Ima̍tiyu 16

Āchɛ nīi chikpo̍ yī lɛlā ɔlɛbɛ̍bi̍ ɔmɔ̍ɔ̄ma̍ ma̍

(Ima̍aki 8:11-13; Ilu̍uku 12:54-56)

1Āchɛ yī Ifa̍rasīi ba̍la Āchɛ yī Isa̍dusīi ɛha̍ wā dikpo̍ba̍ Iji̍sɔ̄ɔsi. E̍ chikpo̍ ge̍ē trɛ̍ɛda ē gwō ɔ̄ lɛlā ɔha̍. Wu̍chē yī ɔla̍ā, e̍ da ɔ̍ ka ɔ̍lɔ ge̍ yɛ̍ɛ̄lā ɔlɛbɛ̍bi̍ ɔha̍ nīi - ɔ̍lɔ ge̍ē chabɔ̄ hīka Ɔwɔ ɔ̍lɔ chɛ̄ ku̍ ɔ̍lɔ ma̍ de aa̍. 2Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Je̍ka yɛnɔ ge̍ yɛ ē bi̍ ma̍, ala̍ ē ka hīka, akpɔ̍ɔwɔ ɔ̍lɔ lɛ nyɔɔ ma̍, ɛbɛ ɔ̍lɔ ge̍ē lɛ ngu̍wa̍ hwɔhi hwɔhi i̍chɛ. 3O̍ ge̍ chī - ɔ̄chɔ̄chī nɛ, ala̍ ē ka hīka, wu̍chē lɔkɔ nīi akpɔ̍ɔwɔ ɔ̍lɔ lɛ nyɔɔ gba̍a dobū ma̍, ɔ̍lɔ ge̍ē hrīwō u̍ma̍ama. Ala̍ ē deyīrɛ akpɔ̍ɔwɔ ē jo̍ōkū lɔkɔ nīi ɛbɛ ge̍ē lɛ ma̍ ē mɛ; ala̍ i̍ chī je̍ ochi̍chi̍ yī ɔjā ode lɛlā chabɔ̄ nīi lā ku̍ yɛ̄grāa olu̍ma̍ama mɛ ni̍. 4Āchɛ ɔdwɔ̄bi̍ ba̍la i̍je̍ Ɔwɔ ni̍ nīi gblāa ma̍ la yɛchɛ nūma̍ ma̍! Ala̍ ē che um abɔ̄ yī lɛlā ɔlɛbɛ̍bi̍ ɔyɔ̍ɔ̄ya̍ chabɔ̄? Īchāha̍-īchāha̍! Lɛlā ɔlɛbɛ̍bi̍ ode chabɔ̄ lōri̍īnū nīi hɔ̄ de ala̍ ma̍ - ɔla̍ā nīi iyī Ijo̍na ma̍ nɛ.”

Iji̍sɔ̄ɔsi pīya ɔjānū hī wā rɛ abɔ̍ɔ.

Ɔna yī lɛlā yī āchɛ yī Ifa̍rasīi ba̍la yī Isa̍dusīi

(Ima̍aki 8:14-21)

5A̍chi̍kpo̍ yī Iji̍sɔ̄ɔsi ga hɛ̍ta̍ ga oe̍ ɔla̍nū yī li̍hu ɔla̍ā ma̍, e̍ i̍ bla bī ibrɛ̍ɛdi ni̍. 6Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ala̍ ā deyīrɛ! Ala̍ ā gbō iyī ala̍ hī ɔjā obī ibrɛ̍ɛdi nōnū yī Āchɛ yī Ifa̍rasīi ba̍la Āchɛ yī Isa̍dusīi ko̍ō!”

7A̍chi̍kpo̍ yī nū kū abɔ̍ɔ ē ka ē de ɔ̍nyīnū bɛ̍ɛ̄nɛ̄ hīka, ibrɛ̍ɛdi ɔha̍lɔha̍ nīi aɛ̍lɛ i̍ bī ni̍ ma̍ - ohu̍ nīi ɔ̍lɔ ka i̍ngɔ̍ɔ a̍nɛ.

8Iji̍sɔ̄ɔsi je̍ ɔjā nīi e̍ yɛ ē ka ē de iyī wā ma̍ ɔpɔ̄ɔpɛ̄. O̍ da wa̍ hīka, “Ohu̍ yī oji̍ nīi ala̍ ē kɛlā ku̍ ibrɛ̍ɛdi i̍bōbī ni̍ ē de iyī ala̍ ma̍/? Ɔtū ode chōche yī ala̍ ma̍ bi̍hi chɔ̍ɔ! 9O̍ re̍ka ala̍ i̍ po̍ ochi̍chi̍ yī lɛlɛ̄lā we̍ ni̍? Ala̍ i̍ bla gɛ ni̍: Yɛ̄grāa nīi n da ākpā yī ibrɛ̍ɛdi ɛrwɔ̄ hɛ̍ de āchɛ u̍nɔ igwo̍lɛpa che āchɛ ohu igwo̍ ma̍ bɛ̍ɛ? Obri̍bri̍ ɛmla̍a nīi ala̍ kpo̍ onīi jɛ̄ wā hōhī ma̍ tū ma̍? 10Kɛ̄ɛ yɛ̄grāa nīi n chī de ākpā arāapa hɛ̍ de āchɛ u̍nɔ igwo̍ ma̍ bɛ̍ɛ? Obri̍bri̍ ɛmla̍a nīi ala̍ kpo̍ onīi jɛ̄ wā hōhī ma̍ tū ma̍? 11Ɔkana̍ - ohu̍ nīi ala̍ i̍ po̍ ochi̍chi̍ yī lɛlā nīi n ka ma̍ ni̍ ma̍? I̍ lɛlā yī ibrɛ̍ɛdi nīi n chī yɛ ē ka ē de ala̍ a̍ni̍. Ɔjā nīi n ka ma̍ re̍ka, ‘Ala̍ gbō iyī ala̍ hī ɔjā obī ibrɛ̍ɛdi nōnū yī Āchɛ yī Ifa̍rasīi ba̍la Āchɛ yī Isa̍dusīi!’ ”

12Bū la ɛbɛ ɔla̍ā, a̍chi̍kpo̍ yī nū de jo̍ōkū bɛ̍ɛ̄nɛ̄ hīka ɔ̍lɔ i̍ ɔjā ode tū ibrɛ̍ɛdi nīi o̍ nōnū ɔla̍ā nīi ɔ̍lɔ yɛ ē ta̍ aa̍ ɔna yī ɔ̍lɔ a̍ni̍. E̍ de jo̍ōkū bɛ̍ɛ̄nɛ̄ hīka ɔ̍lɔ - lɛlā ongōngū yī Āchɛ yī Ifa̍rasīi ba̍la Āchɛ yī Isa̍dusīi nīi ɔ̍lɔ yɛ ē ta̍ aa̍ ɔna yī ɔ̍lɔ a̍nɛ.

Ipi̍ta de lɛlā yī Iji̍sɔ̄ɔsi chāyenyi

(Ima̍aki 8:27-30; Ilu̍uku 9:18-21)

13Iji̍sɔ̄ɔsi wā ge̍ pīya ga ajɛ nīi hɔ̄ bla̍a ipwo̍gra yī Isi̍sari̍ya Ifili̍pāyi ma̍ bɛ̍ɛ̄nɛ̄. O̍ che a̍chi̍kpo̍ yī nū ikpo̍ abɔ̍ɔ hīka, “Āchɛ̄ɛchɛ ma̍ u̍tu gbɛri̍ya̍ ka Ɔyi̍ yī Ɔngrɔ̄ɔ ɔ̍lɔ - ɔ̄nyɛ nɛ ma̍/?”

14E̍ hīya anu̍ ɔkɔ hīka, “Āchɛ ɛha̍ ka aɔ̍lɔ - Ijɔ̍ɔn Ohuyenyi nɛ. Ɛha̍ ka aɔ̍lɔ - Ɛla̍yi̍ja nɛ. Ɛha̍ chī ka hīka aɔ̍lɔ - Ijɛrɛma̍ya kɛ̄ɛ ɔ̄chɛ ɔkɛrɔ̄ yī Ɔwɔ ɔha̍ nɛ.”

15Iji̍sɔ̄ɔsi gba̍a che wa̍ ikpo̍ hīka, “Ala̍ ma̍ bɛ̍ɛ? Ala̍ gbɛri̍ya̍ ka amɔ̍lɔ - ɔ̄nyɛ nɛ?”

16Isa̍yi̍mɔ̄ɔn Ipi̍ta ka ɔpɔ̄ɔpɛ̄ hīka, “Awɔ - Ɔhɔ̍ɔnyɛta̍ Nīi Ɔwɔ Hōhu Ma̍ a̍nɛ. Awɔ - Ɔyi̍ yī Ɔwɔ nīi - Ɔwɔ ɔhɔ̄leyī ma̍ a̍nɛ.”

17Iji̍sɔ̄ɔsi da ɔ̍ bɛ̍ɛ̄nɛ̄ hīka, “Isa̍yi̍mɔ̄ɔn ɔyi̍ yī Ijɔ̍ɔn! A̍hōhi ge̍ - iyī wɔ lēchi̍ lēchi̍! Wu̍chē oji̍ nɛ, lɛlā olēchi̍ lēchi̍ nūma̍, i̍ ɔ̄chɛ̄ɛchɛ ɔlamu ji de chabɔ̄ hu̍ wɔ a̍ni̍; A̍dā yī u nīi hɔ̄ la ichō ma̍ chabɔ̄ hu̍ wɔ a̍nɛ. 18Wu̍chē yī ɔla̍ā, n ge̍ē koko̍o ē de wɔ; awɔ re̍ka Ipi̍ta, lɛchɔ̄ ɔlwɔhɔ̍hu̍ a̍nɛ. Ichō yī lɛchɔ̄ ɔlwɔhɔ̍hu̍ nūma̍ nīi n ge̍ē gwo̍ ɛbɛ ogrēeyī yī āchɛ yī u ē che a̍nɛ. Wɔhu̍ yī ɔpīyaku̍ i̍ ge̍ē kla̍ anu̍ ɔkɔ̍ɔ̄kla̍ ē mɛ ge̍ē gbo ni̍. 19Awɔ nīi n ge̍ē de ɔyi̍ igbɔ̄gɔ̄rɔ̄ yī ɛbɛ yī Ɔchwɔ̄lɛ̍ Oro̍ōre̍ yī Ɔwɔ ē de wɔ a̍nɛ. Ɔjāmɔjā nīi a ge̍ howu̍ yī nū amu la ajɛ, e̍ ge̍ē howu̍ i̍ngɔ̍ɔ abɔ̍ɔ la ichō. Ɔjāmɔjā nīi a ge̍ chī chɛ̄ amu la ajɛ; e̍ ge̍ē chɛ̄ i̍ngɔ̍ɔ abɔ̍ɔ la ichō.”

20Bū la ɛbɛ ɔla̍ā, Iji̍sɔ̄ɔsi ta̍ a̍chi̍kpo̍ yī nū ɔna ka ɛ̍lɛ ge̍ e̍e ka de ɔ̄chɔ̄chɛ ka anɔ̍lɔ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu a̍nɛ ni̍.

Iji̍sɔ̄ɔsi kɛlā ku̍ ichi̍ ba̍la ɔpīyaku̍ yī nū

(Ima̍aki 8:31—9:1; Ilu̍uku 9:22-27)

21Bū la yɛ̄grāa ɔla̍ā, Iji̍sɔ̄ɔsi kū la ɔka lɛlā nūma̍ hwōō de a̍chi̍kpo̍ yī nū bɛ̍ɛ̄nɛ̄ hīka, “N ge̍ē gāa Ijɛru̍sālɛm ge̍ē mi̍chi̍ gba̍a̍ la abɔ̄ yī ɛgabɔ̄ ba̍la alɛhu̍ aligbe ba̍la āchɛ ongū Lihɔ yī Iju̍u. E̍ ge̍ē de u ē ngmo̍. Ɔ̄chī ɔmɛta̍, n chī ge̍ē hye̍ēyī la okū wā la ɔhɔ̄leyī.”

22Ipi̍ta wā ge̍ bī ɔ̄ du̍mɔ̍ ga ɛkū ge̍ yɛ ē ka ē tāa anu̍ hīka, “Ādā, Ɔwɔ ge̍ e̍e chɛ̄ i̍ngɔ̍ɔ ni̍! Lɛlā nūma̍ i̍ ge̍ē ya̍ wɔ i̍ngɔ̍ɔ īchāha̍-īchāha̍ ni̍!”

23Iji̍sɔ̄ɔsi pīya kpa̍ta̍ da Ipi̍ta hīka, “Chi̍i̍, tu̍ rɛ gāa hī u, Isa̍tan! Awɔ - ɛkwɔ ogū ɔ̄nyɛ ɔpɛ̄ nɛ. Wu̍chē oji̍ nɛ, ɛri̍ya̍ yī wɔ nūma̍ - iyī āchɛ̄ɛchɛ nɛ; i̍ iyī Ɔwɔ ni̍.”

24Iji̍sɔ̄ɔsi ka de a̍chi̍kpo̍ yī nū wa̍a̍ bɛ̍ɛ̄nɛ̄ hīka, “Ala̍ ma̍ gɛ ko̍ō! Ɔ̄chɛ nīi ge̍ chikpo̍ ge̍ē yɛ ba̍la ami, ɔlɔjā ge̍ mwanyī hī lɛlā yī anu̍ ɔlɔjā. O̍ ge̍ chrōoko̍o yī ichi̍ ɔmɔ̍ɔ̄ma̍, nīi o̍ ge̍ ku u la u̍tu. 25Wu̍chē oji̍ nɛ, ɔ̄chɛ nīi ge̍ chikpo̍ ge̍ē de ɔhɔ̄leyī yī nū gbōgbō, o̍ ge̍ē ngmla̍a ɔlɔjā pīyēbi̍. Ɔ̄chɛ nīi ge̍ chī de ɔhɔ̄leyī yī nū pīyabi̍ wu̍chē yī u, ɔlɔjā ge̍ē ma̍ ɔhɔ̄leyī yī nū ke̍e̍. 26Ɔ̄chɛ ge̍ de yɛchɛ nūma̍ lɛ mɔri̍mɔri̍ nīi ɔhɔ̄leyī yī nū ge̍ chī ngmla̍a anu̍ pīyabi̍ ma̍ bɛ̍ɛ? Ɛpiyabuna ɔna̍ nīi ɔlɔjā lɛ ma̍? Ɔjɔ̄jā i̍ hɔ̄ abɔ̍ɔ nīi ɔ̄chɛ ē de ē hīya ɔhɔ̄leyī yī nū ni̍. 27Wu̍chē oji̍ nɛ, Ɔyi̍ yī Ɔngrɔ̄ɔ ge̍ē wā la rīgā ɔnɔ̄kɔ̄kū yī A̍dā yī nū la ayɛ̍ɛ̄chɛ̄rɔ̄ yī nū la u̍tu ma̍, yɛ̄grāa ɔla̍ā, o̍ ge̍ē kla̍ ɔ̄chɛmɔ̄chɛ ure̍ lɔkɔ nīi ɔnyɔnyɛ ya̍ wa̍a̍ ma̍. 28Lēchi̍-lēchi̍, n ā koko̍o de ala̍! Āchɛ ɛha̍ gblāa amu u̍ma̍ama nīi i̍ ge̍ē pīyēku̍ ni̍ kpɛɛ nīi e̍ ē ma̍ Ɔyi̍ yī Ɔngrɔ̄ɔ nīi o̍ ē wā bāa Ɔchwɔ̄lɛ̍ ma̍.”

Okuqokiwe okwamanje:

Ima̍tiyu 16: YBASR

Qhakambisa

Dlulisela

Kopisha