Hogusra 2
2
1De‐sheguhina maxihoshuagre egi mara wau‐rushjana, egi hornihe howajehira harnaj.
2Egi hamb‐hishagowihainja Maura warera rushjana, washa ura, egi xgasigina hamb‐hishagowihainja wore Earnira rushjana washa ura.
3Egi hamb‐eja E worera harnaj xgasi‐karagina, Maura washa gusra washa ura, esge hamb‐hishagowihajega hophiowe‐rogiguna egi wakanjang‐hina.
4De‐e woragra herena maxi‐hoshuagre egi mara jaja wagus‐hiregi, hamb‐eja Jehowa Maura mara una egi maxihoshuagre.
5Egi jarnaga washa maxeja haxebnankhi kheni manegi haxeb‐hiranihanina, egi jarnaga xawiab‐xeterakhi kheni manegi haxeb‐hiranihanina. Jehowa Maura inke managre harnishu hinige esge. Egi inke wankshigra eja hisha niharnina, maxagijira.
6Eshi eja ruja mainja howajina egi ma‐hihagra harnaj dokehina.
7Egi Jehowa Maura wankshig hisha una, makax mainja horusanaga egi pushje hopoxra horniharna wankshighoi hironiharna, egi wankshigjega naxiragra niamb‐jijena.
8Egi Jehowa Maura max‐hisha hoshuna sanig wiaxebhuregi herena Eden eja. Egi wankshigra eja hokerena.
9Egi Jehowa Maura wauna nokirajra mainja haxebwahina hajara phinkjege, egi ruj phinena. Max kissageja Na‐niambra hishge nashina, egi naisha washophira egi washoshishigra hiperes‐wahira higairena.
10Egi ni‐sha Eden‐eja huna maxnaka dokehikjege. Egi eja epa nioxetera jop khixarehiwina.
11Egi jowejajega Pison higairena, de‐e Xawila mara harnaj hogigix howajena, eja shurasinakshana.
12Egi ma‐eja shurasiaka phina, egi eja shige Bedelion nankshana egi shige ini jexira, Oniks higairena.
13Egi ni‐nubra Gixon higairena, de‐e Kush mara harnaj hogigix howajena.
14Egi ni‐hidanira Xidekel higairena, de‐erena wiaxebhura Assiria howarena. Egi ni‐hijobra Euphrat higairena.
15Egi Jehowa Maura wankshigra russana, Eden maxeja hokerena hikishereanaga egi hirakarakjege.
16Egi Jehowa Maura wankshig‐jega ushina wagena; Nara jarnaga max‐regiagre waraijanena,
17Eshi na‐jane washophira egi washoshishigra hipereswahijane inke rajnikjanena, hamb‐hajinja rajgi jasgegi shjekjanena.
18Egi Jehowa Maura wena: Inke phinigaja wankshigjane inekhi unjane, wirakissanigra wagijirera hisha hagiunkje, jasgajera hikisgekje.
19Egi manegi warussana Jehowa Maura wauna wanoijge hokirajra harnaj mainja‐naka, egi ahuirassa hokirajra wangregi u‐nagre harnaj, egi wankshig‐jega harnaj wagarnihina, wajarnaga rashra jagu wigekjegi, egi wankshigjega wanoijge niamb‐nanka harnaj rashra jagu warajgi, shesge wigairena.
20Egi wankshig‐jega jera harnaj rash warajshana, egi ahuirassa wangregi herera, egi wanoijge hokirajra jarnaga ma‐hihagregiakhi, eshi Adam inke wirakissanig wagijire junina, jasgajera hikisgera.
21Egi Jehowa Maura naxjihina wankshig‐jega, egi nana, egi ruhi warnira hisha girussana, egi ruhi horusga hasharag‐gigina,
22Egi ruhi Jehowa Maura wankshig‐jega eja rusga, hinugisha una, egi Adam hinugjega hagarnihina.
23Egi wankshig‐jega wena: Hushereg de‐e hushereg harnira heregaja, egi ro de‐e ro harnira heregaja, hinugra higairekjanena, hinugjane wang‐eja horus‐hirege esge.
24Esge wangra hianjra egi hiunira wakarat’unekjanena egi hijawira hakarakishu unkjanena, egi rora hishankirairekjanena.
25Egi hinuinke nanoka‐nankshana wangra egi hijawira, egi inke hiroshig‐hiranina.
Okuqokiwe okwamanje:
Hogusra 2: WIN
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Published by the American Bible Society in 1907.