Lukga 23
23
1Egi worohanka harnaj nashinena egi Pilatus hagarniahirena.
2Egi washinaraj hajiarairena, wairena: (Wang) de‐e wankshignagre egi hinakewe wahijau hia’ewina, egi Kaiser hirowegigira roxijena, wajena, Kristus hungra hereshe hikigena.
3Egi Pilatus higiwaxshana wena: Judra hung harninera nenineshe? Egi hornigiharna wena: Shesge hishegaja.
4Egi Pilatus nabhoruxaj hirukana hungra wawagena egi wankshignanka: Inke wang de‐e washinohirera hisha hiagienina.
5Egi higu arnakshana wairena: Wankshigra warupurujena, Judea mara harnaj washa wagigus houna, Galilea‐eja jeg‐u hurna, egi ma tegi.
6Jaja Pilatus Galilea naxgungi, hiwaxshana wangjega Galilea wankshig hisha hereguni.
7Egi higu hiperesgi, Herodes e wawirukanara, Herodes eowarehina, Herodes exji hishge Jerusalem‐eja unjena hambnanka eja.
8Egi jaja Herodes Jesus hajagi mashja giphina, s’ireja haja roguxjinge. Washara roha ushe aire naxgushunuge esge, egi washa wowakanjank gi’uanaga hajakjane hirege.
9Egi Herodes washara rohaxji hiwaxshana, eshi Jesus inkaga gixabnina.
10Egi nabhoruxaj hirukana hungra egi wowagax hiperesra nashinena egi washinarajera rokana wagairena.
11Herodes egi wawokishgara wakarakishu, Jesus inke wankshighiranairanina egi igixjairena, egi waini sgaxji hogiwaxug‐hirena, egi Pilatus shige eja howarehirena.
12Egi hambeja Pilatus egi Herodes hijakorokhinena, jorni hokish’ig hireshununa.
13Egi jaja Pilatus nabhoruxaj hirukana hungra egi washinukanara egi wankshigra stowahigi, wawagena:
14Wang de‐e hinagashini rajiwira, wankshigra gixa wahijeshe hi’shawira, egi horuxujwire, jowerawiregi pessiwina inke washinohira wang de‐e hiagienina, inke jagu hirasharajwire shesgarnina.
15Herodes hishge inke washi’enina, ne‐hanireningigiwina, egi horuxujwire inke d’ehire phi washa higienina.
16Esge hawe‐hagigianaga girushjanehigi.
17Houna shegungaja hisha ningitushjanehawigi phinana worujxeteregi.
18Egi horniheaka harnaj uwainena, wairena: Wang de‐e ningiot’unare, egi Barabbas girushjarehige hunkaraikuwine.
19E jhinageja wankshigra warupuruna egi watehina, esge jhi‐hornassairena.
20Esge Pilatus shige wawokit’ena Jesus girushjanehinaixjinge.
21Eshi uwainena hakira, wairena: Naramiheja haisarajre, naramiheja haisarajre.
22Egi Pilatus hitanihana wawigena: Jagu‐u? Jagu wowongisha ushe? Inke d’ehi phi washa hiagienina. Esge hawe‐hagigianaga egi keregigigi.
23Egi higu uwara arnakshana, naramiheja haisaraj nangi‐inankshana. Egi uwananka hereanaga egi nabhoruxaj hirukana hungra rokanaxji uwarnankshana.
24Egi Pilatus wawornagijena, jagu rogunagra wagiunkjanena.
25Egi girushjanehina hisha wankshigra warupuranaga egi wat’ehira egi jhi‐hornassairera e roguinera, eshi Jesus rushjanehirena jagu rogunagra.
26Egi jaja nigeowarniarairegi, hisha harukos‐hirena Simon higairera Kirene eja hereisha, hirarujeja howajina, egi e naramihera k’ingigirena, e Jesus gik’inhironaikjege.
27Egi wankshigra worohaxji hironakshana, egi hinugrashge xagnakshana, egi gixagnankshana.
28Egi Jesus hakjambarnaga wawagena: Hinug Jerusalem‐eja herera, inke hingixagwinine, eshi kixagwire egi ninkjang washiniwira wagixagwire.
29Egi horuxujwire, hambra hajirekjanena, eja washe’kjanihawina: Wogishawairegaja ninkjang jushgunira egi kheni waujganagninankhi, egi wasra inkaga wahininankhi wogishawairekjanena.
30Egi wairekjanena xexetera hishibrairekjawina, egi xera hirairukainekjawina.
31Na‐jegra washa deshesge gigiregi, na‐wusra jasge wagigiranashe?
32Egi wankshig d’ehira nupi hishge hakishu harniahirena d’ewahirekjege.
33Egi jaja hounekjanegi hahiregi, Kalwari higaireja, eja naramiheja haisaraj‐hirena, egi wankshig d’ehinanka, hisha hoishoroija minagshana egi hijanera hoirajgeja.
34Egi Jesus wena: Jaji inke washa wigiranine, inke hiperes‐ninankshana jagu unagra. Egi wonashi harnira khiruje khinekjege hushereg gishox uinena.
35Egi wankshigra woruxuj‐nankshana. Egi washinukanara hishge hija‐unankshana, igixjanankshana, wairena: Hijanera niamb‐wahijegaja, niambkinkjena, Kristus E herejegi, Maura waijana hisheregi.
36Egi manapera hishge igixjairena hirajiranaga ninash hok’uinena.
37Egi wairena: Judra hung harninera neninegishi, khijirare.
38Egi wowagaxra hija wangeja giwagax t’umbhirena Hellenitra egi Romanra egi Hebraira hoit’e wagiuinena, de‐e Judra hung harninera herena.
39Egi wankshig d’ehinaka hisha hoijganagra washingegena, wena: Kristus neninegishi, khijirare egi hingijirawire.
40Egi hijanenaka horniharna najisgina wena: Inke nishge Maura nanakawanishe? Hawera nishge hikisge wash’u‐shanakshana,
41Hisgenaje ha‐warnakshana, jagu hiura e hiwagiu harnakshana, eshi wang de‐e inke washanisha higishananinakshana.
42Egi Jesus wagairena: Hirukanara hiwewianje jaja hungma hashinieja ragigi.
43Egi Jesus wagena: Hisgexjina hinigena, hamb de‐e Paradisra‐eja harnikishu hagikjanena.
44Egi ejaxji howagix hirakewehanegi hereguni egi manaka harnaj hokawassana howagix hishankijushgunieja hipa.
45Egi hambwira hokawas‐shana, egi wohokhu‐hojhixeteja hagijara kissageja gasrena.
46Egi jaja Jesus mashja uwanaga wena: Jaji naxirag harnira nab hashinieja harninigigina, egi deshesge e‐gi d’ena.
47Egi jaja manape hungra jagu ura hajagi, Maura rajankshana, wena: Hisgexjingaja de‐e wang phisha heregaja.
48Egi wankshigra jarnagaka hija sto‐khinena hojantieja hajairena washa uinega, mangeja hokarajinarnaga egi hakarairena.
49Egi jarnaga hikiperes‐hiregi egi hinug hironaghirera Galilea‐eja howajirera hari nashiranaga horuxuj‐nankshana washa de‐e.
50Egi horuxujre, wangisha eja jena Joseph higairera, waehisha egi wang phisha herena, egi wang rojaisha.
51Wang she‐e inke woehira egi jagu uinega wagiphinina, Arimathea‐eja hereisha herena. Judra jhinag harnineja, e hishge Maura hungma harnira hapejena.
52Wang de‐e Pilatus hirahina egi Jesus rora tarna.
53Egi rushibshana, egi linen hirowejana, egi warnaxihoshueja hot’umbshana, ini g’aireja herena, eja inkaga jorni hisha t’umbhiranina.
54Egi hambeja hikorohora herena, egi Sabathra herekjanena.
55Egi hinugra hishge hironag hahirena Galilea‐eja hakishu howajirera, egi warnaxi‐hoshura horuxuj‐nankshana, egi jasge rora t’umbhiregi.
56Egi hakarairena, egi washa‐teg hirushjahirena egi wikinipana phi, egi Sabath‐hambregi xgasigirena, Maura u‐washi harnira jagu agra shesgehirena.
Okuqokiwe okwamanje:
Lukga 23: WIN
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Published by the American Bible Society in 1907.
