Akisy. 18
18
Kiikinae Aburaam ka Sara ikoku ŋinisapat
(Ŋibur. 13:2)
1Totakanu Akuj neni ka Aburaam aneni alomit iŋes, alodiyete ŋikuyono ŋulu a Mamure; apaki ŋina eboiyo iŋes alotolim a epuke a eema keŋ aŋuna ka amwanis a akoloŋ. 2Kikeu Aburaam ereet keŋ, kiŋolik ŋikilyok ŋiuni ewuasi aneni aapi, kedau akiŋolikin ikes, tokuraun alopuke a eema, toem kisiryam ikes, toryedik, kijuuru. 3Tema, “Ekapolon kaŋ, ani tokona kajok ayoŋ aneni kon, ekelipit ayoŋ iyoŋ nyilunyar kare ca aneni a eketiyan kon. 4Kimyek kare ca yaunae ŋakipi ŋadi kilotaryata iyes ŋakejen, ido kieŋut a lokitoe. 5Kimyekinae ayoŋ oyau ŋamugati ŋadi tonyama toryamuniata agogoŋu, ido nai torotokis, ikwapei itorunioto iyes neni a eketiyan kus.” Tolimut ŋikilyok ŋuluuni ŋul temasi, “Kitiya lopite ŋolo ilimunio iyoŋ.” 6Kionyak Aburaam atipei loeema neni a Sara tema, “Tooku ŋakirya ŋuna ajokak ŋaokunet ŋauni tomunak kipou ŋamugati atipei.” 7Toem Aburaam neni aya ŋimoŋin, toramu etaok ŋolo anakunan, inak neni a esorokit a ŋolo abu kiburuburak akitemokin. 8Tolemu Aburaam akimyet ka ŋakile ta akiriŋ a etaok ŋolo abu iŋes kitemok, kiwuak ŋamuja ŋun daadaŋ kiŋaren ŋikilyok ŋul, kimuja. Apaki ŋin, awuoi Aburaam alodiyete kec alokitoe a ŋolopei eboiyoto ikes.
9Kiŋita ŋikilyok ŋul Aburaam temasi, “Ai eyai aberu kon Sara?” Toboŋok iŋes tema, “Eyai tooma eema.” 10Tolimok epei alokidiŋ ŋikilyok ŋul Aburaam tema, “Kire jik, aboŋuni ayoŋ neni kon apaki ŋina ejokunia ekaru ŋina ieteunio, apaki ŋin, eyakaunor aberu kon Sara ikoku ŋinisapat.” Apupi Sara ŋakiro ŋun alopuke a eema alokaku Aburaam, aneni eboiyo iŋes. 11Apaki ŋin, aris Aburaam ka Sara kemojoŋa nooi, aris Sara daŋ kedepa ŋikaru ŋulukidoet. 12Tokyeni Sara ejamuwara bon alotau keŋ tema, “Apedori mono kire ayoŋ aryamun alakara kamojoŋ ka ekapolon kaŋ daŋ kemojoŋ a?” 13Kiŋit Ekapolon Aburaam tema, “Kaanukiro akyenia Sara ejamuwara ebala, ‘Apedori mono kire ayoŋ auruun ikoku, ayoŋ ŋina amojoŋ a?’ 14Eyai mono ibore ŋini etyono aneni ke Ekapolon a? Aboŋuni ayoŋ neni kon apaki ŋina itemokinitoe, apaki ŋina ejokunia ekaru ŋina ieteunio, apaki ŋin, eyakaunor Sara ikoku ŋinisapat.” 15Nai tema Sara, “Nyekyena ayoŋ.” Alimuni iŋes ŋun aŋuna akuryania. Tolimok Ekapolon iŋes tema, “Mam, ikyenit iyoŋ.”
Akinyasuno a Sodoma
16Torotokis ŋikilyok ŋul a nen, kiŋolikis Sodoma erounito. Apaki ŋin, etenakinit Aburaam ikes akitoodikin erot. 17Tema Ekapolon, “Emunoni mono ayoŋ aneni ka Aburaam ŋuna alosi ayoŋ akitiyakin 18ikwapei eraakar Aburaam ayeni ayoŋ atemar eruwor papa a ŋituŋa a ŋulu alalak ka ŋulu etirok, ido neni keŋ iterereŋere ŋituŋa a ŋakwapin a daadaŋ a? 19Nyemunoni, anerae adau ayoŋ aseun iŋes ikotere iciki ŋidwe keŋ ka ŋituŋa a ekal keŋ ŋulu iwuapete iŋes, kiwuapa erot ŋolo ke Ekapolon anakitiya ŋuna iyookino ka ŋuna ecamakinitae; ikotere nai isiyookini Ekapolon ŋuna adau akiikin Aburaam.” 20Tema Ekapolon, “Epol nooi akigworo aŋuna a ŋituŋa a Sodoma ka Gomora, epol daŋ nooi ka elal asecit kec. 21Itemokino ayoŋ otiyaar kwap a ne, oanyu erae kitiyato ikes kaapei lopite ŋolo igworotor, ŋolo adolu neni kaŋ; ani pa kikote nen, ayenuni ayoŋ.”
22Toriwo ŋikilyok ŋiarei alokilyok a ŋul, toloto Sodoma, kidoŋ Aburaam nen ewoi alokiŋaren Ekapolon. 23Kiyotu Aburaam neni ke Ekapolon tema, “Erae mono kire a? Imunyari mono iyoŋ ŋulu iyookino ka ŋulu itiyaete aronis a? 24Ani mono keyakasi ŋituŋa ŋatomonikan ŋulu iyookino lotaun ŋol; imunyari mono iyoŋ akibois daadaŋ, nyisyoni iyoŋ iŋes aŋuna a ŋituŋa a ŋatomonikan a ŋulu iyookino alotooma etaun ŋol a? 25Nyerae nu ŋuna emaikina iyoŋ kitiya; amunyar ŋulu iyookino kaapei ka ŋulu itiyaete aronis, akisican kaapei ŋulu iyookino ka ŋulu itiyaete aronis. Nyerae ŋun ŋuna emaikina iyoŋ kitiya. Nyemaikina mono ekatubon ŋolo ka akwap a daadaŋ itiyae ŋuna iyookino a?” 26Tema Ekapolon, “Ani karyamu ayoŋ alotaun a Sodoma ŋituŋa ŋatomonikan ŋulu iyookino, esyoni ayoŋ akibois ŋin daadaŋ aŋuna kec.” 27Tema nabo Aburaam, “Kisyoni ca Ekapolon ayoŋ aŋuna arubakinitor erworo neni kon, orae bo ayoŋ ituŋanan koŋin. 28Ani bo pa kiyookino ŋikan alotooma ŋituŋa ŋulutomonikan ŋul, imunyari mono iyoŋ etaun daadaŋ aŋuna a ŋulukan a ŋul a?” Tema Ekapolon, “Nyamunyari ayoŋ akibois ŋin erae karyamu ŋatomoniomwon ka ŋikan ŋulu iyookino a nen.” 29Torubak Aburaam isirwori Ekapolon kiŋit tema, “Ani bo kerae ŋatomoniomwon iryamuni iyoŋ iyookino a nen?” Toboŋok Ekapolon tema, “Aŋuna a ŋulutomoniomwon a ŋul, nyamunyari ayoŋ akibois ŋin.” 30Tolimu nabo Aburaam tema, “Okoe, Ekapolon kaŋ, nyiŋo ca! Kimyekinae erwor; ani bo kerae ŋatomoniuni bon iryamuni iyoŋ iyookino a nen?” Toboŋok Ekapolon tema, “Nyamunyari ayoŋ akibois ŋin erae karyamu ŋatomoniuni ŋulu iyookino a nen.” 31Tema Aburaam, “Kisyoni ca Ekapolon ayoŋ aŋuna arubakinitor erworo neni kon. Ani bo kerae ŋatomoniarei bon iryamuni iyoŋ iyookino a nen?” Toboŋok Ekapolon tema, “Aŋuna a ŋulutomoniarei a ŋul, nyamunyari ayoŋ akibois ŋin.” 32Tolimu nai Aburaam tema, “Okoe Ekapolon kaŋ, nyiŋo ca! Kimyekinae olimu apei ca bon; ani bo kerae ŋitomon bon iryamuni iyoŋ iyookino a nen?” Toboŋok Ekapolon tema, “Aŋuna a ŋulutomon a ŋul, nyamunyari ayoŋ akibois ŋin.” 33Ani kedau Ekapolon akirworo ka Aburaam, torotok kimyek Aburaam. Tosodi Aburaam toboŋo tolot nakibois keŋ.
Okuqokiwe okwamanje:
Akisy. 18: NIB2008
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ngakarimojong Interconfessional Bible © Bible Society of Uganda, 2008.