TAUNET 7
7
Maranet
1Kilenjin Jehovah Noa, Obwa melit, inye ak bikab gong’ung’ tugul; amu kaageerin ale i bo imanda eng’ tainnyu eng’ ibini. 2Ketu che bo tiong’ik alak tugul che miachen tisab tisab, kirgit ak ne kotoy; ak che bo tiong’ik che ma miachen aeng’, kirgit ak ne kotoy; 3ak che bo taritik che bo barak agichek, tisab, kirgit ak ne kotoy: si kerib kosopcho iyotenywa eng’ ng’ony komugul. 4Amu tomo betusiek tisabu, si ayokyi ropta ng’ony korobonji betusiek artam ak kemousiek artam; ak abar awong’u eng’ ng’ony komugul kiy age tugul ne sobei ne kiga ayai. 5Ak kiyai Noa tugul ko u ye king’at Jehovah inendet.
6Ak kiga kotar Noa kenyisiek bogol lo si kobiitu maranet eng’ ng’ony. 7Kiba anyun Noa melit ak werikyik, ak kwondanyi, ak kwonyikab werikyik, koboto inendet, si kochililye beekab maranet. 8Kiba anyun alak eng’ tiong’ik che miachen, ak che ma miachen, ak taritik, ak kiy age tugul ne ichuutegei ng’ony, 9aeng’ aeng’, ole mi Noa eng’ melit, kirgit ak ne kotoy, ko u ye king’at Kamuktaindet Noa. 10Ak kingobata betusiek tisabu, kobiit beekab maranet eng’ ng’ony. 11Eng’ kenyit ne kiite Noa kenyisiek bogol lo, arawet ne bo aeng’, betutab taman ak tisab ne bo arawet, eng’ betunoto anyun koyatogis kong’ik che kutune beek che bo riret ne o, ak koyatogis tirisiokab kipsengwetisiek. 12Ak kirobonji ng’ony betusiek artam ak kemousiek artam.
13Kiba melit Noa eng’ betunoto, koboto Sem, Ham, ak Japet, werikab Noa, ak osotiotab Noa, ak osotik somok che bo werikyik; 14icheget, ak tiony age tugul ko u kergeindanyi, ak tugul che kiyagi ko u kergeindanywa, ak kiy age tugul ne ichuutegei ng’ony ko u kergeindanyi, ak tarit age tugul ko u kergeindanyi, tarit age tugul ne tirireni. 15Kiba melit ole mi Noa, alak tugul che bo borwek, aeng’ aeng’, che tinyei kabusetab sobondo. 16Ak ichek che kiba, ko ki kirgit ak ne kotoy, tugul che tinyei borwek, ko u ye king’at Kamuktaindet inendet: ak kigerji Jehovah anyun Noa orit. 17Ak kimarane beek ng’ony betusiek artam; kitesak beek, ak koganab melit kwo barak, kot kolooit eng’ ng’ony. 18Kigimegitu beek, ak ko tesak mising’ eng’ ng’ony; ak kowendote melit beek barak. 19Kigimegitu beek eng’ ng’ony mising’ kosiir; ak kituch tulonok che koen, che mi kureretab kipsengwet komugul. 20Kichang’it beek kot kotuch tulonok che itei kakwautik taman ak mut che bo eut. 21Kibek tugul che bo borwek che kibendote ng’ony, taritik, ak tuga, ak tiong’ik, ak tiong’ik tugul che mengechen che uuoti eng’ ng’ony, ak chi age tugul. 22Kibek tugul che tinyei eng’ serunekwak kabusetab tamirmiriet ne sobei, ak tugul che mi emet ne yaamat. 23Ak kigibar kiwong’ kiy age tugul ne kisobei, ne kimi ng’ony komugul, chi ak tany, agot ne ichuutegei, ak tarit age tugul ne bo barak; kigibar kiges eng’ ng’ony; Noa kityo ne king’et, koboto ichek che kimitei ak inendet eng’ melit. 24Ak kigimegitu beek eng’ ng’ony betusiek bogol ak konom.
Okuqokiwe okwamanje:
TAUNET 7: BUKUIT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
God's word open for all
©Bible Society of Kenya, 2020