Ima̍tiyu 8
8
Iji̍sɔ̄ɔsi ya̍ nīi olimada ɔha̍ de lɛ cha̍cha̍
(Ima̍aki 1:40-45; Ilu̍uku 5:12-16)
1Iji̍sɔ̄ɔsi hrāajɛ bū abɔ̍ɔ yɛwu ɔla̍ā bɛ̍ɛ̄nɛ̄ ma̍, āchɛ lyɛ̄mɛ̄ kpɛ̍ɛji nīi pɛ̍ ku ɔ̍ ma̍. 2Olimada ɔha̍ wā dikpo̍ba̍ Iji̍sɔ̄ɔsi ge̍ de ūnōowu tū ajɛ de ɔ̍ ka hīka, “Ādā, o̍ ge̍ rīya awɔ, a chī ge̍ē ya̍ nīi n de ē lɛ cha̍cha̍ mɛ.”
3Iji̍sɔ̄ɔsi nā abɔ̄ kpaa gwō olimada ɔla̍ā, ka de ɔ̍ hīka, “O̍ rīya ami. De lɛ cha̍cha̍ gɛ!” Imada de kwɛ̍ɛjī hī ɔngrɔ̄ɔ ɔla̍ā i̍ngɔ̍ɔ ke̍e̍ ɔpɔ̄ɔpɛ̄. 4Iji̍sɔ̄ɔsi koko̍o de ɔ̍ hīka, “Ma̍ ko̍ō! A ā koko̍o yī lɛlā nūma̍ de ɔ̄chɔ̄chɛ ni̍. Yɛ i̍ngɔ̍ɔ tri̍di̍di̍ dikpo̍ba̍ oligbe yī Ɔwɔ nīi o̍ ge̍ jiya awɔ ma̍. Nīi a ā ya̍ ɔpɔ̄pā lɔkɔ nīi Imo̍sīisi chabɔ̄ ma̍; oge̍ ya̍ ochi̍chi̍ de āchɛ wa̍a̍ hīka a de lɛ cha̍cha̍ mɛ̍.”
Iji̍sɔ̄ɔsi nyiya ɔ̍chɛ̍ yī a̍dā icho̍ojiya ɔha̍
(Ilu̍uku 7:1-10)
5Iji̍sɔ̄ɔsi chɛ̄ ga ipwo̍gra yī Ikapa̍num ma̍, a̍dā icho̍ojiya yī Aliro̍om ɔha̍ wā dikpo̍ba̍ ɔ̄ ge̍ ra̍ābɔ̄ de ɔ̍ hīka, 6“Ādā, ɔ̍chɛ̍ yī u kwi̍īyē kpɛ̍ɛ gbo abɔ̍ɔ la wɔlɛ̍. O̍ i̍ ē pīya wɔcha̍ mɛ ni̍ lachi̍lachi̍. Ibi̍īyē ɔla̍ā yɛ abɔ̍ɔ ē ya̍ ɔ̄ dwɔ̄bi̍-dwɔ̄bi̍.”
7Iji̍sɔ̄ɔsi ka de ɔ̍ ka anɔ̍lɔ ge̍ē wā ge̍ē ya̍ nīi ɔ̍lɔ de ē lɛ cha̍cha̍.
8Ɔngrɔ̄ɔ ɔla̍ā hīya anu̍ ɔkɔ bɛ̍ɛ̄nɛ̄ hīka, “Ehe̍, Ādā! N i̍ ngma̍ lɛbɛ nīi a ge̍ē wā ge̍ē plɛ̍hu̍ kpɛ̍ɛ̍ chɛ̄ u̍nu̍ yī u ni̍, ka la oko̍o ji hɛ̄ɛbɛ nīi ɔ̍chɛ̍ yī u ge̍ de lɛ cha̍cha̍. 9Wu̍chē oji̍ nɛ, ami titi lɛ āchɛ ɔnɔ̄kɔ̄kū ɛha̍ nīi ami ɔlɔjā hɔ̄ la ihi̍yajɛ yī wā ma̍. N chī lɛ icho̍ojiya ɛha̍ nīi hɔ̄ la ihi̍yajɛ yī ami ma̍. N ge̍ da onūma̍ hīka, ‘Gāa gɛ!’ O̍ ē yɛ. N ge̍ chī da ɔla̍ā hīka, ‘Yewā!’ O̍ ē wā. N ge̍ de ɔ̍chɛ̍ yī u hīka, ‘Ya̍ ɔjā nūma̍,’ o̍ ē ya̍ ɔjā ɔ̍lɔma̍ ɔpɔ̄ɔpɛ̄.”
10Iji̍sɔ̄ɔsi plɛ̍ɛ̄lā nūma̍ ma̍, o̍ de ya̍ ɔ̄ lɛbɛ̍bi̍ ɔlamu-ɔlamu. O̍ koko̍o de āchɛ nīi yɛ ē ku ɔ̄ la u̍tu ma̍ hīka, “Lēchi̍, n ā koko̍o de ala̍! N i̍ ma̍ ita yī ɔtū ode chōche bāa onūma̍ amu la ajɛ yī I̍sɛ̄rɛli wa̍a̍ je̍ ni̍. 11Ala̍ ma̍ gɛ ko̍ō! Āchɛ yɛ̄mɛ̄mɛ̄ ge̍ē bū la wāā yɛnɔ ɔ̄chī ba̍la yɛnɔ ɔ̄nɛ̄ wā ge̍ē hyāhɔ̄ la okpōkōlō nīi rɛ la ɛbɛ yī Ɔchwɔ̄lɛ̍ Oro̍ōre̍ yī Ɔwɔ ma̍. E̍ ge̍ē wā ge̍ē hyāhɔ̄ abɔ̍ɔ ba̍la A̍brahāam ba̍la A̍yi̍sāaki ba̍la Ije̍kɔ̄ɔpu. 12Āchɛ nīi ke̍ ge̍ hɔ̄ abɔ̍ɔ la ɛbɛ yī Ɔchwɔ̄lɛ̍ Oro̍ōre̍ yī Ɔwɔ ma̍, e̍ ge̍ē kpo̍ wā wu̍ ngmɛ̍ɛchɛ, ē kpo̍ wā chīyētū gāa ɛbɛ odobū la yɛchɛ. Abɔ̍ɔ nīi e̍ ge̍ē gblāa ē drɛ̄ɛgba ē rāngūu a̍nɛ.” 13Iji̍sɔ̄ɔsi ka de a̍dā icho̍ojiya ɔla̍ā bɛ̍ɛ̄nɛ̄ hīka, “Pīya yī wɔlɛ̍ gɛ! Lɔkɔ nīi a de ɔtū che ma̍, lɛlā ɔla̍ā ge̍ de lɛ i̍ngɔ̍ɔ de wɔ gɛ!” Ɔpɔ̄ɔpɛ̄ ɔ̍chɛ̍ yī a̍dā icho̍ojiya ɔla̍ā de lɛ cha̍cha̍ yɛ̄gɛ̄grāa ɔla̍ā i̍ngɔ̍ɔ ke̍e̍.
Iji̍sɔ̄ɔsi nyiya āchɛ yɛ̄mɛ̄mɛ̄
(Ima̍aki 1:29-34; Ilu̍uku 4:38-41)
14Iji̍sɔ̄ɔsi pīya ga wɔlɛ̍ yī Ipi̍ta bɛ̍ɛ̄nɛ̄. O̍ ma̍ hīka ɛ̍nɛ̍ ɔlwɔlɛ̍ yī Ipi̍ta ɔ̍lɔ ku̍ ibi̍īyē ɔla̍ gbo abɔ̍ɔ. 15Iji̍sɔ̄ɔsi gāa ge̍ de abɔ̄ gwō ɔ̄; ɔpɔ̄ɔpɛ̄, o̍ de hīya anu̍ nīi o̍ nīichō kū abɔ̍ɔ ē chrāa aa̍ ɛrɔ̄.
16La ɔ̄nɛ̄ ɔla̍ā yɛ̄grāa nīi yɛnɔ yɛ ē bi̍ ma̍, e̍ bī āchɛ oku̍ yapri̍ija yɛ̄mɛ̄mɛ̄ ge̍ de Iji̍sɔ̄ɔsi. Iji̍sɔ̄ɔsi kpo̍ yapri̍ija ɔdwɔ̄bi̍ ɛla̍ā nū hī wā cha̍cha̍ bū lɛlā yī oko̍o yī nū. 17Onūma̍ ya̍ lɛbɛ nīi lɛlā nīi Ayisa̍ya ɔ̄chɛ ɔkɛrɔ̄ yī Ɔwɔ mwɔ̍ɔmu ma̍ ge̍ē gɔ̄grāa. O̍ ka hīka,
“Anu̍ ɔlɔjā de iyē oko̍ōku̍ yī alɔ nāa pīya.
O̍ de ɛjā nīi ku̍ alɔ iyē ma̍ bī pīya.”
Akanya nīi hɔ̄ la oku Iji̍sɔ̄ɔsi ma̍.
(Ilu̍uku 9:57-62)
18Iji̍sɔ̄ɔsi ma̍ yɛ̄mɛ̄ yī āchɛ nīi ta̍kakatū ɔ̄ ma̍, o̍ ka hīka aɛ̍lɛ ge̍ pīya ga oe̍ ɔla̍nū yī li̍hu. 19Ɔ̄chɛ ongū Lihɔ yī Iju̍u ɔha̍ wā dikpo̍ba̍ Iji̍sɔ̄ɔsi ge̍ da ɔ̍ hīka, “Ɔngūlɛ̄lā be̍e! Ɛbɛha̍-ɛbɛha̍ nīi a ge̍ yɛ, n ge̍ē de ē ku wɔ.”
20Iji̍sɔ̄ɔsi hīya anu̍ ɔkɔ hīka, “Ma̍ ko̍ō! Yangūudu lɛ wɔ̄gɔ̄ nīi e̍ ē chā ma̍; a̍gba̍ana nīi wu la ichō ma̍ chī lɛ a̍chwɔ̍lɛ̍. Ami Ɔyi̍ yī Ɔngrɔ̄ɔ i̍ chī lɛ ɛbɛ ode lɛhu̍ kɔ̍ myɛ̍nyɛ̍ ni̍.”
21Ɔngrɔ̄ɔ ɔha̍ nīi - a̍chi̍kpo̍ yī Iji̍sɔ̄ɔsi ma̍ gba̍a ka de ɔ̍ hīka, “Ādā be̍e! De yɛ̄grāa de u nīi n ē gāa ge̍ de a̍dā yī u nyi o̍bū gɛ/.”
22Iji̍sɔ̄ɔsi koko̍o de ɔ̍ hīka, “Ku la u̍tu! Pi̍ye̍mā nīi okū ge̍ nyi okū yī aa̍ ɛlɛjā!”
Iji̍sɔ̄ɔsi ya̍ nīi ahuhu ɔnɔ̄kɔ̄kū gboba̍
(Ima̍aki 4:35-41; Ilu̍uku 8:22-25)
23Iji̍sɔ̄ɔsi gatū ga wɔwu̍ bɛ̍ɛ̄nɛ̄. A̍chi̍kpo̍ yī nū yɛ ba̍la anu̍. 24Ɔpɔ̄ɔpɛ̄, ahuhu oluhuhwi ɔha̍ kū la ogwōgwō abɔ̍ɔ li̍hu ɔla̍ā kpɛɛ nīi a̍kpa̍yēenyi wu̍ kla̍ wɔwu̍ ɔla̍ā mɔri̍mɔri̍, Iji̍sɔ̄ɔsi ma̍ gbwɔlā. 25A̍chi̍kpo̍ yī nū gāa ge̍ hɛ̍ ɔ̄ eyī ka de ɔ̍ hīka, “Ādā, chu̍chu̍u hɛ̍ alɔ ta̍; ma̍a alɔ de jī mɛ̍!”
26Iji̍sɔ̄ɔsi hīya aa̍ ɔkɔ hīka, “Oji̍ nīi ala̍ ē tūuhwi i̍ngɔ̍ɔ ma̍/? Ɔtū ode chōche yī ala̍ ma̍ bi̍hi chɔ̍ɔ!” Iji̍sɔ̄ɔsi nīichō bɛ̍ɛ̄nɛ̄, ka tāa ahuhu ba̍la a̍kpa̍yēenyi ɔla̍ā. Ɛbɛ hīya i̍ngɔ̍ɔ brɛɛ ɔpɔ̄ɔpɛ̄.
27Ɔ̄chɛmɔ̄chɛ de kwi̍ibū hɔ̄ abɔ̍ɔ. E̍ ka hīka ita yī ɔ̄chɛ ɔna̍ ɔ̍lɔ hɔ̄ ma̍ ma̍/? Ahuhu ba̍la a̍kpa̍yēenyi ɔ̍lɔ nōnuni̍ pɔ̍ɔkɔ yī ɔ̍lɔ!
Iji̍sɔ̄ɔsi nyiya alyapri̍ija ɛha̍ la Iga̍dāra
(Ima̍aki 5:1-20; Ilu̍uku 8:26-39)
28Iji̍sɔ̄ɔsi gba̍a ga ɔcha yī Aliga̍dāra, abɔ̍ɔ la oe̍ ɔla̍nū yī li̍hu bɛ̍ɛ̄nɛ̄. Āchɛ ɛpa ɛha̍ bīyɛchɛ hī wɔ̄gɔ̄ yī u̍nwɔ̍wu̍ wā ge̍ grāa anu̍. Āchɛ ɛpɛpa nūma̍ ku̍ yapri̍ija ɔdwɔ̄bi̍ gba̍a̍. E̍ luhuhwi kpɛ̍ɛ nīi ɔ̄chɔ̄chɛ i̍ ē bɔ̍ɔ̄tū ga abɔ̍ɔ la ɔpɔ̄pū ɔla̍ā mɛ ni̍. 29Alyapri̍ija ɔdwɔ̄bi̍ ɛla̍ā ti̍ira̍gba̍ ka hīka, “Ɔyi̍ yī Ɔwɔ! Oji̍ nīi a chikpo̍ lɛhu̍ yī alɔ ma̍/? O̍ re̍ka a wā ge̍ē ya̍ alɔ ichi̍ o̍bū nīi yɛ̄grāa kpakpa ge̍ē gbajɛ?”
30Abɔ̍ɔ kurɛkurɛ bla̍a ɛbɛ ɔla̍ā, ribi yī eko̍oba ɛha̍ gblāa abɔ̍ɔ ē ri̍re̍. 31Yapri̍ija ɛla̍ā ra̍ābɔ̄ de Iji̍sɔ̄ɔsi hīka ɔ̍lɔ ge̍ yɛ ge̍ē de aa̍ ē kpo̍ nū, ɔ̍lɔ ge̍ pi̍ye̍mā nīi aɛ̍lɛ ge̍ pīya ga lipu̍ yī eko̍oba ɛla̍ā.
32Iji̍sɔ̄ɔsi ka de wa̍ ka ɛ̍lɛ ge̍ pīya gɛ. E̍ ngmɛ̍ɛchɛ hī āchɛ ɛla̍ā pīya ga lipu̍ yī eko̍oba ɛla̍ā bɛ̍ɛ̄nɛ̄. Ribi yī eko̍oba ɛla̍ā ya̍ wuru la ɛnya bū abɔ̍ɔ la o̍chi wa̍a̍ ge̍ chīyētū li̍hu; e̍ bi̍yenyi i̍ngɔ̍ɔ cha̍cha̍.
33Āchɛ nīi yɛ ē deyīrɛ eko̍oba ɛla̍ā ma̍ hīma̍a̍ la ɛnya pīya ga wɔlɛ̍ ge̍ de wɔ̄kā ɔla̍ā mīyanya abɔ̍ɔ wa̍a̍. E̍ koko̍o yī lɛlā nīi ya̍ la lɛhu̍ yī alyapri̍ija āchɛ ɛpa ɛla̍ā ma̍ de āchɛ wa̍a̍. 34Wu̍chē yī ɔla̍ā, alipwo̍gra ɔla̍ā mi̍ya hī ajajɛ wā abɔ̍ɔ dikpo̍ba̍ Iji̍sɔ̄ɔsi. E̍ wā ge̍ ma̍ Iji̍sɔ̄ɔsi ma̍, e̍ ra̍ābɔ̄ de ɔ̍ ka ɔ̍lɔ ge̍ ku̍ pīya hī ajɛ yī aa̍.
Okuqokiwe okwamanje:
Ima̍tiyu 8: YBASR
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2020 Bible Society of Nigeria (second edition)
