Lŭka 11

Jezŭ Thèhlô̆ Dèdathèb́è̆

(Mattĕo 6.9-13; 7.7-11)

1Dinidèthè̆ Jezŭ thèb́è̆hta d́ŏ ale dokhlo nu kî Cò òsòd́è̆ akhî nu, Zo bōhmubicè aklè̆ dèbwè d́ò cè, “Ŏ B́ĭcè, thèhlô̆bò̄ wa akè thèb́è̆ acab́ô̆ Zowănnī thègè abōhmubicè tòcò akhò̆ nu,” cò d́ògè lōwa d́o.

2Jezŭ d́òge cè tòcò,

“B́ĕ thĭ thèb́è̆ nu d́òbò̄;

‘Ŏ Apa, Ni mi kè̄ b́è d́ò̆è Atcahtĭ tîkî.

Ni htĭ Ne ge gō do d́ò̆bò̄è tîkî.

3Ibò̄ wa khŏdini atoko tîkî.

4B́ăplèbò̄ wè dèkhòwè,

manè̄ wa b́ăplè lŏ bija amò tani wè dèmège akholī tòcò acè̆ nu.

Kî leihŭbò̄ ḿè wa d́ŏ dèhnakă abu ḿè,’” Cò d́ò̆sagè lōwa tòcò do.

5Mèhwă Jezŭ d́ògè cè tòcò, “D́ŏ thĭ klè̆ nu athò ò dèbwè kî klăḿè̆lumu nu, thĭ lehtî cè kî d́ò cè, ‘Athò, ilò Mò̄kô jè toko thŏmè̆. 6Manè̄ jò thò dèbwè dohtîgè jè, ḿî dè amò i acè tò ògè dimĭ ńò!’ 7Cò kò ò hwă hibu cò d́òscĭge ma, ‘Mèd́îd́ă ḿè jè ḿè. Khaglè̄ òb́ò̆b́igè. Jè kî jo pho ji li tòcò sòḿĭsò̆ha htŏ. Jè dè wè̄hto kî i za nè ńò,’ cò kò̄ d́ò ma do dō, 8Jò d́ò̆sa thĭ, cò kò̄ dè wè̄hto i nòthò̆ cè d́ŏ zi ḿî lōwa athò akhoacè̆ ńò hnò̆nu, d́ŏ zè dèda digrî̄nî̄ akhoacè̆, ci kī i tèpwè lōwa. 9Jò d́ò̆sa thĭ, dabò̄, thĭ gī nib́èkò̆. Wāhlèbò̄, thĭ gā pahtîkò̆. Tòklòbò̄, dè kā b́ăhtanikò̆ thĭ. 10Manè̄ d́o bija adadè dèbwè nu zi nib́è tèpwè. Bija awāhlè dè dèbwè nu za pahtî tèpwè, kî bija atòklò dèbwè nu dè ka b́ăhtani tèpwè cè. 11Barasă d́ŏ thĭ klè̆ nu apho da atoko d́ō, ai cè lo, ada a dāpho d́ō ai cè wu kò òbò̄ dèbwèbwè ā? 12Ḿî̆dîḿî ńò da a dè ad́i tu d́ŭ d́ō ai cè lode kò̄ òbò̄ dèbwèbwè ā? 13Mègōnu thĭ nu thĭ kî̆kkè nòthò̆ hnò̆nu, thĭ ki i za ma thĭphothĭli dè aè d́ō, thĭ Pa aò d́ŏ Mò̄kho dèbwè nu Ci ki i d́okhlŏkò̆ bija ada Cè tòcò Spirito Tcahtĭ tè b́è ńò ā?” Cò d́ògè lōwa tòcò d́o.

Jezŭ kî Bilzabŭba

(Mattĕo 12.22-30; Mărko 3.20-27)

14Kîd́ò̆ Jezŭ hna hèhtagè dèscidèhnè ablîglo to d́ŏ nu d́ō, bija ablîglo dèbwè jî̄b́ègè akhoacè̆, bija tòcò htèdômô̄dahmă lōgè. 15Barasă bija tòcò d́ògè, “Za hna hèhtaphlòḿĭ dèscidèhnè d́ŏ za saphra Bilzabŭba acô̆thèlè̆ abu nu,” cò d́ògè lōwa d́o.

16Tòcò cò thaè wāhlè Zè dèkèḿè d́ō, dagè Cè dèhô̆gèlè aò d́ŏ Mò̄kho tòcò nu. 17Barasă d́ō Jezŭ thîhè̆ zè dègomo tòcò akhoacè̆ Cò d́ò lōwa tòcò, “Gajă htĭge abēpha ane tòcò nu lamulapha tèpwè. Hiphă tòcò ḿî gōnu lò lò. 18Sătana ge bēpha ma ane d́ō, zi htĭ ze ge gò̄ sò̆hto òhme za cadè̄? Manè̄ thĭ d́ògè jè htè ja hna hèhta dèscidèhnè d́ŏ Bilzabŭba ami abu nu. 19B́eḿĕ Ja gā hna hèhta dèscidèhnè d́ŏ Bilzabŭba acô̆thèlè̆ abu nu d́ō, thĭ pho thĭ li tòcò hna hèhtakô d́ò̆ bò̄bwè? Mègōnu cè tòcò gî̄ ḿîkò̆ acirrathĭ. 20B́eḿĕ Ja gā hna hèhta dèscidèhnè kî Kib́ĭcè acukońŏ d́ō, Kib́ĭcè Ahtĭage dohtî htŏ thĭ dòkhò̆.

21“B́ĕ bija akhob́ăădo dèbwè òi pĕhta dèrî̄dècŭ kî dôi zi hiphă akhî nu, zè dèhtò̆dèla tòcò ò èzènè b́è tèpwè. 22Barasă bija akhob́ăădo d́olĭ cè dèbwè d́ophja kî nobè cè tapla d́ō zî phîthĭwī hwă lōwa dèrî̄dècŭ htè cè tòcò bè̄dobè̄mugè d́ō, zi gî̄ phîăwū tèpwè lōwa dèhtò̆dèla tòcò nu kî bēpha ilakè̆ dè htè ca ăwūni tòcò nu.

23“Bija atò òkô ja kă ńò dèbwè nu htakhokă jè kî bija adu htuplobè̆plo zo jè dè ńò dèbwè ḿî bija abāphrubāphrî̆ dè lò.

Dèhnè Acîpô Geb́a Alekă

(Mattĕo 12.43-45)

24“B́ĕ dèhnè acîpô hèhta hwă bija ahîklè̆ nu, zè hè wāhlè ze le zè klè d́ŏ khò̆krakho nu, barasă za da pahtî alleaklè dală ńò d́ō Cò d́ò, ‘Je gē ge d́ŏ ji hi htè ja bāladē dawa nu.’ 25B́ĕ ze geb́a ze lekă, genī hid́o abu d́ō, za tcahtîgè aòhwib́ăwāb́ă kî prahnè èzènè d́o. 26Hwă d́ō ze le kî jokègè dèhnè akî̆kkè d́olĭ cè thăthôtod́ŏ, kî le òplosò̆jīgè lōwa d́ŏnu d́ō, bija khŏnu dèbwè zî̄lazô̄hta d́okhlŏ kî aŭsu nu dòkhò̆,” Cò d́ò̆sagè bija tòcò do.

Dèthalōthala Hnèhnè

27B́ĕ Cò d́ò phătha dè ajo akhî nu, amihmu aò d́ŏ bija aboahò aklè̆ dèbwè htŏhta alē kî d́ògè Cè, “Ab́èhôwî ḿî phŭ htè amuthèd́ŏhtai nè dèmè̆ kî nu htè ab́oò̆gè nè nuhtĭ nu,” cò d́ògè Jezŭ d́o.

28Barasă Jezŭ d́òge cè, “Ab́èhôwî d́okhlŏ ḿî bija asòkhĕńe Kib́ĭcè alēahwè kî aòi cè tòcò nu dòkhò̆,” Cò d́ò̆sagegè lōwa d́o.

Dèda Dègèlè Còklî

(Mattĕo 12.38-42)

29B́ĕ bija aboahò ladēplo lōwa nu, Jezŭ d́ògè gōjo, “Bija khŏnujo dikhwĭ ḿî akî̆kkè akhwĭ. Za dadè ahô̆agèlè, barasă dè kī ilani cè Zŏnah ahô̆gèlè lò. 30Acab́ô̆ Zŏnah ḿî Nĭnevepho anikhĭ dègèlè akhò̆ nu, Bija Apho ḿî dègèlè bija ajo durū anikhĭ khĭ. 31B́ĕ dècirra amuni nu, Sheba Asaphramo gè̄ wè̄hto ploplokò̆ bija ajo tòcò kî zè gè̄ mèkò̆ lōwa dèhmŭ, manè̄ cò ò d́ŏ mòhtîkă kî le sòkhĕńe Saphra Sòlòmòn adèzadèbla, kî tcabò̄ ado d́olĭ Saphra Sòlòmòn ò jo. 32Bija aò d́ŏ Nĭneve u tòcò gè̄ wè̄hto cirrakò̆ bija khŏnujo durū; manè̄ Zŏnah adèd́ò̆htô acè̆ cè tòcò bajalage ane, kî tcabò̄ ado d́olĭ Zŏnah ò jo,” Cò d́ògè lōwa tòcò d́o.

Neb́î̆cè Adèhlî̆

(Mattĕo 5.15; 6.22,23)

33“Bija do dola hwă hmîŭd́ŏ d́ō phlalaglob́i kî ṕahlu dèbwè̆ ńò, ḿî cab́ô̆htè bija alenī hibu tòcò gā tcahtî zabò̄ nu bija b́è̆hta cè d́ŏ thikhĭkho dòkhò̆. 34Ne neb́î̆cè adèhlî̆ ḿî na gādŭphlo. Na gādŭphlo kè è ma d́ō, ni neb́î̆cè kò òṕĕhta tèpwè dèhlî̆, barasă na gādŭphlo gî̄ tè è ma ńò d́ō, ne neb́î̆cè kò ò khithurŭ d́o. 35Woibò̄ cab́ô̆htè dèhlî̆ aò d́ŏ nu bu nu gî̄ dî ḿîbò̄ dèkhi ńò nu. 36B́eḿĕ ne neb́î̆cè kò ò pĕhtakî dèhlî̆ kî atè b́èkja ma dèkhi dimĭ ńò d́ō, agî̄ hlî̆hluhlî̆phrukò̆, mè cab́ô̆ hmîŭd́ŏ mèhlî̆ nè nu,” Cò d́ògè lōwa d́o.

Jezŭ D́òb́èsab́è Pharizè̆pho kî Skrĭbāpho tòcò

(Mattĕo 23.1-36; Mărko 12.38-40)

37Jezŭ jî̄b́è Hwă d́ō Pharizè̆pho dèbwè jo kè Cè hi akā akô ca kă lumuhè adèa. Mègōnu d́ō, Ze le òkôgè lōwa akă d́ŏ d́î̆wāhtî nu. 38Pharizè̆pho dèbwè nu htèdômô̄dahmăgè b́ĕ za tcahtî Jezŭ tu ŭsab́ă acukhò ńò kî a ò̆ ŭsugè nu. 39Gōnu acè̆ B́ĭcè d́ò cè, “Thĭ Pharizè̆pho tòcò nu mèb́ăthab́ă còkhlecòlò akhlŏathăba, barasă thĭ thabu ḿî aòpĕhtakî dèăwūăthèphlè kî dèkî̆kkèmèhlò̆. 40Bija agudŭ tòcò! Kib́ĭcè htè amèhta dè akhlŏathăba dèbwè nu dè mèhtabò̄ dè abu ńò ńò ā? 41Igetcagebò̄ assègnè̆pho tòcò kî dèlŏcăcè gī ḿîkò̆ thĭ nikhĭ aplî̆atcă,” Cò d́ògè lōwa d́o.

42“Dèba gā lab́èkò̆ thĭ pwedè̄ lò, thĭ Pharizè̆pho tòcò! Manè̄ thĭ i tèpwè Kib́ĭcè zarahlè kî phŭd́uhlè kî dihwimupho arră nu athwèsci tèthwè, barasă thĭ tcatôĺô dèdî̄dèhma kî dèb́èlò̄ Kib́ĭcè. Dè ajo thĭ mò mè kî lè̄dākè̆ dè alewe tòcò nu dòkhò̆.

43“Dèba gā lab́èkò̆ thĭ nè̆, thĭ Pharizè̆pho tòcò! Manè̄ thĭ thagolō sańă d́ŏ alehtajî ahlò̆mò̄ d́ŏ Sinagŏgā abu nu kî thĭ b́èlò̄ bija adèd́ŏdèj́a d́ŏ d́ŏdaglākho nu. 44Dè gāba thĭ nikhĭ, manè̄ thĭ ḿîgè acab́ô̆ lūkho htè bija tòcò khè̆htajāhta tib́ĭtab́a tòcò nu,” Cò d́ògè lōwa tòcò d́o.

45Skrĭbāpho tòcò aklè̆ dèbwè d́ògè Jezŭ, “Sara, ńò d́ò dè ajo tòcò nu ab́èhtîb́èd́ô̆ wa papa!” cò d́ògè lōwa d́o.

46Jezŭ d́òge cè, “Dèba thĭ nikhĭ papa, thĭ Skrĭbāpho tòcò, manè̄ thĭ tèhta dèhtodèba bija aplĕb́akho, barasă thĭ thè̆ne thĭ dò tòb́è kî thĭ cumu dèmè̆ ńò. 47Dèba gā lab́èkò̆ thĭ pwedè̄ lò, Manè̄ thĭ b́òhta prò̆fèt tòcò ab́ikho, htè thĭ pa mèthĭgè tòcò nu. 48Mègè acab́ô̆ thĭ ŏlăphlalakôgè cè tòcò adèmè nu. Ahnèhnè nu thĭ pa tòcò mèthĭgè prò̆fèt, ḿî thĭ b́òhtagè ci b́ikho. 49Dè ajo akhoacè̆ Kib́ĭcè Adèzadèbla d́ògè gōjo, ‘Jo gō thodŏlekò̆ Prò̆fèt tòcò kî bōhmubicè tòcò d́ŏ cò ò nu, kî cò kò̄ lômèssègnè̆kò̆ kî mèthĭkò̆ tòcò cò,’ ad́ògè d́o. 50Gōnu akhoacè̆, prò̆fèt tòcò athwi khod́o kè̄ b́è dagekò̆ thĭ hlĕ Lākho òhta akăhtî htô̆ dola khŏnujo nu, 51gohta b́ĕ Abĕlè̄ athwi htô̆ dola Zakarĭa htè athĭlăgè dèthèb́è̆kho kî Zarādo aplè dèbwè athwi nu. Ab́èhŏ! Jò d́ò̆sa thĭ bija ajo dikhwĭ kè̄ b́è daplekò̆.

52“Dèba gā lab́èkò̆ thĭ pwedè̄ lò, Skrĭbāpho tòcò! Manè̄ thĭ phîglo hwă dèzadèbla akhaglè̄ ahnèwî̄kă, thĭ thè̆ne thĭ de lenī ńò kî thĭ mèd́îd́ăgè bija athaè lenī tòcò aklè acè̆ nu,” Cò d́ògè lōwa tòcò d́o.

53B́ĕ Jezŭ hèhta hwăgè dè ale b́ĕnu, Skrĭbāpho tòcò kî Pharizè̆pho tòcò d́ònod́òzî̄gè lōwa ab́èkja dè amŏamo, 54cab́ô̆htè zè gè̄ khwèhta lōwa adèkèḿè agā sajò Cè anikhĭ nu.

Okuqokiwe okwamanje:

Lŭka 11: GRNT21

Qhakambisa

Dlulisela

Kopisha

Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume

Funda kabanzi mayelana ne Geba Roman New Testament

Amavesi eBhayibheli adumile avela kokuthi
Lŭka 11

Ividiyo ye- Lŭka 11

NgokukaLuka 11:1-54

Lumo Project

Lŭka 11

Amavesi eBhayibheli adumile avela kokuthi
Lŭka 11

Ividiyo ye- Lŭka 11

NgokukaLuka 11:1-54

IBhayibheli:

Karen, Geba

Inguqulo: Geba Roman New Testament - GRNT21

Lŭka 11

Lŭka 11

Amavesi eBhayibheli adumile avela kokuthi Lŭka 11

Ividiyo ye- Lŭka 11

NgokukaLuka 11:1-54

IBhayibheli:

Karen, Geba

Inguqulo: Geba Roman New Testament - GRNT21

Lŭka 11

Amavesi eBhayibheli adumile avela kokuthi
Lŭka 11