BOTHUBO 13
13
Abram ngo Lot Kütüta shive
1Ikehu Abram ye Egypt lono iqhove, pa ngo pa nipu eno pa pighi kümtsü sasü Negeb lo wuve. 2Abram ye atsü-aqu, ghükayi eno ameshoyi kipighi lo ighono kinikülü shive. 3Eno pa no Negeb lono chesü Bethel, khilehi pa no abothu lo aphiki tshü keno, ti ye Bethel ngo Ai küma dolo, 4a-a khile pa no atüghü lo akümlla-khache mla keno, tilau wuve. Eno tileno Abram no Ampeu mllae.#4:26; 12:8 5Lot, khuu Abram gholono wu keno, pa ghi ambe ngo ane loji eno timiqo sache, 6ikehu pama kümtsa küghünani keu ye ayeghi no tülalove; kughengu pamaw pichepighi ye ighono kutomo akehu kümtsa küghüna mlave, 7eno Abram tsü-aqu khemi ngo Lot tsü-aqu khemi dolo mtomshu keu auve. Tipa ghuloki lo Canaanmi ngo Perizimi ye ayeghi tipau lo küghüna ache.
8Tileno Abram no Lot vilo pi, “Nikujo dolo eno o tsü-aqu khemi ngo I tsü-aqu khemi dolo mtomshu ape kevilo, kughengu ningu ye abolomi ke. 9Ayeghi kümtsü o zülo anike kumo keshea? I launo o kütüta shivelo. Tsala nono au piyiu luve aye, I no au ajeu wuveni, momu nono au ajeu luve aye, I no au piyiu wuveni.” 10Lot no pa nhethi tsüpuku no Jordan Khila huye azünihoi Ampeu ghutu toi, Zoar küdau Egypt yeghi toi aghikeu ithulu. (Hi ye Ampeu no Sodom ngo Gomorrah kütsa mphi züuke.) 11Ikehu Lot no pa ampi sala Jordan Khila kümtsü kisheluve, eno pa ye kipelau wuve. Pama ye hitoi lakhino lakhi launo kütüta shive. 12Abram ye Canaan yeghi lo xüsüve, eno Lot no akhila lo mishighünaqo dolo xüsüve no Sodom kutolo pa phiki pekho wove. 13Sodommi ye küsakügha, Ampeu shou axine kije shiche kemie.
14Lot no pa launo kütüta shive kethiu, Ampeu no Abram vilo pi, “O nhethi tsüpukupe nono ngo akeu-a lono ahuu ngo apeu eno kipelau ngo kulolau julo, 15kughengu nono ithulu akeu yeghi kümtsü I no alholo ghenguno no eno o polo kughukomi tsüni. 16I no o polo kughuko pesü ayeghi lo asaye toi shi tsüni, ikehu tsala khuana no ayeghi lo asaye kihikulupu shi aghi aye, o polo kughuko ghi kihilu nani. 17Ithulo, ayeghi hipau akijelau eno akushulau kupuju chesü wulo, kughengu I no tipau o tsüni.” 18Ikehu Abram no pa phiki xakiqheve no wo Mamre lo aphisübo phivilo xüsüve, tipau ye Hebron lo ani, eno tile pa no Ampeu lau akümlla-khache shiqhe.
Okuqokiwe okwamanje:
BOTHUBO 13: SUMRVBSI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Bible Society of India
© 2023, Used by permission. All rights reserved. More