ማቲወስት ወንጌል 28
28
ፈወነ 28
እየሱስ ክርጘይስ ጐጘ
(ማር. 16፡1-10፤ ሉቃ. 24፡1-12፤ ይዃ. 20፡1-10)
1ቅዳምሲንቭት ዲቈት ግረ ጛምርሲዝ ሸወጪዙ በወትረ ግርየይዝ ግረቨዝ መግደላዊት ማርያምስመ ላየ ማርያምስ መቃቭርድየንት ቓልጥጘ ፊር። 2ድጝግትም ዝቨድ ኻይልዝ ተናውፅሽቱ፤ ኣደረት መላክም ሲመይስ ጊም መቃቭርድ ዲቭሽተው ቕርጘድየንት ጊልብር ጝዲጊል ጐዩ። 3ጝሚልክድ መቭረቂዝጘ ኣቭርቅርቀው፣ ጝኣልቨድም ኣይዝጘ ፃረው ዊኑ። 4ሊሚደቍ ዊተድርድም መላክድየንት ጐውትጛንስቅ ቀጥቀጥ ይጛ ቢድኒዝጘ ኣቕ። 5መላክድም እቍንድዛት፦ «ኣይዝዀጥን ጐውትርነ! ሲቅልሸው እየሱስት ደምዝርነቅ ኣርነጘ ኣርቕኩን። 6ጘጝ እንል እጀውም፤ በውገ ዊግተጘ ጕኩ፤ ላቝጥን እርሸድ ዊነው ስፍረድየንት ቓልጥን። 7ነንም ቃዝየዝ ፊትርን ጝክንደጢዝ፦ ‹ክርጘይስ ጕኩ! ክታትም ቀድም ገሊለ ፊርጡ! ጝጊስም ቓልትርንቅ!› ይርን ድቍጥን፤ እንወ ድቍኩን!» ዩ። 8እቍንድም ጐውትዝመ ዲስተዝ እቻቕጝ ክንደጢዝ ድቍጥጘ በውዝ መቃቭሪስ ጕጝ ውጢጛ ፊር።
9በውዝም እየሱስ ጛት ችጝ፦ «ዲግተ ክታጭስ ኣነ!» ዩ፤ ጛይም እየሱስትል ኣልትጝ ጝልኵድ ፃይጝ ሲግድ። 10ኣይንድም እየሱስ፦ «ጐውትርነ! ፊጥን፤ ገሊለ ፊርጛንስ ማጥን ይፅንስ ድቍጥን፤ ይት ጝጊስ ቓልጥቍ» ዩ።
11እቍንድ ገነ ጒደነይል ፅብጛ፣ መቃቭርድ ሊሚድጛ ዊነቍ ዊተድሪስ ላው ላውድ ኻትመይል ፊርጝ ኣቐው ገቨድቅ ካኽነጣነ ኻልቅጢዝ ድቍ። 12ካኽነጣነ ኻልቅጥድም ሽመቅሊጅቅ ኣኽቭሽጝ ማኽርኽርሽ፤ ዊተድሪዝም ንቕፀው ጊንዝቭ ይውጝ፦ 13« ‹ይን ኽርይን ፅብና ጝክንደጥድ ኻር ተርጝ ስ› ይጥን። 14እኒን ጂጘድ ቅመተይል ችጝሽ እኳ ይን ኣልትን ኣስርድዝንቅ፤ ክታግልም ውርቅ ጭቓ ዊገ ችጛይየጘ ፃቭንቅ» ይ። 15ዊተድርድም ጊንዝቭድ ለምርጝ ኣዚትጘጘ ፃቭ፤ እንም ነኳን ኣሽ ኣይዅዳኒዝ ማኽሊል ዊግሻ ፅበኵ።
እየሱስ ጝክንደጢዝ ይወው ትዛዝድ
(ማር. 16፡14-18፤ ሉቃ. 24፡36-49፤ ይዃ. 20፡19-23፤ ኽዝ. 1፡6-8፤ 1ቈረ. 15፡3-8)
16ፅጭ ለው ክንደጥድም እየሱስ ፊርጥጘ ኣዘው ገሊለቱ ኣበይል ፊር።#ማቲ. 26፡32፤ ማር. 14፡28። 17እየሱስት ቓልጛንድም ሲግድ፤ ላው ላውድ ግን ተጠራጥርሽ። 18እየሱስም ጝታጐ ኣልት፦ «ሲመይስመ ዝቨዝቅ ስልጣን እጝቅ ይጭስ ነይሽትኩ። 19-20እንዝ ማጥን ፊጥን፤ ኣልሚዝ ኽዝቭድቅ ኣይርት ሽዝ፣ ዅርት ሽዝ፣ መንፈስ ቅዱስት ሽዝ ጣምቅርና፣ ያን ክታት ኣዘውድየንትም እጝቅትቅ ፋፅምጛንስ ማጥን ክንስርና ይክንደጥ ፃቭጥን፤ እንወ ያን ኣልሚዝ ኻትሸነይል ኣሽ ዊትርቅ ክታጅቅ የጝ» ዩ።#ኻወ. 1፡8።
Okuqokiwe okwamanje:
ማቲወስት ወንጌል 28: ኽምጣኣኪ
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
