मत्ती 6
6
दान गै बारै में
1“चोकस रेओ। जे थे लोग कोई आच्छा काम दूसरां लोगां नै दिखाण खातर करो तो पिता परमेसर थानै कोई फळ कोनी दैय। 2जद थे लोगां नै दान दैयो तो बिंगो रोळो ना मचाओ जिंया चलाक लोग सतसंग घरां में अर गळियां में केवंता फिरै। मैं थानै केऊं कै जे ऐ लोग इंया करैगा तो बानै इंगो फळ मिल चुक्यो। 3पण जद तूं एक हात ऊं दान दैय तो तेरै दूसरै हात नै ठा ना लागणो चईयै। 4तूं झिको दान गुफ्त में दियो है तो तेरो पिता परमेसर झिको गुफ्त में देखै बो तनै फळ देवैगो।
पराथना गै बारै में
(लूका 11:2-4)
5जद तूं पराथना करै तो चलाक लोगां तरियां ना करी क्यूंकै बां लोगां नै सड़का गै मोड़ा पर खड़या होगे पराथना करणी आच्छी लागै। मैं थानै साची केऊं बे लोग आपगो फळ पेलां ई ले चुक्या है। 6पण जद तूं पराथना करै तो बंद कोठड़ी में करी। जद तेरो पिता झिको दिखै कोनी बो तनै लुकगे देखैगो तो इंगो फळ तनै देवैगो। 7जद थे पराथना करो तो गेर यहुदी लोगां गी तरियां जादा ना बोलो क्यूंकै बे लोग इंया सोचै है कै म्हारै बोळै बोलण ऊं म्हारी पराथना सुण लेसी। 8ईंखातर थे बांगै बरगा ना बणो। थारो पिता थारै मांगणूं पेलां ई जाणै है थानै के चईयै? 9ईंखातर इंया पराथना करे करो, हे पिता परमेसर तूं झिको सुरग में रेवै है थारो नाम पवितर मानिजै। 10थारो राज आवै जिंया थारी इच्छा सुरग में पूरी होवै बिंया धरती पर बी होवै। 11आज गै दिन गी रोटी म्हानै दे। 12अर जिंया म्हे म्हारै दुसमणां नै माफ करां हां बिंया तूं बी म्हानै माफ कर। 13म्हानै परीक्सा में ना लेई अर बुराई ऊं बचाई। 14अर झिका थारै पर अपराध करै अर थे बां लोगां नै माफ करोगा तो थारो पिता थानै बी माफ करैगो। 15जे थे लोगां नै ना माफ करया तो पिता परमेसर थानै बी कोनी माफ करैगो।
बरत गै बारै में
16जद तूं बरत राखै तो चलाक लोगां तरियां मूं लटकागे ना बेठी क्यूंकै बे दूसरै लोगां नै ओ दिखाणो चावै कै म्हारो आज बरत है। मैं थानै साची केऊं कै बानै इंगो फळ पेलां ई मिल चुक्यो है। 17जद तूं बरत राखै तो देखण आळा नै जिंया तूं रोटी खाण आळै टेम दिखै बिंया दीखणो चईयै। 18झिकै ऊं लोगां नै ओ ठा ना लागैगो इंगो बरत है। झिको पिता थानै गुप्त देखै बो थानै फळ दैयगो।
सुरग गै धन गै बारै में
(लूका 12:33,34)
19आप खातर धरती पर धन भेळो ना कर। क्यूंकै अठै इनै कीड़ा अर जंगाळ लागज्यैगो अर चोर बी ले जा सकै। 20सुरग में धन भेळो कर। बठै ना कोई कीड़ा ना कोई जंगाळ अर ना चोर चोरी कर सकै। 21अर याद राखो जठै थारो धन हो'सी बठै थारो मन बी लागग्यो रेसी।
सरीर गो चानणो
(लूका 11:34-36)
22सरीर गो दीयो तो आंख है। जे तेरी आंख ठीक है तो तेरो सारो सरीर ई चानणै में रेवैगो। 23जे तेरी आंख बुरी हो'ज्यै तो तेरो सारो सरीर अंधेरै में हो जावैगो। ईंखातर झिको चानणो तेरै मा है बो जे अंधेरो होज्यै तो तूं आप अंधेरै में रेवैगो।
24कोई आदमी एक सागै दो मालिकां गी सेवा कोनी कर सकै। क्यूंकै बो एक ऊं प्रेम अर दूसरै ऊं बैर राखसी। थे परमेसर अर धन दोनां गी एक सागै सेवा कोनी कर सको।
परमेसर अर धन
(लूका 16:13; 12:22-31)
25मैं थानै केऊं खाण पीण गी चिंता छोड दैयो। आपगै सरीर खातर कपड़ा गी चिंता छोड दैयो। थारो जीवन रोटी अर सरीर गै कपड़ा ऊं भोत मेंगो है। 26आं आकास गै उडण आळै पंछियां नै देखो झिका ना तो बीजै अर ना बाडै अर ना भेळो करै। पण फेर ई परमेसर बांगो पेट भरै है। थे तो आऊं भोत जादा किमती हो। 27थारै मू कोई हिस्यो है कै झिको चिंता कर'गे आपगै जीवन गो एक पल बी बधा सकै। 28अर थे आपगै गाबा गी क्यामी सोचो। खेतां गै फूलां गै बारै में सोचो, बे किता सुणा होवै। बे ना कोई काम करै अर ना कोई कपड़ा बणावै। 29मैं थानै केऊं कै आपगै राज पाट में राजा सुलेमान बी बां फूलां बरगो कोनी बण सक्यो। 30ईंखातर झिका खेतां गा फूल आज है, दिनगै बे आग में बाळिजैगा। परमेसर आं फूलां नै इता सुणा बणावै तो थे झिका कमजोर बिस्वासी हो थानै बो आऊं सुणा गाबा क्यूं कोनी पीरासी? 31ईंखातर चिंता कर'गे ओ ना केओ के खास्यां अर के पीस्यां अर के पेरस्यां? 32संसार गा लोग आं चिजां गै लारै भाजै पण सुरग में रेण आळो पिता परमेसर जाणै है थानै आं चिजां गी लोड़ है। 33थे सारा ऊं पेलां परमेसर गै राज अर बिंगी धारमिकता गी खोज करोगा तो ऐ सारी चिजां थानै मिलज्यैगी। 34तड़कै गी चिंता ना करो क्यूंकै काल गो दिन आपगी चिंता आप ई कर लेवैगो। हर एक दिन गी आपगी आपणी ब्यादि होवै।”
Okuqokiwe okwamanje:
मत्ती 6: BGQ
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved. © WIn Publishing Trust
