol na turnoy ungo wo̰. 38Ama Jesu yege hɨn̰: «Kɨya wa ma ɗugoygɨŋ algɨŋ hɨn̰ wo̰ ga? Kɨya wa ma magɨŋ ɨrɨm kɔl kuduroygɨŋ sɔɔ sɔɔ hɨn̰ wo̰ ga? 39Sɨlagɨŋ kɔbɔŋ dan̰ tɨbanɨ, na ɨŋ-bandi gusɨnɨ. Ɨsɨbɨgɨŋ gusɨnɨ sɨla. Kɨya wa turnoy ungo le, ɨran̰ dan̰ kuyoŋ bɨ, isi bɨ, gusi hɨn̰ gɨ kɨŋ ba sol gɨ ɨŋ ba-orɨn̰ kɛ wo̰ naŋ.»

40Ban ye kɔl gɨ nee le bɨ, gɨlge kobi dan̰ tɨbayi. 41Gusɨge mooge tɔgɨ bɨ, kɔl kayge yɔd nee bɨ, bɨrɨŋ gɨ kan waage cay tɨbayge di ni bɔgɛ kuduroyge cayi naŋ. Na toy di hɨn̰ wo̰ ma Jesu ɨngɨrge ye hɨn̰: «Kɛ kɨŋ orɨn̰ dan̰ hɨnga ga ni dɔɔ kɛ ga?»

42Kan ay kɨway gusa gɨ payi pɨna bii. 43Ban ƴee kobɨge bɨ, dii a tumoyge nɔm. 44Kardi nee ban yege hɨn̰: «Sɨlagɨŋ! Na kɔl gɨ ɨŋ ba yəgɨŋ kɨɗɨn̰ ga ɨŋ ba ban̰ danagɨŋ ƴee le: Kɔl gɨ kan walge ojɨn̰ canɨ duroy magtubu gasɨn̰-kɔl gɨ da Moyis dan̰ ka-yɔɔ-kɔl-gɨ-Kumu-ba-yɔɔ dan̰ magtubu Dɔgɛ kɨra le, naa wa wa kalɨn̰ ma, kɨya ɔrɛ kɨɗɨn̰dɨge gaŋ.»

45Ɨni na, ban haŋgɨ cɨndɨge, ɗe kan na solɨn̰ te kɔl gɨ kan ba walge a duroy Magtubu di da Kumu dɨŋ le. 46Ban yege hɨn̰: «Sɨlagɨŋ! Kan walge a duroy magtubu dɨŋ yege hɨn̰: Naa wa wa kalɨn̰ ma, Kɨris ban gɨ Kumu dorii le, kɨya wɔɔ cɨn̰-gɨle-cɨn̰ bɨ, wɔlɛ sɨbɨdi gɨŋ na, ban kɨya bɔyɛ lɨbe a duroy kalaŋ ga madɨrdaŋ gaŋ bɨ. 47Naa wa wa kalɨn̰ ma, kan kɨya tɔgɛ bɛrnɛ bɨn̰ te wɔɔ gɨ da kalaŋ pɨna pɨna, ayɨn̰ toy a cay ƴaa-di-gumu di Jerusalɛm dɨŋ. Bɨ kan kɨya tɔgɛ bɛrnɛ yɔɔge hɨn̰: “Bɨlgɨŋ gɨye-lɔɔdɨgɨŋ na, Kumu kɨya ɗɔɔ kuduroy jalɨwa a cay ɨsɨna kogɨŋ gɨŋ.” 48Kɨŋ na ka-sɔlɛ dan̰ cɨndɨgɨŋ bɨ, ka-yɔɔ kol hɨnga ga nee le nɔm bɨ. 49Sɨlagɨŋ! Ɨŋ-bandi, ɨŋ kɨya gɨygɨn̰ dan̰ hɨnga ga Banɨ ba ye gɨ ɗi na kɨya lɔɔ bɨgɨŋ le. Ama kɨŋ-gandi na, kɨŋ sɨma cay ƴaa-di-gumu dɨŋ kɛ, bɨrɨŋ gɨ ɗe dɔnɔ di da Kumu gɨsɨn caygɨŋ.»

Jesu say or daa nii

50Kardi nee Jesu dor tumoyge orɨn̰ danage jɨn̰ cay ƴaa di Betani dɨŋ. Bɨ a kɨɗɨn̰di ga nee gaŋ le, ban don kobi daa torɨn̰-kɨbi cayge. 51Kɨɗɨn̰ ga ban tor-kɨbi a cayge ban̰ nee ƴee bɨ ga ma, ban ɗege bɨ Kumu ayi orɨn̰ daa nii. 52Ka-aye-cay-tɨbayi poyge mɨregi n̰ɨriige ɨni na, kan sayge jogɨge a cay ƴaa-di-gumu di Jerusalɛm dɨŋ dan̰ gusi-mɔwa di gumu. 53Ay toy a boy wɔlɛdi gɨ nee gɨŋ le, kan ɨrege dan̰ wɔlɛ pɨna pɨna a duroy gulɔŋ ƴaa-di-da-Kumu dɨŋ, kɨya hɨramɨn̰ge Kumu.

Okuqokiwe okwamanje:

Lug 24: gab

Qhakambisa

Dlulisela

Kopisha