ማርቈስት ወንጌል 1
1
ፈወነ 1
ጣምቀተ ይዃንስት ኣዋጅድ
(ማቲ. 3፡1-12፤ ሉቃ. 3፡1-18፤ ይዃ. 1፡19-28)
1እኒን እደረት ዅር እየሱስ ክርስቶስት ወንጌሊዙ ኪርመነድ የጝ። 2እንም ነቭይ ይሳያስ፦
«እንወ፣ ክጕደነድ ኣስለው
ይእፃሸረድ ክበዊል እፃጭር፤#ምል. 3፡1።
3‹ኣደረት ጒደነድ ኣስልጥን፤
ጥርግየድየንትም ጭቅ ሽጥን› ያⶖ
በራኸይስ ቓፀው እጅርዙ ድመ»
የው ፃፈጘ የጝ።#እሳ. 40፡3።
4እንዝ ማጥን ጣምቀተ ይዃንስ፦ «ኽጥያቲዙ ይቅርተድ ችጝርናስ ማጥን ንስኻ ጥውርን ጣምቅጭጥን» የው ኣውጃ በራኸይዝ ተሩ። 5ይዅዳ ኻግርድቅ እጝቅ፣ እየሩሳልየም ኻትመይል ፅበውድቅ ጥቅለዝ ጝጐ ፊራⶖ፣ ጝኽጥያቲስም ነዚታⶖ፣ ዮርዳኖስ ዊርቨይል ይዃንስት ናኒዝ ጣምቅሻ ዊኑ። 6ይዃንስም ሲረውድ ግምል ፅቭቀዝ ተሲተው ኣልቨ፣ ጝከምረነድም ኣኽር ዊኑ፤ ጝዅረድም ኣብጠዝመ በራኸዙ ሳረዝ ዊኑ።#2ነገ. 1፡8። 7ሲቭካንድም፦ «ፍጥ የር ጝፃቢዙ ፃልየድየንት እኳ እክስጨ ጥውጨቅ ይጊስ ጭቕጘ ዲቈው ይግረይል ተርጡ። 8ያን ክታት ኣቚዝ ጣምቀኵን፤ ጘጝ ግን ክታት መንፈስ ቅዱስዝ ጣምቅጡ» ያ ዊኑ።
እየሱስት ጣምቅሸነይዝመ ፊትንሸነይዝ
(ማቲ. 3፡13-17፤ 4፡1-11፤ ሉቃ. 3፡21-22፤ 4፡1-13)
9ኣይንድም እየሱስ ገሊለ ኻግሪል ችጝሽረይ ናዝሪት ኻትመየንቲስ ተር ዮርዳኖስ ዊርቨይል ይዃንስት ናኒዝ ጣምቅሹ። 10ይዃንስም በውዝ እየሱስ ኣቚስ ፈጘ ሲመይ ቢት መንፈስ ቅዱስ ርግቨት ተከዝ እየሱስትል ጊማንድ ቓሉ። 11ኣይንድም፦ «ይቀነነር ይዅርድ ክት የጝ፤ ክቍዝ ዲስ የኵን» የው ድመ ሲመይስ ወይሽቱ።#ዘፍ. 22፡2፤ መዝ. 2፡7፤ እሳ. 42፡1፤ ማቲ. 3፡17፤ 12፡18፤ ማር. 9፡7፤ ሉቃ. 3፡22። 12በውዝም መንፈስ ቅዱስ እየሱስት በራኸዝጐ ፊሱ። 13ሲጣኒዝም ፊትንሻ ኣርቨ ግርቅ በራኸይል ኣረዊታኒጅቅ ሳብጡ፤ መላካንድም ጝት ኣግልግል።
እየሱስት በውጥ ክንደጥድ
(ማቲ. 4፡14-17፤ ሉቃ. 4፡14-15)
14ይዃንስም ፃይሽ ወኽኒ ጝንል ጥወት ግረ፣ እየሱስ እደረት ወንጌልድ ሲቭካⶖ ገሊለ ትጐ ተሩ። 15ሲቭካንድም፦ «ግርየድ ችጝኩ፤ እደረት ምጝግስትየንም ኣልትርኵች፤ ንስኻ ጥውጥን፤ ወንጌሊዝም ኣምንጥን» ያⶖ ዊኑ።#ማቲ. 3፡2።
16እየሱስ ገሊለ ባኽሪዝ ጋቢዝ ዲቋንድ፣ ኻዘ ፃውረጥ ስሙንስመ ጝዝን እንድርያስስ ጝታመረቭድ ኣቚል ማልጛንድ ቓሉ። 17እየሱስም ጛት፦ «ላቝጥን ይት ቲክንጥን፤ ነስየ ይጭስ እቅ ፃውርድርነቅ ፃቭጭር» ዩ። 18ጛይም በውዝ ጝታመረቭድ በርጝ ጝት ቲክን።
19ዊቱ ዲቍ የጘም ዘቭዲወስት ቝር ያይቈቭስመ ይዃንስስ ታኰይል ኣቕጝ ጝታመረቭድ ኣስልጋⶖ ቓሉ። 20ጘጝም በውዝ ጛት ጭጙ፤ ጛይም ጝታይር ዘቭዲወስት ጝሰራሸጢጅቅ ታኰይል በርጝ ጝት ቲክንጝ ፊርⶖ።
እየሱስ እርኵስ መንፈስዝ ፃይሸው እጅር ቓዘጘ
(ሉቃ. 4፡31-37)
21ጝዝለም ቅፍርናዀም ትጐ ፊርⶖ፤ እየሱስም ቅዳምሲንቭት ግርየዝ ምኵራቭል ጥው ክንሰነው ኪርሙ። 22ክንሰውድም ወሪትት ኽግ ክንስጢዝጘ ኣይጝቀ ኽየው ስልጣንዝ ዊናንስቅ ኽዝቭድ ጝክንስኒዝ ጊርምሹ።#ማቲ. 7፡28-29። 23ኣይንድም ጝታምኵራቭ ኣቒል ዊነው እርኵስ መንፈስዝ ፃይሸው እጅር፦ 24«ናዝሪትቱ እየሱስወ! ይን ክጅቅ ወረጘ ፃይነቅ? ይናት ድስተመ ተትሩ? ክት ኣው ኣረጘ ኣርቐኵን፤ ክት ቃል እደረት ቅዱስ የጝ!» የው ቓፁ። 25እየሱስም ርኵስ መንፈስድየንት፦ «ዝም ይ! እጅሪስም ፍ!» የው ኣዙ። 26እርኵስ መንፈስድየንም እጅርድየንት ማል ፍርግስ በር ጭቕጘ ቓፃⶖ እጅሪስ ፉ። 27ኽዝቭድም እጝቅቅ ጊርምሸነውዝ፦ «እኒን ዊገድ ወረጘ የጝ? ስልጣን ፃየው ኣቭን ክንድጝ ኣጠት! እርኵሳን መንፈሳንድዛት እኳ ስልጣንዝ ኣዘኵ፤ ጛይም ኣዚትጘኵ» ያ ጝስመ ጝስ ዋቕረዋቕርሹ። 28በውዝም ጝጂጘድ ገሊለት ጅልወይዝቍ ኻግራኒልቅ ወይሽቱ።
እየሱስ ንቕፀቍ ፅውዝጅንጥ ቓዘጘ
(ማቲ. 8፡14-17፤ ሉቃ. 4፡38-41)
29ምኵራቪስ ፈጘም ያይቈቭስመ ይዃንስስታጅቅ ኣቕ ስሙንስመ እንድርያስስታጝኒል ጥዉ። 30ስሙንት ጣስንም ብርዘው ፅውዘዝ ፅዊትር ኽርይር ዊንች፤ ጛይም ጚ ፅዊተነውድ እየሱስስ ድቍⶖ። 31ጘጝም ጝርጐ ኣልት ጝርናንድ ፃይ ጒሱ፤ ብርዘው ፅውዘድም በውዝ ጝርጊስ ሊቁ፤ ጚይም ጕር ጛት ኣቭኑዝች።
32ኰረየን ጥውረት ግረም፣ ድልሚዝ ጘጝ ጅልወይዙ ኽዝቭድ ፅውዝጅኒዝመ ጋኒናኒዝ ፃይሸቊዝዛት እጝቅትቅ እየሱስትጐ ነሱ። 33ኻትመይዙ ኽዝቭድ እጝቅቅ ቢዘይል ኣኽቭሽ ዊኑ። 34ጘጝም ቲተቲተው ፅውዘዝ ፅዊተቍ ንቕፀቍ እቅ ቓዙ፤ ንቕፀቍ ጋኒናንም ፊሱ፤ ዊገድ ግን ጋኒናንድ እየሱስት ኣው ኣቐጘ ኣርቕጝ ዊንጛንስቅ ውረውረቅ ዊግትጥጘ ፊቅድየውም።
እየሱስ ገሊለስ ወንጌል ክንስጘ
(ሉቃ. 4፡42-44)
35ጛምርሲዝም ግረቨዝ ቅሸነይዝ ጕ ጝኒስ ፉ፤ ላው ገለል የው ስፍረልም ፊር ፃልያ ዊኑ። 36ስሙንስመ ጝፃምጢዝም ጕጝ ጝት ደምዝጥጘ ኪርምⶖ። 37ችጘጘም፦ «እጅር እጝቅ ክት ደምዘኵ» ይ።
38እየሱስም፦ «ክንስጨ ማጥን እኒስ ጕን እት ጣቂል ፅበቍ ኪቋኒል ፊርነ፤ ምላሰንድም ያን ተጠውድ እንዝቍዝ የጝ» ዩ። 39እንዝ ማጥን ጝታምኵራቫኒል ክንሳ ጋኒናንድም እቂስ ፊሳⶖ ገሊለት ምሉዝ ጅልዉው።
እየሱስ ለምፃም እጅርድ ቓዘጘ#ማቲ. 4፡23፤ 9፡35።
(ማቲ. 8፡1-4፤ ሉቃ. 5፡12-17)
40ላው ለምፃም#1፡40 ለምፅ፦ መፃፍ ቅዱሲዝ ለምፅ የው ቃልድ ሰውነቲዝ ዲጊል ፈው ከረከረው ፅውዘድየንትቅ ቓሊሰው የጝ። እጅርም እየሱስ ትጐ ተር ጝበዊል ግርቨቭሽ፦ «ፊቅድረውዝየ ይለምፂስ ቓዝተ ቸልደኵ» የው ጨዉ።
41እየሱስም ጝጭስ ጭቕጘ ኣርኽርኻንስቅ ጝናንድ ዘርጋቕ ላምጥጣ፦ «ፊቅድኩን ቓጭ» ዩ። 42ኣይንድም በውዝ ጝለምፅድየን ጝጊስ ሊቁ፤ ጝፁዘይስም ቓዱ። 43-44እየሱስም እጅርድየንት፦ «ጣጝቅቅጭ! እኒንት ኣውማውስቅ ድቍረር፤ ዊገድ ግን ጛጭስ ሚዝር ኣቓንስ ማጥን ፊትር ክቕምት ካኽንዝ ቓሊሽ፤ ክቓድቲዝ ማጥንም ሙሴ ኣዘው ምስዋይትድ ኣልሽ» የው ጣጝቅቅስ ሲነቭሱ።#ዘሊ. 4፡1-32።
45እጅርድ ግን ፊረው ስፍረይልቅ ዊገድየንት ቐናዝ ዊግተነው ኪርሙ፤ ዊገድየንትም እጝቅዝቅ ጂጝዙ፤ እንዝ ምላሰንዝም እየሱስ ኻትምጢል እትላⶖ ጥውጠ ቸሊየውም፤ ዊገድ ግን ኻትመይዝ እድጐ ፅበው ሰውር ስፍረይል ፅቭጠ ኪርሙ፤ ኣቕሽም እቅ ስፍረ ጨቨቂስቅ ጝጐ ተረነው ቀቪየቊም።
Okuqokiwe okwamanje:
ማርቈስት ወንጌል 1: ኽምጣኣኪ
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
