Markus 4
4
Vɨnado Aghama ba tawazɨ
(Matiyu 13:1-9; Luka 8:4-8)
1Yesu dɨ mɨnan dzakwa gyagɨyaka ta vɨna madzɨ. Sɨbɨ cas dɨ pa ghamatlɨn a tirusɨ, har dɨ baiya ta zahɨ ɗe kwatal ɗe madzɨ, dɨ tsɨgusɨ ɗahɨ. Ndyam sɨbaboka tlɨn data vɨna madzɨ. 2Dɨ gyagiya tlɨn kutato cas a vɨnado. Ɗe gyagiyakɨ tusɨ a ɗɨnga ndu, 3tɨyi kumai! Wɨ ba tawazɨ dɨ buse tawazɨ. 4Tɨ ndɨ ɗe vahiya varai ka, wi varai dɨvusɨ nda ta darhɨ, je buwaza zhanyaku dɨ parai. 5Wi varai dɨ vusa ta ɗai adare kwa mɨdzai zhɨkɨ. Asɨnatama casu dɨ bawai, adama mɨdzaika ma zhɨku, 6dage ɓaa muku dɨ losai, adama amarme za tlerwanwasu dɨ tsɨfai. 7Wi varai dɨ vusɨ ɗe vekiyayo, daga tɨfa veki dɨ tlɨmbuseyi, amarma dɨ za tiyu. 8Ama wi varai dɨ vusɨ ɗe mɨdzai ma mban, dɨ bawa saɗaɗa, dɨ gwardzusɨ, dɨ zaa ti ma mban, dɨtlɨgusɨtlɨgau, wi diɓi kidi, wi diɓi maha, niwi ma kwape be ɗyal wutɨ.
9Yesu dɨ ɗa ndu, “Batɨda kumai ma dɨkayakɨ ka tadɨkai.”
Zhamata vɨnado aghama ba tawazɨ ka
(Matiyu 13:10-17; Luka 8:9-10)
10Daga beɗe tlɨna metlɨn, sɨbana ɗiyusɨ fa nikya bahɨntsɨrka,jetsɨyusɨ zhamata vɨnadoka. 11Je bɨla tlɨna ndu, “Hinkɨn, atsanatsa sɨnaka nzuya Gwalfu ta Ghɨnsai, ama sɨba tlɨmma ɗenau, tangan meki kwafa nda vɨnado. 12A dama
“Tlɨna ndarna dɨ ndarnau ama tlɨnma nayau,
Tlɨna dɨkaya dɨkayai ama tlɨmma sɨna zhamatazau,
adama kabi sɨnaka tlɨna dzɨgatlɨn dɨbi bɨsatlɨn lyapɨ natlɨnai a Ghɨnsɨ!”
13Je ɗɨnga tlɨna Yesu du ndu, “Ase na lɨkaima ndɨra nakɨn vɨnado kɨna? To kukwa nasa bi sɨna bɨrɨm vɨna doka jika? 14Ba tawazɨ ka tataa tɨnza ɗɨngɨ ta Ghɨnsɨ. 15Varai ba vusa ta darhɨka tlɨnji waneyin sɨba dɨkaya ɗɨngɨ ta Ghɨnsɨ. Ndaa dɨkayakɨ ka, tɨmbɨzɨm garna dɨ busɨ kɨrma ɗɨngɨ kayaɗe cantlɨn. 16Sɨba dɨ vatlɨn atlara ɗai dɨgan wanka, tlɨnji sɨba ndaa dɨkayaka ɗɨngɨ ka dɨ gɨsai da lyakwa lyakwau. 17Tɨn da tlɨmma tlerwanu, tlɨmma gwau. Kwa saa kaitɨ ko wiya hɨlayakɨ dɨ maratlɨnka a dama ɗɨngɨ ta Ghɨnsɨka, tlɨna lɨɓatlɨn lɨɓai nda dliya dli. 18Niwi Sɨbɨ dɨ wan vare ba vusɨ ɗe vakɨyayo, tlɨnji sɨbana dɨkaya ɗɨngɨka, 19ama daa makɨ ta duniya, ɨna araka cantlɨn ata kutatau, ɨna kwaɗɨya dukɨ ji zusa cantlɨn dɨbi tlatlɨna ɗɨngɨ kai, dɨ tlɨgatlɨn manamu. 20Varai ba dɨ vusɨ de mɨdzai ma mban, tlɨn ji wane yin sɨbana dikaya ɗɨngɨka, dɨ gɨsau dɨ mbɨnatlɨn dɨ tlɨgatlɨn diɓi kidi kidi, niwi dɨ diɓɨ maha-maha, niwi dɨ ɗyal wutɨ-wutɨ.”
Pɨtɨlah ma dzaɓai a gali
(Luka 8:16-18 )
21Dɨ mɨna ɗɨnga tlɨna ndu, wiga gɨɓa ku ɗe pɨtɨla dɨ dzaɓoya galiwa, ko dɨ ara bɨɗa dlarwa, dɨma araza dɨna ta wihamu nda? Damana tsaa ku. 22Ndyam hamba tlɨn da pepiyaka a bawai tlɨna vikan ewuya, ndyam hamba tlɨnda tɨɓakɨka agɨta tlɨn gɨtau. 23Batɨda kumai ma dɨkaya yuka ta dɨkai. 24Dɨ mɨna ɗɨnga ndu. “Tiyi kumai saɗaɗa fa hamba na da ta dɨ kayau, hamba hɨne ɗɨma wika aɗɨmana gan wanka, har dɨ rara wane hɨne ɗɨmau. 25Ndɨ batɨda kutɨka a daɗaya gatu. Ba tɨma wihamu, wihan niya kunwasɨka agɨsaya gɨsai.”
Vɨnado Aghama varai ba bawo
26Dɨ mɨna ma ndu, “Gwalfu ta Ghɨnsɨ ka nji wan sɨm ba dɨ va varai amɨdzai. 27Ba tleɗa sɨna camaza dɨ zɨkusɨ tsɨwai tɨma sɨna ena bawa varai da gwardzusu. 28Varaika ta bawa ghama mɨdzai, ta dzakwa ta tsɨkwakɨ, dɨ mbala ɗɨ gham dɨ za ɗa ti. 29Kwabi naa tlɨna hamba dɨ mbalaka dɨ kiya ɗɨ ngɨlatɨ dɨ kurai,matsau dɨnsu jikai.”
Vɨnado a ghama ditsa mastad
(Matiyu 13:31-32; Luka 13:18-19)
30Yesu dɨ mɨna tsɨya tlɨna ndu, “Miya gudza gwalfu ta Ghɨnsɨ kɨna ma? Ko miya gudza za varai wena vɨna dawa? 31Nji wan ditsa mastad, ma nji ndɨ gyaɓinini a ɗe varayayau na duniya. 32Ndyam ɨna wanka, kwabi tɨnzazaka, dɨ gwardzazai dɨ ra tlipiyayo na tsakɨn, dɨ va pe-eyazai har zhanyaku da dawaza tu.”
Yesu ɗɨnga-ɗɨnga vɨna do
(Matiyu 13:34-35)
33Yesu dɨ ɗɨnga tlɨna ɗɨngɨ ma piyatɨ a vɨna do cas wanena tɨda ɗɨmau, saɗaɗa ta vɨna sɨnakɨ ta tlɨn. 34Tɨma bɨla tlɨna ɗɨngu kwafa a yagu vɨnado ɗahɨ. Ama tansu ndɨ ti ɨna sɨba gyagiyakɨ niwasɨka ta bɨlatlɨn zhamataza ndyam.
Yesu daba lɨpɨm ma ghɨnau
(Matiyu 8:23-27; Luka 8:22-25)
35Muku taka rɨdza je ɗɨnga sɨba gyagiyakɨ niwasa Yesu du, “Pɨlima mi bama ta pakɨ ta yika.” 36Je zuwa sɨbɨ ka tacɨɓɨ, dɨ batlɨnai ɨna ti, sɨba gyagiyakɨ niwasɨ dɨ zatlɨn ɗe kwatal ma tɨdɨ ɗahɨ, wuya kwatalalo dɨgoyi. 37Je tlusa ruwun bakalpɨ da kambɨlai kwatal, zho bi da vusɨ ɗe kwatal wan sa mbɨla zai, 38Yesu dɨ yika ta ciɓɨ kwatal, tɨ da ta sɨnawa ta hamba piyau. Je zɨkusa sɨba gyagiyakɨ niwasɨ, dɨ ɗɨngaya ndu, “Basɨnakɨ, tama manan ɗahu, fa ma kwaya bɨrama?”
39Je tlusa Yesu, dɨ daba ruwunka, dɨ ɗɨnga bii na madzɨ ka ndu, “Tsirkwai, makɨnafu tik.” Ruwun dɨ tsɨrusai tik.
40Yesu dɨ ɗɨnga sɨba gyagiyakɨ niwasa ndu, “Hɨnata laka ma ji wankana? Na tsa ma gan gasƙewata?”
41Dɨ shiɗa tlɨn lakaka yuwai, tlɨndɨ su ndɨ shashɨkai. Dɨ ɗa tsatsɨyaya tsafaya tlɨn du, “Wena sɨm ji wan kɨna! Ba, ruwun ɨna bi da ɗiya dɨngɨ tusa!”
Okuqokiwe okwamanje:
Markus 4: MKF
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
©2023 Seed Company in collaboration with Language Developers and Bible Translators Association
