Embandizo 3
3
Adamu na Eva nibashenga
1Enjoka ekaba eina obwenge kukira enyamaishwa zona ez'Omukama Ruhanga yatonzire. Ebaza omukazi eti, “Ruhanga akagamba ati, ‘Mutalilya aha muti gwona gwona omu busitani?’ ” 2Omukazi ahorora ati, “Ebiraba by'emiti y'omu busitani twakubilya; 3kyonkai Ruhanga akagamba ati, ‘Omuti oguli omugati y'ebusitani mutaligulyaho kiraba, nangu n'okugukoraho chei, mutalija mukafa.’ ” 4Nawe enjoka emugambira eti, “N'akati timufe, 5aha rw'okuba Ruhanga namanya okwo ekiro ekyo muligulyaho, amaisho ganyu galiburura, muliba nka wenene, mumanye ekirungi n'ekibi.” 6Omukazi kayaboine okwo omuti gwabaire gwina ebyakulya birungi, mara nigushemera aha maisho, kandi guli gw'okwegombwa aha rw'okugiza omuntu obumanyi, atongora ekiraba kyagwo, alya, ashuba ebindi atwalira iba, nawe alya. 7Aho bombili baburura amaisho, bemanya okwo bali bushai, baruka obubabi bw'omuti gw'omutini bekolera obukebwe.
8K'omushana gwabaire gwahumbire, bahulira Omukama Ruhanga omu ndimiro naija. Bamwesheleka omu miti y'omu busitani omwo, ngu atababona. 9Kyonkai wenene ayeta omushaija namubaza ati, “Oli nkahai?” 10Ogu ahorora ati, “Nakuhulira omu busitani noija natina aha rw'okuba ndi bushai, nayesheleka.” 11Omukama Ruhanga amubaza ati, “N'ohai ayakugambira okw'oli bushai? Isi walya aha muti ogwo nakutangire kulyaho?” 12Omushaija ahorora ati, “Omukazi wo wampaire kutura nawe niwe yampa ekiraba ky'omuti ogwo nkakilya.” 13Aho Omukama Ruhanga abaza omukazi ati, “Kiki eki ekyo wakora?” Omukazi ahorora ati, “Enjoka niyo yambeiya nkalya.”
Okuraamwa kw'ensi
14Omukama Ruhanga agambira enjoka ati,
“Orwo wakor'otyo.
Omu bitunganwa byona n'omu nyamaishwa zona
waba muraamwa.
Oragenzaga orubunda,
mara oralyaga eitaka,
ebiro byona by'oburora bwawe.
15Ndibagiza obwiko iwe n'omukazi,
oruzaro rwawe n'oruzarorwe.
Oruzarorwe rulikushekenyura omutwe,
na iwe olirutema ekisinziro.”
16Agambira omukazi ati,
“Ndakanyisa muno obushasi omu kuzara,
orazaraga abaana omu bushasi.
Baro oramugiliraga orwoyoyo,
kandi wenene arabaga mukama wawe.”
17Agambira Adamu ati,
“Orwo waikiliza ekyo mukazi wawe yagamba,
okalya aha muti
ogwo nakutangire ningamba nti, ‘Otaligulyaho,’
ensi yaraamwa yazira iwe;
oragiyagamu ebyakulya obihendekeire
ebiro byona eby'oburora bwawe.
18Erakumeleza amahwa n'amatoju,
kandi oratungwaga ebishambu.
19Kugya kubona ekyakulya orakamukwaga empita
kuhika orwo oligaruka omw'itaka,
aha rw'okuba okaruga omuli lyonene.
Okw'oli itaka, oligaruka omw'itaka.”
20Adamu aruka mukaziwe eibara Eva aha rw'okuba niwe yabaire nyina abarora bona. 21Omukama Ruhanga akolera Adamu na mukaziwe ebijwaro by'empu, abajweka.
Adamu na Eva nibabingwa omu busitani ya Edeni
22Ahanyuma Omukama Ruhanga wenene agamba ati, “Omuntu atushusire, yamanya ekirungi n'ekibi. Mbwenu atajuburwa kunoga kiraba aha muti gw'oburora akakilya, akarora eirai lyona.” 23Aha rw'ekyo amubinga omu busitani ya Edeni, kugya kulima eitaka elyo yarugiremu. 24Abinga Adamu; mara omu burugaizoba bw'ebusitani ya Edeni ataho abakerubi#3:24 Abakerubi Ngeli emoiho y'abamalaika. n'embanda elikumengeta omuliro nehindukira buli muhanda, kutanga omuntu wena wena kugoba aha muti gw'oburora.
Okuqokiwe okwamanje:
Embandizo 3: RHAY01
Qhakambisa
Dlulisela
Kopisha
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fzu.png&w=128&q=75)
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ruhaya DC Bible © Bible Society of Tanzania, 2001.