Jenesis 24
24
O Abraam rodel te zinil e Isaake
1O Abraam saia but phuro, ta o Del but blagosisardaia le pe suako ezgode. 2Iek llive o Abraam ikharda e mai phure katar pe sluge, kai saia tala leko va sa so saia e Abraame, ta phenda leke:
Thou cho va telal tala mi chang, 3ta ja mange sovel po Gazda, o Del e milosoko ta e phuviako, kai ni ka muke mo chaurro o Isaak te zinilpe iekhe diskiniaia katar gaia phuv katar o Kanaan, kate kai ziviu, 4goleke tu ka lla kai mi phuv, ta ka ezviri iekhe diskinia maskar mi familia te avel leki rromi.
5A o sluga phenda leke:
A e diskinia te na mangela te avel, ¿So ka cherav? ¿Morabi te inllarav che chaurre ande phuv kotar katar tu likistan?
6O Abraam phenda leke:
¡Na inllar incha me chaurre! 7O Gazda, o Del e milosoko, kai ikanda man katar o cher me dadeko ta me familiako, dia orba manchar ta jala mange sovel kana phenda kai gaia phuv ka del la me porodoke, vou ka bichalel pe suecho angla tu te sai ane kotar iek diskinia me chaurreke te zinilpe. 8Goia diskinia te na mangela te avel tuia, ni ka ache phanglo pe sovel kai jalan mange, ¡samo na inllar incha me chaurre!
9Ondaka o sluga thoda po va telal katar e chang e Abraameki leko gazda, ta jala leke sovel kai ka cherel gia sar phendaia leke te cherel. 10Mapalal o sluga lia des deve katar po gazda, ta but aver ezgode sukar ezvirime pe gazdatar te del, ta llelotar ando foro Najor kai si ande Mesopotamia. 11Kana o sluga avilo pasa o foro lela te perel e riat. Ande gua saiato e diskinie sea sikade te llan te anen pai katar o bunari, ta kote o sluga cherda e deven te den changa. 12Ta molisailo ta phenda:
Gazda ta Del katar mo gazda o Abraam, cher allive te llal mange sukar, ta te avel chuke zalba katar mo gazda o Abraam. 13Dik, me ka achav kate pasa o bunari, soke e chea kai zivin katar, aven kate te ikanen pai. 14E cheake kai ka phenav: Me molivman chuke, fuliar cho bardako te piav pai. Cher voi te phenel: Pi, ta i ka dav te pien che deven. Te phenela gala alava mange, ka llanav kai san lacho me gazdaia, ta kai voi si e diskinia kai tu ezvirisardan e Isaakeke.
15Ni ios ni achiloia te molilpe, kana dikhla kai iek chorri avela pe bardakoia pe po dumo. Voi saia e Rebeka, e chorri katar o Betuel. A o Betuel saia chaurro katar e Milka, e rromi katar o Najor o phlal katar o Abraam. 16A e Rebeka saia but sukar ta saia chei. Voi fulisti kai o bunari, pherda po bardako ta lela te irilpe. 17Ondaka o sluga prastio late ta phenda lake:
Moliv man chuke de man te piav cherricha pai katar cho bardako.
18Voi phenda leke:
Pi gazda. Ta isto kote fuliarda po bardako, ta dia le te piel. 19Kana o sluga pila, e Rebeka phenda leke:
Ka ikanav pai i che devenge, te sai pien sogo mangena.
20Voi sigarda ta chucharda o pai kai saia ande lako bardako kote kai pien e zivirinie, ta prasti pale kai o bunari ta ikanda pai sa leke devenge. 21A o sluga chudisailo latar, ta ni phenela niso, soke vou mangela te llanel dal saia o Del kai pomozila le. 22Ta kana e deve pile pai, o sluga dia la iek angrusti sunakuni kai phariavela sov gramura, ta dui esklave kai pariavena stotina gramura, 23ta phenda lake:
Moliv man chuke, phen mange ¿kaki chorri san? Ta phen mange:
¿Ando cher che dadeko, si than kai te nakha e riat?
24Voi phenda leke:
Me sem e chorri katar o Betuel. Mo dad si chavo katar e Milka ta o Najor. 25Ande amaro cher si than kai te nakhe e riat, ta but char te jan che deve.
26Ondaka o sluga dia changa ta blagosisarda e Devle, 27ta phenda:
¡Blagosime te avel o Del katar mo gazda o Abraam, kai ni duriarda pi zalba ta po chachipe katar mo gazda, ta inllarda man po drom karing o cher katar e familia me gazdaki!
28E Rebeka lleli prastindo kai o cher pe dako, te phenel sa gala ezgode kai nakhlea. 29A e Rebeka saia la iek phlal kai ikhardola Laban, vou prastio kai o bunari te anel e sluga, 30soke vou dikhlaia e angrusti ta e esklave kai laki phiorri anela ande pe dui va, ta vou asunda katar e Rebeka so phenela lake gua lleno. Ondaka o Laban avilo pasa o sluga e Abraameko, ta malada le pasa o bunari pe devenchar, 31ta phenda leke:
Aide tu blagosime e Devletar. ¿Soke san avri? Me ia lachardem chuke iek than ande mo cher ta i che devenge.
32Ondaka o sluga llelo kai o cher, ta o Laban mukliarda e deven ta dia len te jan. Ta mapalal anda pai te sai o sluga ta i e llene kai llana lea, te jalaven pe porrne.
33Ta kana thode lenge te jan, o sluga e Abraameko phenda:
Nasti jav lligo ni phenava so si te phenav.
O Laban phenda:
De orba. 34Ondaka o sluga phenda:
Me sem sluga e Abraameko. 35Ta o Del blagosisarda but me gazda ta dia le but barvalipe. Dia le bakre, guruva, sunakai, rup, sluge murusa, ta i sluge diskinie, deve ta magarchura. 36Ta i leki rromi e Sara dia le iekhe chaurre ande po phuripe, ta mo gazda dia pe chaurre sa so si le. 37Ta mo gazda cherda te jav leke sovel, ta phenda:
Na zinisar me chaurre iekhe diskiniaia katar gaia phuv katar o Kanaan, kate kai ziviu. 38Mai sukar lla kai e familia me dadeki, ta rode maskar lenge diskinie iekhe chea me chaurreke. 39A me phendem leke: Gazda ¿a e chei te na mangela te avel manchar? 40Ondaka vou phenda mange:
Me llelem po drom e Devleko, ta vou ka bichalel pe suecho te llal tuia, te sai llal chuke sukar po drom kai lla, ta te sai ane iekhe chorra katar me dadeki familia te avel rromi me chaurreki. 41A te avelape kai mi familia ni kamena te den e chorra bori, kote che sovel kai jalan mange, ka aven prosto.
42Gia si sar allive avilem kai o bunari, ta ando molipe phendem gia: Gazda ta Del katar mo gazda o Abraam, te si de istina kai ka chere te llal mange sukar pe gava drom kai llav, 43molivman chuke akana kai sem pasa gava bunari, cher te avelpe gia:
E diskinia kai ka avel te ikanel pai, ta golake kai ka phenav: Cher mange iek sebapi, muk man te piav cherricha pai katar cho bardako, 44a voi te phenda mange: Pi tu ta i ka ikanav pai che devenge, voi ka avel e diskinia kai tu Devla ezvirisardan e Isaakeke, o chaurro katar mo gazda. 45Kana molivaman, dikhlem kai e Rebeka avela pe bardakoia pe po dumo, fulisti kai o bunari te ikanel pai, ta phendem lake: Cher mange iek sebapi, de man te piav pai. 46Voi isto kote fuliarda po bardako, ta phenda mange:
Pi, ta i ka dav te pien che deven. Ta voi dia man pai ta i me deven. 47Ondaka phendem lake:
¿Kaki chorri san? A voi phenda mange: Me sem chorri katar o Betuel, chaurro katar o Najor ta katar e Milka. Ondaka thodem iek angrusti pe lako nak ta dui esklave pe lake va, 48ta dien changa ta blagosisardem e Devle, o Del katar mo gazda o Abraam kai anda man po drom o chacho, te sai lav e chea kai si chorri katar o phlal me gazdako, te anav la leke chaurreke. 49Akana phenen mange, dal ka aven lache ta chache me gazdaia. A te na, phenenle mange te sai llanav so ka cherav.
50Ondaka o Laban ta o Betuel phende leke:
Sa gala ezgode aven katar o Del, amen nasti phena chuke ea o iok. 51Dik, e Rebeka si angla tu. Lela ta llatar, ta te avel e rromi katar o chaurro che gazdako, gia sar phenda o Del.
52Kana o sluga e Abraameko asunda gola alava, dia changa angla o Del lligo ni leko chikat dodisarda e phuv. 53Mapalal ikanda but ezgode sunakune ta rupune ta patave, ta dia len e Rebekake. Ta i dia but ezgode sukar lake phlale ta i lake da. 54Mapalal o sluga ta e llene kai llana lea, jale ta pile ta nakhle e riat kote. Thiarinako rano kana ustile, o sluga phenda:
Muken te iriu man kai o cher me gazdako.
55Ondaka o phlal ta e dei katar e Rebeka phende leke:
Morabi e chorri te achel amenchar des llive ios, ta mapalal sai ka llaltar tuia.
56A o sluga phenda lenge:
Na achaven man ios. Soke o Del cherda te llal mange sukar pe gava drom, goleke muken man te llautar kai o cher me gazdako.
57Ondaka von phende leke:
Ka ikhara e chorra, te dikha so phenel voi.
58Ondaka ikharde e Rebeka ta phende lake:
¿Mange llatar gale manusea? A voi phenda:
Ea ka llau.
59Ondaka mukle te llaltar e Rebeka, ta i mukle te llaltar laia e diskinia kai arakhlaia la sar kana voi saia minoni, ta i mukle te llaltar o sluga e Abraameko, ta i e llene kai llana lea. 60Ta blagosisarde e Rebeka gale alavenchar:
Amari phiorri,
¡Te ave dei milia milienge!
¡Ta cho porodo
te dobil e foronen kai si lenge dusmanura!
61Ondaka e Rebeka ta lake sluge likiste pe deve ta llele pala o sluga e Abraameko. Gia si sar o sluga lia e Rebeka ta llelotar kotar.
62O Isaak zivila ando Negev ta irilape katar o bunari kai ikhardol: Gua kai zivil ta dikhel man. 63Ta o Isaak likistoia te mislilpe pasa racha, ta kana vazdia pe akha, dikhla kai nesave deve avena. 64A i e Rebeka vazdia pe akha, ta dikhla e Isaake, ta fulisti katar e deva, 65ta puchla:
¿Ko si gua manus kai avel katar o drom karing amende? O sluga phenda:
Vou si mo gazda.
Ondaka voi lia po dikhlo ta ucharda po mui.
66Ondaka o sluga phenda e Isaakeke sa so cherda. 67Ta o Isaak inllarda e Rebeka kai e chara pe daki e Saraki, ta zinisailo laia. Ta o Isaak but volisarda e Rebeka, ta lia zor kana muli leki dei.
Okuqokiwe okwamanje:
Jenesis 24: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.