KADADDIYAN 4
4
Kain ban Habil
1Saellana jareya Adam apolong tedhung ban Hawa, rajina. Babine' jareya pas bubut, sarta babar lalake', pas adhabu, “Kalaban partolonganna Pangeran sengko' andhi' ana' lalake'.” Daddi kana' jareya enyamae Kain.#4:1 Kain: Nyama reya e dhalem oca' Ibrani artena “olle.” 2Saellana jareya Hawa pas babar lalake' pole, enyamae Habil. Habil daddi oreng ngowan dumba, tape Kain daddi oreng tane. 3Ta' abit saellana jareya Kain ngala' sabagiyan dhari hasella tanena, egabay kurban ka PANGERAN. 4#Ibr. 11:4 Habil ngatorragi kurban keya, iya areya budhu'na embi' dumbana se sareyang, budhu'na dumba jareya esambelli, bagiyanna se paleng bagus ekagabay kurban ka PANGERAN. PANGERAN kasokan ka Habil ban kurbanna, 5tape ta' kasokan ka Kain ban kurbanna. Kain laju ce' peggella, mowana nyarotheng. 6Daddi PANGERAN adhabu ka Kain, “Arapa ba'na me' peggel? Arapa ba'na me' theng-nyarotheng? 7Mon ba'na alako becce', tanto ba'na mesem; tape mon ba'na atengka juba', atena ba'na esemma'e dusa. Dusa jareya ngobasa'ana ba'na, tape ba'na kodu makala gudha'anna.”
8 #
Mat. 23:35; Luk. 11:51; 1Yah. 3:12 Kain pas ngoca' ka Habil, “Mara ja' entara ka teggal.” Sanapa'na ka jadhiya, Habil epokol bi' Kain, terros epate'e.
9Dhabuna PANGERAN ka Kain, “Kemma Habil, ale'na ba'na?”
Saodda Kain, “Ta' oneng. Masa' abdidalem ajaga'a ale'?”
10 #
Ibr. 12:24
PANGERAN adhabu, “Arapa ba'na me' ngalakone barang se nako'e jareya? Dharana ale'na ba'na aera' ka Sengko' dhari dhalem tana, akantha sowara se acerreng menta babales. 11Daddi sateya bi' Sengko' ba'na ebastowa, tabuwang jau dhari tana se anganga ngesep dharana ale'na ba'na se epate'e bi' tanangnga ba'na jareya. 12Mon ba'na agarap tana, ba'na ta' kera olle hasel pa-apa dhari tana jareya; ba'na bakal le-ngalleya san-kassannagi, akantha buronan se ta' andhi' kennengngan e bume.”
13Kain mator ka PANGERAN, “Okomanna Junandalem talebat berra', abdidalem ta' kellar se nyandhanga. 14Abdidalem etondhung dhari tana ka'dhinto, jau dhari ajunanna Junandalem. Abdidalem bakal le-ngalleya san-kassannagi, akadi buronan se ta' gadhuwan kennengngan e bume. Daddi manabi abdidalem tapanggi sareng pasera'a saos, tanto abdidalem laju epate'e.”
15PANGERAN adhabu, “Enja', ta' kera. Mon ba'na epate'e oreng, menangka babales, oreng se mate'e ba'na jareya ban oreng laenna, kabbi sampe' kapetto, bakal mateya epate'e oreng keya.” Bi' PANGERAN Kain laju eparenge tandha menangka parengeddan ka sapa'a bai se tatemmo bi' Kain sopaja ta' sampe'a epate'e. 16Kain laju ondur dhari ajunanna PANGERAN, pas enneng e tana Nod, e temoranna Eden.
Toronanna Kain
17Kain ban binena andhi' ana' lalake' se enyamae Henokh. Saellana jareya Kain laju maddek kottha se enyamae Henokh, epapadha ban nyamana ana'na. 18Henokh andhi' ana' Irad. Irad andhi' ana' Mehuya'el, ban Mehuya'el andhi' ana' Metusa'el, ban Metusa'el andhi' ana' Lamekh. 19Lamekh andhi' bine dhadhuwa', Ada ban Zila. 20Ada andhi' ana' Yabal. Yabal jareya se daddi bangatowana bangsa se meyara ebin ban abengko e dhalem kemah. 21Yabal andhi' ale' nyamana Yubal; toronanna Yubal jareya se daddi tokang soleng ban tokang maen calempong. 22Zila andhi' ana' nyamana Tubal-Kain; toronanna Tubal-Kain daddi pandhi se agabay rang-barang dhari dimbaga ban besse. Tubal-Kain andhi' ale' babine', nyamana Na'ama.
23Lamekh ngoca' ka binena se kadhuwa,
“Ada ban Zila, mara edhingngagi.
Sengko' mate'e oreng lalake' dha-ngodha,
polana sengko' epokol bi' oreng jareya,
sampe' sengko' loka.
24Mon oreng kapetto epate'e oreng menangka babalessa matena Kain,
bakal badha'a oreng pettong polo petto' se kodu epate'e mon sengko' epate'e oreng.”
Set ban Enos
25Adam ban Hawa kaagungan Pottra lalake' pole. Ca'na se bine', “Allah apareng ana' lalake' pole ka sengko', gantena Habil se epate'e Kain.” Daddi kana' jareya enyamae Set.#4:25 Set: Nyama reya e dhalem basa Ibrani monyena padha ban oca' se artena “la apareng.” 26Set andhi' ana' lalake' se enyamae Enos. E bakto jareya oreng molae nyebbut asmana PANGERAN menangka baktena oreng ka Salerana.
Okuqokiwe okwamanje:
KADADDIYAN 4: MAD
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume