Jenesis 45
45
O Jose delpe te pinllardol pe phlalenge
1O Jose nasti terpisailo angla sa e llene kai sea tala leko va, ta urkisarda:
¡Liken saurre katar! Ta niko katar leke sluge sea kote kana o Jose diape te pinllardol kai pe phlal.
2Ondaka thoda te rovel gia zurale kai sa e ejipsiura llangle, ta e viasta avili llik kai o cher e Faraonoko. 3Ta o Jose phenda pe phlalenge:
Me sem o Jose. ¿Mo dad si llundo? Von sea gia darane angla le, kai nasti dena orba lea.
4Ondaka o Jose phenda pe phlalenge:
Aven pasa ma. Kana von avile pasa le, vou phenda lenge:
Me sem tumaro phlal o Jose, kai tumen bichinden e Ejiptoke.
5Akana na triston tumen ta na joliaon isto tumenchar kai bichinden man, soke o Del bichalda kate mai anglal tumendar te sai bradui zivotura. 6Cheren dui burs kai si bok ande gaia phuv, ta si te aven ios panch burs kai e phuv ni ka del niso i te thovena simiche ande phuv. 7A o Del bichalda man mai anglal neko tumen te sai avel tumen porodo pe phuv, ta te sai braduil tumaro zivoto bare zoriaia. 8Goleke tumen ni bichalden man kate, o Del si kai anda man kate te avav sargo o dad e Faraonoko ta gazda pe leko cher ta pe sa e phuv katar o Ejipto. 9Llan oma kai si mo dad, ta phenen leke: Gia phenel cho chavo o Jose:
O Del thoda man gazda pe sa o Ejipto. Aide oma te dikhe man. 10Ka zivi ande phuv katar o Gosen, ta ka ave pasa ma tu, che chaurre, che unukura, che zivirinie ta sa che ezgode kai si tut. 11Ta kate ka dav tumen jape tut ta che familia, ta sa e llenen kai si tuia, te na trubul tumen niso, soke achen panch burs ios kai ka avel bok. 12Mo phlal o Benjamin ta tumen si kai asunden, kai isto me phendem gala alava. 13Phenen me dadeke pe kabor gazdaripe si man ando Ejipto, ta sa so dikhlen kate. ¡Llan oma te anen me dade!
14A o Jose abrasisarda pe phlale e Bejamine, ta thoda te rovel. Ta i o Benjamin thoda te rovel ta abrasisarda e Josee. 15Mapalal o Jose chumidia sa pe phlalen, ta rovda kana abrasisarda len. Mapalal katar gala ezgode leke phlal die orba lea.
16Ta lleli e viasta ando cher e Faraonoko, kai e phlal katar o Jose avilea, ta o Faraon veselisailo ta i e llene kai radina leke. 17Ondaka o Faraon phenda e Joseeke:
Phen che phlalenge te chiden pe pe zivirinie ta te irinpe ando Kanaan, 18ta te anen mange pe dade ta pe familien, soke me ka dav tumen o mai lachipe katar e phuv katar o Ejipto, ta ka jan katar o mai sukaripe kai del e phuv. 19Ta phen lenge te inllaren katar o Ejipto bordona te sai anen pe minonen, pe diskinien ta tumare dade, ta te aven. 20Ta te na briginpe katar pe ezgode kai ka muken incha, soke o mai lachipe katar o Ejipto ka avel lengo.
21Ta gia cherde le e chaurre katar o Israel. O Jose dia lende e bordona kai o Faraon phendaia, ta jape e dromeke, 22ta i dia len patave neve te premeninpe, a e Benjamine dia le trin stotine tolaria rupune, ta panch patave premenimake. 23A leke dadeke bichalda des magarchura kai pe lende saia o mai lachipe katar o Ejipto, ta des magarche kai pe lende saia lliu, marrno ta jape te sai jal leko dad po drom. 24Kana o Jose bichalda pe phlalen te llantar, phenda lenge:
Na maren tumen po drom.
25Ondaka von lleletar katar o Ejipto ta avile kai e phuv katar o Kanaan, kote kai zivila lengo dad o Jakob. 26Ta kana phende leke kai o Jose zivila, ta kai vou gazdarila pe sa o Ejipto, o Jose ni llangla so te cherel ta ni so te phenel, soke ni pachala so von phenena leke. 27A kana von phende leke so o Jose phendaia lenge, ta kana dikhla e bordona kai o Jose bichaldaia te anen le, but veselisailo. 28Ondaka o Israel phenda:
¡Dosta mange te llanav kai mo chaurro zivil! Ka llav te dikhav le maianglal te merau.
Okuqokiwe okwamanje:
Jenesis 45: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.