Shitatiko 28
28
1Niho Ishaki ehanine Yakobo na kumutandalisha, pe oho amanishile kumushangwisha, wamwambilile ngayi, “Hinga uyeka mbuyama waku bambuyama ba ku Kenaani. 2Katuka, yanga ku Meshopotamiya, ku munzi wankaka yobe Mbetuwele tata mandiyobe. Ukayekeko kankanga umo ku bana ba bambuyama ba kanyantu kobe Lambani. 3Nyambi Mpandashilanga mwanga atandalishe maluwo wobe na kukupana bana babengi, ngayi mwanga ukenge tata mikoka yayingi. 4#Shit 17:4-8. Mwanga akutandalishe hamo na bazukulyobe ngonehe atandalishile Abulahama, kami mwanga ukakome litunga lino, elye Nyambi apanikile Abulahama.” 5Ishaki wafunzulwe Yakobo kuya ku Meshopotamiya, kuli Lambani, mwana Mbetuwele wa mulume wa Kaalemiya. Lambani wengile mpanza Lambeka, manda Ishau na Yakobo.
Ishau ukuyeka mbuyama wamina
6Ishau walimukile ngayi Ishaki unatandalishi Yakobo na kumufunzula kuya ku Meshopotamiya mu kuyekelako mbuyama. Walimukile ngayi oho amutandalishile, wamwambilile ngayi hinga akayeka mbuyama waku Kenaani. 7Ishau wamonene ngayi Yakobo unombatala tatiyendi na mandiyendi, kami wayakale ku Meshopotamiya. 8Nohobene Ishau, oho ayuvwile ngayi tatiyendi Ishaki kushinga bambuyama ba Kenaani wufwako, 9niho ayile kuli Ishimaele mwana Abulahama wa mulume, pe wakayekele mwanendi Mahalati, mpanza Nebayoti.
Mulo wa Yakobo ku Mbetele
10Yakobo wafumine ku Mbelishemba wayile kulwa Halani. 11Ha kulela kwa mutena wakumine ku mbalila yimo na kutulilako. Walanganine hanci na kuya mutulo hinga ahamina ha limanya. 12#Yowa 1:51. Walotelo na ku mona kakandamisho kakufuma hanci na kukuma kuyilu na mangeloyi a Nyambi hi akandama na ku shuluka. 13#Shit 13:14, 15. Nyambi ya Ngula wemanine kunkumo yendi, wambile ngayi, “Ami Nyambi ya Ngula, Nyambi wa Abulahama na Ishaki. Elye litunga aha unalangana nikalipanika kukwobe naku bazukulyobe. 14#Shit 12:3; 22:18. Pe bazukulyobe bakenga ngonehe lihekelela lya hanci. Bakanenehesha litunga lyabo ku zimbalila nimwazo, kami kupitila mumwobe na bazukulyobe mikoka nimwayo ya hano hanci nikayitandalisha. 15Nikekala nobe na kukulama nimwako oku ukaya, nika kubwesha kami ku litunga lino. Kukakushiya nifwako hantu noho nikatenda nimwabyo biya naku kulupishile.”
16Niho Yakobo apindukile ha tulo, pe wambile ngayi, “Mwa shikuma Nyambi ya Ngula ulikuno, uli ha mwanya unobene, ngoboni ami kaliha nalimukile.” 17Watinine shikuma pe wambile ngayi, “Mbalila yino ya kutinisha shikuma. Yiku fwanina kwinga Litala lya Nyambi ya Ngula, yiku fwanina kwinga menginino akuyilu.”
18Niho Yakobo apindukile lumenemene. Watolele liyo limanya a haminine na kuliyimika kwinga limanya lya shanukisho. Niho ayitilileho mazi. 19Watumbile lizina lya mbalila iyo ngayi Mbetele#28:19 Mbetele: Lizina elye mu Shihebelu likutontoloka ngayi, “Litala lya Nyambi ya Ngula.” ngoboni ha kutatika lizina lya munzi wuyo lyatumbiwile ngayi Luzi. 20Niho Yakobo alibezele kuli Nyambi ya Ngula ngayi, “Ndi ukekala na nami na kundama ha mukala nikuya na kumpana byakulya na bivwalo, 21kami ndi ni kuboka shiwahe ku munzi wa batate, obe ukenga Nyambi yami. 22Limanya elye ninemiki kwinga limanya lya shanukisho likenga litala lyobe, pe nika kupanika sha wu likumi ku nimwabyo biya ukampana.”
Okuqokiwe okwamanje:
Shitatiko 28: LLK
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Libuka Lya Kuyela © Bible Society of Zambia, 2020.