1Mos. 8
8
Katukappulat eba
1Taikamanua ta'ikakalipogi si Noak samba sangamberi tarimeu sibabara pasambania kabagat kinapat nenda. Igalai le Taikamanua ipuboroi rusa, bailiu oinan nenda taddaakenangan ikainia. 2Sangamberi bubuaket katei polak samba sangamberi matat baliu oinan ka manua luplupmakenangannia. Malegeunangan urat, 3samba oinan memei ikakai. Pasat sangotu limapulu ngagogoi oinan taan makope buak. 4Kagogoi pulu pitu laggo pitu, kinapat nenda saggat ka sara tutut leleu ka leleu Ararat. 5Oinan riuriu le ikainia samba ka gogoi sara laggo pulu, taddanagan imakoinong sangamberi tu'tut leleu.
6Pasat epet pulu ngagogoi, ngangaakenangan si Noak sara jandelat kinapat, 7lepa belaakenangan sangamuneng uma' kailea. Uma' nenda ta'atoili ka kinapat, tapoi riuriu le ituburut teret bulat kainangan eba nenda. 8Kineneiget, belaakenangan si Noak sangamuneng uma' ngorut addeat masiagai aikaian pa' oinan nenda. 9Tapoi oinan nenda aipeile itatalu sangamberi uddut polak, uma' ngorut nenda ta'aisese' kudduatnia muera'. Iageti toilinia ka kinapat; Totoiakenangan kabeinia si Noak lepa ambitnangannia kabagat kinapat. 10Si Noak masingena pitu ngagogoi minca, lepa belaakenangan minca uma' ngorut nenda. 11Ka legre soibo toili uma' nenda katubunia ambitnangan sangambuiluk buluk zitun sibau ka udduknia. Kineiget si Noak iagai, oinan aikaian. 12Lepat aingena pitu ngagogoi minca, belaakenangan ngorut nenda aipei sangaminca; sangaminca nene uma' ngorut nenda ta'an atoili katubunia.
13Kateteret si Noak ainia enemngotu sara ngaruru, ka gogoi sara laggo sara, bulat amagarakngan oinan. Ngangaakenangan si Noak matat baliu kinapat nenda, samba itconangan kasangalionia. Itconangan uddut polak amagarakngan. 14Kagogoi rua pulu pitu laggo rua, polak amagarakngan.
15Lepa kuanangan Taikamanua kai Noak, 16“Belaake ekeu ka kinapat nenda pasamba sinanalepnu, tatogam samba tainanalepra. 17Belaake le sangamberi uma' samba tarimeu bagei, sabeu samba leu sigoiso, bule ioi imakakra samba ikudduiji ka sangalio polak.” 18Lepa bela si Noak ka kinapat nenda pasamba sinanalepnia, tatogania samba tainanalepra. 19Sangamberi uma' samba tarimeu ka polak bela ka kinapat nenda, senen mungkuat ngamataatnia.
20Si Noak masirioake sara kudduat pasibuluat addeat Tuhan. Alanangan pasasangamuneng ka senengamata uma' tarimeu bagei sitaikasitsitnakenen, lepa panguruatnakenangannia sibailiu panguruat silabo ka uddut kudduat pasibuluat nenda. 21Singin tubut panguruatnakenen buluakenen nenda masiangkaake bagat Tuhan, samba Ikua kapaatuat, “Taan Kutetelei geti polak nene kalulut galaitubut sirimanua; Akuagaian, kateteret bau tubunia, paatuat sirimanua nenda makatai. Taan Kususubuake geti minca sangamberi sipungongoingoi kele sigalaiKu simaruei nene. 22Ujut kababarat polak nene, sarat ai le tetere mangurep samba masimonei, gogoi simaleppet samba simaoloi, gogoi simalegeu samba simaurat, sinago samba sinoibo.”
Okuqokiwe okwamanje:
1Mos. 8: MWV
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume