लूका 24

24
यीशु दुबारी जीण त स्वर्ग जे घेण
(24:1-53)
यीशु दुबारी जीण
1पर, हफ्ते पेहलकण रोज मतलब ऐतवारे रोज पथवारी से जिल्हाणु अब्बल मुश्कदार चीजे त तेल घिन कइ तसे कब्र केईं एई। 2त तेन्हि से कब्री दुआ केआं बोडा पठ घराओ मेआ। 3कुड अन्तर घेई कइ प्रभु यीशु लाश ना मेई। 4त जपल से हैरान भोई कइ सोचुण लगी त हेरु कि दुई मेह्‍णु चिल-चिलान्ते झिणे डबो तेन्के भेएड़ खड़िए। 5त तपल से सुआ डर गई त इज्जत जुए अपु मुंह उणिहां कइ बिशि त तेन्हि दुई मेह्‍णु तेन्हि जिल्हाणु जे बोलु, “तुस जीन्ते मेह्‍णु मरो तेन्हि अन्तर किस तोपुण लगो असी? 6#मत्ती 16:21; 17:22,23; 20:18,19; मरकुस 8:31; 9:31; 10:33,34; लूका 9:22; 18:31-33से एथ नेईं बल्कि मरो तेन्हि केआं जी गो असा। जपल तुस गलील राज्य अन्तर थिए त तेन की बोलो थिउ, तस याद करे। तेन बोलो थिउ, 7‘ई जरूरी असु कि मनखे कुआ पापी मेह्‍णु के हतेउ अन्तर टोवेईयेल, क्रूस पुठ मरियेल त टेके रोज अन्तर#24:7 यहूदी मेह्‍णु घटनाई शुकरे मुआ त टेके रोज मतलब ऐतवारे दुबारी जी गा। दुबारी जीन्ता भोई घियेल।’” 8तोउं तेन्हि तसे बोके याद एई। 9से कब्र केआं वापस शेहर एई कइ तेन्हि ग्याराह चेली जे त जे होरे थिए तेन्हि सोबी जे ए बोके शुणाई। 10जेन्हि ई बोके प्रतिनिधि जे बोली से मगदला ग्रांए मरियम, त योअन्ना, त याकूबे ई मरियम त तस जुए होरी जिल्हाणु बि थी। 11पर तेन्के बोके तेन्हि ग्यारोही जेईं गभुर के कथा ईं लगी। त तेन्हि तेन्के विश्वास ना किआ। 12पर, तोउं पतरस खड़ भोई कइ कुड केईं जे दौड़ा त उनकुशी कइ चादुर काए जे यीशु लाश जोई लपेटो थिए। तोउं, जे भुओ थिउ तस बारे सोच सोच कइ से शेहर जे वापिस घेई गा।
इम्माउसे बथ पुठ चेली जुए यीशु
मरकुस 16:12-13
13तेस रोज जे चेले तथ किठे थिए तेन्हि चेली बुचा दुई चेले इम्माउस नओएं यक ग्रां जे घेण लगो थिए। ए ग्रां यरुशलेम शेहर केआं ग्याराह किलोमिटर दूर थिउ। 14से प्रभु यीशु बारे जे सोब घटना भुओ थी तेन्हि पुठ बोक कते-कुते घेण लगो थिए। 15त जपल से अपफ बुच बोक विचार करुण लगो थिए त यीशु भेएड़ एई कइ तेन्हि जुए साते हंटण लगा। 16पर, परमेश्वरे तेन्के टीर ईं बंद कइ छो थिए कि तेन्हि से पिछाण ना बटा। 17तेन तेन्हि केआं पुछु, “तुस अपफ बुच कि बोक कते-कुते हंटो असे?” त से उदास भोई कइ खड़ खड़ रेही गे। 18तोउं, तेन्हि बुच क्लियोपास नओएं चेले तेस जे बोलु, “यरुशलेम शेहर अन्तर कि तुईएं यक जातुर असा ना, जेसे कुछ पता नेईं कि एचेल तथ की की भुण लगो असु?” 19तेन तेन्हि केआं पुछु, “की भुओ असु, कि गल असी?” त तेन्हि तेस जे बोलु, “नासरत ग्रांए यीशु बारे! जे परमेश्वरे त सोब मेह्‍णु के नजर अन्तर यक ताकतवर भविष्य वक्ता थिआ। तेन सुआ बोडे बोडे कम किए त पूरे हक जुए शिचाले। 20पर, मुख्य पुजारे त हें खास खास नेते से टोवा त क्रूस पुठ मरवाई छड़ा। 21अब कीं करुं, हें त उम्मीद थी कि शयद ए से भो जेसे बारे नियम त भविष्य वक्ते बोलो असे कि से इस्राएल बचान्ता। एसे बगैर बोक इ असी की तेस मरो आज टेका रोज अओ असा। 22त हें कुछ जिल्हाणु भ्यागे कब्र धे गो थी दे तेन्हि अस परेशान कइ छड़े। 23जिखेईं तथ तेसे लाश न मेई त से बोती कि तेन्हि स्वर्गेदूती काए त तेन्हि स्वर्गेदूती बोलु ‘यीशु जीन्ता असा।’ 24पता हें साथी बुचा केहि जेईं घेई कइ कब्र अन्तर हेरु त तेन बि तिहांणि केउ जीं जिल्हाणु बोलो थी। पर तसे लाश कब्र अन्तर ना थी।”
25त यीशु तेन्हि जे बोलु, “ए मुर्खो, त भविष्य वक्ताई जे सोब बोलो असे तेस पुठ यकीन ना करणे बाड़िओ! 26कि ए जरूरी नेओथ ना कि मसीह कष्ट सेहे, तोउं, इज्जत त कदर मेईंयेल?” 27त से मूसे केआं शुरु कर कइ सोब भविष्य वक्ते त पूरी धरमे कताब अन्तर तसे बारे जीं जीं बि लिखो असु से समझाई छोउ।
28तोउं से तेस ग्रांए भेएड़ पुजे जेठि तेन्हि घेण थी। त तेसे ढंग केआं ईं लगतुथ कि तस अगर घेण असु। 29पर, तेन्हि तस जे ई बोल कइ रोक छड़ा कि अन्हारु भुण लगो असु, दिस बि ओली गो असु, त असी जुए साते इठि बिश। त से तेन्हि जुए बिशुण जे अन्तर घेई गा। 30जपल से तेन्हि जुए रौठि खाण जे बिशा त तेन रौठि नी कइ परमेश्वरे धन्यवाद किउ त टुकड़ेर कइ तेन्के धे देण लगा। 31तपल परमेश्वर तेन्के टीर खोले त तेन्हि से पिछाण छड़ा। पर यीशु तपले छपत भोई गा। 32त तेन्हि अपफ बुच बोलु, “जपल तेन बत असी जुए बोके की त धरमे कताबे मतलब असी समझाई त कि हें मन अन्तर खुशी ना भुई ना?” 33त से तिखेईंए खड़ी कइ यरुशलेम जे नश गे त ग्याराह चेले तेन्हि साते मेईंए। 34से होरे चेले बोतेथ कि “प्रभु सच्चे ईं जी गो असा त शमौन पतरस दर्शण दुतो असा।” 35त तेन्हि दुई बि बते बोक चेली बताई छइ त तेन्हि रौठि टुकड़ेरणे वकत कीं पिछाणा।
यीशु अपु चेली दर्शण देण
36से होता एन्हि बोके बोलुणे लगो थिए कि यीशु अपफ तेन्के बुच एई कइ खड़ी गा त तेन बोलु, “परमेश्वर तुसी शान्ति दिए।” 37पर, से सोब चेले डर कइ बटी गे। तेन्हि सोचु कि शयद तेन्हि कोई भूत काओ असा। 38त तेन तेन्हि जे बोलु, “किस डरुण लगो असे? तुं मन अन्तर अभेईं बि में बारे किस सवाल खड़िन्‍ते? 39में हतेउ त में खुरी कें धे हेरे त विश्वास करे कि अउं यीशु भो। मोउं छूण दिए, किस कि आत्मा अन्तर हड मास ना भुन्ते।”
40ईं बोल कइ तेन तेन्हि अपु हथ खुर हराले। 41जिखेईं खुशी बेलि तेन्हि कुछ समझ ना आउ त से हैरान भोई गे। त यीशु तेन्हि केआं पुछु, “इठि तुसी केईं रौठि असी ना?” 42तेन्हि तसे धे पघारो मछली टुकुड़ दुतु। 43तेन टाइ कइ तेन्के साम्हणे खउ।
44तोउं, तेन तेन्हि जे बोलु, “ई में से बोके भीन्‍थ, जे मेईं तुसी जोई बिश कइ बोलो थी कि जरूर असु कि जती बोके मूसे नियम अन्तर त भविष्य वक्ती के त छुआंरी के कताबी अन्तर में बारे लिखो असी, से पूरी भुन्ति।”
45तोउं तेन धरमे कताब समझणे जे तेन्के सोबी कें धे बुद्धि दिती। 46त तेन्हि जे बोलु, “इ लिखो असु कि मसीह कष्ट सेहन्ता,#छुआंरी 22:1-18; 69:19-21; यशायाह 52:13—53:12; जकर्याह 13:7 त टाई रोज अन्तर मरो तेन्हि अन्तरा दुबारी जी घेन्ता।#छुआंरी 16:9-10; होशै 6:10 47होर यरुशलेम केईआं धरती सोबी जाति के मन बदलण त पापी जे माफ करणे प्रचार तसेरी नओएं बेलि करिन्ता। 48तुस एन्हि सोबी बोकी के उगाह असे। 49त हेरे, जे जुबान में बोउए मेन्धे दुतो असी अउं तेस तुन्धे देन्ता। त जपल तकर स्वर्ग केआं परमेश्वरे ताकत ना मेईंयेल तोउं तकर तुस इस शेहर अन्तर बिशे।”#प्रतिनिधि 1:4-5
यीशु स्वर्ग अन्तर घेण
प्रतिनिधि 1:9-11
50तोउं कुछ रोज पता से तेन्हि बैतनिया ग्रां सोंख यरुशलेम केआं बाहर घिन गा त अपु हतेउ खड़ कइ कइ तेन्हि अशुश दिती। 51तेन्हि अशुश देन्ते देन्ते से तेन्के टीरी के उलाठ घेई गा त परमेश्वरे से स्वर्ग जे नेण ला। 52तपल से बोडी खुशी जुए यीशु महिमा कते-कुते यरुशलेम पैठे गे। 53त से दन रात देहेर अन्तर परमेश्वरे गुणगान कते रिहे।

Okuqokiwe okwamanje:

लूका 24: pgg

Qhakambisa

Dlulisela

Kopisha

None

Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume

Uhlelo Lwamahhala Lokufunda nokuthandaza okuhlobene ne लूका 24

I-YouVersion isebenzisa amakhukhi ukuze ukwazi ukwenza isipiliyoni sakho. Ngokusebenzisa iwebhusayithi yethu, wamukela ukusebenzisa kwethu amakhukhi njengoba kuchaziwe kuNqubomgomo yethu yoBumfihlo