Jenesis 22
22
O Del zumavel o pachape e Abraameko
1Kana nakhle gala ezgode, o Del zumada o pachape e Abraameko ta ikharda le, a o Abraam phenda leke:
Kate sem.
2A o Del phenda leke:
Le e Isaake, cho edino chaurro kai pe gachin voli, ta llatar ande phuv katar e Moria. Kana ka ave incha, dele kurbano po burdo kai me ka phenav chuke.
3O Abraam ustilo thiarinako rano, lacharda po magarcho, chinda kasta e kurbanoke ta llelotar po than kai o Del phendaia leke te llal, ta inllarda pea pe chaurre e Isaake ta dui katar pe sluge. 4Kana nakhle trin llive, o Abraam vazdia pe akha ta dikhla o than duratar. 5Ondaka o Abraam phenda pe slugenge:
Tumen achen kate e magarchoia, me ta o chaurro ka lla angle, ka blagosi e Devle ta mapalal ka iri amen.
6O Abraam lia e kasta e kurbanoke ta thoda len pe zea e Isaakeke, mapalal lia e churi ta e iag, ta lleletar e dui. 7Ondaka kana phirena, o Isaak phenda e Abraameke:
¡Dade! A o Abraam phenda leke:
¿So mange chaurrea? A o Isaak phenda leke:
Dik, si amen e kasta ta e iag, a ¿kaitalo o bakro e kurbanoke?
8O Abraam phenda:
Chaurrea, o Del ka del iek bakro e kurbanoke. Ta e dui phirena.
9Ta kana avile kai o than kai o Del phendaia leke, o Abraam lacharda iek altar ta lacharda e kasta, mapalal phangla pe chaurre e Isaake ta thoda le po altar, upral pe kasta.#Stg 2.21. 10A kana o Abraam inzarda po va ta lia e churi te chinel e korr pe chaurreki. 11Ondaka o suecho e Devleko ikharda le katar o miloso, ta phenda leke:
¡Abraam! ¡Abraam! A o Abraam phenda:
Kate sem.
12O suecho phenda leke:
Na vazde cho va po chaurro, ta na cher leke niso, soke llanav kai dara katar o Del, soke ni dian tut palpale ta llelan angle te de man che edine chaurre.
13Ondaka o Abraam vazdia pe akha ta dikhla kai palal katar leke zea, saia iek bakro kai achilo phanglo katar pe singa maskar e kasta. Ondaka llelo o Abraam, lia e bakre ta dia le kurbano po than pe chaurreko.#Ebr 11.17-19. 14Ta o Abraam thoda o anav katar gua than, o Del del so trubul. Goleke phendol allive: Po burdo o Del ka del so trubul.
15Ta o suecho e Devleko ikharda pale o duito e Abraame katar o miloso, 16ta phenda leke:
Soke cherdan gaia ezgoda, ta ni achadan te de man che edine chaurre, me o Del jav sovel pe ma, 17kai ka blagosiv tut. Ka cherav cho porodo te avel gia baro sargo e cheraia e milosoke, ta sargo e chisai kai si pase pasa e mora. Ta cho porodo suako drom ka dobin pe dusmanonenge forura.#Ebr 6.13-14; 11.12. 18Ta katar chi vicha ka avel blagosime sa o sueto e phuviako, soke kandian man.
19Mapalal o Abraam irisailo kote kai sea leke sluge, ta saurre lleletar ando Berseba, ta kote achilo te zivil.
E chaurre katar o Najor
20A kana nakhla nesavo vreme kotar, ande e viasta kai o Abraam, ta phende leke kai e rromi katar leko phlal o Najor, e Milka, avila la minone. 21O purvo chaurro saia o Uz, mapalal biandilo leko phlal o Buz, mapalal o Kemuel, kai saia o dad katar o Aram. 22Mapalal biandile o Kesed, o Jazo, o Pildas, o Idlaf ta o Betuel. 23Gava Betuel saia o dad katar e Rebeka. Gala si e ojto chaurre kai e Milka dia e Najore, o phlal katar o Abraam.#Jen 24.15.
24A o Najor avila le aver chaurre katar leki duito rromi e Reuma. Gala si lenge anava: O Teba, o Gajam, o Tajas ta o Maaka.
Okuqokiwe okwamanje:
Jenesis 22: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.