MATIYO 6
6
Misomo ya Insa yahusu zaka
1«Namudzifahamishe ufanya ĩɓada zanyu mbeli za wanadamu pare muonehane; neka tsi namuna iyo, kamutsopara thawaɓu ha Ɓaɓanyu alio mbinguni.
2Neka usutoa zaka, usudzivudziye ɓaragumu mauri ɗe inamuna wanafiki wafanyao moni na ziNyumba za Uswali na mav̄areni, ile wasifiwe na wanadamu. Nisumuambiani ha kweli, v̄ale kamwe wapara thawaɓu zawo. 3Ɓadi wawe wamotoa zaka, muhono wa potro waho usujuwe izo wa hume ufanyao, 4ile zaka yaho ifanyishihe ha siri; na Ɓaɓaho aonao sirini, atsohuliv̄ayo.»
Yahusu mamilio
(Luk 11:2-4)
5«Mwamofanya mamilio, musufanye mauri ɗe uwanafiki wav̄endzao umia ha ulimbala moni na ziNyumba za Uswali na hari mwa zinia-traru pare wanadamu wawaone. Nisumuambiani ha kweli, v̄ale kamwe wapara thawaɓu zawo. 6Ɓadi wawe, wamofanya mamilio, ngia fukoni haho, uɓale umulongo, umumiye Ɓaɓaho alio v̄av̄o ha siri; na waye Ɓaɓaho aonao sirini, atsohuliv̄ayo. 7Mwamofanya mamilio, musuengedze marongozi kayana mana mauri watru kawamuji Mungu, wadzifikiriao amba ha uwengi wa yamarongozi ɗe watsotakaɓaliwao. 8Musufanye mauri ɗe wao, mana Ɓaɓanyu asujua zamulazimuni, kaɓula wanyu umumia.
9Ɓasi tsini inamuna mwalazimu mufanye mamilio:
‹Ɓaɓatru alio pev̄oni,
dzina laho nalitwaharishihe,
10Utawalizi waho nauje.
Mav̄endzeleo yaho nayafanyishihe ulemenguni,
mauri ɗe pev̄oni.
11Riv̄e leo ini ishahula itsorilisao leo.
12Riswamihi mahosa yatru,
mauri ɗe wasi wajau, heli riswamihio wao warikosa.
13Usurilishe radjereɓilwa uzainiwa,
ɓadi ripukamanise na uMovu|Movu.›
[Mana utawalizi, ushindzi, na utukufu,
wawe ɗe Monyewe wizo daimani aɓada. Amina.]
14Neka mususwamihi wanadamu mahosa yawo wamufanyiani, Ɓaɓanyu Mungu alio mbinguni atsomuswamihini wajau; 15ɓadi neka kamususwamihi wanadamu, Ɓaɓanyu katsomuswamihini wajau mahosa yanyu.»
Yahusu ufunga
16«Mwamofunga, musudzirembedze mauri ɗe wanafiki; wao ugaudza sura zawo, ile waonese watru amba wafungu. Nisumuambiani ha kweli, v̄av̄o kamwe wapara thawaɓu zawo. 17Ɓadi wawe, wamofunga, dzirengeledze ishitswa mauri kula suku, uhose uso waho, 18ile usuonese watru amba ufungu, ɓadi ɗe Ɓaɓaho alio v̄av̄o ha siri; na Ɓaɓaho aonao sirini, atsohuliv̄ayo.»
Yahusu utadjirifu pev̄oni
(Luk 12:33-34)
19«Musudzingulidziye utadjirifu ulemenguni v̄anu, v̄ulio amba maɓiɓi na kutsu uangamidza, na waidzi uvundza na uhiɓa, 20ɓadi namudzingulidziye utadjirifu pev̄oni, v̄ulio amba maɓiɓi na kutsu kaziangamidza, na waidzi kawavundzu, wala kawahiɓi. 21Mana v̄ahanu v̄ulio utadjirifu waho, v̄av̄o wajau ɗe v̄utsokao umo waho.»
Mufano wa heu na shidza
(Luk 11:34-36)
22«Dzitso ɗe umwenge wa umwili. Ɓasi neka dzitso laho la djema, piya umwili waho utsoka hari mwa heu. 23Ɓadi neka dzitso laho la ɓovu, piya umwili waho utsoka moni na shidza. Neka iheu ilio moni haho ya shidza, ɓasi ha mara ngav̄i ishidza itsokao shidza!»
Mutru kashindri umurumishia Mungu na Mali
(Luk 16:13)
24«Kav̄u mutru ashindrao arumishiye warumisa waili, mana au atsoenga umoja, av̄endze umoja, au atsodzifungamanisa na umoja, apuzise umoja. Kamushindri murumishia Mungu, mwarumishia na Mali.»
Watru wamujuao Mungu, wasudzitriye hamu na zawalazimu
(Luk 12:22-31)
25«Iyo ɗe imana nimuambiaoni, musudzitriye hamu na maẽsha yanyu na iyo mutsoiɗyao na mutsoinwao, wala na umwili wanyu na iyo mutsoipindrao. Maẽsha, yao tsi ɓorwa rahana shahula, na umwili rahana nguo? 26Namuangaliye zinyunyi za hawani: izo kazitaɓu, kazivunu, wala kazingulidza ata shitru moni na zikanya, na Ɓaɓanyu alio pev̄oni uzilisa. Hali kamusina thamani ɓole rahana wizo? 27Mbani hari mwanyu, ha ihamu yahe, ashindrao aengedze trundra moja hari mwa umuri wahe?
28Na v̄anu, manatrini mudzitriao hamu na trongo ya nguo? Namufikiri namuna mafu ya shitsahani yameao: kayafanya hazi, wala kayasono. 29Ɓadi wami nisumuambiani amba ata Sulaimana hari mwa piya utukufu wahe, ne kaka apindra ha uzuri mauri moja hari mwayo. 30Ɓasi neka Mungu upindrisa namuna iyo ɗavu lilio malavuni liẽshio leo, meso litsovutswao moroju, je, ata katsomufanyiani zaidi? Uaminifu wanyu wa mushashi halisi! 31Ɓasi musudzitriye hamu, wala musudzidzise: ‹Ritsoɗya trini? Ritsonwa trini?› Au: ‹Ritsopindra trini?› 32Mana piya trongo zizo, watru kawamuji Mungu ɗe wadzisongao nazo. Ɓaɓanyu alio pev̄oni asujua amba zimulazimuni. 33Namutsahe raɓuzi Utawalizi wa Mungu na izo azitsahao, na piya zile mutsoengedzewazo. 34Ɓasi musudzitriye hamu na imeso, mana imeso itsodzishahilisha wiyo monyewe. Kula suku utosheha na taãɓu zayo.»
Okuqokiwe okwamanje:
MATIYO 6: swb
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2021, Wycliffe Bible Translators, Inc. All rights reserved.
