Mapookyony 6
6
Uravi lwa Vandu
1Naasa kyeeri kilya vandu valepooka ifumbuka urukeny, na vakaira vana va kyika. 2Vana va kyuumi va Iruva llyo valesennyo mmbana yewo va kyika va vandu vekee washa vakakooryafo shaasa vakunda. 3Nndumi Iruva kaamba, “Mumuyo wakwa mbushelung'anaa na vandu yeva mikonu simu-fo, mashika nawo ni fyuumbe. Kyasia myaaka yakwe ishevaa iyana na makumi avii nsi.” 4Vanefili veefo urukeny, kyeeri ekyo na numa ya vayo-da vana yewo va Iruva elyi valekaa na vana yewo va kyeny va Vandu, vakaira nawo vana. Yewo elyo kasha mmbo vekee vandu vakaari vatiri finya na irina lyawo lyikamanyika. 5Kyeeri Nndumi Iruva alelollya uravi lwa nndu wa vandu ni uniini ulaniny na wo ikusaro lya nrimin wakwe mmbo lyikee iravi wo nkonu. 6Nndumi Iruva kakurrya elyi aleumba nndu ulaniny kasokkywa mfyoova nriminy. 7Nndumi Iruva kaamba. “Mmbo nsherumataa nndu yeu shilemuumba yaa ulaniny, nndu wa vandu na mafisi na ekyo kirufukaa-si na ndeye. Mashika mmbo shakurya nkiki elyi shilevaumbany.” 8Kyeendi we Noe kakooya isenya efo kwa Nndumi Iruva.
Mbony ta Noe
9Yaa nng'u marika a Noe. Noe kava nndu wa usumanu, nndu nsha efo irikeny lyakwe. Noe keenda ariani na Iruva. 10Noe kaira vana vararu va kyuumi mmbo: Semu, Hamu na Yafeti. 11Ulana lukalyamarika usanguny lwa Iruva, ulana lukaisshwa ngapanu na uwai. 12Iruva kalollya shaasa ulana lwalyang'a, mashika wo nndu mmbo ekelatya shia ya uravi ulaniny. 13Iruva kavia Noe. “Vandu vammishura ulana ngapanu na uwai, naasany nshevalyamaraa vandu ando amwi na ulana.” 14Songosia Safina niini ya mbau ta kidamwa kuvike-fo firya, kuyaambye-fo laami nisha mmba na kyipoo. 15Ni indi kushetanaa; mita iyana lyimwi makumi araru na kyeenda llo waasha lwa safina eyo, mita makumi avii na isaanu llyo ivari lya vayo, na mita ikumi na isaanu ni waasha lwa yeenda uwe. 16Na yoo mbariny ya vayo vika-u mwaango, kuvike kai firaaru; kya si, kya kavii, na kya karaaru. 17“Lola-te! Nsheende mmbwa nniini ya mifu urukeny, ilyamare wo kyuumbe kyiiyo kitiri muu na wo kindo kikee ulaniny kiffwe. 18Lyo nshelyaa mma ivanngyi neewe. Kusheangaa efo safininy, yewe na nka-afo na vana vafo, na vaka vawo. 19Na wo ifisi kwiipo avii, lya kyuumi na lya kyika safininy, naambo fikkye muu amwi neewe. 20Kwaate-fo fivii wo ngata ya ndeye na ifisi wo ngata ya ifisi, na efyo fifurukaa si, naambo fikkye muu efo safininy. 21Kwiipoo shoonga ya wo ngata ivaa ilya kuisurumi, nnyo ishevaa shoonga yaany na fyuumbe efyo.” 22Ni indo Noe aletana shaasa Iruva alembavasya.
Okuqokiwe okwamanje:
Mapookyony 6: MAS2
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Holy Bible in Kimashami © Bible Society of Tanzania, 2016.