Johnga 6
6
1De‐e hagregi Jesus nigiowarena Galilea tera harujena Tiberias tera higairena.
2Egi worohaxji Jesus hironaghirena, wowakanjangra hagijairege, howashairegi eja waunge esge.
3Egi Jesus xe‐higageja howarena egi eja minagshana hironaghirera wakarakishu.
4Egi Pasxa‐woruj Judra harninera herehikorohorna.
5Egi Jesus jambshana, egi wajarna worohaxji eja hahuhairegi, Philipga wagena: Hajinja waisgabduj hinuwinkjanihawishe, de‐e waruj‐hiranana?
6Egi de‐e hiunjage wena. Exji jagu unkjanera hiperesjena.
7Philipga hornigiharna, Denaria hogihinup hikisge waisgabdujragi inke hina hiraninana harnaj xunuhinigshana rus‐hireshgunina.
8Hironagananka hisha wena, Andreas Simon Peter khinubra:
9Hojinjinig hisha egi unjera, waisgab‐sinshserej horok’ira saja harnijena, egi ho xununigra nup harnijena. Sheeshi washashe worohaxji‐gaja.
10Egi Jesus wena: Wankshigra minag wagigiwire, xawijora eja ju‐ankshana. Egi wangra minaghirena, ejaxji hogihixete sajanguni.
11Egi Jesus waisgabdujra warussana, egi wainabrashjangi, hironagananka wawigiwenina egi hironagananka minagwagigirega wawigiweninena egi ho‐xununigra shige hiwenirena jarnaga giphinegi.
12Jaja wainaj‐hiregi, Jesus hironagananka wawagena: Sto‐wahiwire hoxjugra hotagi, inke washa xawaninikjena.
13Esge sto‐wahirena egi napanra kerepanaishanaganuphashana hoixjina, waisgab‐sinshserej horok’ina sajanka eja hoxjugra howaji, waruj rushjainegi shenaga rushaghirena.
14Egi wankshigananka hajairegishi wowakanjangra Jesus ungi, wairena: De‐e wogisogji prophet e heregaja, jasgegi manegi jikjane airera.
15Egi Jesus wajarna, hajiranaga egi hinirus‐hiranaga, hung uinekjanege, shige xe‐hihageja inekhi howarena.
16Egi jaja hoxjarnagi hironagananka harukanag‐hiranaga tera howarairena.
17Egi waj‐isha eja hominaghirena egi te‐agra Kapernaum sanig eowarairena. Egi shegunegi hokawassana, egi Jesus inke wirahiniankshana.
18Egi tera hixgana maintajehira rokana hakirige esge.
19Egi niwa hahirena ejaxji kerepananup‐anaga‐sajahashana, nigeshge kerepanadani Stadia (wigus dani jop) hahiregaja, hajairena Jesus teja maniankshana, egi wajra haruxa hiwusunsh howarena, egi naxirairena.
20Egi wawagena: Newinena, inke naxirawinine.
21Egi wajeja hominag nangi‐inena, egi higuana wajra moroija haunina hajinja howarairegi eja.
22Haininegi wankshig te‐ageja unangra hajairena, inke eja waj hijahina hishangenira, eshana herena Jesus hironaghirera waj hominaghirera, egi Jesus inke hironaghirera wakishu hominagnira waj‐eja, hironaghirera inekhi nige‐howarairena.
23Nunige waj hijahi hajirena Tiberias eja howajirena, hajinja waisgab horuj‐hirera hiwusunsh eja, hageja Hirukanara wainabra.
24Jaja wankshigra wajairegi Jesus inke hija unijegi eja, egi shige hironaghirera inke hija uninankhi, hishge waj‐eja hominaghirena egi Kapernaum eja hahirena, Jesus horni.
25Egi jaja hieregi te‐ageja, wagairena: Rabbi jajanane rajishe?
26Jesus wornigiharna egi wena: Hisgexjina, hisgexjina hinigawina, hunaniharajane inke wowakanjang haura hashjawira esge wash’uwini, eshi waisgab horok’in rajwira egi wa’ininajwira esge wash’urajiwina.
27Inke waruj d’arnankhi ruxurugnaiwinine, waruj hisha she‐e inke shena phiniagra ruxurug‐naiwine wankshighoi hisgejagra she‐e Wankshig‐hinigra hornik’unkjanihawina, Maura Hianjihiwira E wijanti‐una.
28Esge wagairena: Jagu hauwingi, Mau worera hauwinagi?
29Jesus horniharna egi wawagena: De‐e Mau worera herena hisha jigigira E harnanaxguwingi.
30Egi esge wagairena: Woijanti jaguisha sh’unkjaneshe, harnijawigishi egi harnanixguwinana, woshga jagu sh’unajeshe?
31Hianjwahawira mojainainja Manna ruj‐hirena, shesge wagax‐hirena: E ruj‐hirekjege waisgab wangregi howaji wogarna.
32Egi Jesus wawagena: Hisgexjina, hisgexjina hinigawina, Mosesga inke waisgab she‐e wangeja howaji hornik’uwinina, eshi Jajiga waisgab wogisog hornik’uwina wangregi howaji.
33Eshi Maura waisgab harnira erena E wangregi howajina, egi maneginagre wankshighoi wogarna.
34Egi wagairena: Hirukanara hoishib waisgab de‐e hunk’uwianje.
35Egi Jesus wawagena: Newinena waisgab niambra, hisha hiraijigi inkaga dokewe‐hinikjanena, egi hisha harnaixgungi inkaga iwus‐inikjanena.
36Egi hinigawishare, egi hinshjara‐jawinunige egi inke harnainaxguwinina.
37Jarnaga Hianjihiwira hunk’ura hiraijirekjanena egi she‐e hiraijiregi inke jangra wat’untanikjanena.
38Eshi manegi hajina, wangregi wawajina, inke woshganira hauanjinina, eshi hisha huingigira woshganira wagiuhajina.
39Egi de‐e Hianjihiwira woshganira herena E huingigina, jarnaga hunk’ungi inke hisha xawarni‐harnikjanena eshi phihi shige wankshig‐inekjanena hamb hirowageja.
40Egi woshgara de‐e herena hisha huingigira, jarnaga Hinigra hajagi egi harnaxgungi, wankshighoi hisgeja unana, egi phihi wankshig‐ihakjanena hamb hirowageja.
41Judra shejananegi haehirena, waisgabra Newinena wangregi wawajina hikigege esge.
42Egi wairena: Inke Jesus de‐e Josephga hinigra herenisha, hianjra egi hiunira hiwiperes‐wigaja, jasgegaja weguni wangregi wawajina are?
43Esge Jesus horniharna egi wawagena: Inke haewiwinine.
44Inkisha hiraijininana Hianjihiwira E huingigira inke rutinigi, egi phihi wankshig‐ihakjanena hamb hirowageja.
45Prophetra wagax‐hirena: “Egi harnaj Maura wagigusjanena, esge wankshigra jarnaga Hianjihiwira naxguinera egi hiperes‐hirera e hiraijirena.”
46Inkisha Hianjihiwira hajarnina, eshana Maura eja howajira, E Hianjihiwira hajarna.
47Hisgexjina, hisgexjina hinigawina, hisha harnaixgungi wankshighoi hisgeja unana.
48Waisgab she‐e niambra Newinena.
49Hianjwarawiga mojainainja Manna ruj‐hirera egi she‐eshge d’airegaja.
50Waisgab de‐e E wangregi howajina, hisha she‐e rujgi inke d’arninana.
51Waisgab niambra Newinena, E wangregi howajina, hisha waisgab de‐e rujgi manegus niaimbjanena, egi waisgab hornik’unk‐jarnihawire ro harnira herena, E wagakjanena maneginagre wankshighi‐inekjanena.
52Judra esge kikitakhirena wairena: Jasge hiarnaga wang de‐e rora wangok’uwianaga hinuj‐janihawishe?
53Egi Jesus wawagena: Hisgexjina, hisgexjina hinigawina, inke Wankshig‐hinigra rora rajwinigi egi wa‐ira sharajgawinigi, inke wankshig‐shiwininana.
54Higuisha ro harnira rujgi egi wa‐i harnira rajgangi, wankshighoi hisgeja unana, egi phihi wankshig‐ihakjanena hamb hirowageja.
55Ro harnira hisgexji waruj hisha herena egi wa‐i harnira hisgexji rajga phina.
56Hisha ro harnira rujgi egi wa‐i harnira rajgangi hunjhikjanena egi wajhikjanena.
57Hianjihiwira niambanagra shesge hikisge huingigina egi Hianjihiwira wankshighia‐ina, nishge shesgarnana hisha hirujgishi e wankshighi‐inkjanena.
58De‐e waisgabra herena, E wangregi howajina, inke hianjwarawiga Manna ruj‐hirera hikisgarnina egi sheeshge d’airegaja. Hisha waisgab de‐e rujgi manegus wankshig‐inkjanena.
59Washa de‐e are wohokhu‐hojhieja wena, Kapernaum‐eja washa wagigus wena.
60Esge hironaghirera roha jaja de‐e naxguinegi wairena: De‐e rokana wegaja, peshe naxgu ruxuruigjeshe?
61Egi Jesus hikiperes‐shana hironaghirera haegiginankhi, wawagena: De‐e wogitegniwishe?
62Jasgarnashe, Wankshig‐hinigra wangrowakere hashjawigi, hajinja jorni hounjera eja?
63Naxiragra wauna wankshig‐iwahijera, ronagre inke washophi ruxurug hiranikjanena. Hoit’e hinigajane naxirag wagajena egi wankshighoi wagajena.
64Eshi hota inke harnanaxguwinina, Jesus hiperesjena jeg‐hojikerejareja peshe inke harnaxgunikjanera egi peshe himanaikjanera.
65Egi wena: Esge wanigawina inkisha hiraiji ruxurugnina, inke Jajiga wogarnigishi.
66Epa hironaghirera roha hakja kerena, egi inke hinupahana hakishu maninanina.
67Egi Jesus nup‐hashananka wawagena: Nishge nige horawara‐kerekjanihawishe?
68Egi Simon Peter horniharna wagena: Hirukanara, peshe eja wawatekjanihawishe? Manegus wankshighoi hoit’era hashinirajegaja.
69Egi harnanixguwina egi wogisog hiaperes‐hajena, Ne Kristus Mau niambra Hinigra Neninera.
70Jesus wornigiharna: Inke nup‐hashanara nijawinishe, egi hisha waxopinishishig raniwina?
71Judas Iskariot, Simon hinigra ewagena, erena himanaikjanera, nup‐hashanara esherena.
Okuqokiwe okwamanje:
Johnga 6: WIN
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Published by the American Bible Society in 1907.
