मत्ती 23
23
चयेलम धङ् फरीसी घयेत्ल येशुगी लप्स्य तङ २३:१–२३:३९
चयेलम धङ् फरीसीगी मत् ओ़बे लेमी़ ढीक्ल लप्स्य १-३६
1ॱनी उन मी छेत्मीत् यो़प्प बेत्। ॱनी येशुगी मी घयेत् दी धङ् रोरङ्गी ॱलोप्टुक् दीबल हीन्दुक् सीन्न ॱस्येप्प बेत्। 2छ्यो़डीम्गी चयेलम घयेत् धङ् फरीसी घयेत् हुब मोशागी छप्पु डस्सील खोङ्गी स्युडील देत्न यो़क्केन् बेत्। 3हुबे घङ् ॱलब दील खीत्रङ् नेन्। ॱनी हुबे छ्यलु दी डस्सी खीत्रङ् मत् झ्यीत्। घन्ड हीन् सीन्न हुबे ॱयोङ्ल ॱलोप्स ज्यक्केन् बेत्। ॱनी रोरङ्सो हुल यङ् ॱस्युली ॱमीत् चीगेन् बेत्। 4हुबे खुच्च्ये ज्यप्न मी घयेत्ल खेद थेक्चो़त् को़गेन् बेत्। ॱनी रोरङ्सो़ म दी हुबल खेद तोक्चो़त् च्यीक् इक् ॱरोङ्रो मीत् झ्यीक्केन् बेत्। 5हुबे घङ् झ्यीप्पे ले घयेत् हुगो मी घयेत्ल तो़न्ज्येगी ढीक्ल झ्यीक्केन् बेत्। ॱसुङ्रप् ॱलुक्न खुर्केङ्गी गम्डुक् दी हुबे छ्यीदु सो़न सी़ल डान गीर्केन् बेत्। ॱनी हुबे छ्यी घो़ घयेत् दील पोजप् रीङ्मु स्यक्न घो़ङ्गेन् बेत्। 6मी डो़न् तोङ्सदु धङ् यहुदीगी छ्यो़गी छोगङ्दु हुब ढे तेङ्ल दो़च्च्येल मो़सी झ्यीक्केन् बेत्। 7ॱनी ठोम् छुसदु मी घयेक्की ॱसे स्यी़न युङल धङ् रब्बी सीन्न युङल हुब मो़सी झ्यीक्केन् बेत्।
8खीत्रङ्ल मी ॱयोङ्गी रब्बी सीन्न युङ्न ॱनी, हुगो सीत्तु ॱमत् ची़त्। घन्ड हीन् सीन्न खीत्रङ्ल चयेलम दी च्यीगी च्यीक्रङ् यो़क्केन् बेगो। खीत्रङ् जेङ् पी़न्ज्या हीम्बल डोगेन् बेगो। 9जम्बुलीङ्गी मी ॱसुल आक् खीत्रङ्गी यप् सीन्न मत् सीच्च्यीत्। घन्ड हीन् सीन्न खीत्रङ्गी यप् दी च्यीगी च्यीक्रङ् तेङ् यी़न यो़क्केन् बेगो। 10मी ॱयोङ्गी खीत्रङ्ल चयेलम सीन्न युङ्न ॱनी, हुगो सीत्तु ॱमत् ची़त्। घन्ड हीन् सीन्न खीत्रङ्गी चयेलम दी च्यीगी च्यीक्रङ् ख्रीष्ट् यो़क्केन् बेगो। 11खीत्रङ्गी घुङ्न ॱसु छ्यीया यो़दङ् हुगी ॱयोङ्म कुरीक्ल स्यप्च्यी़ ज्युज्यीत्। 12मी ॱसी़ रोरङ्गी रोरङ् छ्यीया हीम्ब ॱसम्गो़दङ् हुगो च्युङाल तोङ्गेन् बेत्। ॱनी यङ् ॱसी़ रोरङ्गी रोरङ् च्युङा हीम्ब ॱसम्गो़दङ् हुगो छ्यीयाल तो़ङ्गेन् बेत्।
13छ्यीलेल नङ् मत् लेब खीत्रङ् छ्यो़डीम्गी चयेलम घयेत् धङ् फरीसी घयेत् घन्डे दुक्प। घन्ड हीन् सीन्न मी घयेत्ल तेङ् यी़गी ज्यागक्की लम् कक्न स्यक्न खीत्रङ् ॱअङ् मीत् स्युक्। ॱयोङ्म स्युक्केल्ल अक् क च्यो़क्केन् बेत्। 14[छ्यीलेल नङ् मत् लेब खीत्रङ् छ्यो़डीम्गी चयेलम घयेत् धङ् फरीसी घयेत् घन्डे दुक्प। खीत्रङ्गी मोरेङ्मु घयेक्की ढोङ्ब लुप्केन् बेत्। मील तो़न्ज्येल ॱसुव रीङ्मु तोप्कीन् दो़क्केन् बेत्। हीगो झ्यीनी, खीत्रङ्ल छ्येप्प ॱल्हक्मु फोक्केन् बेत्।] 15छ्यीलेल नङ् मत् लेब खीत्रङ् छ्यो़डीम्गी चयेलम घयेत् धङ् फरीसी घयेत् घन्डे दुक्प। खीत्रङ्गी ज्यी़त् ॱयोङ्गी मी च्यीक् यहुदीगी छ्यो़लुल स्युन दो़क्केल्ल सोज्येगी ढीक्ल हुगो कुक्तु थक्रीङ्मु ज्यम्जो छ्यीम्मी़ लम्ल हीन्, कङ्दङ्रङ् हीन्न अक्, डोगेन् बेत्। ॱनी हुगो खीत्रङ्गी लेमु डस्सी झ्यीक्केल्ल झ्युङ्नी, ॱनलल छर्केन् खीत्रङ्ले दोबर्की आक्पागी मील हुगो खीत्रङ्गी ॱलप्न सोगेन् बेत्।
16ॱवे लम्बा स्यर्च्योक् घयेस्सो, खीत्रङ् घन्डे दुक्प। खीत्रङ्गी सीक्को़त्ल छ्यो़गङ् दी पङ्दु डेन्न मी ॱसी़ ॱन झ्यीगुक्क हुगो धम्ज्ये मीत् युङ्गेन् बेत्। छ्यो़गङ्गी नङ्न यो़प्पे ॱसीर् दी पङ्दु डेन्न ॱसी़ ॱन झ्यीगुक्क हुगो धम्बा युङ्गेन् बेत् सीक्केन् बेत्। 17ॱवे घुव स्यर्च्योक् घयेस्सो, घङ्गो छ्यीया बेक्क ॱसीर् दी न छ्यो़गङ् दी? छ्यो़गङ्गी लम्नी क हुगी ॱसीर् हुगो को़न्ज्योक्ल ॱमीन तीम्ब मेम्बेक्क ॱनी?
18ॱनी खीत्रङ्गी यङ् छ्यो़गङ्गी छ्यो़प्प पुस पङ्दु डेन्न मी ॱसी़ ॱन झ्यीगुक्क हुगो धम्ज्ये मीत् युङ्गेन् बेत्। ॱनी छ्यो़प्प पुसल स्यक्न यो़प्पे छ्यो़प्प दी पङ्दु डेन्न मी ॱसी़ ॱन झ्यीगुक्क हुगो धम्बा युङ्गेन् बेत् सीक्केन् बेत्। 19ॱवे स्यर्च्योक्सो, घङ्गो छ्यीया बेक्क, छ्यो़प्प दी न छ्यो़प्प पुस दी? छ्यो़प्प पुस दीगी लम्नी क हुगी छ्यो़प्प हुगो को़न्ज्योक्ल ॱमीब मेम्बेक्क ॱनी? 20हीगो झ्यीनी, छ्यो़प्प पुस पङ्दु डेन्न मी ॱसी़ ॱन झ्यीगुक्क हुगी उन छ्यो़प्प पुस दी धङ् उन घङ् यो़प्प घयेत् जेङ् पङ्दु डेम्बल डोगेन् बेत्। 21छ्यो़गङ् पङ्दु डेन्न मी ॱसी़ ॱन झ्यीगुक्क हुगी उन छ्यो़गङ् दी धङ् छ्यो़गङ्गी नङ्ल स्युगेन् खोङ् पङ्दु डेम्बल डोगेन् बेत्। 22तेङ् यी़ पङ्दु डेन्न मी ॱसी़ ॱन झ्यीगुक्क हुगी को़न्ज्योक्की ॱवङ् च्येम्मे स्युडी धङ् स्युडील स्युगेन् खोङ् पङ्दु डेम्बल डोगेन् बेत्।
23छ्यीलेल नङ् मत् लेब खीत्रङ् छ्यो़डीम्गी चयेलम धङ् फरीसी घयेत् घन्डे दुक्प। खीत्रङ्गी ॱमेन्ने ढङ् ॱस्येमेन्, सुप् धङ् जीरा झ्यीबनी गो च्युल तङे गो च्यीक् को़न्ज्योक्ल पुगेन् बेत्। हीले गो़बा च्येम्म छ्यो़डीम्ल यो़प्पे दम्ङीत् मीप्पे क दी, ॱङीङ्ज्यी झ्यीच्च्येम धङ् तेन्देन् झ्यीच्च्येम दी मीत् झ्यीप्प, हुगो ॱनङ्ज्युङ्ल स्योक्केन् बेत्। खीत्रङ्गी स्येन् हीगो ओक् झ्ये। ॱनी हुगी पुज्येम दी इक् झ्यीच्च्येम यो़क्केन् बेत्। 24ॱवे लम्बा स्यर्च्योक् घयेस्सो, खीत्रङ्गी च्याबीया डस्सील ॱसीङ्न छ्यीप्न पुर्केन् बेत्। ॱनी यङ् ॱमुक्मु घम डस्सी झ्यीब मीक् तोङ्गेन् बेत्।
25छ्यीलेल नङ् मत् लेब खीत्रङ् छ्यो़डीम्गी चयेलम धङ् फरीसी घयेत् घन्डे दुक्प। थार फोप्पे छ्यी दीरङ् ॱय च्येत्न चङ्मल सोगुक्। ॱनी यङ् नङ् दील लुप्केन् धङ् रङ्ज्यी़गी ढङ्गी घेङ्न यो़क्केन् बेत्। 26ॱवे स्यर्च्योक् फरीसी घयेस्सो, ॱअल नङ् दी एल्ला ॱय च्यो़त् गोगेन् बेत्। हुनी क छ्यी दी इक् चङ्मल डोगेन् बेत्।
27छ्यीलेल नङ् मत् लेब खीत्रङ् छ्यो़डीम्गी चयेलम धङ् फरीसी घयेत् घन्डे दुक्प। खीत्रङ् घयेत् रो बेक्सल छो़ कप्पु ॱही़म्ब डस्सी छ्यी दी च्यत् थीङीय झ्ये। नङ् दील मी ॱस्यीनरे री़त्तोक् धङ् ॱयोङ्म चङ्ज्ये मीप्पे ढङ् घयेक्की घेङ्न यो़क्केन् बेत्। 28हीगो डस्सी मी घयेक्की छ्यीनी तेबल ढङ्सी यो़त्तोक्पल, म दी नङ् दील खोक्री़ डस्सी अयेक्पे ढङ्गी घेङ्न यो़क्केन् बेत्।
29छ्यीलेल नङ् मत् लेब खीत्रङ् छ्यो़डीम्गी चयेलम घयेत् धङ् फरीसी घयेत् घन्डे दुक्प। खीत्रङ्गी धङ्बी़ कलुङ् ॱस्यो़क्केन् घयेक्की रो बेक्स घयेत् दी स्योङ्ले झ्यीक्केन् बेत्। ॱनी धङ्बी़ को़न्ज्योक्की मी ढङ्बु घयेक्की पुक्कङ् घयेत् दी लेदु सोले झ्यीक्केन् बेत्। 30ॱनी खीत्रङ्गी सीक्को़त्ल धङ्बु पुबु ॱमुमी़ ङोल ङीत् यो़प्प हीन्न, कलुङ् ॱस्यो़क्केन् घयेत् ॱसो़क्केन् दीबे दल ङीत् मत् रीब यो़ट्टो सीक्केन् बेत्। 31ॱनी हीगी केच्च्य हीगीरङ् खीत्रङ् घयेत् धङ्बु कलुङ् ॱस्यो़क्केन् घयेत् ॱसो़क्केन् दीबे ज्यी़त् हीम्बल डोगेन् बेत्। 32हुन्दुक् झ्यीन खीत्रङ्गी पुबु ॱमुमी़ झ्यीबे दीक्प ॱमत् छङ घयेत् दी खीत्रङ्गी झ्यीन छङल सो़। 33ॱवे डी़गी ज्यी़त् घयेस्सो। खीत्रङ् डी़गी ज्यी़त् झ्यीनी, घन्दुक् झ्यीन ॱनलल छर्केङ्गी छ्येप्प हुनी थर् छुगेन्? 34खीत्रङ् घयेत् च्याल कलुङ् ॱस्यो़क्केन्, झ्यी़रीक् खेबा धङ् चयेलम घयेत् ङे तोङ्गो़त्। ॱनी हुब घयेत् खीत्रङ्गी यरी ॱसो़क्केन् बेत्। यरी कुरुस्ल तान ॱसो़क्केन् बेत्। यरील छ्यो़गी छोगङ्गी नङ्दु डेङ्ज्यक् बेङ्गेन् बेत्। यरी यङ् सार् सार्नी रीदीक् ज्यप्न दीक्केन् बेत्। 35ॱनी हीगो डस्सी झ्यीन युङ्नी, जम्बुलीङ्दु को़न्ज्योक्की मी ढङ्बु घयेत् ॱसेप्पे छ्येप्प थम्ज्येत् खीत्रङ्ल फोक्केन् बेत्। को़न्ज्योक्की मी ढङ्बु हबील् ॱसेप्पनी झ्यीनी बेरेक्यागी भु जकरीया ॱसेप्प थुक्की ठक्की ङेल्लेन् थम्ज्येत् खीत्रङ्ल फोक्केन् बेत्। जकरीया हुगो छ्यो़प्प पुस धङ् छ्यो़गङ्गी ॱअर्तक्तु खीत्रङ्गी ॱसेप्प बेत्। 36ङे खीत्रङ्ल गन्दीय ॱस्येत् योङ्। हुगी छ्येप्प हुगो हीगी धीङ्सङ्गी मी हीबलरङ् फोक्केन् बेत्।
यरुशलेम्गी मी ढीप्पीय हीम्बे ढीक्ल ३७-३९
37ॱवे यरुशलेम्, यरुशलेम् कलुङ् ॱस्यो़क्केन् घयेत् ॱसो़क्केन् धङ् को़न्ज्योक्की तङे मी घयेत्ल दोर्तुङ् बेन्न ॱसो़क्केन्, यरुशलेम्गी मीस्सीर् खीत्रङ् घयेत् झ्यमु आमे रोरङ्गी छ्यीरुक् ॱस्योक्पक्की होक्ल इब डस्सी ङे खीत्रङ् घयेत् लेम्म गज्येन् इप्च्ये ॱनो़ब झ्यीबेन्। ॱनी खीत्रङ् ॱलीत्मोङ्। 38तेदे खीत्रङ्गी छ्यो़गङ् हुगो ह खीम्दोङ् ले डोगेन् बेत्। 39हरुङ्द ङे खीत्रङ्ल ॱस्येत् योङ्। ह हीनी झ्यीनी
इगी चोव ज्यीन्दक्की छेन्नी युङ्गेन् दी ॱमेल्लम् च्येम्म हीनो सीन्न खीत्रङ्गी सीरे यङ्ल मेन्द, खीत्रङ्गी ङ ॱमीत् थोङ्गेन् बेत्। (ॱसुङ्रप्की गुल्लु ११८:२६)
Okuqokiwe okwamanje:
मत्ती 23: LHM
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1995 Wycliffe Bible Translators, Inc. and Nepal Bible Society
