Jenesis 38
38
O Juda ta e Tamar
1Ande gua vreme, o Juda fuladilo katar pe phlal ta llelo te zivil ando cher katar o Jira, kai saia katar o foro Adulam. 2Kote pinllarda e chorra katar iek kananeo kai ikhardola Sua, ta zinisailo laia. Ta kana sovto laia, 3voi achili khamni ta maladila lake iek minono, kai thoda leko anav Er. 4Ta pale achili khamni ta maladila lake aver minono, kai thoda leko anav Onan. 5Ta pale achili khamni ta maladila lake aver minono kai thoda leko anav Sela. Kana vou biandilo o Juda saia ando Kezib.
6O Juda zinisarda e Ere iekhe diskiniaia kai ikhardola Tamar. 7A o Er saia bilacho angla e akha e Devleke, ta o Del lia leko zivoto. 8Ondaka o Juda phenda e Onaneke:
Zivisar che phlaleke rromiaia ta zinisao laia soke achili phivli ta gia ka vazde porodo che phlaleke.#Dt 15.5-6.
9A o Onan llanela kai gola chaurre kai ka biandon ni ka aven leke. Goleke, vou suako drom kai thovelape te sovel gole diskiniaia kai saia pala leko phlal, vou cherela te na achel khamni, gia te na avel porodo leke phlale letar. 10O Del jolailo but pala so cherela o Onan, ta i leko zivoto lia. 11Ondaka o Juda phenda pe boriake e Tamarake:
Achi phivli ando cher che dadeko, lligo ni ka bariol mo chaurro o Sela. Vou phenela gava soke mislila kai i leko chaurro o Sela ka merel sargo leke phlal. Gia e Tamara lleli te zivil ando cher pe dadeko.
12Nakhla o vreme ta muli e rromi e Judaeki, e chorri katar e Sua. Kana nakhlo o vreme katar o zalosno, o Juda mukla o zalosno ta llelo ando foro katar o Timnat, kote kai sea e llene kai chinena e bal e bakrenge, ta leko amal o Jira o adulamita llelo lea. 13Kana e Tamar llangla kai lako sastro llelo ando Timnat te chinel e bal pe bakrenge, 14ikanda pe patave phivliake, ta thoda pe pete iek dikhlo, gia te na pinllarel la niko, ta besli kote kai dena ando foro katar o Enaim, kai si po drom katar o Timnat. Cherda gava soke llangla kai o Sela saia chavo zinimako, ta ni zinisardea le laia.
15Kana o Juda dikhla la, mislila kai voi saia iek kurvichka, soke voi uchardaia po mui. 16Ondaka likisto katar o drom te sai avel pasa la, ta sar ni llanela kai saia leki bori phenda lake:
¿Muk man te sovav tuia? A voi phenda leke:
¿A so ka de man te sovav tuia?
17O Judas phenda:
Ka bichalav chuke iek busnorro katar mi stoka. A voi phenda leke:
Sukar, samo muk mange vareso chiro lligo ni ka bichale le mange. 18O Juda phenda lake:
¿So mange te mukav chuke? Voi phenda leke:
De man cho sello e doriaia ta e rovli kai si ande cho va. O Judas dia la so mangla ta sovto laia, ta voi achili khamni letar. 19Mapalal voi ikanda po dikhlo, ta pale thoda pe pete e patave phivliake.
20Mapalal o Juda bichalda o busno pala po amal o adulamita, te sai e diskinia iril lete leke ezgode kai muklaia late, a leko amal ni malada la. 21Ondaka puchla e llenen katar goia rig:
¿Kai si goia kurvichka katar o Enaim, goia kai saia pasa o drom? Von phende leke:
Kate ni saia ni iek kurvichka.
22Ondaka vou irisailo kote kai saia o Juda, ta phenda leke:
Ni maladem e diskinia, ta i e llene katar goia rig phende mange kai kote ni saia ni iek kurvichka. 23A o Juda phenda:
Ne achel peke e ezgodenchar, gia niko te na marel espurnia amendar, soke me bichaldem o busno ta tu ni maladan la.
24Ta pala e trin chon kotar, avile te phenen e Judaeke:
E Tamar chi bori kurvisaili ta achili khamni. Ondaka o Juda phenda:
¡Ikanen la ta phabaren la!
25Ta kana ikanena la, voi bichalda te phenen lake sastreke:
Kake si gala ezgode gua si kai mukla man khamni. Dik tu akana kako si gava sello e doriaia ta e rovli. 26Kana o Juda pinllarda e ezgode phenda:
Mai chachi si voi neko me, soke ni zinisardem la me chaurrea e Selaea, ta nikada ios ni sovto laia.
27O llive kana e Tamara maladila lake, avila la dui minone bisniakura. 28Ta kana biandona iek lendar ikanda po va. Ondaka e diskinia kai pomozila te biandon phangla iek thauv lolo pe leko va, ta phenda:
Gava likisto mai anglal. 29Ta kana o minono thoda pale po va, leko phlal biandilo mai oma. Goleke e diskinia kai pomozila te biandon thoda leko anav Fares, soke phenda:
¡Sar putardan chuke drom! 30Mapalal biandilo o gua minono, kai saia o thauv lolo pe leko va ta ikharda le Zeraj.
Okuqokiwe okwamanje:
Jenesis 38: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.