Johnga 12
12
1Egi hambra akeweha Pasxara hotagaja Jesus Bethaniaeja kirina, Lasarus hounjera eja d’arnihera, e niambhina.
2Eja hoxjarna woruj giuinena, egi Martha wawagirajena, egi Lasarus hisherena warujeja wakishu minagra.
3Egi Maria wikinipauna phi wogisog Nardra hikiruaisha russana mashja jexi hirena, egi Jesus si‐eja hawaxuna egi sira giwasharna najura hik’uanaga. Egi jhira wikinipanna phi panana hoixjina.
4Egi hironaghirera hisha wena: Judas Iskariot Simon hinigra, erena hagregi himanakshana,
5Jagu‐u wikinipanna phi de‐e inke Denaria hogwihidani hiruwiniguni (ejaxji $45:00) egi wanajojaisgeja wogarnishe?
6De‐e inke wanajojaisgera najge wawoji warnina, eshi wamanukeisha herege esge, egi panra harninakshana, egi jagu hijoshurega g’injena.
7Egi Jesus wena: Shegu hinugjane unjehire, hamb huxairekjanera eja de‐e hingirujgus‐shana.
8Wanajojaisgera hoishib harnikishu unakaja, eshi ne inke hoishib hinakishu sh’unikjanihawina.
9Jud wankshigra roha hiperes‐hirena eja unagra egi inke Jesus eshana wagiu hahiranina, eshi Lasarus hishge hajairekjege esge, hisha d’egaja niamb hirera.
10Egi nabhoruxaj hirukana hungra haehirena Lasarus hishge d’ehirekje.
11E‐waunge Judra roha gixarna, egi Jesus harnaxguinege esge.
12Hamb joweja wankshigra roha worujeja hina, naxguinegi Jesus Jerusalem‐eja hikjanegi,
13Palm‐akarajge rus‐hiranaga, egi hikipa hahirena, egi wairena: Hosanna, Rajangwire Israel Hungra, Hirukanara rash harnira harnijina.
14Egi Jesus shungxete‐najawaxete wajegisha hiegi, haminagshana, wowagaxra shesgagshana:
15“Inke naxiranine Sion hinugra, horuxujre hung hashinira huhena, shungxete‐najawaxete harexirig hisha haminaganaga.”
16Washa de‐e inkiperes‐hiranina wironag warnira jegeja, jaja Jesus gloriagishi, egi hiperes‐hirena, washa de‐e horagangra wowagaxeja, egi washa de‐e shesge gigirekjanera.
17Egi Jesus Lasarus warnaxi‐homigeja gigoregi egi niambhira d’egajeregi, wankshig hija hiranihegi, horagnankshana.
18De‐e wankshigra hishge hikipa hajirena, washa wowakanjank de‐e ungi naxguinege esge.
19Esge Pharisera e wakigairena: Hashjawishe inke washanisha u‐hinuxurugwinina, horuxujwire managre harnaj hironaghirena.
20Egi worujeja gikaraj hajirera horogeja Hellenitra hota hijarnankshana.
21E wauinena Philip hirahirera Bethsaida jhinageja hereisha, Galilea mowagaxeja, egi rogiguinena wairena: Hirukanara Jesus hajha rowaguwina.
22Philipga Andreas hirahianaga hogiragshana, egi shige Andreas egi Philip hakishu Jesus hogiragwina.
23Egi Jesus wornigiharna wena: Howagixra jiginina, Wankshig‐hinigra gloriakjanena.
24Hisgexjina, hisgexjina hinigawina, inke waisgab‐sura manogeja rakanagwinigi, d’arnigi, inekhi naikjanena, eshi d’egishi, waisgabra roha haxebnana.
25Hisha wankshighoira wokaragixetegi, xawarnikjanena, egi hisha wankshighoira hokarash’ighi ma‐degi, hakaraninihekjanena wankshighoi hisgejaija.
26Hisha waigirekjegi, hiroinaikjena, egi hajinja hauanjegi, eja hishge ware harnira unjekjanena. Egi hisha waigiregishi, Jajiga gish’aikjanena.
27Shegunegi naxirag harnira najgerategjena, egi jagu hihekjeshe? Jaji niambwine howagix tegi. Eshi de‐e ewau howagix eegi hajina.
28Jaji rash hashinira gloriare. Egi wangeja hora howajina, ena: Gloriahaginina egi shige gloriahakjanena.
29Wankshigra eja nashinankhi naxguinena, wairena: K’oirena, hijanera wairena: Waxopiniwarajire hokit’airena.
30Jesus horniharna egi wena: Hit’et’e de‐e inke Newaigiunjinina, eshi ne‐wanigiunjiwina.
31Shegunegi woehira ma‐de‐e herena. Shegunegi hung ma‐egi herera jangra hot’unairekjanena.
32Egi manegi wangra‐hunuainegi wankshigra harnaj eegi wotutikjanena.
33De‐e are, horakewajena hot’e jagu hit’ekjanegi.
34Wankshigra hornigihairena: Hinaxguwigaja woehieja, Kristus manegus nihekjanera. Jagu‐u wa’sheshe, Wankshig‐hinigra ruainekjanegi? Peshe hereshe Wankshig‐hinigra?
35Egi Jesus wawagena: Hohambra jowexjinig harnikishu u‐anjena. Maniwine hohambjeregi, ningete hornikawas‐wiege. Hisha hokawaseja manigi, hajinja howarahegi inke hiperesninana.
36Hohamb hosh’u harajeregi, hohambra harnaxguwine, e hohambra ninkjang harninikjawina. Washa de‐e Jesus arnaga egi nigeowarena, egi warnugixawarna.
37Egi wowakanjangra roha jowehireja wagiu‐nunige, inke harnaxguinanina.
38Egi Esaias prophetra hoit’e harnira jagu era, shesgena: “Hirukanara, peshe harnaxgushe wohokhu harniwira? Egi peshe Hirukanara arnira hiperes‐hishe?”
39De‐e ehawau inke harnaxgu ruxurug‐hiranina, Esaias shige e‐ge esge:
40“Hishjara ning‐wahina, egi najgera shja‐wahina, inke hishjasu warninera wiraja‐hiranikjege, egi inke najgera winaxgu‐hiranikjege, egi runajimb‐hiranikjege, egi rushja‐hiranikjege.”
41Washa de‐e Esaias wena, jaja gloria hagijagi, egi haehina.
42Shesgarnunige wang jornira horogeja roha harnaxguna. Eshi Pharisenaka e hawau inke hokarag‐hiranina, nigete wohokhu‐hojhieja hihinab‐wagigirege hirairege esge.
43Egi wankshig rajangra hiraijera giphinena Maura rajangra worujis hirena.
44Jesus uwana egi wena: Hisha harnaixgungi, inke Ne‐harnaixgu‐waunikjanena, eshi hisha huingigira E harnaxgu‐waunkjanena.
45Hisha hinjagishi, huingigira E haja‐waunkjanena.
46Managre eegi hohambra Newine hajina, higu peshe harnaixgungi inke hokawaseja unjanikjanena.
47Egi hisha hoit’e harnira naxgungishi egi inke harnaixgunigi, inke woehi‐hagiunikjanena. Inke managre woehi‐hagiu hajinina, eshi managre niamb‐hakjege wauhajina.
48Hisha hiwajisgishi, egi inke hoit’e harnira rusnigi, hisha woehi‐giunkjanena. Hoit’era hironikit’awira, she‐e woehi‐giunkjanena hamb hirowageja.
49Inke Ne‐wakigarnihajena. Eshi Jajiga E huingigina, uwashi hunkune jagu hihekjera egi jagu haehakjera hingena.
50Egi hiaperes‐shana ushi earnira manegus wankshighoira herena. Esge jagura hisha hihega, Jajiga shesge hingera, shesge hihajena.
Okuqokiwe okwamanje:
Johnga 12: WIN
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Published by the American Bible Society in 1907.
