2 USamuweli 13
13
Isono Sika-Amnoni
1 U-Absalomu, indodana kaDavide, wayenodadewabo omuhle, ogama lakhe kunguThamari; u-Amnoni, indodana kaDavide, wayemthanda.
2Lokho kwamhlupha waze wagula ngenxa kadadewabo, uThamari, owayeyintombi, ngakho-ke kwakulukhuni ku-Amnoni ukuba angenza utho kuye.
3 U-Amnoni wayenomngani, ogama lakhe kunguJonadaba, indodana ka-Shimeya, umfowabo kaDavide. UJonadaba wayengumuntu onobuqili obukhulu. 4Wathi kuye: “Yini ekwenza uzace kangaka usuku nosuku, ndodana yenkosi na? Ungengitshele lokho na?”
U-Amnoni wathi kuye: “NguThamari, udadewabo ka-Absalomu, umfowethu; ngiyamthanda.”
5 UJonadaba wathi kuye: “Lala embhedeni wakho, uzishaye ogulayo, kuyothi lapho uyihlo efika ukuzokuhlola, uthi kuye: ‘Ake uvumele uThamari, udadewethu, kube nguye ozongenzela ukudla, akwenze phambi kwami ngimbuka, ukuze ngimbone, ngidle engifunza.’ ”
6 Wayeselala phansi u-Amnoni, wazishaya ogulayo. Isifikile inkosi ukuzombona, u-Amnoni wathi enkosini: “Ake kuze uThamari, udadewethu, enze amaqebelengwane amabili phambi kwami bese engifunza.”
7UDavide wayesethumela lapho kwakuhlala khona uThamari, wathi: “Hamba uye endlini yomnewenu u-Amnoni, ufike umlungisele ukudla.”
8Wayesehamba uThamari, waya endlini ka-Amnoni, umnewabo; wayelele phansi. Wathatha inhlama wayixova wenza amaqebelengwane, wawapheka embuka u-Amnoni. 9 Wathatha ibhodwe wawathulula ebuka, kodwa u-Amnoni wenqaba ukudla. Wathi: “Khipha bonke abantu.”
Baphuma bonke abantu lapho. 10U-Amnoni wayesethi kuThamari: “Letha ukudla lapha kimi ekamelweni lami khona uzongifunza.”
UThamari wawathatha amaqebelengwane ayewenzile, wawaletha ku-Amnoni, umfowabo, ekamelweni. 11Kwathi lapho ethi uyawaletha ukuba adle, wambamba, wathi kuye: “Woza ulale nami, dadewethu.”
12 UThamari wathi kuye: “Qha, mnewethu, ungangiphoqi; akwenziwa lokhu kwa-Israyeli. Ungalokothi wenze lobu buwula. 13 Mina-ke ngiyoshona kuphi nalelo hlazo na? Nawe usuyofana neziwula zakwa-Israyeli. Ngakho-ke ake ukhulume nenkosi, ngeke ikwenqabele ukuba ungithathe.”
14Akavumanga ukulalela izwi lakhe. Ngenxa yokuthi wayenamandla kunaye, wamphoqa, walala naye.
15U-Amnoni esekwenzile lokho wamzonda uThamari ngenzondo eyedlula uthando ayenalo ngaye phambilini. U-Amnoni wayesethi kuThamari: “Vuka uhambe.”
16Yena wathi kuye: “Lobu bubi bokungixosha bukhulu kunalokhu okunye okwenze kimi.”
Kepha u-Amnoni akavumanga ukumlalela. 17Wayesebiza inceku yakhe eyayimsebenzela, wathi: “Mkhiphele phandle lo wesifazane, umsuse lapha kimi, bese ukhiya umnyango uma esephumile.”
18 UThamari wayegqoke ingubo ende, enemikhono emide, ngokuba amadodakazi enkosi ayeyizintombi ayengqoka kanjalo. Leyo nceku yamkhiphela phandle, yayisihluthulela umyango ngesikhiye lapho esephumile. 19 UThamari wayesezithela ngomlotha ekhanda, wayiklebhula ingubo yakhe enemibala ayeyigqokile, wathwala izandla ekhanda, wahamba elokhu ekhala.
20 U-Absalomu umnewabo wathi kuye: “Ubenawe yini umnewenu, u-Amnoni na? Thula, dadewethu; ungumnewenu, ungayibeki inhliziyo yakho kule nto.”
UThamari wahlala eyisikhwebu endlini ka-Absalomu, umnewabo.
21Kwathi ukuba inkosi uDavide izwe ngakho konke lokhu, yathukuthela kakhulu. 22 U-Absalomu akazange akhulume lutho olubi noma oluhle ku-Amnoni, kodwa u-Absalomu wamzonda u-Amnoni, ngokuba wayemphoqile udadewabo, uThamari.
Ukubulawa Kuka-Amnoni
23 Kwathi sekwedlule iminyaka emibili yonke, abagundi bezimvu baka-Absalomu babeseBhali Hazori eliseduzane nakwa-Efrayimi, u-Absalomu wamema wonke amadodana enkosi. 24 U-Absalomu waya enkosini wafike wathi: “Inceku yakho inabagundi, iyacela ukuba nenkosi ize nezinceku zayo.”
25Inkosi yathi ku-Absalomu: “Qha, ndodana yami, masingahambi sonke, funa sibe ngumthwalo kuwe.”
Wayincenga, kodwa ayivumanga ukuhamba naye, nokho yambusisa.
26 U-Absalomu wayesethi: “Uma kunjalo, u-Amnoni, umfowethu, makahambe nathi.”
27U-Absalomu wayinxenxa, yaze yavuma, yamthumela u-Amnoni nawo wonke amadodana enkosi.
28 U-Absalomu wayala izinceku zakhe, wathi: “Niyabona-ke, kuyothi lapho selimngene iwayini u-Amnoni, ngiyothi kini: ‘Bulalani u-Amnoni,’ nimbulale, ningesabi, ngokuba niyobe niyalwe yimi ukwenza kanjalo. Yimani isibindi, nibe ngamaqhawe.”
29 Izinceku zika-Absalomu zenza ku-Amnoni njengokuba ayeziyalile u-Absalomu. Asukuma wonke amadodana enkosi, kwayileyo naleyo yagibela umnyuzi wayo, abaleka.
30Kwathi esesendleleni, kwafika izwi kuDavide, lathi: “U-Absalomu uwabulele wonke amadodana enkosi, akusalanga nayinye.”
31 Inkosi yayisisuka, yaklebhula izingubo zayo, yalala emhlabathini, zonke izinceku zayo zema lapho, izingubo zazo ziklebhukile.
32 UJonadaba, indodana kaShimeya, umfowabo kaDavide, waphendula, wathi: “Inkosi yami mayingathathi zonke izinsizwa, amadodana enkosi abulewe, ngoba ngu-Amnoni kuphela ofileyo. Lokhu kwakuyinhloso ka-Absalomu kusukela ngosuku u-Amnoni aphoqa ngalo udadewabo, uThamari. 33 Ngakho inkosi yami, inkosi, mayingakubeki enhliziyweni yayo ukuthi wonke amadodana enkosi afile, ngu-Amnoni kuphela ofile.”
Ukubaleka Kuka-Absalomu
34 U-Absalomu wabaleka. Insizwa eyayiqaphile yaphakamisa amehlo ayo, yabona iqulu labantu liza ngendlela ehamba emva kwentaba.
35UJonadaba wathi enkosini: “Bheka, amadodana enkosi asefikile njengoba ishilo inceku yakho.”
36Kwathi lapho eqeda nje ukukhuluma, kwafika amadodana enkosi; adazuluka, akhala, inkosi nazo zonke izinceku zayo bakhala kakhulu.
37 U-Absalomu wabaleka waya kuThalimayi, indodana ka-Amihudi, inkosi yaseGeshuri. UDavide wayililela indodana yakhe zinsuku zonke.
38 U-Absalomu wabaleka, waya eGeshuri, wahlala khona iminyaka emithathu. 39 Inhliziyo yenkosi uDavide yalangazelela ukubona u-Absalomu, lokhu yayisize yaduduzeka ibona ukuthi impela u-Amnoni ufile.
Okuqokiwe okwamanje:
2 USamuweli 13: ZUL20
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Bible in isiZulu 2020 © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.
Bible in isiZulu 2020 with Deuterocanonical Books © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.